B sẽn wub kẽer zĩis ningã, rap wʋsg getame tɩ pag yõod pa ta rao ye. Wala makre, a Ãns sẽn yaa tigims sull yel-gɛt n be Bolivi wã yeelame: “B sẽn wub rap kẽer to-to wã kɩtame tɩ b wukd b mens wʋsgo. B tagsdame tɩ b sãoo pagbã, n wae n paoogd-ba.” A Sẽngsiyan sẽn yaa kãsem-soab n be Tayiwannã yeelame: “Tõnd tẽngẽ wã, rap wʋsg tagsdame tɩ pag pa segd n ning a noor rap yɛlẽ ye. Pag sã n togs a tagsg bũmb ning wɛɛngẽ tɩ rao rɩk n togs a taaba, b tõe n yaal-a lame.” Rap kẽer me tara manesem sãnda tɩ wilgdẽ tɩ b pa nand pagbã ye. Wala makre b tõe n gomda laad goam sẽn paoogd pagbã.

Zu-noogo, baa b sẽn wub rao to-to, a tõe n toeemame. A tõe n toeemame n pa le tagsd tɩ rao yõod yɩɩda pag ye. (Efɛɛ. 4:22-24) La yaa a sã n dɩkd a Zeova togs-n-taar la a tõe n maan woto. Sõs-kãngã pʋgẽ, d na n yãa a Zeova manesem sẽn yaa to-to ne pagbã, saam-biisã sẽn tõe n dɩk a togs-n-taar zĩ-kãng wɛɛngẽ to-to, la kãsem-dãmbã sẽn tõe n maan to-to n wilgd tɩ b nanda saam-bi-pogsã, tɩ yaa mak-sõngo.

A ZEOVA MANESEM YAA WÃN TO NE PAGBÃ?

A Zeova kõo mak-sõng sẽn ka to d manesem sẽn segd n yɩ to-to ne pagbã wɛɛngẽ. A Zeova sẽn yaa Ba sẽn yaa nimbãan-zoɛtã nonga ninsaalbã fãa. (Zã 3:16) Saam-bi-pogs nins sẽn maand sɩd ne-a wã yaa wa a kom-pugli a sẽn nong wʋsgo. Ad bũmb toor-toor sẽn wilgd t’a Zeova waoogda pagbã:

 A pa get tɩ pagbã pa ta rapã ye. A Zeova naana pagbã ne rapã fãa a meng wõnego. (Sɩng. 1:27) A pa naan rapã tɩ b tar yam wall minim n yɩɩd pagbã ye. A leb n pa nong rapã n yɩɩd pagbã ye. (2 Kib 19:7) A naana rapã ne pagbã fãa tɩ b tõe n wʋm Biiblã goam võore, la b tõe n dɩk a togs-n-taare. A Zeova sũur nooma ne pagb la rap nins fãa sẽn tẽed-a wã. A kõo pagb la rap fãa sor tɩ b tõe n wa vɩɩmd wakat sẽn kõn sa tẽngã zugu, wall b kẽng saasẽ n tɩ yɩ rĩm-dãmb la maan-kʋʋdba. Yaa vẽeneg t’a Zeova nanda pagbã.

A kelgd-b lame. A Zeova pa maand a toog kae ne pagbã tagsgo, wall bũmb ning sẽn pak-bã ye. Wala makre a kelga a Rasɛll ne a Ann pʋʋsgã, n deege. (Sɩng. 30:22; 1 Sãm. 1:10, 11, 19, 20) Sẽn paase, a Zeova vẽnega neb tɩ b gʋls rap sẽn kelg pagb sagls kibay Biiblã pʋgẽ. Wala makre, a Abrahaam saka a Zeova sẽn yeel-a t’a kelg a pag a Saara wã. (Sɩng. 21:12-14) Rĩm a Davɩɩd kelga a Abigayɩlle. Sɩd-sɩda, a ra getame tɩ yaa a Zeova n tʋm pagã t’a wa gom ne yẽ. (1 Sãm. 25:32-35) A Zeezi sẽn da rɩkd a Ba wã togs-n-taar kɛpɩ wã kelga a ma a Maari. (Zã 2:3-10) Kiba-kãensã wilgdame tɩ bũmb a ye a Zeova sẽn maand n wilgdẽ t’a nanda pagbã yaa a sẽn kelgd-bã.

