Yãmb karma Gũusg Gasg nins b sẽn yiis rõandã wã sõma bɩ? Bɩ y ges y sã n tõe n leoka sogsg nins sẽn pʋgdã:

Mak-sõng-bʋg la a Zeova kõ, d manesem sẽn segd n yɩ to-to ne pagbã wɛɛngẽ?

A pa get tɩ pagbã pa ta rapã ye. A kelgd-b lame, n pa maand a toog kae ne b tagsgo, wall bũmb ning sẽn pak-bã ye. A kɩs-b-la sɩda, n kõt-b tʋʋma.—w24.01, s.n. 15-16.

Wãn to la d tõe n tũ Efɛɛz rãmb 5:7 wã sẽn yeel tɩ d “ra maan wa bãmbã”?

Tẽn-tʋmd a Poll sagenda tõnd tɩ d ra maan tũud-n-taar ne neb sẽn na n kɩt tɩ yɩ toog ne-d tɩ d tũ Wẽnnaam noyã ye. Tũud-n-ta-wẽnsã tõe n yɩɩ neb nins d sẽn wae n be ne wã, la neb nins d sẽn tũnugd ne rezo sosiyo-rãmbã n sõsd ne wã.—w24.03, s.n. 22-23.

D segd n gũusa d mens ne kiba-bʋs buud sẽn yaa ziri?

D segd n gũusa d meng ne kibay d zo-rãmb sẽn tool-d n pa reng n bao n bãng sã n yaa sɩda, imell-dãmb neb d sẽn pa mi sõma sẽn tool-do, la sɩdã kɩɩsdb sẽn maand wa b rata koɛɛgã n kelg goama.—w24.04, s.n. 12.

Bõe la d mi a Zeova sẽn na n kao rĩm a Salomo bʋʋdo, la neb nins sẽn ki Sodom ne Gomoor sãoongã sasa n paas sa-kãsengã sasa wã bʋʋd to-to wã wɛɛngẽ, la bõe la d pa mi?

D pa mi a Zeova sã n sãama nin-kãens wakat fãa yĩng ye. La d miime t’a mii bũmb fãa, la t’a nimbãan-zoeerã yaa kãsenga.—w24.05, s.n. a 3-4.

B sẽn yeel tɩ Wẽnnaam “yaa Pĩig kugrã” kɩtame tɩ d tõe n bas d yam ne bõe? (Tõo. 32:4)

D tõe n baoo soondg zĩig a Zeova nengẽ. D tõe n teeg-a lame, a sẽn pidsd a pʋlemsã wakat fãa wã yĩnga. Sẽn paase a pa toeemd ye. A sẽn yaa Wẽnnaam ning buudã ne a raabã pa toeemd ye.—w24.06, s.n. 26-28.

Y sã n toeem tiginga, bõe n tõe n sõng-yã?

Teeg-y-yã a Zeova. A na n sõng-y-la wa a sẽn zoe n sõng neb a taab sẽn tũud-a wã. Ra rɩk-y y pĩnd tigingã yɛl n mak ne tigin-paallã rẽnd ye. Naagd-y tigingã neb n maand bũmb wʋsgo, la y yõg zood ne y tigin-paallã neba.—w24.07, s.n. 26-28.

Yel-bũn a tãab nins sẽn be Matiye sak 25 wã wilgda tõnd bõe ne bõe?

Piisã la bʋʋsã yel-bũndã wilgdame tɩ d segd n yɩɩ neb sẽn maand sɩda. Pʋg-sadb sẽn tar yam la pʋg-sadb sẽn yaa yalembã yel-bũndã wilgdame tɩ d segd n segla d meng sõma la d yɩ gũusda. La talã-rãmbã yel-bũndã wilgdame tɩ tara yõod tɩ d tʋm ne yẽesem.—w24.09, s.n. 20-24.

A Salomo wẽnd-doogã zãongã woglem ra yaa wãn to?

Seb-kʋd kẽer b sẽn gʋls ne nus pʋsẽ, 2 Kibay 3:4 yetame tɩ “kãntɩɩg koabg la pisi,” rat n yeel tɩ metr pis-nu la a tãabo. La seb-kʋd a taab nebã sẽn kɩs sɩd ne pʋsẽ, b ningame tɩ “kãntɩɩg pisi,” rat n yeel tɩ metr a wɛ. D sã n ges wẽnd-doogã lalsã taglem sẽn da yaa to-to wã, d tõe n yeelame tɩ sẽn yeel-b tɩ “kãn-tɩɩg pisi” wã n be bʋʋm.—w24.10, s.n. 31.

B sẽn yeel tɩ kãsem-sõngd segd n yɩɩ “pʋg-yɛng sɩdã” rat n yeelame tɩ bõe? (1 Tɩm. 3:12)

Rat n yeelame t’a segd n kẽe kãadem ne pag a ye, la t’a pa segd n yo a bada. La pa rẽ bal ye. A pa segd n bas t’a yamã kẽ pag a to ye.—w24.11, s.n. 19.

Bõe yĩng tɩ d tõe n yeel tɩ Zã 6:53 pa wilgd bũmb b sẽn segd n maan Zu-soabã zaabr dɩɩbã sasa?

Zã 6:53 yeelame tɩ yaa tɩlɛ tɩ d wãb a Zeezi yĩn-nemsã la d yũ a zɩɩmã. Yɩɩ yʋʋmd 32 soabã la a Zeezi togs gom-kãensã Galile soolmẽ wã. Rẽ t’a ra gomda ne Zʋɩf-rãmb sẽn pa tẽed-a. La yɩɩ na maan yʋʋmd poor la a lugl Zu-soabã zaabr dɩɩbã Zerizalɛm. Be, a ra gomda ne neb sẽn na n wa naag-a n dɩ naam saasẽ.—w24.12, s.n. 10-11.