1. Neb kẽer tagsg yaa wãn ne vɩɩmd wakat sẽn kõn sa?

 NEB wʋsg maanda gũusg bũmb nins b sẽn dɩtã wɛɛngẽ, la b wɩsgd b yĩnsã b sẽn dat n kell n tall laafɩ wã yĩnga. Baa ne rẽ, b pa saagd n na n vɩɩmd wakat sẽn kõn sa ye. B tagsdame tɩ yaa bũmb sẽn pa tõe. B pʋd n pa rat rẽ meng ye. Bala kʋʋlmã wata ne bãas la zu-loeese. La a Zeezi sẽn gom “vɩɩm sẽn ka sɛtã” yell to-to wã wilgdame tɩ yaa bõn-sõngo, wa Zã 3:16 la 5:24 sẽn wilgdã.

2. Zã sak a 6 pʋgẽ, bõe la a Zeezi yeel vɩɩm sẽn ka sɛtã wɛɛngẽ? (Zã 6:39, 40)

² Daar a ye, a Zeezi maana yel-solemd tɩ neb paam zĩm ne bur n wãbe. a Rẽ linga nebã. La bũmb ning a sẽn yeel vẽkembeoogã maneg n linga nebã n paase. Kʋʋngã pʋga a Zeezi n kẽng Kapɛrnawum, Galile mogrã noore. Be, a yeel-b lame tɩ neb wʋsg sẽn ki tõe n wa vʋʋgame n vɩɩmd wakat sẽn kõn sa. (Karm-y Zã 6:39, 40.) Tags-y y zo-rãmb la y roagdb nins sẽn maan kaalmã yelle. A Zeezi goamã wilgdame tɩ neb wʋsg sẽn ki na n vʋʋgame la tɩ yãmb ne y roagdbã tõe n paama vɩɩm sẽn ka sɛtã. La a Zeezi sẽn yeel bũmb ning n paas Zã sak a 6 pʋgẽ wã võor wʋmb yɩɩ toog ne neb wʋsgo. Bɩ d gom rẽ yelle.

3. Zã 6:51 wilgdame tɩ bõe la a Zeezi yeel a mengã zugu?

 ³ A Zeezi sẽn maan yel-solemd tɩ nebã paam burã n wãbã poore, b tagsa mannã a Zeova sẽn da kõt b yaab-rãmbã yelle. Sɩd me, Biiblã boonda mannã tɩ rɩɩb bɩ bur “sẽn yi saasẽ.” (Yɩɩn. 105:40; Zã 6:31) A Zeezi tũnuga ne mannã n zãms kʋʋngã bũmb sẽn tar yõod wʋsgo. Baa sẽn da yaa Wẽnnaam n maan yel-solemd tɩ Israyɛll nebã paam mannã, neb nins sẽn dɩ-a wã wa n kiime. (Zã 6:49) La a Zeezi goma a mengã yell n yeel tɩ yẽ n yaa “bur meng-mengã sẽn yit saasẽ,” “Wẽnnaam burã,” la “bur ning sẽn kõt vɩɩmã.” (Zã 6:32, 33, 35) A wilga welgr ning sẽn be yẽ ne mannã sʋka. A yeelame yaa: “Mam yaa bur ning sẽn kõt vɩɩmã sẽn yi saasẽ n sigã. Ned sã n wãb bur-kãnga, a na n vɩɩmda wakat fãa.” (Karm-y Zã 6:51.) Nin-kãens sẽn yaa Zʋɩf-rãmbã ra pa wʋmd a gomdã võor ye. A Zeezi na n yɩɩ wãn n yeel tɩ yẽ yaa “bur” sẽn yit saasẽ, n yɩɩd mannã Wẽnnaam sẽn maan yel-solemd tɩ b yaab-rãmbã paamã? A Zeezi togsa bũmb sẽn tõe n sõng-b tɩ b wʋm a võor n yeel yaa: “Bur ning mam sẽn na n kõ dũniyã vɩɩm yĩngã yaa mam yĩn-nemsã.” A Zeezi gomdã võor yaa bõe? Tara yõod tɩ d bao n bãng rẽ võore, bala wilgda bũmb ning tõnd ne d roagdbã sẽn tõe n maan n paam vɩɩm sẽn ka sɛtã. Bɩ d bao n bãng a Zeezi gomdã sẽn dat n yɛɛlga.