A kɩs-b-la sɩda. A Zeova yeela a Awa t’a sõng n ges tẽngã yelle, tɩ wilgdẽ t’a ra kɩs-a-la sɩda. (Sɩng. 1:28) A Zeova sẽn maan woto wã, a wilgame t’a nifẽ, a Ãdem sẽn yaa a Awa sɩdã pa yɩɩd-a, la t’a Awa yaa a Ãdem sõangda. A Zeova yãka no-rɛɛs-pogs a Debora ne a Hulda tɩ b sagl a nin-buiidã, baa bʋ-kaood la rĩma, tɩ wilgdẽ t’a kɩs-b-la sɩda. (Bʋ. 4:4-9; 2 Rĩm. 22:14-20) Rũndã-rũndã me, a Zeova kɩsa kiris-nin-pogsã sɩda, n kõ-b tʋʋma. Saam-bi-pog-kãensã sẽn maand sɩdã kẽer yaa koe-moondba, so-pakdb la misioneer-dãmba. Sãnda sõngd n maanda Rĩungã rot la siglgã rot a taab pãlã-rãmba, n sõngd n metẽ, la b get b yelle. Kẽer tʋmda Betɛl-dãmbẽ, tɩ sãnda tʋmd sɛbã lebgr biru-rãmbẽ. Saam-bi-pog-kãensã yaa wa tãb-bi-kʋʋng a Zeova sẽn tũnugd ne n pidsd a raabã. (Yɩɩn. 68:11) Vẽenega, a Zeova pa get tɩ pagbã ka pãnga, wall tɩ b ka võor ye.

BÕE LA SAAM-BIISÃ TÕE N MAAN N DƖK A ZEOVA TOGS-N-TAARE?

Saam-biisi, sẽn na yɩl n bãng tɩ d manesem sẽn yaa to-to ne pagbã yaa wa a Zeova, d segd n pelga d pʋg n fees d meng n ges d manesmã ne d tagsa wã sẽn yaa to-to. Sẽn na yɩl n maan dẽ, yaa tɩlɛ tɩ d paam sõngre. D zoa hakɩɩk la Wẽnnaam Gomdã tõe n sõng-d lame tɩ d bãng d sã n tara tags-kɛg pagbã wɛɛngẽ, wa logtor sẽn tõe n tall masĩn n ges ned sũuri, n bãng a sã n tʋmda sõma wã. Bõe la d tõe n maan tɩ b sõng-do?

Sok-y y zoa hakɩɩka. (Yel. 18:17) D tõe n soka d zoa d sẽn kɩs sɩd ne, la sẽn yaa nin-bʋgsg la ned sẽn pa dem-dem sogsg kẽere. Wala makre: “Fo tagsdame tɩ mam manesem yaa wãn ne saam-bi-pogsã? B getame tɩ m waoogd-b lame bɩ? Bũmb n be m sẽn tõe n maane, tɩ m manesmã sẽn yaa to-to ne-bã sõmblem paas bɩ?” Y zoa wã sã n wilg-y bũmb kẽer y sẽn segd n demse, bɩ y ra sãam y sũur ye. Sak-y ne y sũur fãa n toeeme.

Zãmsd-y Wẽnnaam Gomdã. Bũmb d sẽn tõe n maan tɩ sõng-d tɩ d bãng d manesem sẽn yaa to-to ne pagbã sã n yaa sõma, yaa d sẽn na n tik Wẽnnaam Gomdã n fees d meng n ges d tagsa wã ne d manesmã sẽn yaa to-to ne-bã. (Ebre. 4:12) D sã n zãmsd Biiblã, d yãta rap sẽn tall manesem-sõng ne pagbã, la rap sẽn pa tall manesem-sõng ne-b kibaya. D tõe n tika rẽ n ges tõnd mengã manesem sẽn yaa to-to ne pagbã. Sẽn paase, d pa segd n tik Biiblã vɛrse-yɛng bal zug n tall tags sẽn pa zems ne pagbã ye. D segd n karma vɛrse toɛy-toɛy n bãng a Zeova sẽn dat tɩ d tall manesem ning ne pagbã. Wala makre, 1 Pɩyɛɛr 3:7 wã yetame tɩ “pagbã sẽn yaa wa laas sẽn pa tar pãng wʋsgã yĩng bɩ y waoog-ba.” b Woto rat n yeelame tɩ pagbã yõod wall b yamã pa ta rapã bɩ? A bada! D sã n mak a  Pɩyɛɛr goamã ne bũmb ning sẽn be Galat-rãmb 3:26-29 wã, d yãtame t’a Zeova yãka pagb la rap fãa tɩ b na n naag a Zeezi n dɩ naam saasẽ. D sã n zãms Wẽnnaam Gomdã la d sok d zoa hakɩɩk n bãng d manesem sẽn yaa to-to ne pagbã, na n sõng-d lame tɩ d waoogd d saam-bi-pogsã wa sẽn segdã.

