M baaba ne m ma ra yaa Katolik-rãmb sẽn pa reemd ne b tũudmã ye. La b sẽn wa n wilg-b Biiblã pʋgẽ tɩ Wẽnnaam yʋʋr la a Zeova wã, b yiibã fãa lebga a Zeova Kaset rãmb sẽn tar yẽesem. M baaba ra peesda bõn-naands sẽn makd a Zeezi. La a basa rẽ maanego. A sẽn da yaa minizie wã, a manega tõnd doogã tẽngr doogã tɩ lebg Rĩung roogo. Rẽ n yɩ Sãn Ruwan sẽn yaa Maniyn sẽn yaa Filipin na-tẽngã sak a ye wã pipi Rĩung roogo.

M doga yʋʋmd 1952. Rẽ poore, m doagdbã sɩnga mam sõngr sẽn na yɩl tɩ m bãng a Zeova wa b sẽn da sõngd m kẽem-kom-dibli a naasã la m kẽem-kom-pugli a tãabã. M sẽn wa n lebg bedr bilfã, m baaba sagl-m lame tɩ m karemd Biiblã sak a ye daar fãa. A talla siglgã sɛb wʋsg n zãms maam Biiblã. M doagdbã ra mi n deega tigims sull yel-gɛtb wall neb Betɛllã sẽn tʋm tõnd zakẽ wã. Saam-bi-kãens sẽn da togsd b vɩɩmã sẽn yɩ to-to wã ra kõta tõnd zakã rãmb sũ-noogo, la kengd d raoodo. Rẽ kɩtame tɩ d fãa yãk yam n na n lʋɩɩs a Zeova tʋʋmdã taoore.

Mam doagdbã tẽebã sẽn da tar pãngã yĩnga, m dɩka yam wʋsg b mak-sõngã pʋgẽ. M ma wa n lʋɩɩ bãag n maan kaalem. Rẽ poore, maam ne m baaba naaga taab n lebg so-pakdb yʋʋmd 1971. La yʋʋmd 1973 m sẽn wa n tar yʋʋm pisi wã, m baaba maana kaalem. M doagdbã yiibã fãa sẽn ki wã kɩtame tɩ m da tagsdẽ tɩ m pa le tar sõangd ye. La saagr ning “sẽn vigl kãn-kãe la sẽn pa vigsdã” sẽn be Biiblã pʋgẽ wã sõnga maam tɩ m pa koms raood wʋsgo, la m kell n tall tẽeb sẽn tar pãnga. (Ebre. 6:19) M baaba kũumã poor bilfu, m lebga zall so-pakda, tɩ b tʋm maam Korõn ko-sʋk tẽngã sẽn be Palawan soolmẽ wã.

M sẽn wa n dabd Korõn ko-sʋk tẽngẽ wã tɩ m tara yʋʋm pisi la a ye. Mam sẽn dog tẽn-bedr pʋgẽ wã, m sẽn ta be n mik tɩ zĩis wʋsg la kʋʋrã la koom ka be wã, la tɩ yɩl n paam mobill wall  montɛɛr n tog sor yaa toogã, ling-m-la wʋsgo. Baa saam-biis a wãn sẽn da be be wã, yaa maam m ye bal n da yaa so-pakda, tɩ wakat ninga yaa tɩlɛ tɩ m moon m yembre. Pipi kiuugã, m da tagsda m zakã rãmb la m zo-rãmbã yell wʋsg hal tɩ m sũur sãamdẽ. Yʋngo m da mi n naka m neng n get ãdsã tɩ m nintãmã sodgdẽ. Mam raabã bal ra yaa m bas tʋʋmdã n lebg n kuili.

Wakat kãng sẽn pa yɩ nana wã sasa, m da wae n pelgda m pʋg n togsd a Zeova bũmb ning sẽn namsd maamã. M ket n tẽra bũmb toor-toor m sẽn karem Biiblã pʋgẽ la tõnd sɛbã pʋsẽ tɩ keng m daoodo. M da wae n tagsda Yɩɩn-sõamyã 19:14 sẽn yet bũmb ningã yelle. M wa n bãngame tɩ m sã n dat t’a Zeova yɩ “mam Pĩig kugr la m Fãagda,” m segd n bʋgsda bũmb nins a sẽn maandã zugu, la a zʋg-sõma wã zugu. Gũusg Gasgã pʋgẽ sõsg a ye n zĩnd be t’a gom-zugã yaa: “Vous n’êtes jamais seul.” a Sõs-kãng sõnga maam wʋsgo. Mam karm-a lame n yɩlem naoor wʋsgo. M sã n wa yaa m yembre, m getame tɩ m bee ne a Zeova, la tɩ yaa wakat m sẽn paam n tõe n pʋʋse, n zãms Biiblã la m bʋgse.