BUR NING SẼN KÕT VƖƖMÃ, LA A YĨN-NEMSÃ

4. Bõe yĩng t’a Zeezi sẽn yeel bũmb ningã sãam neb kẽer sũyã?

⁴ A Zeezi sẽn wa n yeel tɩ ‘bur ning a sẽn na n kõ dũniyã vɩɩm yĩngã yaa a yĩn-nemsã,’ sãama a kɛlgdbã kẽer sũyã. Tõe tɩ b tagsame tɩ yaa a yĩn-nemsã meng-meng la a rat n kõ-b tɩ b wãbe. (Zã 6:52) A Zeezi togs-b-la bũmb sẽn maneg n ling-ba. A yeelame: “Yãmb sã n pa wãb Ninsaal biigã yĩn-nemsã la y yũ a zɩɩmã, y pa tar vɩɩm ye.”—Zã 6:53.

5. Bõe n kɩt tɩ d miẽ t’a Zeezi gomdã ra pa rat n yeel t’a kɛlgdbã segd n yũu a zɩɩmã meng-menga?

⁵ Hal a Nowe wakatẽ wã, Wẽnnaam yeelame tɩ ninsaal pa segd n dɩ zɩɩm ye. (Sɩng. 9:3, 4) A Zeova sẽn wa n na n kõ Israyɛll nebã Tõogã, a le goma no-kãng yelle. Ned sã n da rɩ zɩɩm, b ra segd n ‘kʋʋ-a lame.’ (Maan. 7:27, notã) A Zeezi ra nanda Tõogã. (Mat. 5:17-19) Rẽnd a ra pa na n saag n yeel neb sẽn yaa Zʋɩf-rãmb tɩ b wãb a yĩn-nemsã meng-menga, wall tɩ b yũ a zɩɩmã sẽn zoet a yĩngẽ wã ye. La sɩd-sɩda, a Zeezi sẽn yeel woto wã yaa sẽn na n wilg a kɛlgdbã b sẽn tõe n maan to-to n paam vɩɩm, rat n yeel tɩ “vɩɩm sẽn ka sɛtã.”—Zã 6:54.

6. Bõe n kɩt tɩ d miẽ t’a Zeezi ra pa gomd a yĩn-nemsã ne a zɩɩmã meng-meng yelle?

⁶ A Zeezi gomdã võor yaa bõe? Yaa vẽeneg t’a ra pa gomd a zɩɩmã meng-meng yell ye. Yaa wa a sẽn da gom ne Samari pagã n yeelã: “Ko-yũud pa na n tol n le yõk ned ning sẽn yũud koom ning mam sẽn na n kõ-a wã ye. Koom ning mam sẽn na n kõ-a wã na n lebga ko-bundg n bund yẽ pʋgẽ wã n kõt vɩɩm sẽn ka sɛta.” (Zã 4:7, 14) b A Zeezi gomdã ra pa rat n yeel tɩ koom sɩd-sɩd n be tɩ Samari pagã sã n yũ rẽ bal bɩ a na n paam vɩɩm sẽn ka sɛtã ye. Woto me, a ra  pa yet tɩ neb nins a sẽn da gomd ne Kapɛrnawummã na n vɩɩmda wakat sẽn kõn sa, b sã n wãb a yĩn-nemsã la b yũ a zɩɩmã meng-meng ye.