WÃN TO LA KÃSEM-DÃMBÃ WILGD TƖ B WAOOGDA SAAM-BI-POGSÃ?

Saam-biisã tõe n dɩka tigingã kãsem-dãmb sẽn tar nonglmã togs-n-taare, n waoogd saam-bi-pogsã neere. Wãn to la kãsem-dãmbã kõt mak-sõng saam-bi-pogsã waoogr wɛɛngẽ? Ad bũmb kẽer b sẽn maande:

B pẽgda saam-bi-pogsã. Tẽn-tʋmd a Poll kõo kãsem-dãmbã mak-sõngo. Lɛtr ning a sẽn gʋls n tool Rom tigingã pʋgẽ, a pẽga saam-bi-pogs wʋsgo. (Rom. 16:12) Tags-y n ges-y saam-bi-pog-kãens sũur sẽn yɩ noog to-to, b sẽn wa n karemd a Poll lɛtrã tigingã pʋgẽ wã. Woto me, kãsem-dãmbã pẽgda saam-bi-pogsã ne b sũy fãa b zʋg-sõma wã yĩnga, la b sẽn tʋmd a Zeova tʋʋmã yĩnga. Woto kɩtame tɩ saam-bi-pogsã neẽ tɩ b waoogd-b lame la b nong-ba. Wakat ninga, bũmb ning saam-bi-pog-kãens sẽn dat sẽn na yɩl n kell n tũ a Zeova ne b sũur fãa yaa kãsem-soab sẽn na n togs-b goam sẽn kengd raoodo.—Yel. 15:23.

Kãsem-dãmbã sã n wa pẽgd saam-bi-pogse, b goamã segd n yɩɩ ne b sũur fãa, la tik bũmb takɩ zugu. Bõe yĩnga? Saam-bi-poak a ye yʋʋr sẽn boond t’a Zesika yeelame: “Saam-biig sã n yeel saam-bi-poak tɩ ‘tʋʋm-neere,’ noogda sũuri. La sẽn yaa sõma n yɩɩd yaa a sẽn na n tik bũmb n pẽg foo. Wala makre, f sẽn modgd sẽn na yɩl tɩ f kambã zĩnd sɩɩ tigsgã sasa, wall f sẽn kẽnd n dɩkd Biibl karen-biig n wat tigissã yĩnga.” Kãsem-dãmbã sã n tikd bũmb takɩ n pẽgd saam-bi-pogsã, kɩtdame tɩ saam-bi-pogsã neẽ tɩ b tara yõod tigingã pʋgẽ.

B kelgda saam-bi-pogsã. Kãsem-dãmb sẽn yaa sik-m-mens rãmb miime tɩ pa bãmb bal n  tõe n yãk yam tɩ yɩ sõma ye. B sokda saam-bi-pogsã me b tagsgo, la b maag b yĩng n kelg-ba. Kãsem-dãmbã sã n maand woto kengda saam-bi-pogsã raoodo, la nafd bãmb mensã. Wãn to? Kãsem-soab sẽn tʋmd Betɛllẽ t’a yʋʋr boondẽ t’a Zerardo yeelame: “M gũus n gesame tɩ m sã n sok saam-bi-pogs sogsg tɩ b togs b tagsgo, sõngd-m lame tɩ m tõog n tʋm m tʋʋmã sõma n yɩɩda. Wakat ninga, b tara minim tʋʋm kẽer wɛɛngẽ n yɩɩd saam-biis wʋsgo.” Tigingã pʋgẽ, saam-bi-pogs wʋsg yaa so-pakdba, tɩ kɩt tɩ b mi b koɛɛgã mooneg zĩigẽ nebã manesem sẽn yaa to-to wã sõma n yɩɩda. Kãsem-soab a ye yʋʋr sẽn boond t’a Brayan yeelame: “Saam-bi-pogsã tara zʋg-sõma la minim sẽn nafd a Zeova siglgã. Woto wã, bɩ y modg n dɩ b minimã yõodo!”

Kãsem-dãmb sẽn tar yam pa maand b toog kae ne saam-bi-pogs tagsg sẽn yaa a soab bũmb ning wɛɛngẽ ye. Bõe yĩnga? Kãsem-soab yʋʋr sẽn boond t’a Eduwaar yeelame: “Saam-bi-poak tagsg la a minim tõe n sõnga saam-biig t’a wʋm yell ning võor sõma. Leb n tõe n sõng-a lame t’a bɩɩs nimbãan-zoeere.” (Yel. 1:5) Baa kãsem-soab sã n wa pa tõe n tũ bũmb saam-bi-poak sẽn yeele, a tõe n pʋʋs-a-la bark a sẽn togs a tagsgã yĩnga, la a sẽn wilg a sẽn wʋmd yɛlã võor to-to wã yĩnga.