Mam sẽn ta Korõn ko-sʋk tẽngẽ wã poor bilfu, b yãka maam tɩ m lebg kãsem-soaba. Sẽn da yaa maam m ye bal n yaa kãsem-soabã, semen fãa m da segd n lʋɩɩ taoor Wẽnnaam tʋʋmdã lekoll sasa, Tʋʋmdã tigsga, Sebrã zãmsg tigsgã, la Gũusg Gasgã zãmsg sasa. M da wɛgsda sõsg zãma wã yĩng semen fãa me. M da pa le tar sẽk n tagsdẽ tɩ m yaa m yembr ye!

Mam sẽn moon koɛɛgã Korõn ko-sʋk tẽngẽ wã woma biisi, tɩ m Biibl karen-biis kẽer deeg lisgu. La m paama zu-loees me. Wakat ninga yɩl n ta moonegã zĩigẽ m segd kẽna daarã pʋɩ-sʋka, n pa mi m sẽn na n gãand zĩig ning be me ye. Ko-sʋk tẽn-bõoneg wʋsg me n da be d moonegã zĩigẽ. Sẽn na yɩl n ta be, m mi kẽe kom-kogl-bil sẽn tar montɛɛr tɩ sob-kãseng mi n yik mogrã zugu, tɩ m yaool n pa mi rugb ye. Zu-loe-kãensã fãa sasa, a Zeova kogla maam la a teel-ma. M wa n bãngame t’a Zeova ra segenda maam zu-loe-kãsems nins m sẽn na n paam zĩig ning b sẽn tʋm maam rẽ poorã yĩnga.

Yʋʋmd 1978 wã, b tʋma maam Papuazi Nuvɛll Gine sẽn be Ostrali nug-rɩtg sẽnesã. Papuazi Nuvɛll Gine yaa tẽng sẽn pid ne tãense, t’a yalmã kolg Ɛspayn. Mam sẽn ta be n mik tɩ tẽngã nebã yaa na maan milyõ a tãabo, tɩ b buud-goamã yaool n yaa kobs-nii la zakã ling-m-la wʋsgo. Zu-noogo, tẽngã nebã fãa la bal wʋmda Pidgĩn melaneziyẽ wã b sẽn boond tɩ Tok Pisin buud-gomdã.

B kɩtame tɩ mam kẽng Poor-morɛsbi sẽn yaa na-tẽngã Ãngilind tiging a ye pʋgẽ wakat bilfu. La rẽ poore m kẽnga Tok Pisin tiging pʋgẽ, n sɩng buud-gomdã zãmsgo. M da tikda bũmb ning m karen-saambã sẽn wilgd maamã n moond koɛɛgã. Rẽ sõnga maam tɩ m bãng buud-gomdã tao-tao. Pa yã n kaoos la m sɩng sõss wɛgsg Tok Pisin buud-gomdã pʋgẽ ye. B wa n yãka maam tɩ m lebg tigims sull yel-gɛt n segd n kaagd Tok Pisin tigims sẽn be porvẽns-bɛd pʋsẽ. Linga maam wʋsgo, bala rẽ tɩ m sẽn ta Papuazi Nuvɛll Gine wã pa ta yʋʋmd ye.

Tigimsã sẽn da zãr taab wʋsgã yĩnga, m da segd n sigla tigims sull tigis-kãsems wʋsgo, la m  tog sor naoor wʋsgo. Sɩngrẽ wã, yɛlã sẽn da yaa toor fasɩ wã kɩtame tɩ m tagsdẽ tɩ m yaa m yembre. M da bee tẽn-zẽnga, tɩ nebã buud-gomdã la b minimdã yaa toor ne mam sẽn yiẽ wã. Tãensã la soayã sẽn pa sõma wã kɩtame tɩ m sã n da yi tiging a ye n na n kẽng tiging a to, m da pa tõe n kẽ mobill wall m zomb montɛɛr ye. Kɩtame tɩ m da kẽed sɩlg semen fãa la bala. Wakat ninga yaa maam ne sofɛɛrã bal n be sɩlgã pʋgẽ, tɩ sɩlgã pa maneg n yaa sõma zãng ye. M sã n da togd sor ne sɩlg a woto buudu, m maanda yɩɩr wa m sẽn da togd sor ne koom-koglgã.

