ZÃMSGÃ YĨNGA 7
YƖƖLL 15 Bɩ d kils a Zeova Bi-kãsengã!
A Zeova sẽn kõt sugrã sẽn nafd tõnd to-to
“Sugr hakɩɩkã bee yãmb nengẽ.”—YƖƖN. 130:4.
D SẼN NA N BÃNGE
D na n yãa b sẽn bilgd a Zeova sugrã to-to Biiblã pʋgẽ. Na n kɩtame tɩ d sũur maneg n yɩ noog ne d sẽn paam t’a Zeova kõt-d sugr hakɩɩkã.
1. Bõe yĩng tɩ ninsaal sã n yeel t’a kõo sugri, bɩ a võorã wʋmb tõe n yɩ toogo?
“M KÕ-F-LA SUGRI.” Ned sã n yeel yãmb gom-kãensã, kɩtdame tɩ y bas y yam. Sẽn yɩɩd fãa, y sã n yeela gomd wall y maana bũmb n sãam a soabã sũuri. La “m kõ-f-la sugrã” võorã meng-meng yaa bõe? A soabã rat n yeelame tɩ y zoodã ket n yaa wa pĩndã bɩ, bɩ a rat n yeelame t’a pa le rat n gom yellã yelle, la tɩ y zoodã pa le tõe n yɩ wa pĩndã? Sɩd me, ninsaal sã n yeel t’a kõo sugri, a võorã wʋm tõe n yɩɩ toogo.
2. Bõe la Biiblã yet a Zeova sugrã wɛɛngẽ? (Ges-y tẽngr notã me.)
2 A Zeova sẽn kõt tõnd a ninsaalbã sẽn pa zems zãngã sugr to-to wã yaa toor ne tõnd sẽn kõt taab sugr to-to wã. Ned pa tõe n kõ sugr wa a Zeova sẽn kõt sugr to-to wã ye. Yɩɩn-gʋlsdã yeela a Zeova wɛɛngẽ yaa: “Sugr hakɩɩkã bee yãmb nengẽ, sẽn na yɩl tɩ b zoe yãmba.” a (Yɩɩn. 130:4) Sɩda, a Zeova sugrã yaa “sugr hakɩɩka.” Yaa yẽ n wilgd tõnd sugr sẽn sɩd yaa bũmb ninga. Biiblã babg ning b sẽn da gʋls ne Ebre wã vɛrse-rãmb kẽer pʋsẽ, b tũnuga ne gom-bil n gom a Zeova sugrã yelle, gom-bil b sẽn zɩ n tũnug ne n gom ninsaalbã sugr yelle.
3. Bõe n kɩt t’a Zeova sugrã yaa toor ne tõnd dẽndã? (Ezayi 55:6, 7)
3 A Zeova sã n kõ ned sugri, a basda a yel-wẽndã taal zãnga, tɩ b zoodã le yaa wa pĩndã. A Zeova sugrã ka to ye. A kõta sugr zãng-zãnga, la a kõt sugr naoor wʋsg me.—Karm-y Ezayi 55:6, 7.
4. Bõe la a Zeova maan n na n sõng tõnd tɩ d bãng sugr hakɩɩkã sẽn dat n yɛɛlga?
4 Sẽn mik t’a Zeova sugrã yaa toor ne tõnd dẽndã, tõnd a ninsaalbã sẽn pa zems zãngã na n yɩɩ wãn n bãng sugr hakɩɩkã sẽn dat n yɛɛlga? A Zeova tũnuga ne makr toor-toore, n na n sõng-d tɩ d bãng a sẽn kõt-d sugr to-to wã. Sõs-kãngã pʋgẽ d na n goma bãmb b wãn yelle. Na n sõng-d lame tɩ d bãng tɩ d sã n tek yam n kos sugri, a Zeova basda d yel-wẽnã taale, la a sak tɩ d kell n yɩ a zoa. D sã n wa gomd mak-kãens yelle, d sũur na n maneg n yɩɩ noog ne d Ba wã sẽn yaa sõmblem soab la nimbãan-zoɛta, n kõt sugr ne manesem buud toor-toorã.
