1-2. Zu-loe-bʋs la sẽn tũud-b a Zeova wã tõe n sege?

 ZU-LOEES kẽer tõe n tiig n toeema d vɩɩmã fasɩ! Wala makre, logtoɛɛmbã wa n yeela saam-biig a ye yʋʋr sẽn boond t’a Luwɩ a t’a bẽeda kãnsɛɛr sẽn pa wae. B yeel-a lame t’a na n kii ka la kiuug a wãn bala. A Monika ne a sɩdã ra naaga taab n tʋmd a Zeova tʋʋmã wʋsgo. La daar a yembre, a Monika bãngame t’a sɩdã sẽn yaa kãsem-soab me wã soosd n tʋmda tʋʋm-beed na maan yʋʋm wʋsgo. Yɩɩ tɩlɛ t’a Oliviya sẽn yaa saam-bi-poak sẽn nan pa kẽ kãadmã zoe n bas a zaka, sob-kẽeng sẽn da wat yĩnga. A sẽn wa n lebg n wa wã, a mikame tɩ sob-kãsengã sãama a roogã zãnga. Zĩig pʋgẽ, a Luwɩ ne a Oliviya la a Monika vɩɩmã toeema fasɩ. Yel-beed a woto buud zoe n paama yãmba, n tiig n toeem y vɩɩmã bɩ?

² Baa ne d sẽn tũud a Zeova ne d sũur fãa wã, d segda zu-loees la d lʋɩt bãas wa neb a taabã. Sẽn paase, neb sẽn kis Wẽnnaam nin-buiidã tõe n namsda tõndo, la b weoogd tõndo. La baa a Zeova sẽn pa kogend tõnd sẽn na yɩl tɩ zu-loees a woto buud ra paam-dã, a pʋlmame t’a na n sõnga tõndo. (Eza. 41:10) Ne a Zeova sõngre d tõe n kell n talla sũ-noogo, n yãkd yam sẽn yaa sõma, la d kell n maan sɩd ne-a baa zu-loe-kɛgems pʋsẽ. Sõs-kãngã pʋgẽ, d na n yãa bũmb a naas a Zeova sẽn maand n sõngd tõnd zu-loe-kɛgems sasa. D leb n na n yãa d sẽn segd n maan n paam t’a sõng-do.

 A ZEOVA NA N KOGLA YÃMBA

3. Zu-loe-kɛgeng sã n wa paam-do, bõe maaneg n tõe n yɩ toog ne-do?

³ Bũmb ning sẽn yaa toog ne-dã. D sã n wa maood ne zu-loe-kɛgenga tõe n yɩɩ toog tɩ d tags neere, n bãng n yãk yam sẽn yaa sõma. Bõe yĩnga? Bala d sũurã tõe n sãama wʋsgo, tɩ d maand yɩɩre. Tõe n yaa wa d kẽnda lik pʋgẽ, n pa mi d sẽn teesdẽ ye. Ges-y saam-bi-pogs a yiib nins yell d sẽn zoe n gomã tagsg sẽn yɩ to-to b zu-loeesã wakate. A Oliviya yeelame: “Sob-kãsengã sẽn sãam m doogã poore, sũ-sãangã loog-m lame hal tɩ m pa mi m sẽn maandg ye.” A Monika goma a sɩdã sẽn zãmb-a wã yell n yeel yaa: “M sũurã pa sãam bal ye. A sẽn maanã ra zabda maam hal tɩ m pa tõe n bãng n bilg ye. Ra lebga toog tɩ m maan bũmb nins m sẽn da minim n maand daar fãa wã. M da zɩ n tags tɩ yel-kãngã tõe n paama maam ye.” Bõe la a Zeova pʋlem t’a na n maan n sõng-d lame, zu-loeesã sã n wa kɩt tɩ d pa mi d sẽn maandga?

4. Sã n yaa ne Filip rãmb 4:6, 7 wã, bõe la a Zeova pʋlem tõndo?

⁴ A Zeova sẽn na n sõng-d to-to. A pʋlmame t’a na n kõo tõnd bũmb ning Biiblã sẽn boond tɩ “Wẽnnaam laafɩ wã.” (Karm-y Filip rãmb 4:6, 7.) Laafɩ-kãng yaa yam-gãneg la sũur pʋgẽ bãane, neb nins sẽn tar zood sõma ne a Zeova wã bal sẽn tare. Laafɩ-kãng “yɩɩda bũmb nins fãa ninsaalbã sẽn tõe n wʋm a võorã,” rat n yeel t’a yɩɩda bũmb nins fãa d sẽn tõe n mamsã. Yãmb zoe n pelga y pʋg n pʋʋs a Zeova, tɩ rẽ poor tɩ y yamã gãand bãan hal tɩ ling-y bɩ? Yaa rẽ la b sẽn boond tɩ “Wẽnnaam laafɩ wã.”