Wakat kãng tɩ neb wʋsg ra pa tar telefõn ye. Rẽ n so tɩ m da gʋlsd lɛtã n toond tigimsã. M da mi n gʋlsa lɛtr n tool tiging ning n wilg tɩ m watame, n deng lɛtrã n ta tẽn-kãnga, tɩ lebg tɩlɛ tɩ m sok tẽng-n-nebã tɩ b wilg-m a Zeova Kaset rãmbã sẽn beẽ. La wakat fãa m sã n yã saam-biisã b reegd-m-la sõma, tɩ kɩt tɩ m sũur noom m sẽn maand modgr woto fãa wã. M yãa a Zeova sẽn sõng-m ne manesem buud toor-toore, tɩ kɩt tɩ maam ne yẽ zoodã pãng paas wʋsgo.

Pipi tigsg m sẽn maan ko-sʋk tẽngã a ye b sẽn boond tɩ Bugẽnvɩll pʋgẽ, pag ne a sɩd n kolg maam tɩ b nensã be laado, n sok yaa: “Fo tẽra tõnd yell bɩ?” M tẽegame tɩ m sẽn ta Poor-morɛsbi paalmã, m moona pʋg-kãng ne a sɩdã. M sɩnga Biiblã zãmsg ne-ba, n wa rɩk-b n kõ tẽngã saam-biig a yembre. B yiibã fãa reega lisg masã! Rẽ naaga bark nins a Zeova sẽn kõ maam m sẽn zĩnd Papuazi Nuvɛll Gine yʋʋm a tãabã sasa wã.

Nand tɩ m yi Korõn ko-sʋk tẽngã yʋʋmd 1978 wã, m bãnga saam-bi-poak yʋʋr sẽn boond t’a Adel. Ra yaa pʋg-neere, n da sakd n mongd a meng bũmb wʋsg neb a taabã yĩng me. A ra yaa wakat fãa so-pakda, la a wubd a Samuel ne a Shirley sẽn yaa a kamb a yiibã. A ra geta a ma wã sẽn kʋʋlã yell me. Yʋʋmd 1981 sig-noy kiuugã, m lebg n leba Filipin n tɩ kẽ kãadem ne a Adel. D kãadmã poore d yɩɩ wakat fãa so-pakdba, la d naag taab n get d zakã rãmb yelle.

Baa ne m sẽn da tar zak rãmb n get b yellã, yʋʋmd 1983, b le yãka maam tɩ m lebg zall so-pakda. B tʋm-m-la Linapakan ko-sʋk tẽngã sẽn be Palawan soolmẽ wã. Tõnd zakã rãmb fãa yik n kẽnga zĩ-kãng sẽn yaa zĩig koe-moond baa a ye sẽn da pa be wã. A Adel ma wã maana kaalem na maan yʋʋmd poore. La d sẽn kell n modg ne koɛɛgã moonegã sõngame tɩ sũ-sãangã pa loog-d ye. D paam n sɩnga Biiblã zãmsg ne neb wʋsg Linapakan tɩ b wat tigissã. Sẽn pa yã n kaoose, lebga tɩlɛ tɩ d paam Rĩung roogo. Rẽ n so tɩ d me Rĩung roog d toore. D sẽn ta be wã yʋʋm a tãab poor bala, neb koabg la piig n wa a Zeezi kũumã tẽegr hal tɩ d sũur yɩ noogo. B sʋkã neb wʋsg wa n deega lisg d loogrã poore.

