ZÃMSGÃ YĨNGA 4
YƖƖLL 18 Bark pʋʋsgo, Kiris maoongã yĩnga
A Zeezi sẽn ki tɩ yɩ maoongã wilgda tõnd bõe?
“Ad Wẽnnaam sẽn wilg a nonglmã to-to.”—1 ZÃ 4:9.
D SẼN NA N BÃNGE
D na n yãa a Zeezi sẽn ki tɩ yɩ maoongã sẽn sõngd tõnd tɩ d bãng bũmb nins Wẽnnaam a Zeova la a Zeezi Kirist zʋg-sõma wã wɛɛngẽ.
1. D sã n kẽnd a Zeezi Kirist kũumã tẽegr b sẽn maand yʋʋmd fãa, wãn to la nafd tõndo?
YAA vẽeneg tɩ y na n sak n deegame t’a Zeezi sẽn ki tɩ yɩ maoongã yaa kũun yõod sẽn pa tõe n bãng n bilgi. (2 Kor. 9:15) A Zeezi sẽn kõ a vɩɩmã tɩ yɩ maoongã maasem yĩnga, y tõe n paam n lebga Wẽnnaam a Zeova zoa. Y tõe n wa paam n vɩɩmda wakat sẽn kõn sa me. Rẽnd zemsame tɩ d wilg tɩ d sũur yaa noog ne a Zeova sẽn yaa soab ning sẽn kɩt t’a Zeezi wa ki tɩ yɩ maoongo, a sẽn nong tõndã yĩnga. (Rom. 5:8) Sẽn na yɩl n sõng-d tɩ d ra tol n yĩm a Zeezi sẽn ki tɩ yɩ maoongã la d ket n wilgdẽ tɩ d sũur yaa noog ne rẽ, a Zeezi yeelame tɩ d maand a kũumã tẽegr yʋʋmd fãa.—Luk 22:19, 20.
2. Bõe yell la d na n gom sõs-kãngã pʋgẽ?
2 Rõandã, d na n maana a Zeezi kũumã tẽegr yʋʋmd 2025 tʋʋl-nif kiuug rasem 12 sẽn yaa sibr daarã. Yaa vẽeneg tɩ d fãa magd n na n waame. Tẽegrã sã n wa kolgdẽ la a loogr poore, d sã n bao weer n bʋgs a bũmb nins a Zeova ne a Biigã sẽn maan tõnd yĩngã zugu, na n naf-d-la wʋsgo. Sõs-kãngã pʋgẽ, d na n yãa a Zeezi sẽn ki tɩ yɩ maoongã sẽn wilgd tõnd bũmb nins a Zeova la a Biigã zugu. Sõsg ning sẽn pʋgdã na n sõng-d lame tɩ d bãng d sẽn tõe n dɩ a Zeezi sẽn ki tɩ yɩ maoongã yõod to-to, la bũmb nins d sẽn tõe n maan n wilg tɩ d sũur nooma ne rẽ.
A ZEEZI SẼN KI TƖ YƖ MAOONGÃ SẼN WILGD TÕND BŨMB NING A ZEOVA ZUGU
3. Bõe yĩng tɩ nin-yɛng kũum tõe n fãag neb milyõ-rãmba? (Ges-y fotã me.)
3 A Zeezi sẽn ki tɩ yɩ maoongã wilgda tõnd bũmb wʋsg a Zeova tɩrlmã zugu. (Tõo. 32:4) Wãn to? Tags-y n ges-y-yã: A Ãdem kɩɩsgã kɩtame tɩ d rogd ne yel-wẽndã, n yaa kiidba. (Rom. 5:12) Sẽn na yɩl n fãag tõnd ne yel-wẽndã la kũumã, a Zeova kɩtame t’a Zeezi wa ki tɩ yɩ maoongo. La wãn to la nin-yɛng sẽn zems zãng kũum tõe n fãag neb milyõ-rãmba? Tẽn-tʋmd a Poll yeelame yaa: “Rao a yembr [a Ãdem] kɩɩsg yĩnga, neb wʋsg lebga yel-wẽn-maandba. Woto me, ned a yembr [a Zeezi] sakr yĩnga, neb wʋsg na n lebga nin-tɩrse.” (Rom. 5:19; 1 Tɩm. 2:6) A Poll gomdã rat n yeelame tɩ yaa nin-yɛng sẽn zems zãng kɩɩsg n kɩt tɩ tõnd fãa lebg yel-wẽndã la kũumã yembse. Rẽnd nin-yɛng sẽn zems zãng sakr me tõe n kɩtame tɩ d paam d mense.