A ZEOVA YIISDA YEL-WẼNA
5. A Zeova sã n kõ-d sugri, yaa wa a sẽn maan bõe?
5 Biiblã pʋgẽ, b nong n makda yel-wẽnã ne zɩɩb sẽn zɩs wʋsgo. Rĩm a Davɩɩd goma a yel-wẽnã yell n yeel yaa: “Mam yel-wẽnã zamame tɩ b zãntlmã zʋʋg mam zugã. B yaa wa zɩɩb sẽn yaa zɩsgo, n yɩɩd mam sẽn tõe n tʋke.” (Yɩɩn. 38:4) La ned sẽn maan yel-wẽnd sã n tek yam n kos sugri, a Zeova kõt-a-la sugri. (Yɩɩn. 25:18; 32:5) Ebre wã gom-bil ning b sẽn lebg tɩ “kõ sugrã” rat n yeelame tɩ “zẽke,” bɩ “zã.” Mams-y wa y sẽn na n tʋk zɩɩb sẽn yaa zɩsg wʋsgo, tɩ rao sẽn tar pãng wa rok zɩɩbã tɩ y paam y menga. Yaa woto la a Zeova maand ne tõnd yel-wẽnã.
‘Kõo sugri’ (Yɩɩn. 32:5)
6. Wãn to la a Zeova zãagd d yel-wẽnã ne tõndo?
6 Makr a to n wilgd a Zeova sẽn zãagd d yel-wẽnã ne tõnd to-to wã. Yɩɩn-sõamyã 103:12 yetame yaa: “A zãagda tõnd ne d beegrã, wa yaang sẽn zãr ne nin-taoor to-to wã.” Yaang n zãr ne nin-taoor n tɩ yɩɩda. Yaang ne nin-taoor pa tol n tõe n yek taab ye. Rat n yeelame t’a Zeova sẽn zãagd d yel-wẽnã ne tõnd to-to wã pa tõe n bãng n bilg ye. Kɩtdame tɩ d bas d yam t’a kõt-d-la sugr zãng-zãnga.
“Wa yaang sẽn zãr ne nin-taoor to-to wã” (Yɩɩn. 103:12)
7. Wãn to la Biiblã bilgd a Zeova sẽn kõt-d sugr to-to wã? (Mise 7:18, 19)
7 Yaa sɩd tɩ yaa wa a Zeova rɩkda d yel-wẽnã n zãag ne tõndo. La rẽ yĩnga, woto rat n yeelame t’a kelld n zã-b lame bɩ? Ayo. Rĩm a Ezekɩyaas goma a Zeova yell n yeel yaa: “Yãmb loba m yel-wẽnã fãa y poorẽ.” Pa rẽ bɩ, “yãmb yãka m yel-wẽnã fãa y taoore,” wa notã sẽn yeelã. (Eza. 38:9, 17, notã) Gom-kãensã wilgdame t’a Zeova rɩkda ned sẽn tek yam n kos sugr yel-wẽna, n lobg hal zĩ-zãrgẽ, n pa le ne-b ye. B ra tõe n lebga gom-kãensã n yeel yaa: “Yãmb kɩtame tɩ yaa wa mam zɩ n maan yel-wẽnd ye.” Biiblã pʋgẽ, b rɩka makr a to n na n gom rẽ yell tɩ be Mise 7:18, 19. (Karm-y-yã.) Be b yeelame t’a Zeova lobda d yel-wẽnã mogrã zĩ-zulumsẽ wã. Pĩnd wẽndẽ wã b sã n da lobg bũmb mogrã zĩ-zulumsẽ wã, bũmb ra kae ned sẽn tõe n maan n le paam bõn-kãng ye.
“Yãmb loba m yel-wẽnã fãa y poorẽ” (Eza. 38:17)
“Yãmb na n loba b yel-wẽnã fãa mogrã zĩ-zulumsẽ wã” (Mis. 7:19)
8. Bõe la d bãng-yã?
8 Mak-kãensã sõnga tõnd tɩ d bãng t’a Zeova sã n kõ-d sugri, a kɩtdame tɩ d paam d meng zãng ne yel-wẽnã sẽn yaa wa zɩɩb d sẽn tʋkã. Sɩd me a Davɩɩd yeelame: “Sũ-noog rãmb la neb nins sẽn paam tɩ b kõ-b sugr b tʋʋm-wẽnsã yĩnga, la b lud b yel-wẽnã. Sũ-noog soab la ned ning a Zeova sẽn bas a yel-wẽnd taalã.” (Rom. 4:6-8) Woto n yaa sugr hakɩɩkã!