Yʋʋmd 1986, b tʋma maan Kiliyõn ko-sʋk tẽngã. Zĩig n da be be tɩ b tɩpd wãooba. Rẽ poor bilfu, b yãka a Adel me t’a lebg zall so-pakda. Sɩngrẽ wã, d ra yɛɛsda wãoobã moonego. La koe-moondb nins sẽn yaa tẽng-n-nebã yeela tõnd tɩ b kõta wãoobã tɩto, la tɩ b pa le tõe n long ned woto ye. Wãoob kẽer da wata tigissã saam-bi-poak a ye zakẽ. Pa yã n kaoos la d sɩng nin-kãens moonego, n pa le yɛɛsdẽ ye. Sõng nin-kãensã sẽn da tagsd tɩ  Wẽnnaam la neb a taabã raag-b lame n basã tɩ b bãng saagr ning sẽn be Biiblã pʋgẽ wã kẽngda raood wʋsgo. D sã n da ne nin-kãensã bãagã sẽn namsdã sũy sẽn noom to-to b sã n wa bãng tɩ daar n wat tɩ b na n paam laafɩ zãng-zãngã, ra noogda d sũuri.—Luk 5:12, 13.

D maana wãn tɩ d kambã vɩɩm yɩ noog Kiliyõn ko-sʋk tẽngẽ wã? Maam ne a Adel kosa Korõn saam-bi-pogs a yiib sẽn yaa kom-bɩɩs tɩ b wa bʋʋg tõndo, sẽn na yɩl tɩ d kambã paam tũud-n-ta-sõma. A Samuel ne a Shirley la kom-bɩ-kãens ra moonda koɛɛgã tɩ womd biisi. B ra zãmsda Biiblã ne kamb wʋsgo, tɩ maam ne a Adel zãmsd Biiblã ne kom-kãens roagdbã. D wa n zãmsda Biiblã ne zags piig la a yembr neba. Sẽn pa yã n kaoose d tõog n lugla tigin-paalle, bala d Biibl karen-biis wʋsg ra tũuda bũmb nins b sẽn zãmsdã.

Sɩngrẽ wã, maam m ye bal n da yaa kãsem-soab n be bab-kãnga. Rẽ n so tɩ Betɛllã kos maam tɩ m maand tigissã semen fãa Kiliyõn koe-moondb a nii wã yĩnga, tɩ rẽ poor bɩ m kẽng Maarili n tɩ maan tigissã be koe-moondb a wɛ wã yĩnga. F sã n da na n yi Kiliyõn n kẽng Maarili ne koom-koglgo, kaoosda lɛɛr a tãabo. Tigsg fãa poore, tõnd zakã rãmb ra kẽnda lɛɛr-dãmb soolem-kãng sẽn yaa tãensã pʋgẽ n kẽng tẽn-bil b sẽn boond tɩ Alse pʋgẽ, n tɩ zãms neb Biiblã.

Neb wʋsg wa n saka sɩdã Maarili la a Alse, tɩ kɩt tɩ d me Rĩung rot tẽn-kãense. Be me, yɩɩ saam-biisã la saam-bi-pogsã n paas Biibl karen-biisã n wa ne meebã teed fãa la bala, la b sõng n me wa sẽn yɩ to-to Linapakan ko-sʋk tẽngẽ wã. Maarili Rĩungã roog ra tõe n deega neb kobs-yi. D leb n da tõe n yalg-a lame, tɩ kɩt tɩ d maand tigis-kãsems be.

Yʋʋmd 1993, d kambã sẽn wa n bi wã, m lebga tigims sull yel-gɛt Filipin tɩ maam ne a Adel kaagd tigimsã. Yʋʋmd 2000 pʋgẽ, b boola maam Wẽnnaam tʋʋmdã zãmsg lekolle, sẽn na yɩl tɩ m paam zãmsg n lebg lekoll-kãng karen-saamba. M da tagsdame tɩ m pa na n tõog tʋʋm-kãng ye. La a Adel ra kengda m daood wakat fãa. A tẽeg-m lame t’a Zeova na n kõ-m-la pãng tɩ m tõog n tʋm tʋʋm-kãnga. (Fili. 4:13) A Adel ra miime tɩ na n yɩɩ woto, bala yẽ mengã ra tʋmda a tʋʋmdã baa ne a sẽn maood ne bãasã.