A ZEEZI TOGSA GOAM SẼN WÕND WOTO

7. Bõe la neb kẽer yet a Zeezi sẽn yeel bũmb ning Zã 6:53 wɛɛngẽ?

⁷ Tũudum kẽer neb n yet t’a Zeezi sẽn yeel Zã 6:53 tɩ b wãb a yĩn-nemsã la b yũ a zɩɩmã wilgda bũmb b sẽn segd n maan Zu-soabã zaabr dɩɩbã sasa, bala wakat kãngã a togsa goam sẽn wõnd woto. (Mat. 26:26-28) B yetame tɩ neb nins fãa sẽn wat a Zeezi kũumã tẽegr segd n wãba burã la b yũ divẽ wã b sẽn pɩʋʋgd ne b taoorã. Yaa woto bɩ? Tara yõod tɩ d bao n bãng a Zeezi gomdã sẽn dat n yɛɛlga, bala yʋʋmd fãa dũniyã gil zugu, neb milyõ-rãmb n naagd tõnd n maand a Zeezi kũumã tẽegre. D na n yãame tɩ welgr n be bũmb ning a Zeezi sẽn yeel Zã 6:53 ne a sẽn yeel bũmb ning Zu-soabã zaabr dɩɩbã wɛɛngẽ wã.

8. Bõe n kɩt tɩ wakat ning a Zeezi sẽn togs goam a yiibã yaa toor-roore? (Ges-y fot-rãmbã me.)

⁸ Bɩ d gom bũmb a yiib sẽn kɩt t’a sẽn yeel bũmb ninsã yaa toor-toorã yelle. Pipi, yaa wakat-bʋg la a Zeezi togs goam nins sẽn be Zã 6:53-56 pʋgẽ, la yɩɩ yɛ? Yɩɩ yʋʋmd 32 soabã la a togs kʋʋng sẽn da yaa Zʋɩf-rãmb gom-kãensã Galile  soolmẽ wã. Yɩɩ na maan yʋʋmd poor la a lugl Zu-soabã zaabr dɩɩbã Zerizalɛm. Yiib-n-soaba, yaa ãnd dãmb la a taas gom-kãensã? Bũmb ning sẽn da pak neb nins sẽn da kelgd a Zeezi Galile wã fãa la bal ra yaa noorã rɩɩbo, pa bao n bãng a Zeova n paas ye. (Zã 6:26) Sɩd me, a Zeezi sẽn wa n yeel bũmb t’a võorã wʋmb yaa toogã, zĩig pʋgẽ b basame n pa le tẽed-a ye. A karen-biis kẽer meng basa a pʋgbo. (Zã 6:14, 36, 42, 60, 64, 66) Yɛlã yɩɩ toor a Zeezi sẽn wa n na n lugl Zu-soabã zaabr dɩɩbã yʋʋmd 33 soabã, rat n yeel tɩ na maan yʋʋmd poorã. Wakat kãnga, a tẽn-tʋmdb 11 wã sẽn kell n maan sɩd ne-a wã ra bee ne-a, baa ne b sẽn da pa wʋmd bũmb nins a sẽn zãmsd-bã fãa võor sõma wã. La b ra yaa toor fasɩ ne neb nins sẽn da kelgd a Zeezi Galile wã fãa la bala. B ra kɩsa sɩd t’a Zeezi n yaa Wẽnnaam Biigã, soab ning sẽn yi saasẽ n sigã. (Mat. 16:16) A Zeezi pẽg-b lame n yeel yaa: “Yãmb yaa neb nins sẽn pa ne maam m namsgã wakatã.” (Luk 22:28) Bõn-kãensã a yiibã bal seka d na bãng tɩ neb nins sẽn yet t’a Zeezi goam nins sẽn be Zã 6:53 wilgda bũmb sẽn segd n maan Zu-soabã zaabr dɩɩbã sasa wã tudgame. La bũmb a taab me n be n wilgd rẽ.

