ZÃMSGÃ YĨNGA 8
YƖƖLL 130 D kõt taab sugri
Wãn to la d tõe n dɩk a Zeova togs-n-taar n kõt d taabã sugri?
“A Zeova sẽn sak n kõ yãmb sugrã, yãmb me segd n maana woto.”—KOLO. 3:13.
D SẼN NA N BÃNGE
Sõs-kãngã na n sõng-d lame tɩ d bãng bũmb nins d sẽn tõe n maan n kõ ned sẽn beeg-d sugri.
1-2. a) Wakat-bʋg la yaa toog n tɩ yɩɩd tɩ d kõ ned sugri? b) Bõe la a Deniiz maan tɩ wilg t’a yaa sug-kõata?
YÃMB mi n getame tɩ yaa toog tɩ y kõ y taabã sugr bɩ? Yaa woto ne tõnd sʋkã neb wʋsgo. Sẽn yɩɩd fãa ned sã n yeel gomd wall a maan bũmb tɩ sãam d sũur wʋsgo. La bũmb toor-toor la d tõe n maan tɩ d sũurã sigi, tɩ d sak n kõ sugri. Wala makre, saam-bi-poak a ye yʋʋr sẽn boond t’a Deniiz a wilgame t’a sɩd yaa sug-kõata. Yʋʋmd 2017 wã, a Deniiz ne a sɩdã la b kambã kẽng n tɩ kaaga a Zeova Kaset rãmbã biru-kãsengã b sẽn nan pak paalmã. B sẽn wa n lebg n kuiisẽ wã, mobill a to n fõ-ba. A Deniiz sobgame. A sẽn wa n vʋʋgã, a bãngame t’a kambã pogla wʋsgo, la t’a sɩd a Brayan kiime. A Deniiz tẽega yɛlã sẽn yɩ to-to daar-n-kãngã yell n yeel yaa: “M sũurã sãama wʋsgo, hal tɩ m da pa mi m sẽn maandg ye.” A wa n bãngame tɩ yellã sẽn maanã pa rao wã sẽn yũ rãam wall dorg yĩnga, pa rẽ bɩ a sẽn da pa get sorã sõma yĩng ye. Rẽ n so t’a pʋʋs a Zeova n kos t’a kõ-a sũur pʋgẽ bãane.
2 B ra segd n kaoo rao ning sẽn fõ-bã bʋʋdo, a sẽn yɩ sabab tɩ ned ki wã yĩnga. Bʋ-kaoodã sã n ning-a taale, b na n kẽes-a-la bãens roogo. La ned sẽn tʋmd bʋ-kaoorã zĩigẽ n yeel a Deniiz tɩ raoã yɛlã sẽn na n baas to-to wã bee ne a Deniiz sẽn na n yeel bũmb ning bʋ-kaoodã taoorã. A Deniiz yeelame yaa: “Yɩɩ wa ned sẽn ta gĩs nins b sẽn tall n sẽ mam noadã n tõse, n sudg mam sãmpoagã yamsem, m sẽn da segd n gom bũmb nins sẽn paam maamã yellã yĩnga.” Semen a wãn poor bala, a Deniiz kẽnga bʋʋdã zĩigẽ n na n tɩ gom yɛlã sẽn yɩ to-to wã yelle, rao ning sẽn maan b zakã rãmb wẽng wʋsgã taoore. Bõe la a yeel-yã? A Deniiz kosa bʋ-kaoodã t’a kõ raoã sugri. b A sẽn wa n gom n sa wã, bʋ-kaoodã raaga nintãm. A yeelame: “Yʋʋm 25 la woto m sẽn yaa bʋ-kaooda, la m zɩ n wʋm goam a woto buud bʋʋdã roogẽ ka ye. M zɩ n wʋm ned b sẽn kʋ zak rãmb sẽn kot tɩ b zoe sẽn maan-a yellã nimbãaneg ye. M zɩ n wʋm nonglem goam a woto, la ned sẽn sak n kõ sugr a woto ye.”
3. Bõe n sõng a Deniiz t’a sak n kõ sugri?
3 Bõe n sõng a Deniiz t’a sak n kõ sugri? A bʋgsa a Zeova sẽn kõt sugr to-to wã zugu. (Mis. 7:18) D sũur sã n noom ne a Zeova sẽn kõt-d sugr to-to wã, na n kɩtame tɩ d kõt d taabã sugri.
