Y ZOE n tagsame tɩ y maooda ne y zu-loeesã y yembre, n pa tar sõangd bɩ? Rũndã-rũndã, yɛlã yaa “kãn-kãe hal tɩ vɩɩmã lebg toogo,” tɩ tõe n koms d raood wall kɩt tɩ d tagsdẽ tɩ d yaa d yembre. (2 Tɩm. 3:1) La pa tɩlɛ tɩ d mao ne d zu-loeesã d yembr ye. Biiblã wilgame tɩ “yel-pakr wakate,” d sã n tar zo-rãmb hakɩɩka sõngdame.—Yel. 17:17.

Tẽn-tʋmd a Poll sẽn wa n togd sor n moond koɛɛgã, a zo-rãmb n da yãagd-a n maand bũmb toor-toor n sõngd-a. (Kolo. 4:7-11) B sẽn wa n yõk a Poll n pag bãens roog Rommã, a zo-rãmb n maan bũmb nins a sẽn da pa tõe n maan a toorã. Wala makre, a Epafordit talla bũmb toor-toor Filip saam-biisã la saam-bi-pogsã sẽn toole, n wa kõ a Polle. (Fili. 4:18) A Tisik talla lɛta a Poll sẽn gʋlse, n tɩ kõ tigims toor-toore. (Kolo. 4:7) A Poll tõog n kell n tʋma a tʋʋmdã baa b sẽn wa n yõk-a n pag roog tɩ sodaas gũud-a wã, wall a sẽn wa n be bãensã roogẽ wã, ne a zo-rãmbã sõngre. Bõe la y tõe n maan n yɩ zoa hakɩɩk rũndã-rũndã?

Kibay wʋsg n be n wilgd zo-rãmb hakɩɩk sẽn sõngd taab to-to rũndã-rũndã. A Elizabɛt sẽn yaa wakat fãa so-pakd n be Ɛspayn wã paamame tɩ saam-bi-poak wilg t’a yaa a zoa hakɩɩka. Logtoɛɛmbã wa n yeelame t’a Elizabɛt ma wã bẽeda kãnsɛɛr bãag sẽn pa tar tɩɩm. Rẽ poore, saam-bi-poakã tool-a-la mesaaz-rãmb wʋsg sẽn tik Biiblã zug n keng a raoodo. A Elizabɛt yeelame: “Mesaaz-kãens ra kengda m daood daar fãa, la sõng tɩ m da pa tagsdẽ tɩ m yaa m yembr ye.”—Yel. 18:24.

D sã n sõngd d tẽed-n-taasã tɩ b kẽesd b mens tigingã tʋʋm pʋsẽ, tõe n kɩtame tɩ d zoodã pãng paase. Wala makre, y tõe n kẽnd n dɩkda y saam-biig wall y saam-bi-poak yʋʋm sẽn vẽsg n kẽnd tigissã wall koɛɛgã moonego. Y sã n maand woto, yaa vẽeneg tɩ y na n kenga taab raoodo. (Rom. 1:12) La d tẽed-n-taas kẽer n be b zagsẽ n pa tõe n yi ye. Bõe la d tõe n maan n wilg tɩ d yaa b zo-rãmb hakɩɩka?

Bãag wall bũmb a to tõe n kɩtame tɩ d tẽed-n-taas kẽer pa tõe n kẽng tigissã ye. D gom saam-biig a ye yʋʋr sẽn boond t’a Davɩɩd sẽn da bẽed kãnsɛɛr bãag yelle. B tɩp-a-la ne tɩbsg buud sẽn boond tɩ simiyoterapi n kaoos kiuug a yoob la rasem a wanã. Wakat kãnga, a Davɩɩd ne a pag a Lidiya ra maanda tigissã ne videokõnferãns maasem.

Bõe la tigingã neb maan n sõng-ba? Tigsg fãa poore, sẽn be-b Rĩungã roogẽ wã kẽer da modgdame n gomd ne a Davɩɩd la a Lidiya ne videokõnferãnsã maasem. Sẽn paase, a Davɩɩd  ne a Lidiya sã n da zẽk b nug n leok sokre, tigsgã poore b tẽed-n-taasã toond-b-la mesaaz-rãmb n wilg tɩ b sũur yɩɩ noog ne b leoorã. Wãn to la rẽ naf-ba? Kɩtame t’a Davɩɩd ne a Lidiya ra neẽ tɩ b tẽed-n-taasã nong-b lame.