A ZEEZI GOAMÃ TARA YÕOD NE YÃMBA

9. A Zeezi sẽn yeel bũmb ning Zu-soabã zaabr dɩɩbã sasa wã yaa sul-bʋg neb yĩnga?

⁹ A Zeezi sẽn wa n na n lugl Zu-soabã zaabr dɩɩbã, a kõo a tẽn-tʋmdbã bur sẽn pa ning rabɩll n yeel tɩ makda a yĩngã. Rẽ poore a kõ-b-la divẽ wã, n yeel tɩ makda “kaoolã zɩɩm.” (Mark 14:22-25; Luk 22:20; 1 Kor. 11:24) Gom-kãng tara yõod wʋsgo. B maana kaool-paalgã ne “Israyɛll sẽn yaa Wẽnnaam dẽndã,” rat yeel tɩ neb nins sẽn na n “zĩnd Wẽnnaam Rĩungã pʋgẽ” wã, pa ne ninsaalbã fãa ye. (Ebre. 8:6, 10; 9:15) Ra pa na n kaoos la tẽn-tʋmdbã paam tɩ b zae-b ne vʋʋsem sõngã tɩ b kẽ kaool-paalgã pʋgẽ n tõe n wa paam n tɩ naag a Zeezi saasẽ, baa ne b sẽn da pa mi rẽ wakat kãngã.—Zã 14:2, 3.

10. Bõe me n kɩt t’a Zeezi sẽn yeel Galile wã yaa toor ne a sẽn yeel bũmb ning Zu-soabã zaabr dɩɩbã sasa wã? (Ges-y fotã me.)

¹⁰ Zu-soabã zaabr dɩɩbã sasa a Zeezi ra gomda ne “bãg-bilã.” Sul-kãng sɩnga ne a tẽn-tʋmb nins sẽn kell n maan sɩd ne-a wã sẽn da be ne-a roogẽ wã. (Luk 12:32) Yɩɩ bãmb la a Zeezi yeel tɩ b wãb burã la b yũ divẽ wã. Rẽ poore, ned ning fãa sẽn na n wa naag bãmb segd n wãba burã la a yũ divẽ wã Zu-soabã zaabr dɩɩbã sasa. Bãmb n na n wa paam n tɩ naag a Zeezi saasẽ. A sẽn yeel a tẽn-tʋmdbã bũmb ningã yaa toor fasɩ ne a sẽn yeel kʋʋngã bũmb ning Galile wã. Be, a ra gomda neb sõor sẽn yaa wʋsg yelle.

11. A Zeezi sẽn wa n be Galile wã, bõe la a yeel tɩ wilgdẽ tɩ pa nebã fãa yell la a ra gomda?

¹¹ A Zeezi sẽn wa n be Galile yʋʋmd 32 soabã, yaa ne Zʋɩf-rãmb nins sẽn da rat burã la a gom ne n tɩ yɩɩda. La a wilg-b-la bũmb sẽn tar yõod wʋsg n yɩɩd rɩɩbo. A wilg-b-la bũmb b sẽn tõe n maan n wa paam vɩɩm sẽn ka sɛtã. Sẽn paase, a Zeezi yeelame tɩ neb nins sẽn ki wã tõe n wa vʋʋga yaoolem daarã n vɩɩmd wakat sẽn kõn sa. A ra pa gomd neb sõor sẽn yaa bilf yell wa sẽn yɩ to-to Zu-soabã zaabr dɩɩbã sasa wã ye. Galile wã, a ra gomda bark nebã fãa sẽn tõe n paam yelle. Sɩd me, a yeelame yaa: “Ned  sã n wãb bur-kãnga, a na n vɩɩmda wakat fãa. . . . Bur ning mam sẽn na n kõ dũniyã vɩɩm yĩngã yaa mam yĩn-nemsã.”—Zã 6:51. c

12. D sã n dat n paam bark nins yell a Zeezi sẽn gomã, bõe la d segd n maane?

¹² A Zeezi pa yeel Zʋɩf-rãmb nins sẽn da be Galile wã tɩ yaa neb nins fãa sẽn vɩɩmd tẽngã zugã bɩ sẽn nan na n dogã n na n paam bark-kãng ye. Yaa neb nins sẽn na n ‘wãb bur-kãngã’ bala, rat n yeel tɩ neb nins sẽn na n tẽ a Zeezi wã. Neb wʋsg sẽn yet tɩ b yaa kiris-neb tagsdame tɩ f sã n tẽed a Zeezi, n boond-a tɩ f Fãagd bala sekame. (Zã 6:29) La kʋʋngã sʋka, neb wʋsg sẽn da tẽed a Zeezi wa n basa a tũubu. Bõe yĩnga?