5. Wãn to la Wẽnnaam laafɩ wã gũud d sũyã la d tagsa wã?

⁵ Filip rãmb 4:7 wã yeelame me tɩ Wẽnnaam laafɩ wã “na n gũu yãmb sũyã la y tagsa wã,” bɩ n kogl-ba. Gɛrkã gom-bil ning b sẽn lebg tɩ “gũ wã” bilgda sodaas sẽn gũud tẽnga, sẽn na yɩl tɩ b ra wa zab ne-a ye. Sodaas sã n gũud tẽnga, tẽngã nebã gõee bãane, b sẽn mi tɩ sodaas n be rignoyẽ wã yĩnga. Woto me, Wẽnnaam laafɩ wã sã n gũud tõnd sũyã la d tagsa wã d yam gãee bãane, d sẽn mi tɩ bũmb pa na n paam-dã yĩnga. (Yɩɩn. 4:8) Baa d yɛlã sã n pa maneg zĩig pʋgẽ, d yamã tõe n gãanda bãan wa sẽn yɩ to-to ne a Annã. (1 Sãm. 1:16-18) D yam sã n gãe bãane wae n yaa nana tɩ d tags neere, n bãng n yãk yam.

6. Bõe la y tõe n maan n paam Wẽnnaam laafɩ wã? (Ges-y fotã me.)

⁶ Tõnd sẽn segd n maane. Tẽng neb vɩɩm sã n wa be yell pʋgẽ b boonda tẽngã gũudbã. Woto me y sã n wa maand yɩɩre,  bɩ y bool a Zeova. Wãn to? Pʋʋs-y hal n wa paam Wẽnnaam laafɩ wã. (Luk 11:9; 1 Tes. 5:17) A Luwɩ sẽn yaa saam-biig ning yell d sẽn zoe n gomã wilga yẽ ne a pag a Ana manesem sẽn yɩ to-to, b sẽn wa n wʋm t’a na n kii ka la kiuug a wãnã. A yeelame: “Yell a woto taoore, yɩl n bãng n yãk yam laafɩ wã wɛɛngẽ la bũmb a taab wɛɛngẽ yaa toog wʋsgo. La wakat kãngã sẽn pa nana wã pʋgẽ, pʋʋsgã sõngame tɩ d yamã gãand bãane.” A Luwɩ ne a pagã pelga b pʋs n pʋʋs a Zeova naoor wʋsg n kos-a t’a kɩt tɩ b yamã gãand bãane, la t’a kõ-b sũur pʋgẽ bãan la yam, tɩ b bãngd n yãkd yam. B ra neeme t’a Zeova sõngd-b lame. Y sã n maooda ne zu-loɛɛg bɩ y wɩng ne pʋʋsgo, tɩ y na n yãa a Zeova laafɩ wã sẽn na n gũ y sũurã la y yamã to-to.—Rom. 12:12.

A ZEOVA NA N SÕNG-Y LAME TƖ Y RA MAAN YƖƖR TƖ LOOG YE

7. D sã n wa tar zu-loe-kɛgenga, d tagsg tõe n yɩɩ wãna?

⁷ Bũmb ning sẽn yaa toog ne-dã. D sã n wa maood ne zu-loe-kɛgenga, d sẽn get yɛlã to-to wã, d tagsa wã la d manesmã tõeeme n pa yɩ wa raasenkamã ye. Zu-loɛɛgã tõe n tar-d lame n lengdẽ, wa sobg sẽn lengd koom-koglgo. A Ana sẽn yaa saam-bi-poak ning yell d sẽn gomã yeelame t’a sɩd a Luwɩ kũumã poore, a ra pa mi a sẽn ningd a meng zĩig ning ye. Ad a sẽn yeelã: “Wakat ninga m yamã ka m menga, tɩ m sũurã sãamd wʋsgo. M sã n mi n tags a kũumã yelle, m sũurã yikdame.” Sẽn paase, a Ana sã n wa segd n yãk yam bũmb a Luwɩ sẽn da maand sõma wɛɛngẽ, a sũur yikdame, t’a tagsdẽ t’a pa le tar sõangd ye. A ra mi n getame t’a yaa wa koom-koglg sobg sẽn lengde. Woto wã, zu-loɛɛg sã n wa kɩt tɩ d pa mi d sẽn maandga, wãn to la a Zeova sõngd tõndo?