4. Bõe la a Zeova rat tɩ d maane? (Efɛɛz rãmbã 4:32)
4 A Zeova ratame tɩ d sakd n kõt d taabã sugr wa yẽ mengã sẽn sakd n kõt tõnd sugrã. (Karm-y Efɛɛz rãmb 4:32.) A ratame tɩ ned sã n maan bũmb n sãam d sũur bɩ d sak n kõ-a sugri. (Yɩɩn. 86:5; Luk 17:4) Sõs-kãngã pʋgẽ d na n yãa bũmb a tãab sẽn tõe n sõng-d tɩ d kõt sugr nana-nana.
RA MAAN-Y WA YELLÃ PA ZABD-Y YE
5. Sã n yaa ne Yel-bũn 12:18 sẽn yetã, ned sã n maan bũmb n sãam d sũuri, yɛlã tõe n yɩɩ wãn ne-do?
5 Ned tõe n yeela gomd wall a maan bũmb tɩ sãam d sũur wʋsgo, sẽn yɩɩd fãa sã n yaa d zoa, wall d zakã neda. (Yɩɩn. 55:12-14) Wakat ninga, bũmb tõe n sãama d sũur tɩ yaa wa b kõsd-d-la ne sʋʋga. (Karm-y Yel-bũn 12:18.) D tõe n modgame n maan wa yellã pa zabd-d ye. La d sã n maan woto, yaa wa b sẽn na n kõs-d ne sʋʋga, tɩ d bas sʋʋgã n pa yãk ye. Woto me, ned sã n maan bũmb n sãam d sũur tɩ d maand wa pa zabd tõnd bala, pa manegd yellã ye.
6. Ned sã n maan bũmb n sãam d sũuri d manesem tõe n yɩɩ wãna?
6 Ned sã n beeg-do, zĩig pʋgẽ d sũur tõe n yikame. Biiblã meng yeelame tɩ tõe n yɩɩ woto. La a sagend-d lame tɩ d ra bas tɩ d sũurã yik n kaoos ye. (Yɩɩn. 4:4; Efɛɛ. 4:26) Bõe yĩnga? Bala d sũurã sã n yiki, d tõe n yãka yam n maan bũmbu, la pa wae n yaa bõn-sõng ye. (Zak 1:20) Tẽeg-y tɩ ned sã n maan bũmb sẽn pa noom-do, tõe n yika d sũuri. La yaa tõnd n yãkd d sã n na n basame tɩ d sũurã sigi, bɩ d pa na n bas t’a sigi.
Tẽeg-y tɩ ned sã n maan bũmb sẽn pa noom-do, tõe n yika d sũuri. La yaa tõnd n yãkd d sã n na n basame tɩ d sũurã sigi, bɩ d pa na n bas t’a sigi
7. Ned sã n maan bũmb n sãam d sũuri, wãn to la tõe n nams-do?
7 Ned sã n maan tõnd wẽnga, tõe n nams-d-la wʋsgo. Wala makre, saam-bi-poak yʋʋr sẽn boond t’a Ann yeelame: “Mam sẽn wa n yaa kɩdgã, m baaba basa m ma, n kẽ kãadem ne pag ning b sẽn da rɩk t’a zãad maamã. M da getame tɩ b raaga maam n base. B sẽn wa n dog kambã, m da getame tɩ kom-kãens reega m zĩiga. M wa n bɩɩme n ket n tagsdẽ tɩ ned kae n nong maam ye.” Saam-bi-poak a ye yʋʋr sẽn boond t’a Zorzɛt wilga a tagsg sẽn yɩ to-to a sɩdã sẽn zamb-a wã poore. A yeelame: “D sɩng n yaa zo-rãmb hal d yãadmẽ. D ra naaga taab n yaa so-pakdba. Mam sũurã sãama wʋsgo.” Saam-bi-poak a ye yʋʋr sẽn boond t’a Naomi yeelame: “M zɩ n tags tɩ m sɩdã na n sãama m sũur ye. Rẽ n so t’a sẽn wa n togs-m t’a ra solgd n geta yoob yɛlã, m tagsame t’a belga maam la a zãmb-ma.”