A ZEOVA YẼESDA YEL-WẼNÃ
9. Wãn to la Biiblã sõngd tõnd tɩ d bãng a Zeova sẽn kõt sugr zãng-zãng to-to wã?
9 Ne a Zeezi maoongã maasem, a Zeova yẽesda neb nins sẽn tek yam n kos sugrã yel-wẽnã. D ges Biiblã sẽn bilgd a sẽn maand dẽ to-to. Biiblã pʋgẽ b wilgame t’a Zeova pekda yel-wẽn-kãense. Kɩtdame tɩ sẽn maan-a yel-wẽnã lebg yɩlemde. (Yɩɩn. 51:7; Eza. 4:4; Zer. 33:8) A Zeova mengã wilga rẽ sẽn yaa to-to wã n yeel yaa: “Baa yãmb yel-wẽnã sã n yaa moomde, b na n lebga pɛɛlg wa sa-lamdo. Baa b sã n yaa wa fu-miuugu, b na n lebga wa pe-kõbd sẽn yaa pɛɛlga.” (Eza. 1:18) Bũmb sẽn yaa moomd bɩ miuug sã n tẽk fu-pɛɛlga, yɩl t’a yi yaa toogo. Rẽnd a Zeova sẽn dɩk makr a woto wã, yaa sẽn na yɩl tɩ d bas d yam t’a tõe n peka d yel-wẽnã tɩ b lebg yɩlemde, tɩ yaa wa d pa le ne-b ye.
“Baa yãmb yel-wẽnã sã n yaa moomde, b na n lebga pɛɛlg wa sa-lamdo” (Eza. 1:18)
10. Wãn to la Biiblã bilgd a Zeova sugrã sẽn zem to-to wã?
10 Sõsg ning sẽn loogã pʋgẽ, d yãame tɩ b mi n maka yel-wẽnã ne “sama.” (Mat. 6:12; Luk 11:4) Rẽnd d sã n maan yel-wẽnd n beeg a Zeova fãa, yaa wa d samã sẽn tar paasgo. D tara a sam-kãsenga! La a Zeova sã n kõ-d sugri, yaa wa a basa samdã d sẽn tarã taale. A pa yet tɩ d yao yel-wẽn a sẽn kõ sugr yĩng ye. B sã n bas ned samd taale, a soab sũur noomame. Woto me a Zeova sã n kõ-d sugri, d sũur noomame.
“Bas-y tõnd samã taale” (Mat. 6:12, notã)
11. Biiblã sẽn yeel tɩ b ‘yẽesda’ d yel-wẽnã rat n yeelame tɩ bõe? (Tʋʋma 3:19)
11 A Zeova pa basd d samã bɩ d yel-wẽnã taal bal ye. A yẽesd-b lame. (Karm-y Tʋʋm 3:19.) D rɩk makre. Mams-y wa ned sẽn na n gʋls samd y sẽn tar sebr zugu, n wa yãk yam n na n bas samdã taale. A ninga bãnd sẽn wilgd rẽ gʋlsmã zugu. Baa a sẽn ning bãndã, y tõe n ket n nee sẽn gʋlsã. La pa woto ne gʋlsem b sẽn yẽes ye. Sẽn na yɩl n wʋm makrã võore, tẽeg-y tɩ pĩnd wẽndẽ wã, gʋls-koomã b sẽn da tar n gʋlsdẽ wã yẽesg ra yaa nana. Ned ra tõe n dɩka kʋɩd-maasr n yẽes b sẽn gʋlsã. Rẽnd b sã n da “yẽes” samde, menemda zãnga. Ned pa le tõe n yã bũmb ning b sẽn da gʋlsã ne nif ye. Yaa wa samdã zɩ n zĩnd ye. D sẽn bãng t’a Zeova pa basd d yel-wẽnã taal bala, la t’a yẽesd-b-la zãngã pa noom-d sɩda?—Yɩɩn. 51:9.
“Sẽn na yɩl tɩ b yẽes y yel-wẽnã” (Tʋʋ. 3:19)
12. A Zeova sẽn dɩk makr n gom sawad-taok yellã wilgda tõnd bõe?
12 A Zeova tũnuga ne makr a to n wilg a sẽn yẽesd d yel-wẽnã to-to wã. A yeelame: “Mam na n yẽesa fo kongrã wa sawadg sẽn lud bũmbu, la m yẽes f yel-wẽnã wa sawad-taok sẽn lud bũmbu.” (Eza. 44:22) A Zeova sã n kõ sugri, yaa wa a sẽn kɩt tɩ sawad-taok lud d yel-wẽnã tɩ nif pa le tõe n yã-b ye.