8. Sã n yaa ne Yɩɩn-sõamyã 16:8, bõe la a Zeova pʋlem tõndo?

⁸ A Zeova sẽn na n sõng-d to-to. A pʋlmame t’a na n sõng-d lame tɩ d ra maan yɩɩr tɩ loog ye. (Karm-y Yɩɩn-sõamyã 16:8.) Sob-kãseng sã n yik mogrã zugu, tõe n kɩtame tɩ koom-koglg lengd goabg la rɩtgo, tɩ tõe n wa ne yelle. Sã n wa yaa woto, koom-kogend wʋsg tara bũmb b sẽn tõe n yiis koglgã goabg la rɩtgo. Bõn-kãens sõngdame tɩ koom-koglgã ra leng wʋsg ye. Woto, neb nins sẽn be koom-koglgã pʋgẽ wã paamda koglgo, tɩ so-toakã ra nams-b wʋsg me ye. La yaa koglgã sã n ket n kẽnd la bõn-kãens tar yõod n yɩɩda. Woto me, yaa d sã n ket n tũud a Zeova ne d sũur fãa zu-loees wakat la a na n sõng-d tɩ d ra maan yɩɩr tɩ loog ye.

9. Wãn to la d vaeesgã tʋʋm-teedã tõe n sõng-d tɩ d ra maan yɩɩr tɩ looge? (Ges-y fotã me.)

⁹ Tõnd sẽn segd n maane. Zu-loɛɛg sã n  wa kɩt tɩ y pa mi y sẽn maandga, bɩ y modg n ket n maand bũmb nins sẽn paasd y tẽebã pãngã. Yaa sɩd tɩ tõe tɩ y pa na n tõog n maand bũmb wʋsg wa pĩndã, la tẽeg-y t’a Zeova yaa wʋmda. (Ges-y Luk 21:1-4.) Sẽn paase, yãk-y wakat n zãmsd Biiblã la y bʋgsdẽ, tɩ paasd y tẽebã pãnga. Bõe yĩnga? Bala a Zeova tũnugda ne a siglgã n yiisd bũmb toor-toor sẽn tik Biiblã zug sẽn tõe n sõng-d zu-loees wakate, tɩ d ra maan yɩɩr tɩ loog ye. Sẽn na yɩl n paam bũmb nins sẽn tõe n sõng-yã, y tõe n tʋma ne tʋʋm-teed nins sẽn be yãmb buud-gomdã pʋgẽ wã. Wala makre JW Library^® la Index des publications des Témoins de Jéhovah, ne Vaeesg sebre, a Zeova Kaset rãmbã yĩnga. A Monika sẽn yaa saam-bi-poak ning yell d sẽn zoe n gomã yeelame t’a sũ-sãangã sã n wa paamd pãnga, a maanda vaeesg n bao saglse. Wala makre, a gʋlsa gom-bil ning sẽn yaa “sũ-yikrã,” n maan vaeesgo. Wakat kẽere, a gʋlsda “zãmbo” wall “maan-sɩda,” n maan vaeesgo. Rẽ poore a karemda bũmb nins a sẽn vaees n yã wã, hal t’a yam wa gãand bãane. A yeelame: “Mam sɩngda vaeesgã ne yɩɩr wʋsgo. La m sã n karemdẽ, wat n yaa wa a Zeova mobg-m lame. Mam wa n bãngame t’a Zeova wʋmda bũmb nins fãa sẽn namsd maamã võore, la t’a sõngd-m lame.” A Zeova tõe n sõnga yãmb me tɩ y ra maan yɩɩr tɩ loog noore, hal tɩ y yamã wa gãand bãane.—Yɩɩn. 119:143, 144.

