Zãongã ra bee wẽnd-doogã noore, tɩ b tũud be n kẽed Zĩ-sõngẽ wã. Gʋls-sõamyã, Dũni-paalgã lebgr nins b sẽn yiis sẽn deng yʋʋmd 2023 pʋsẽ wã, b yeelame tɩ “zãongã sẽn da be taoorã woglem ra yaa kãntɩɩg pisi, wa sẽn zems roogã yalem, t’a zãntlmã yaa koabg la pisi.” (2 Kib 3:4) Biibl-dãmb a taab me yeelame tɩ zãongã zãntlmã yaa “kãntɩɩg koabg la pisi,” rat n yeel tɩ metr pis-nu la a tãabo.

La Gʋls-sõamyã, Dũni-paalgã lebgr ning b sẽn yiis yʋʋmd 2023 goma a Salomo wẽnd-doogã zãongã yell n yeel yaa: “A zãntlmã yaa kãntɩɩg pisi,” rat n yeel tɩ zemsa metr a wɛ. a Ad bũmb a wãn b sẽn tik n toeemã.

Pipi Rĩm-dãmb 6:3 pʋgẽ, b pa wilg zãongã zãntlem sẽn da zem to-to ye. Vɛrse-kãng pʋgẽ, a Zeremi wilga zãongã woglem la a yalem, la a pa gom a zãntlmã yell ye. Sak ning sẽn pʋgdã pʋgẽ, a goma wẽnd-doogã bõn-kãsems a taab yell ball-balle. Wala makre, a goma zũud mogrã yelle, bilim-bilim piigã, la zũud ra-lugs a yiibã sẽn da be zãongã noorã yelle. (1 Rĩm. 7:15-37) Zãongã zãntlmã sã n sɩd ra yɩɩda metr pis-nu, n lug n yɩɩd wẽnd-doogã meng hal zĩig sẽn zãre, a Zeremi ra na n basame n pa gom rẽ yell sɩda? Baa yʋʋm kobs loogr poore, kʋdemd yel-mitb sẽn yaa Zʋɩf-rãmb n gʋlse, n wilg tɩ zãongã zãntlem ra pa yɩɩd a Salomo wẽnd-doogã meng ye.

Bãngdb kẽer yetame tɩ b ra pa tõe n me zãong zãntlem sẽn ta kãntɩɩg koabg la pisi wẽnd-doogã zug t’a pa lʋɩ ye. Pĩnd wẽndẽ wã, rot nins b sẽn me ne kug wall tãn-koɛɛm tɩ b zãnt wʋsgã tẽngrã ra yaa yalemse, tɩ b yĩngrã yaa bãanese. Wala makre, yaa woto la b ra met Ezɩpt wẽnd-dotã rig-noyã. La b ra pa me a Salomo wẽnd-doogã woto ye. Bãngdbã tagsdame t’a lalsã taglem pa yɩɩd kãntɩɩg a yoob (metr a 2,7) ye. A Theodor Busink sẽn yaa kʋdemd yel-mit sẽn maand vaeesg b sẽn da met rotã to-to wã wɛɛngẽ wã yeelame: “D sã n ges wẽnd-doogã noor lalgã taglem sẽn da yaa to-to wã, d tõe n yeelame tɩ zãongã zãntlem ra pa tõe n ta kãntɩɩg koabg la pisi ye.”

Tõe tɩ b tudgame, b sẽn wa n na n ges 2 Kibay 3:4 n lebs n gʋlsã. Seb-kʋd kẽer b sẽn gʋls ne nus pʋsẽ, b ninga vɛrse-kãngã pʋgẽ tɩ “koabg la pisi.” La seb-kʋd a taab nebã sẽn kɩs sɩd ne pʋsẽ, b ningame tɩ “kãntɩɩg pisi.” Wala makre, kodɛgs Alexandrinus b sẽn gʋls yʋʋm tusr la kobs-nu la zak rũndã wã, la kodɛgs Ambrosianus b sẽn gʋls yʋʋm tusr la kobs naas la zak rũndã wã. Tõe tɩ yaa bõe n kɩt tɩ seb-gʋlsd tudg n gʋls tɩ “koabg la pisi”? Ebre wã pʋgẽ, gom-biis nins sẽn yaa “koabgã” ne “kãntɩɩgã” gʋlsem wõnda taaba. Tõe tɩ yaa rẽ yĩng la seb-gʋlsd sẽn tudg n gʋls “koabgã.”

Baa d sẽn maood n na n bãng bõn-kãensã fãa n tõog n bilg a Salomo wẽnd-doogã sẽn da yaa to-to wã kɛpɩ wã, d pa yĩmd tɩ yaa wẽnd-do-kãng sẽn da makd bũmb ningã n tar yõod n yɩɩd ye. D tẽegdame t’a ra makda wẽnd-do-kãseng ning sẽn pa ninsaalb nus n me wã. A Zeova sẽn sak tɩ d fãa be wẽnd-do-kãng pʋgẽ n waoogd-a wã pa noom-d sɩda?—Ebre. 9:11-14; Vẽn. 3:12; 7:9-17.