8. a) Bõe yĩng tɩ d segd n kõt d taabã sugri? b) D sã n kõt sugri, wãn to la nafd tõndo? (Ges-y zĩ-gũbrã: “ Ned sã n maan tɩ d sũur sãam wʋsgo, d maanda wãna?”)
8 D pa tõe n kɩt tɩ neb a taabã pa gom goam kẽere, wall b pa maan bũmb n sãam d sũur ye. La d manesem sẽn na n yɩ to-to rẽ poorã bee ne tõndo. Naoor wʋsgo, d sẽn na n maan tɩ yɩ sõma n yɩɩd yaa d sẽn na n kõ sugri. Bala d nonga a Zeova, t’a rat tɩ d yɩ sug-kõatba. D sũur sã n yik n pa sigda, tɩ d pa rat n kõ sugr me, d tõe n wa yãka yam n maan bũmb sẽn pa sõma. Leb n tõe n booga d yĩisã laafɩ. (Yel. 14:17, 29, 30) D gom saam-bi-poak yʋʋr sẽn boond t’a Kiristin yelle. A yeelame yaa: “Mam sũurã sã n yiki, wall ned sã n beeg maam, m pa le laad wʋsg ye. M wae n dɩta yaare. M pa wae n gõe tɩ sekdẽ ye. Lebgda toog tɩ m tõog m menga, tɩ rẽ mi n wat ne zu-loees maam ne m sɩdã sʋka, la maam ne neb a taabã sʋka.”
9. Bõe yĩng tɩ d segd n bas sũ-kẽka?
9 Baa ned ning sẽn beeg tõndã sã n pa sak n deeg t’a kongame, bũmb n be d sẽn tõe n maan tɩ yellã ra nams-d wʋsg ye. Bõn-kãng yaa bõe? A Zorzɛt sẽn yaa saam-bi-poak ning yell d sẽn zoe n gomã yeelame yaa: “Rɩka sẽka, la m wa n tõog n sigsa m sũurã, n pa le maand sũ-kẽk ne m sɩd-kʋdgã ye. Kɩtame tɩ m paam sũur pʋgẽ bãane.” D sã n modg n bas sũ-kẽkã, d pa na n lebg sũ-to-ned ye. D maanda d meng neere. Bala na n kɩtame tɩ d pa le tagsd yellã sẽn namsd tõndã yelle, tɩ d sũur le noom ne d menga. (Yel. 11:17) La y sã n maan woto fãa tɩ ket n yaa toog ne-y tɩ y kõ sugri, bõe la y tõe n maane?
Y SẼN TÕE N MAAN TO-TO TƖ Y SŨUR SIGI
10. Ned sã n maan bũmb n sãam d sũuri, bõe yĩng tɩ tõe n kaoos bilf tɩ d yaool n tõog n kõ a soabã sugri? (Ges-y fot-rãmbã me.)
10 Bõe la y tõe n maan tɩ y sũur sigi? Bũmb a ye yaa y sẽn na n bas tɩ kaoos bilfu. Ned sã n pogl tɩ b na n tɩp-a, tõe n kaoosa bilf t’a yaool n paam laafɩ zãnga. Woto me, ned sã n maan bũmb n sãam d sũuri, tõe n kaoosa bilf tɩ d yaool n tõog n kõ a soabã sugr ne d sũur fãa.—Koɛ. 3:3; 1 Pɩy. 1:22.
Ned sã n pogl tɩ b na n tɩp-a, tõe n kaoosa bilf t’a yaool n paam laafɩ zãnga. Woto me, ned sã n maan bũmb n sãam d sũuri, tõe n kaoosa bilf tɩ d yaool n tõog n kõ-a sugri (Ges-y sull 10)
11. Wãn to la pʋʋsgã tõe n sõng-y tɩ y kõ sugri?
11 Pʋʋs-y-yã a Zeova n kos t’a sõng-y tɩ y yɩ sug-kõata. c A Ann sẽn yaa saam-bi-poak ning yell d sẽn zoe n gomã wilga pʋʋsgã sẽn sõng-a to-to. A yeelame: “Mam kosa a Zeova t’a kõ d zakã ned kam fãa sugr bũmb a sẽn yeel wall a sẽn maan tɩ pa zems yĩnga. Rẽ poore m gʋlsa lɛtr n kõ m baaba ne a pagã, n wilg-b tɩ m kõ-b-la sugri.” A Ann sak n deegame tɩ rẽ maaneg pa yɩ nana ye. La a paasame: “M saagdame tɩ m sẽn modgd n na n dɩk a Zeova sẽn yaa sug-kõatã togs-n-taarã na n kɩtame tɩ m baaba ne a pagã bao n bãng a Zeova.”