A ZEOVA NA N SÕNGA YÃMBA

10. Yel-beed poore, d manesem tõe n yɩɩ wãna?

¹⁰ Bũmb ning sẽn yaa toog ne-dã. Yel-beed poore, wakat kẽere d sũurã mi n sãamame hal tɩ d getẽ tɩ d pa le tõe n maan baa fʋɩ ye. D tõe n getame tɩ d yaa wa zoɛt sẽn pogle. Pĩndã a ra minim n zoeta ne tʋʋlem, la masã yaa tɩlɛ t’a tik raoog n kẽne. Tõe n yɩɩ toog tɩ d maan bũmb nins d sẽn da minim n maand nana-nana wã, wall bũmb nins d sẽn da maand tɩ kõt-d sũ-noogã yamleoog pa le tar-d ye. D tõe n getame tɩ yaa toog ne-d tɩ d yik d gãagẽ wã wa sẽn yɩ to-to ne a Eli wã. D sẽn dat bal yaa d gõe. (1 Rĩm. 19:5-7) La a Zeova pʋlmame t’a na n maana bõe n sõng-do, d sã n wa getẽ tɩ d ka pãng n na n maan bũmbu?

11. Sã n yaa ne Yɩɩn-sõamyã 94:18 wã, bõe la a Zeova na n maan n sõng-do?

¹¹ A Zeova sẽn na n sõng-d to-to. A pʋlmame t’a na n sõnga tõndo. (Karm-y Yɩɩn-sõamyã 94:18.) Tõe n yɩɩ tɩlɛ tɩ  d paam sõngr sẽn na yɩl n kell n tʋm a Zeova tʋʋmã, wa sẽn yaa tɩlɛ ne zoɛt sẽn pogl t’a paam sõngr n tõog n kẽnã. Sã n wa yaa woto a Zeova yeta tõnd yaa: “Maam a Zeova sẽn yaa fo Wẽnnaamã gãta fo nug-rɩtgo, la m yet foom yaa: ‘Da zoe rabeem ye. Mam na n sõnga foom.’” (Eza. 41:13) Rĩm a Davɩɩd paama sõngr a woto buudu. A sẽn wa n maood ne zu-loees tɩ bɛɛb me baood-a n na n kʋ wã a yeela a Zeova yaa: “Yãmb nug-rɩtg teenda maam.” (Yɩɩn. 18:35) La wãn to la a Zeova sõngd tõndo?

12. D sã n wa koms raoodo, a Zeova tõe n tũnuga ne ãnd dãmb n sõng-do?

¹² A Zeova wae n tũnugda ne neb a taaba, n sõngd tõndo. Wala makre a Davɩɩd sẽn wa n koms raoodo, a zoa a Zonatã wa n kaag-a lame n bels-a la a keng a raoodo. (1 Sãm. 23:16, 17) A Zeova yãka a Eliize me t’a na n sõngd a Eli. (1 Rĩm. 19:16, 21; 2 Rĩm. 2:2) Rũndã-rũndã, a Zeova tõe n tũnuga ne d zakã neba, d zo-rãmb wall kãsem-dãmbã n sõng-do. La d sũur sã n wa sãam wʋsgo, d tõeeme n pa nong neb a taab zĩigẽ ye. D sẽn dat bal yaa d be d yembre. Zu-loe-kɛgeng taoore, d manesem mi n yaa woto. La bõe la d tõe n maan n paam t’a Zeova sõng-do?

13. Bõe la d segd n maan n paam t’a Zeova sõng-do? (Ges-y fotã me.)

¹³ Tõnd sẽn segd n maane. Modg-y n da n zãag-y y meng ne nebã ye. D sã n zãag d meng ne nebã d tõe n tagsda d mengã yell bala, la zu-loɛɛg ning d sẽn maood ne wã yelle. Tagsa a woto tõe n kɩtame tɩ d pa bãng n yãk yam sẽn yaa sõma ye. (Yel. 18:1) Yaa sɩd tɩ tõnd fãa mi n data wakat n yaa d yembre, sẽn yɩɩd fãa d sã n wa maood ne zu-loe-kɛgemse. La d sã n lak d meng n kaoose, tõe tɩ d zãgsda neb nins a Zeova sẽn tũnugd ne n na n sõng tõndã sõngre. Rẽnd baa yɛlã sẽn wa n yaa toog to-to, bɩ y sak y zakã rãmba, y zo-rãmbã la kãsem-dãmbã sõngre. Tẽeg-y t’a Zeova tũnugda ne-b n sõngd yãmba.—Yel. 17:17; Eza. 32:1, 2.

