Tẽn-tʋmd a Poll gʋlsa lɛtr n tool a Tɩmote sẽn da yaa a kãsem-soab-taagã n yeel yaa: “Mam yeta foom Wẽnnaam taoore, Kirist Zeezi taoor la malɛg-tũusdsã taoor tɩ f tũ no-kãensã la f ra tũus neba, wall f bak ned n sõng ye.”—1 Tɩm. 5:21.

Pipi d tõe n yeelame tɩ malɛg-kãens pa neb tus-koabg la tus pis-naas la a naasã ye. A Poll sẽn wa n na n gʋls a lɛtrã n tool a Tɩmote wã tɩ kiris-nin-kãens sẽn paam vʋʋsem sõng zaeebã vʋʋgrã nan pa sɩng ye. Rẽ tɩ tẽn-tʋmdbã ne sẽn paam-b vʋʋsem sõng zaeeb wa bãmbã nan pa kẽng saasẽ n tɩ lebg malɛgs ye. Rẽnd pa tõe n yɩ bãmb la b sẽn bool tɩ “malɛg-tũusdsã” ye.—1 Kor. 15:50-54; 1 Tes. 4:13-17; 1 Zã 3:2.

D leb n tõe n yeelame tɩ “malɛg-tũusdsã” pa malɛgs nins sẽn kɩɩs Wẽnnaam a Nowe wakatẽ wã ye. Malɛg-kãens pʋga a Sʋɩtãan n lebg zĩn-dãmb la a Zeezi bɛɛba. (Sɩng. 6:2; Luk 8:30, 31; 2 Pɩy. 2:4) Ka la bilfu, b na n pag-b-la bog-zulung pʋgẽ yʋʋm tusr yĩnga, tɩ rẽ poor tɩ b naag-b ne a Sʋɩtãan n sãame.—Ziid 6; Vẽn. 20:1-3, 10.

“Malɛg-tũusds” nins yell a Poll sẽn gomã segd n yaa malɛgs nins sẽn be saasẽ n tʋmd ‘Wẽnnaam la Kirist Zeezi’ yĩngã.

Malɛgs nins sẽn sakd a Zeova wã yaa tus ka tɛka. (Ebre. 12:22, 23) Wõnda a Zeova kõta malɛgsã tʋʋm toor-toore. (Vẽn. 14:17, 18) Wala makre, a Zeova zoe n yeela malɛk a ye t’a kʋ Asiiri tãb-biis tus-koabg la pis-nii la a nu. (2 Rĩm. 19:35) Tõe tɩ b yãka malɛgs tɩ b tʋʋmd yaa “yiis bũmb nins fãa sẽn tõe n kɩt tɩ ned lak n lʋɩ wã, ne tʋʋm-wẽns-maandbã [a Zeezi] Rĩungã pʋgẽ.” (Mat. 13:39-41) Tõe tɩ b taab n na n “tigim a nin-tũusdsã” n tall-b n kẽng saasẽ. (Mat. 24:31) Sãnda me la b yeel tɩ b ‘gũ tõnd d soayã fãa zutu.’—Yɩɩn. 91:11; Mat. 18:10; ges-y Matiye 4:11; Luk 22:43.

Wõnda “malɛg-tũusds” nins yell b sẽn gom 1 Tɩmote 5:21 wã yaa malɛgs b sẽn yeel tɩ b sõng n ges Wẽnnaam nin-buiidã yelle. A Poll sẽn wa n na n gom “malɛg-tũusdsã” yellã, a kõo sagls kãsem-dãmbã sẽn segd ne waoogr tigingã pʋgẽ wã wɛɛngẽ me. A yeelame tɩ kãsem-dãmbã segd n tʋma b tʋʋmã sõma n da ‘tũus neba, wall b bak ned n sõng ye.’ B sã n na n yãk yam wall b kao bʋʋdo, b pa segd n maan dẽ n pa yaas n tags tɩ bɩ ye. Bũmb ning sẽn kɩt tɩ b segd n tũ a Poll saglgã yaa tɩ b tʋmda “Wẽnnaam taoore, Kirist Zeezi taoor la malɛg-tũusdsã taoore.” Rẽnd yaa vẽeneg tɩ malɛgs kẽer la b yãk tɩ b sõngd tigingã. Wala makre, b kogenda Wẽnnaam nin-buiidã, n sõngd-b koɛɛgã mooneg pʋgẽ la b kẽnd n togsd a Zeova bũmb nins sẽn maand tigingã pʋgẽ wã.—Mat. 18:10; Vẽn. 14:6.