YÃMB gũus n gesame tɩ dũniyã neb wʋsg tagsdame tɩ b segda ne bũmb kẽere, la tɩ b sãoo neb a taabã bɩ? Baa f sẽn kõ-b bũmb ning fãa, b getame tɩ b segda ne sẽn yɩɩd rẽ. Neb nins sẽn tagsd woto wã yaa rat-m-ye rãmb la sõm-zɩtba. Biiblã pĩnd n togsame tɩ yaool wakatã, nebã na n yɩɩ woto.—2 Tɩm. 3:2.

La rat-m-ye sɩng n beeme. A Ãdem ne a Awa yãka yam n na n yãkd sẽn yaa sõma ne wẽngã b toore, tɩ wa ne yel-beedo. Makr a to yaa Zida rĩm a Ozɩyase. A tagsame t’a tara sor n na n yõog wisd wẽn-doogẽ wã. La yɩɩ tudgr tɛkẽ! (2 Kib 26:18, 19) Fariziyẽ-rãmbã la Sadiseyẽ-rãmbã me ra tagsdame tɩ b tata Wẽnnaam yam, b sẽn yaa a Abrahaam yagensã yĩng bala.—Mat. 3:9.

Neb wʋsg sẽn yaa rat-m-ye rãmb la sẽn tagsd b mensã yell balã, d sã n pa gũusi, b manesmã tõe n mad-d lame. (Gal. 5:26) D tõe n wa tagsdame tɩ d segda ne bũmb kẽere, wall tɩ d sãoo d taabã. Bõe la d tõe n maan tɩ sõng-d tɩ d ra wa tagsd a woto? D segd n deng n bao n bãnga a Zeova tagsg sẽn yaa a soab yel-kãng wɛɛngẽ. Ad bũmb a yiib Biiblã sẽn wilg tɩ tõe n sõng-do:

Yaa a Zeova n yãkd bũmb nins d sẽn segd ne wã. Ad makr a wãna:

• Zakã pʋgẽ, raoã rata pagã sẽn na n waoogd-a, tɩ pagã rat a sɩdã sẽn na n nong-a. (Efɛɛ. 5:33) Ned sẽn kẽ kãadem tara sor n na n yeel t’a sɩdã bɩ a pagã pa segd n bas t’a yamã kẽ ned a to n zʋʋg  yẽ ye. (1 Kor. 7:3) Roagdbã tara sor n na n yeel b kambã tɩ b segd n waooga bãmba. La segdame tɩ roagdbã me nong b kambã la b get b yelle.—2 Kor. 12:14; Efɛɛ. 6:2.

• Tigingã pʋgẽ, kãsem-dãmbã sẽn tʋmd wʋsgã toga ne waoogre. (1 Tes. 5:12) La b pa tar sor n na n soog b tẽed-n-taasã ne pãng ye.—1 Pɩy. 5:2, 3.

• Wẽnnaam kõo ninsaalbã goosneema-rãmbã sor tɩ b tõe n yeel b nin-buiidã tɩ b yao lampo-rãmb la b waoog bãmba.—Rom. 13:1, 6, 7.

A Zeova kõta tõnd tɩ yɩɩd bũmb nins d sẽn segd ne wã. Tõnd sẽn yaa yel-wẽn-maandbã yĩnga, d sẽn segd ne bũmb ning bal yaa kũum. (Rom. 6:23) La a Zeova maan-neerã yĩnga, a kõta tõnd bõn-sõma wʋsgo. (Yɩɩn. 103:10, 11) A sẽn kõt tõnd bõn-kãensã pa d sẽn segd ne rẽ yĩng ye. Yaa a barkã yĩnga.—Rom. 12:6-8; Efɛɛ. 2:8.

Gũus-y y meng n da wa rɩk dũniyã neb togs-n-taar ye. D tõe n wa tagsdame tɩ d segda ne bũmb kẽer n yɩɩd d taabã, n pa miẽ meng ye. A Zeezi wilga rẽ, a sẽn wa n wẽ yel-bũnd n gom tʋm-tʋmdb b sẽn yao deniye a ye yellã. Tʋm-tʋmdb kẽer sɩnga tʋm yibeoogã pĩnda, n tʋm daarã tõr tɩ wĩntoogã pãb-ba. Sãnda tʋma lɛɛr a ye bala. Pipi rãmbã tagsame tɩ b segda ne yaood sẽn yɩɩd rẽ, b sẽn tʋm wʋsgã yĩnga. (Mat. 20:1-16) A Zeezi wilga yel-bũndã võore, n yeel t’a karen-biisã sũur segd n yɩɩ noog ne bũmb nins Wẽnnaam sẽn kõt-bã.

D yɩ sõm-mitba, n da tagsdẽ tɩ yaa tɩlɛ tɩ nebã maan bũmb kẽer n kõ-d ye. (1 Tes. 5:18) D rɩk tẽn-tʋmd a Poll togs-n-taare. Baa ne a sẽn da tar sor n na n yeel Korẽnt tigingã neb tɩ b teel-a wã, a pa maan woto ye. (1 Kor. 9:11-14) D sũur segd n yɩɩ noog ne bõn-sõma nins d sẽn paamdã, n da tagsdẽ tɩ yaa tɩlɛ tɩ d taabã maan bũmb kẽer n kõ-d ye.

Bɩɩs-y sik-m-menga: Naoor wʋsgo, ned sã n tagsd a meng yell wʋsgo, a wat n getame t’a segd n paamame tɩ yɩɩg bũmb nins a sẽn tarã. D sã n yaa sik-m-meng soaba, na n sõngame tɩ d ra wa tall tagsg a woto ye.

No-rɛɛs a Dãniyɛll kõo mak-sõng sik-m-mengã wɛɛngẽ. A zakã rãmb ra yaa nin-kãsemse.  A ra yaa rasãn-beelle, n tar bãngr la minim bũmb wʋsg wɛɛngẽ me. Rẽ ra tõe n kɩtame t’a tagsdẽ t’a zemsa ne bũmb nins a sẽn paam Babilon na-yirã. (Dãn. 1:3, 4, 19, 20) La a Dãniyɛll kell n yɩɩ sik-m-meng soaba. Rẽ kɩtame t’a ra yaa ned sẽn tar yõod wʋsg a Zeova nifẽ.—Dãn. 2:30; 10:11, 12.

Bɩ d modg n da rɩk dũniyã neb wʋsg sẽn yaa rat-m-ye rãmbã togs-n-taar ye. D kell n maan sũ-noog ne bõn-sõma nins a Zeova sẽn maand-d lohorem n kõt-dã.