‘M na n yẽesa f yel-wẽnã wa sawad-taok sẽn lud bũmbu’ (Eza. 44:22)
13. A Zeova sã n kõ-d sugri, bõe la d pa segd n maane?
13 Mak-kãensã fãa wilgda tõnd bõe? A Zeova sã n kõ d yel-wẽnã sugri, d pa segd n ningd d meng taal yel-wẽn-kãens yĩng d vɩɩmã tõr ye. A Zeezi maoongã yaoo d yel-wẽnã zãnga. A Zeova sã n kõ-d sugri, yaa wa d zɩ n maan yel-wẽnd meng ye. D sã n tek yam n kos sugri, yaa woto la a Zeova kõt-d sugri.
A ZEOVA SAKDAME TƖ D LE YƖ A ZO-RÃMBA
Tõnd Ba sẽn be saasẽ wã sẽn kõt sugrã kɩtame tɩ d tõe n kell n yɩ a zo-rãmba (Ges-y sull 14)
14. Bõe yĩng tɩ d tõe n bas d yam t’a Zeova kõta sugri? (Ges-y fot-rãmbã me.)
14 A Zeova sẽn kõt sugr hakɩɩkã kɩtdame tɩ d tõe n kell n yɩ a zo-rãmba. Sõngdame tɩ d pa ningd d meng taal tɩ loog noor ye. D pa tagsd t’a Zeova sũur ket n zabda ne-do, t’a baood a sẽn na n sɩbg-d to-to ye. A pa na n tol n maan a buud ye. A Zeova sã n yeel t’a kõ-d-la sugri, bõe yĩng tɩ d tõe n bas d yam ne rẽ? A Zeova yeela no-rɛɛs a Zeremi yaa: “M na n kõo b kongrã sugri. M pa na n le tẽeg b yel-wẽndã yell ye.” (Zer. 31:34) Tẽn-tʋmd a Poll lebg n dɩka a Zeova goamã n yeel yaa: “M pa na n le tẽeg b yel-wẽnã yell yɛs ye.” (Ebre. 8:12) La woto rat n yeelame tɩ bõe?
“M pa na n le tẽeg b yel-wẽndã yell ye” (Zer. 31:34)
15. B sẽn yeel t’a Zeova pa le tẽegd tõnd yel-wẽnã yellã rat n yeelame tɩ bõe?
15 Biiblã pʋgẽ b sã n gomd “tẽegr” yelle, pa wakat fãa la yaa ned sẽn tẽegd bũmb wall a sẽn tagsd bũmb sẽn loog yell la b gomd ye. Tõe n yaa ned sẽn maand bũmb yell la b gomda. Bi-bɛɛg ning b sẽn da ka ra-luk zug n yɛgl a Zeezi wã kos-a lame yaa: “Zeezi, yãmb sã n wa be y Rĩungã pʋgẽ bɩ y tẽeg m yelle.” (Luk 23:42, 43) A ra kota a Zeezi tɩ wakat kãng sã n ta bɩ a maan bũmb n sõng-a. A Zeezi sẽn leok bi-bɛɛgã to-to wã wilgdame t’a na n vʋʋg-a lame. Rẽnd a Zeova sẽn yeel t’a pa na n le tẽeg d yel-wẽnã yellã, rat n yeelame t’a kõ-d-la sugri, la t’a pa na n wa sɩbg-d yel-wẽn-kãens yĩng ye.
16. Wãn to la Biiblã sõngd tõnd tɩ d bãng lohorem ning tõnd sẽn paamde, a Zeova sã n kõ-d sugri?
16 Biiblã tũnuga ne makr a to me, n na n sõng-d tɩ d bãng lohorem ning d sẽn paamde, a Zeova sã n kõ-d sugri. A yeelame tɩ tõnd sẽn yaa neb sẽn pa zems zãngã yĩnga, d yaa “yel-wẽndã yembse.” La a Zeova sẽn kõ-d sugrã yĩnga, d paamame tɩ b ‘yiis tõnd yel-wẽndã yembdẽ.’ (Rom. 6:17, 18; Vẽn. 1:5) D sã n bãng t’a Zeova kõ-d-la sugri, d tõe n maana sũ-noog wa yamb sẽn paam lohorem.