12. Bõe yĩng tɩ d segd n teeg a Zeova, la pa d sũurã? (Yel-bũnã 3:5, 6)
12 Teeg-y-yã a Zeova, n tẽeg tɩ y sũurã tõe n belg-y lame. (Karm-y Yel-bũn 3:5, 6.) A Zeova mii bũmb ning sẽn yaa sõma ne tõndã wakat fãa. (Eza. 55:8, 9) A pa na n tol n yeel-d tɩ d maan bũmb sẽn na n wã-d ye. Rẽnd a sẽn yeel tɩ d kõt sugrã, d tõe n kɩsa sɩd tɩ d sã n maand woto, yaa d mengã la nafda. (Yɩɩn. 40:4; Eza. 48:17, 18) La d sã n teeg d sũurã tagsgo, tõe n yɩ toog ne-d tɩ d kõ sugri. (Yel. 14:12; Zer. 17:9) A Naomi sẽn yaa pag ning yell d sẽn zoe n gomã yeelame yaa: “Sɩngrẽ wã, m da getame tɩ m sẽn pa kõ m sɩdã sugr a sẽn da get yoob yɛlã yĩngã, m bee bʋʋm. M da yɛɛsdame t’a na n le wa sãama m sũuri, bɩ a na n yĩmame t’a sẽn maan bũmb ningã nams-m-la wʋsgo. M da yeta m meng t’a Zeova wʋmda m sẽn tagsd woto wã võore. La m wa n bãngame t’a sẽn wʋmd m tagsgã võorã pa rat n yeel tɩ rẽ tata a yam ye. A mii rẽ sẽn namsd-m to-to wã, la tɩ yɩl tɩ m sũurã sigã rɩkda sẽka. Baasgo, a ratame tɩ m kõ sugri.” d
KƖT-Y TƖ NONGLEM LEDG SŨ-KẼKÃ
13. Sã n yaa ne Rom dãmb 12:18-21, bõe la d segd n maane?
13 Ned sã n maan bũmb n sãam d sũur wʋsg tɩ d kõ-a sugri, d pa na n yãk yam n pa na n le gom a sẽn maanã yell bal ye. D na n maana sẽn yɩɩd rẽ. Sẽn beeg-a tõndã sã n yaa d tẽed-n-taaga, d raab yaa tɩ laafɩ le zĩnd d sʋka. (Mat. 5:23, 24) D pa na n tall sũ-kẽk ne-a ye. D na n sika d sũurã, n zoee a nimbãaneg la d kõ-a sugri. (Karm-y Rom dãmb 12:18-21; 1 Pɩy. 3:9) Bõe n tõe n sõng-d tɩ d maan rẽ?
14. Bõe la d segd n modg n maane, la bõe yĩnga?
14 D segd n modg n gesa ned ning sẽn beeg tõndã wa a Zeova sẽn get-a to-to wã. A Zeova yãka yam n get sẽn yaa sõma ninsaalbã nengẽ wã. (2 Kib 16:9; Yɩɩn. 130:3) Naoor wʋsgo, d sẽn gẽesd bũmb ning nebã nengẽ wã la d yãta. D sã n gẽesd zʋg-sõma d yãtame. Sã n yaa zʋg-wẽns me, d na n yãame. D sã n get neb a taabã zʋg-sõma wã, d na n kõt-b-la sugr nana-nana. Saam-biig a ye yʋʋr sẽn boond t’a Zarɛɛd yeelame: “Saam-biig sã n beeg maam tɩ m dɩk a beegrã n mak ne zʋg-sõma wʋsgã a sẽn tar tɩ noom maamã, lebgda nana tɩ m kõ-a sugri.”