B sõngda saam-bi-pogsã tɩ b paamd minim. Kãsem-dãmb sẽn tar yam baooda segb n sõngd saam-bi-pogsã tɩ b paamd minim. Wala makre, b tõe n zãmsa saam-bi-pogsã b sẽn tõe n maan koɛɛgã mooneg tigsg to-to, tɩ saam-biig sẽn deeg lisg sã n wa ka be yambẽ bɩ b tõog n maane. B tõe n sõng-b lame tɩ b bãng b sẽn tõe n tʋm ne meebã tʋʋm-teed wall masĩn-dãmbã to-to, sẽn na yɩl tɩ b tõog n sõng ne siglgã rot meeb la b yell gesgo. Betɛl-dãmbẽ wã, yel-gɛtbã sõnga saam-bi-pogsã tɩ b tõe n tʋm tʋʋm buud toor-toore. Wala makre, rotã yell gesgo, teedã raabo, ligdã gɛɛla, ordinatɛɛr-dãmbã manegre, la tʋʋm a taaba. Kãsem-dãmbã sã n sõngd saam-bi-pogsã tɩ b paamd minim, b wilgdame tɩ saam-bi-pogsã tara yõodo, la tɩ b yaa pagb b sẽn tõe n teege.

Saam-bi-pogs wʋsg tara minim ning b sẽn paam kãsem-dãmbã nengẽ wã, n sõngd neb a taaba. Wala makre, saam-bi-pogs kẽer tara minim ning b sẽn paam meebã wɛɛngẽ wã, n sõngd neb tɩ b lebsd n met b rot sabab-wẽng poore. Saam-bi-pogs sãnda tara minim ning b sẽn paam koɛɛgã mooneg zãma sʋkã wɛɛngẽ wã, n sõngd saam-bi-pogs a taab tɩ bãmb me paamd minim. Saam-bi-pogsã tagsg yaa wãn ne kãsem-dãmb nins sẽn sõng-b tɩ b paam minimã? Saam-bi-poak yʋʋr sẽn boond t’a Zenifɛɛr yeelame: “Mam sẽn wa n sõngd n met Rĩung roog a ye, yel-gɛt n maag a yĩng n sõng-m tɩ m paam minim. A gũus n gesa mam sẽn tʋmd to-to wã, n pẽg-m rẽ yĩnga. M sã n naag-a n tʋmdẽ, noom-m lame. Bala m neeme tɩ m tara yõodo, la t’a kɩs-m-la sɩda.”

BARK NINS D SẼN PAAMDE, D SÃ N NAND SAAM-BI-POGSÃ WA D ZAKÃ NEBA

D nonga d saam-bi-pogsã sẽn maand sɩdã wa a Zeova! Rẽ n so tɩ d nand-b wa d zakã neba. (1 Tɩm. 5:1, 2) D getame tɩ d sẽn paam n naagd-b n tʋmdẽ wã yaa zu-zẽkre. D sã n paam tɩ b neẽ tɩ d nong-b lame la tɩ d teend-b lame, nooma tõnd wʋsgo. Saam-bi-poak yʋʋr sẽn boond t’a Vanesa yeelame: “M pʋʋsda a Zeova bark wʋsg m sẽn paam n be a siglgã pʋgẽ, tɩ saam-biis wʋsg kengd m daoodã.” Saam-bi-poak sẽn be Tayiwan yeelame: “Mam pʋʋsda a Zeova ne a siglgã bark wʋsgo, b sẽn wilgd tɩ b nanda pagbã, la tɩ d yell pak-b lame wã. Kengda m tẽebã la kɩtdẽ tɩ m sũur maneg n yaa noog ne m sẽn paam n be a Zeova siglgã pʋgẽ wã.”

A Zeova sã n neẽ tɩ saam-biisã sẽn maand sɩd ne-a wã modgdame tɩ b manesem sẽn yaa to-to ne pagbã yaa wa yẽ, noom-a lame! (Yel. 27:11) Kãsem-soab a ye sẽn be Ekos t’a yʋʋr boondẽ t’a Bẽnzame yeelame: “Rũndã-rũndã, rap wʋsg pa nand pagbã baa bilf ye. Rẽ n so tɩ d rat tɩ pagbã sã n be Rĩungã roogẽ bɩ b neẽ tɩ d yaa toor ne nin-kãense.” Bɩ d fãa modg n dɩk a Zeova togs-n-taare, n wilgd d saam-bi-pogsã tɩ d nong-b lame, la d waoogd-b wa sẽn segdã.—Rom. 12:10.