13. Yɩ a Zeezi karen-biig hakɩɩk baooda bõe maanego?

¹³ Kʋʋngã a Zeezi sẽn dɩlgã fãa la bal ra pʋgd-a-la ne sũ-noogo, a sẽn da kõt-b b sẽn datã yĩnga. B sẽn da rat bal yaa a maand yel-soalem n sãoogd b bãasã, n kõt-b rɩɩbo, la a zãmsd-b bũmb sẽn zems b sẽn tẽedã. La a Zeezi yeelame t’a karen-biis hakɩɩkã segd n maana bũmb sẽn yɩɩd rẽ. A pa wa tẽngã zug n na n sãoog ninsaalbã bãas la a kõ-b rɩɩb bal ye. B ra segd n saka a Zeezi sẽn boond-b tɩ b wa a nengẽ, n tẽ bũmb nins fãa a sẽn zãms-bã la b tũ wã.—Zã 5:40; 6:44.

14. Bõe la d segd n maan t’a Zeezi yĩn-nemsã la a zɩɩmã naf-do?

¹⁴ A Zeezi yeela kʋʋngã tɩ yaa tɩlɛ tɩ b  tall tẽebo. Bõe la b segd n tẽ? B segd n tẽeme t’a yĩn-nemsã la a zɩɩmã a sẽn na n wa kõ tɩ yɩ maoongã yaa b fãagr yĩnga. Tẽeb a woto ra yaa tɩlɛ ne Zʋɩf-kãense, n ket n yaa tɩlɛ ne tõnd rũndã-rũndã. (Zã 6:40) D sã n dat n dɩ a Zeezi yĩn-nemsã la a zɩɩmã yell a sẽn gom Zã 6:53 yõodo, d segd n tẽe a sẽn ki tɩ yɩ maoongã. Yaa neb sõor sẽn pa yãk n tõe n paam bark-kãnga.—Efɛɛ. 1:7.

15-16. Zã sak a 6 segd n kɩtame tɩ d tagsd bark-bʋs yelle?

¹⁵ Zã sak a 6 sẽn gomd bũmb nins yellã tara yõod ne tõnd la d roagdbã. B wilgda vẽeneg tɩ nebã yell paka a Zeezi wʋsgo. A sẽn wa n be Galile wã, a sãooga bãad-rãmba, n zãms nebã bũmb wʋsg Wẽnnaam Rĩungã zugu, la a kõ-b rɩɩb tɩ b rɩ. (Luk 9:11; Zã 6:2, 11, 12) La sẽn tar yõod n yɩɩda, a wilgame tɩ yẽ n yaa “bur ning sẽn kõt vɩɩmã.”—Zã 6:35, 48.

¹⁶ Zu-soabã zaabr dɩɩbã d sẽn maand yʋʋmd fãa wã sasa, neb nins a Zeezi sẽn boond t’a “piis a taabã” pa wãbd burã la b yũud divẽ wã ye. B pʋd n pa segd n maan woto ye. (Zã 10:16) Baasgo, b rɩta a Zeezi Kirist yĩn-nemsã la a zɩɩmã yõodo. B maanda rẽ, b sẽn tẽed t’a Zeezi sẽn ki tɩ yɩ maoongã tõe n fãag-b lame wã. (Zã 6:53) La neb nins sẽn wãbd burã la b yũud divẽ wã Zu-soabã zaabr dɩɩbã sasa wã wilgdame tɩ b naaga kaool-paalgã pʋgẽ, n tõe n wa tɩ naag a Zeezi saasẽ a Rĩungã pʋgẽ. Woto wã, d paama vʋʋsem sõngã zaeeb tɩ d naaga piis a taabã me, Zã sak a 6 sẽn gomd bũmb nins yellã tara yõod wʋsg ne-do. B wilgdame tɩ yaa tɩlɛ tɩ d tall tẽebo, n tõog n wa paam vɩɩm sẽn ka sɛtã.