15. D sã n kõ ned sugri, bõe yĩng tɩ yaa sõma tɩ d togs a soabã?
15 Bũmb a to sẽn tar yõod d sẽn tõe n maan yaa d sẽn na n yeel sẽn beeg-a tõndã tɩ d kõ-a-la sugri. Bõe yĩnga? Ges-y bũmb ning a Naomi sẽn yeele: “Mam sɩdã soka mam yaa: ‘Fo kõ-m-la sugr bɩ?’ Mam sẽn yaag m noorã n na n yeel tɩ m kõ-a-la sugrã, m pa tõog n gom ye. Mam bãngame tɩ m da pa kõ-a sugr ne m sũur fãa ye. Kaoosa bilfu, tɩ m yaool n wa tõog n yeel tɩ m kõ-a-la sugri. Mam sẽn yeel woto wã, m sɩdã raaga nintãm. A sũurã yɩɩ noog wʋsg hal tɩ ling-ma. Ma-me yamã gãanda bãane. Rẽ tɛka, m le kɩs-a-la sɩda. D le lebga zo-rãmb hakɩɩka.”
16. Bõe la y bãng sugrã kũun wɛɛngẽ?
16 A Zeova ratame tɩ d yɩ sug-kõatba. (Kolo. 3:13) Baa ne rẽ, tõe n yɩɩ toog tɩ d kõt d taabã sugri. La ned sã n maan bũmb n sãam d sũur tɩ d rat n kõ-a sugri, d sã n pa maan wa yellã pa zabd tõndo, la d modg sẽn na yɩl tɩ d sũurã sigi, d tõogd n kõo a soabã sugri. Rẽ poore, d tõogd n kɩtame tɩ nonglem ledg sũ-kẽkã.—Ges-y zĩ-gũbrã: “ Bũmb a tãab y sẽn tõe n maan tɩ sõng-y tɩ y kõ sugri.”
TAGS-Y SUGRÃ KŨUN SẼN NA N NAF-Y TO-TO WÃ YELLE
17. D sã n yaa sug-kõata, wãn to la nafd tõndo?
17 Bũmb wʋsg n kɩt tɩ d segd n yɩ sug-kõatba. D gom bãmb b wãn bal yelle. Pipi, d sã n kõt sugri, d rɩkda d Ba a Zeova sẽn yaa nimbãan-zoɛtã togs-n-taare, n tat a yam. (Luk 6:36) Yiibu, d wilgdame tɩ d sũur nooma ne a Zeova sẽn kõt-d sugrã. (Mat. 6:12) Tãabo, paasda d yĩisã laafɩ la kɩtdẽ tɩ tõnd ne neb a taabã zemsd taab sõma.
18-19. D sã n kõt sugri, tõe n waa ne bark-bʋse?
18 D sã n kõt d taabã sugri, tõe n waa ne bark d sẽn da pa tẽede. Wala makre, ges-y-yã a Deniiz yellã sẽn baas to-to. Rao ning sẽn yɩ sabab t’a sɩdã ki wã ra magd n na n kʋʋ a meng bʋʋdã kaoob poore. La a Deniiz ra pa mi rẽ ye. La a sẽn kõ-a sugrã yɩ-a-la noog wʋsgo, hal t’a sɩng Biiblã zãmsg ne a Zeova Kaset rãmbã.
19 D tõe n wa getame tɩ kõ ned sugr yaa toog wʋsgo. La tõe n waa ne bark wʋsgo. (Mat. 5:7) Woto wã, bɩ d fãa maan d sẽn tõe fãa n dɩk a Zeova togs-n-taar n kõt sugri.
YƖƖLL 125 Bark bee nimbãan-zoɛtbã zutu
a D toeema yʋy kẽere.
b Yell a woto taoore, yaa kiris-ned kam fãa n yãkd a sẽn na n maanega.
c Kẽ-y jw.org n ges yɩɩn-nood nins gom-zut sẽn yaa: “Pardonnons-nous les uns aux autres,” “Aide-moi à pardonner,” la “L’amitié retrouvée” wã video-rãmba.
d Yaa sɩd tɩ ned sã n ges yoob yɛla a maana yel-wẽnde, n sãam a pagã bɩ a sɩdã sũur wʋsgo. La Biiblã pa kõ sor tɩ ned tõe n tik yoob yɛl gesg n kao kãadem ye.