 Yʋʋmd 2006, mam sẽn wa n yaa lekoll-kãng karen-saambã, logtoɛɛmbã bãngame t’a Adel bẽeda bãag ning b sẽn boond t’a Parkinsõn bãagã. Sãama d sũur wʋsgo. Mam sẽn yeel a Adel t’a wa tɩ d bas d tʋʋmdã tɩ m tõog n ges a yellã, a yeelame yaa: “M bõos tɩ f bao logtor sẽn tõe n sõng-m ne m bãagã. Mam miime t’a Zeova na n sõng-d lame tɩ d tõog n kell n tʋm d tʋʋmdã.” Yʋʋm a yoob nins sẽn pʋglã, a Adel kell n tʋma a Zeova tʋʋmdã n pa yẽgem ye. A sẽn wa n pa le tõe n kẽnã, a ra zĩ puus-puus zug n moondẽ. A sẽn wa pa le tõe n gom sõma wã, tigissã sasa a modgd n leokda koɛɛg-koɛɛg bala. Hal n tãag a Adel kũumã yʋʋmd 2013, saam-biis la saam-bi-pogs wʋsg ra toond-a-la mesaaz-rãmb n wilgd b sũur sẽn yaa noog to-to, a sẽn kõt mak-sõng tõog-toogã wɛɛngẽ wã. Mam zĩnda ne m pagã sẽn maan sɩd la sẽn nong-mã yʋʋm pis-tã la zaka. Rẽ n so t’a sẽn wa n ki wã m sũurã ra sãamda wʋsgo, tɩ m le tagsdẽ tɩ m yaa m yembre.

A Adel ra ratame tɩ m kell n tʋm m tʋʋmdã. Yaa woto la m maan-yã. M da tʋmda wʋsgo, tɩ rẽ kɩt tɩ m sẽn lebg m yembrã pa nams-m wʋsg ye. Yʋʋmd 2014 n tãag yʋʋmd 2017 wã, b yãka maam tɩ m kẽnd n kaagd tigims sẽn gomd Tagalog buud-gomdã tẽns b sẽn da gɩdg d tũudmã tʋʋm kẽer pʋsẽ. Rẽ poore b yãka maam tɩ m da kẽnd n kaagd Tagalog tigims sẽn be Tayiwan ne Etazĩni la Kanada. Yʋʋmd 2019 wã, b yãka maam tɩ m yɩ Rĩungã koe-moondb lekoll karen-saamb b sẽn maan ne Ãngilind Ẽnd la Tayilãnde. Tʋʋm-kãens fãa kõ-m-la sũ-noog wʋsgo. Yaa m sã n wa tʋmd a Zeova tʋʋmdã wʋsg la m tar sũ-noog n yɩɩda.

B sã n da tʋm maam zĩig fãa, m wat n nonga saam-biisã la saam-bi-pogs nins sẽn be be wã wʋsgo. Rẽ n so tɩ yɩl n loog n bas-bã zɩ n yɩ nana ye. Sã n wa yaa woto, m teegda a Zeova zãng-zãnga. M yãame t’a sõng-m-la wakat fãa, tɩ rẽ sõng maam tɩ m sak toeeng buud fãa ne yamleoogo. Rũndã-rũndã, m yaa zall so-pakd n be Filipin. Mam sũur nooma m tigin-paallã pʋgẽ, t’a nebã teend-m la b get m yell wa m zakã neba. M sẽn ne a Samuel la a Shirley sẽn tar b ma wã tẽebã buudã me noom-m-la wʋsgo.—3 Zã 4.

Sɩd-sɩda, m vɩɩmã tõre m paama zu-loees wʋsgo. Wala makre, m sẽn wa n get m pagã t’a namsd ne bãag sẽn komsd-a hal t’a wa ki wã, sãama m sũur wʋsgo. M yɛlã toeema naoor wʋsg me. Baa ne rẽ fãa, m yãame t’a Zeova “pa zãr ne tõnd ned baa a yembr ye.” (Tʋʋ. 17:27) A Zeova nugã “pa koɛɛg wʋsg” n pa tõe n teel neb nins sẽn tũud-a wã la a keng b raoodo, baa b rãmb nins sẽn be zĩis koe-moondb sẽn pa waoogã ye. (Eza. 59:1) A Zeova sẽn yaa m Pĩig kugrã zĩnda ne maam m vɩɩmã tõre, tɩ m pʋʋsd-a bark wʋsgo. Mam zɩ n yɩ m yembr ye.