A ZEOVA NA N BELS-Y LAME

14. Zu-loe-bʋs n tõe n wa kɩt tɩ d maand rabeem?

¹⁴ Bũmb ning sẽn yaa toog ne-dã. Wakat ninga, d mi n segda zu-loees sẽn kẽesd rabeem. Biiblã pʋgẽ, neb sẽn da tũud Wẽnnaam ne b sũy fãa yeelame tɩ wakat n zĩnd tɩ b maan yɩɩre, la b ra rigd rabeem b bɛɛbã yĩng wall zu-loees a taab yĩnga.  (Yɩɩn. 18:4; 55:1, 5) Tõnd me tõe n paama namsg d tũudmã yĩnga. Tõe n yɩɩ d karen-bi-taase, d tʋmd-n-taase, d zakã neb wall tẽngã taoor dãmb n namsd tõndo. Bãag tõe n wa kɩtame tɩ d yɛɛsd d na n kiime. Yell a woto taoore, d tõe n wa tagsdame tɩ d yaa wa biig b sẽn daag n base. Wakat kãnga, bõe la a Zeova maand n sõngd tõndo?

15. Yɩɩn-sõamyã 94:19 goamã kɩtame tɩ d tõe n bas d yam ne bõe?

¹⁵ A Zeova sẽn na n sõng-d to-to. A belsda tõnd la a kɩtdẽ tɩ d yamã gãe bãane. (Karm-y Yɩɩn-sõamyã 94:19.) Vɛrse-kãngã goamã kɩtame tɩ d tagsd bi-bilf sẽn yɛɛsd n pa tõe n gũsi, saagã sẽn tãsd wʋsg yĩng yelle. D tõe n mamsa a ba wã sẽn tɩ zĩnd a sɛɛgẽ, n mobg-a hal t’a wa gũsi. Baa saagã sẽn ket n niid ne pãngã, a ba wã sẽn mobg-a wã kɩtame t’a yamã gãand bãane. D sã n wa segd zu-loees sẽn kẽesd tõnd rabeem, d tõe n datame tɩ d saasẽ Ba wã mobg tõnd hal tɩ d yamã wa gãand bãane. La wãn to la d tõe n paam t’a Zeova bels tõnd woto?

16. Bõe la d tõe n maan n paam t’a Zeova bels-do? (Ges-y fotã me.)

¹⁶ Tõnd sẽn segd n maane. Baood-y sẽk n pẽnegd a Zeova, rat n yeel tɩ n pʋʋsd-a la y karemd a Gomdã. (Yɩɩn. 77:1, 12-14) Woto y sã n wa maand yɩɩre, pipi bũmb y sẽn na n maan yaa bao y saasẽ Ba wã sõngre. Togs-y-yã a Zeova bũmb ning sẽn kẽesd-y rabeemã, la bũmb ning sẽn kɩt tɩ y maand yɩɩrã. Rẽ poor bɩ y karem a Gomdã tɩ rẽ la y na n paam t’a bels-yã. (Yɩɩn. 119:28) Y sã n wa maand rabeem, Biiblã babs kẽer kareng tõe n sõng-y-la wʋsg tɩ y yamã gãand bãane. Wala makre, y tõe n paama goam sẽn kengd raood Zoob sebrã pʋgẽ, Yɩɩn-sõamyã la Yel-bũn sɛbã pʋsẽ, la a Zeezi goam nins sẽn be Matiye sak a 6 pʋgẽ. Y sã n pʋʋsd a Zeova la y karemd a Gomdã, y na n yãame t’a belsd-y lame.

17. D tõe n basa d yam ne bõe?

¹⁷ D tõe n basa d yam tɩ yel-pakr sasa, a Zeova na n sõng-d lame. A pa na n tol n daag-d n bas ye. (Yɩɩn. 23:4; 94:14) A Zeova pʋlmame t’a na n kogl-d lame, n sõng-d tɩ d ra maan yɩɩr tɩ looge, n teel-d la a bels-do. Ezayi 26:3 goma a Zeova yell n yeel yaa: “Yãmb na n kogla neb nins sẽn dell yãmb zãng-zãngã. Yãmb na n kɩtame tɩ b paam bãan wakat fãa, bala yaa yãmb la bãmb teeg-yã.” Woto wã, teeg-y-yã a Zeova, la y maan y sẽn tõe fãa n paam t’a sõng-yã. Y sã n maand woto y na n paamda raoodo, baa zu-loe-kɛgems sasa.