“B yiisa yãmb yel-wẽndã yembdẽ” (Rom. 6:18)
17. Bõe yĩng tɩ d tõe n yeel t’a Zeova sã n kõ-d sugri d paamda laafɩ? (Ezayi 53:5)
17 Karm-y Ezayi 53:5. Yaoolem makr ning yell d sẽn na n goma pʋgẽ, b maka tõnd ne ned sẽn bẽed bã-kɛgenga. A Zeova sẽn kɩt t’a Bi-riblã ki tɩ yɩ maoongã maasem yĩnga, d paama laafɩ. (1 Pɩy. 2:24) D sã n maan yel-wẽnde, d sãama tõnd ne a Zeova zoodã. La a Zeezi maoongã maasem yĩnga, d tõe n paama d yel-wẽndã sugri, n le maneg zoodã. Ned sã n paam t’a bã-kɛgeng sãooge, a sũur nooma wʋsgo. Tõnd me sã n paam t’a Zeova kõ-d sugr tɩ d le paam a zood n tat a yam, d sũur nooma wʋsgo.
“Yẽ sãmpoagã yĩnga, tõnd paama maagre” (Eza. 53:5)
A ZEOVA SẼN KÕT SUGRÃ SẼN NAFD TÕND TO-TO
18. Makr toor-toorã d sẽn yã Biiblã pʋgẽ a Zeova sẽn kõt sugr to-to wã wɛɛngẽ wã wilgda tõnd bõe? (Ges-y zĩ-gũbrã me: “A Zeova sẽn kõt tõnd sugr to-to.”)
18 Makr toor-toorã d sẽn yã Biiblã pʋgẽ a Zeova sẽn kõt sugr to-to wã wɛɛngẽ wã wilgda tõnd bõe? D bãngame t’a Zeova sã n kõ sugri, a kõo sugr zãng-zãng la wakat fãa yĩnga. Rẽ kɩtame tɩ d tõe n kell n yɩ d saasẽ Ba wã zo-rãmba. D tẽegame me tɩ sugr hakɩɩkã yaa bõn-sõng a Zeova sẽn kõt tõndo. Yaa a Zeova nonglmã la a lohormã n kɩt t’a kõt ninsaalbã sẽn yaa yel-wẽn-maandbã sugrã. Pa bũmb d sẽn tõe n yeel tɩ yaa tɩlɛ t’a Zeova kõ-d ye.—Rom. 3:24.
19. a) D sũur segd n yɩɩ noog ne bõe? (Rom dãmbã 4:8) b) Bõe yell la d na n gom sõsg ning sẽn pʋgdã pʋgẽ?
19 Karm-y Rom dãmb 4:8. “Sugr hakɩɩkã” sẽn be a Zeova nengẽ wã pa noom d ned kam fãa sɩda? (Yɩɩn. 130:4) La d sã n dat t’a Zeova kõ-d sugri, tõnd me segd n maana bũmb sẽn tar yõod wʋsgo. A Zeezi yeelame yaa: “Yãmb sã n pa kõt nebã sugr b beegrã yĩnga, yãmb Ba wã me pa na n kõ yãmb sugr y beegrã yĩng ye.” (Mat. 6:14, 15) Rẽnd d segd n dɩka a Zeova togs-n-taare, n kõt d taabã sugri. Sõsg ning sẽn pʋgdã na n wilga d sẽn tõe n maan dẽ to-to.
YƖƖLL 46 Zeova, tõnd pʋʋsda foo barka
a Ebre wã pʋgẽ, b yeelame bal tɩ “sugrã,” tɩ wilgdẽ tɩ sugr hakɩɩkã yaa a yembr tãa, baa kõ sugr võor sẽn tõe n yɩ toor-toorã. Biibl-dãmb wʋsg pʋsẽ, b pa bãng n lebg-a tɩ zems ye. La Gʋls-sõamyã, Dũni-paalgã lebgr pʋgẽ, b lebg-a lame tɩ zems kɛpɩ, tɩ kɩt tɩ b sẽn lebg Yɩɩn-sõamyã 130:4 to-to wã yaa sõma wʋsgo.