D tõe n naagda d tẽed-n-taas nins sẽn pa tõe n yi b zagsẽ wã me n moond koɛɛgã. D tõe n toeema d sẽn moond to-to wã bilfu, sẽn na yɩl n naagd-b n moond koɛɛgã. Woto, d wilgdame tɩ d pa yĩm b yell ye. (Yel. 3:27) D tõe n yãka wakat n naag-b n gʋls lɛta, wall d moon ne telefõnne. Neb nins sẽn pa tõe n yi b zagsẽ wã kẽer tõe n naag n maana koe-moonegã tigsgã ne videokõnferãns maasem. A Davɩɩd ne a Lidiya sũur nooma b sẽn da tõe n maan woto wã. A Davɩɩd yeelame: “D sã n da mi n paam n sõs ne d tẽed-n-taasã baa yaa bilfu, la d naag-b n pʋʋse, kengda d raood wʋsgo.” Sẽn paase, sã n mik tɩ y tõe n talla y Biibl karen-biig n kẽng koe-moond sẽn pa tõe n yi a zakẽ nengẽ, tɩ y naag taab n maan Biiblã zãmsg tɩ yell ka zĩndi, y tõe n maanda woto wakat-wakate.

D sã n naagd d tẽed-n-taas nins sẽn pa tõe n yi b zagsẽ wã n maand bũmb kẽere, d na n nee b zʋg-sõma wã, tɩ kɩt tɩ d maneg n nong-ba. Wala makre, y sã n naagd-b n moond koɛɛgã, n ne b sẽn maand to-to sẽn na yɩl tɩ Wẽnnaam goamã kẽ nebã sũyã, na n kɩtame tɩ y sũur maneg n noom ne-ba. Y sã n sõngd y tẽed-n-taasã tɩ b maand bũmb kẽer a Zeova tũudmã pʋgẽ, tõe n kɩtame tɩ y zo-rãmbã sõor paase.—2 Kor. 6:13.

A Poll sẽn wa n maood ne zu-loeesã, a zoa a Tɩt tɩ kaag-a lame tɩ keng a raoodo. (2 Kor. 7:5-7) Kiba-kãng wilgdame tɩ pa ne d no-goamã bal la d tõe n bels d tẽed-n-taasã ye. D sã n be ne-b la d maand bũmb toor-toor n sõngd-b me, kengda b raoodo.—1 Zã 3:18.

D tẽed-n-taas nins sẽn be Risi wã kõo mak-sõng teel-taabã wɛɛngẽ. Ges-y b sẽn sõng a Sergey ne a pag a Tatyana to-to. Polɩɩs-rãmbã wa n vaeesa b roogã la b tall-b n loog n na n tɩ sok sogsgo. Yɩɩ a Tatyana la b bas pipi t’a lebg b kuili. A Sergey yeelame: “A Tatyana sẽn ta yirã bala, saam-bi-poak a ye n tall raood n tɩ kaag-a. D zo-rãmb a taab n wa n sõng-a n maneg roogã sẽn da yaa zũna wã.”

A Sergey paasame: “Mam sɩng n nonga Yel-bũn 17:17 sẽn yet bũmb ningã. B yeta be yaa: ‘F zoa hakɩɩk nong-f-la wakat fãa. A yaa f ba-biig f sẽn tõe n teeg yel-pakr wakate.’ B sẽn wa n namsd tõnd d tẽebã yĩng tɩ m pa tõe n mao ne m zu-loeesã m yembrã, m yãa vẽeneg tɩ vɛrse wã goamã yaa sɩda. A Zeova kõ-m-la zo-rãmb sẽn tar raood tɩ b ra sõngd-ma.” a

Zu-loeesã sẽn paasd rũndã-rũndã wã kɩtame tɩ d rat zo-rãmb d sẽn tõe n teege. Yaa to-kãsengã sasa la d na n dat b sõngr n tɩ yɩɩda. Rẽ wã, bɩ d maan d sẽn tõe n fãa n yɩ zoa hakɩɩk masa menga.—1 Pɩy. 4:7, 8.