Rao a ye n kɩt tɩ tõnd lebg yel-wẽndã la kũumã yembse. Woto me, rao a ye n kɩt tɩ d paam d mense (Ges-y sull a 3)
4. Bõe yĩng t’a Zeova pa bas t’a Ãdem kamb la a yagens nins sẽn yaa sakdbã kell n vɩɩmd wakat sẽn kõn sa woto bala?
4 Sɩd ra yaa tɩlɛ t’a Zeezi ki sẽn na yɩl n fãag tõnd bɩ? A Zeova ra pa tõe n bas t’a Ãdem kamb la a yagens nins sẽn na n sak-a wã kell n vɩɩmd wakat sẽn kõn sa woto bal sɩda? Ninsaalbã sẽn pa zems zãngã tõe n tagsdame t’a sã n da maan woto n welg yellã, yɩta sõma. La rẽ ra pa na n zems ne a Zeova tɩrlmã sẽn zems zãngã ye. A Zeova sẽn yaa tɩrgã yĩnga, a ra pa tõe n maan wa a Ãdem zɩ n beeg ye.
5. Bõe n kɩt tɩ d tõe n kɩs sɩd t’a Zeova maanda sẽn yaa tɩrg wakat fãa?
5 La a Zeova sã n da pa kɩt t’a Zeezi wa ki tɩ yɩ maoongo, n kɩɩs noy nins a sẽn gãneg tɩrlmã wɛɛngẽ wã n bas t’a Ãdem kamb la a yagens vɩɩmd wakat sẽn kõn sa, bõe n da na n maane? Nebã ra tõe n sokda b mens a sã n pa na n le wa kɩɩs no-kãens bũmb a taab wɛɛngẽ. Wala makre, b tõe n sokda b mens a sã n na n pidsa a pʋlemsã fãa. La d tõe n kɩsa sɩd ne a pʋlemsã fãa. Bõe yĩnga? Bala a Zeova kell n maana sẽn yaa tɩrga, baa sẽn pa yɩ nana ne-a wã. Yɩɩ tɩlɛ t’a kõ a Bi-nongrã tɩ yɩ maoongo. Woto kɩtame tɩ d tõe n bas d yam t’a maanda sẽn yaa tɩrg wakat fãa.
6. A Zeezi sẽn ki tɩ yɩ maoongã wilgd tõnd bõe a Zeova nonglmã wɛɛngẽ? (1 Zã 4:9, 10)
6 Yaa sɩd t’a Zeezi sẽn ki tɩ yɩ maoongã sõngda tõnd tɩ d bãng t’a Zeova yaa tɩrga. La sẽn yɩɩd fãa, sõngda tõnd tɩ d bãng t’a Zeova nonglmã yaa kãsenga. (Zã 3:16; karm-y 1 Zã 4:9, 10.) A Zeova sẽn tʋm a Zeezi t’a wa ki tɩ yɩ maoongã wilgdame t’a ratame tɩ d vɩɩmd wakat sẽn kõn sa. La pa rẽ bal ye. Wilgdame me t’a ratame tɩ d lebg a zakã neba. Tags-y n ges-y-yã: A Ãdem sẽn wa n maan yel-wẽndã, a Zeova rig-a lame n yiis a zakã rãmb sʋka. Rẽ kɩtame tɩ d pa rogd n yaa a Zeova zakã ned ye. La a Zeezi sẽn ki tɩ yɩ maoongã maasem yĩnga a Zeova kõta d yel-wẽnã sugri, n na n wa kɩt tɩ neb nins fãa sẽn tẽed-a la b sakd-a wã lebg a zakã neba. La baa masã menga, d tõe n paama zood sẽn yaa sõma ne a Zeova la ne d tẽed-n-taasã. Hakɩɩka, a Zeova sɩd nonga tõndo!—Rom. 5:10, 11.
7. A Zeezi sẽn namsã sõngda tõnd tɩ d bãng bõe a Zeova sẽn nong tõnd to-to wã wɛɛngẽ?
7 D sã n tags a Zeezi sẽn ki tɩ yɩ maoongã sẽn nams a Zeova to-to wã zugu, sõngd-d lame tɩ d bãng a sẽn nong tõnd to-to wã sẽn ta zĩig ninga. A Sʋɩtãan yeelame tɩ wẽn-tũud baa a ye pa na n kell n maan sɩd ne Wẽnnaam, sã n wa mik tɩ yaa toog ne-a ye. Sẽn na yɩl n wilg tɩ rẽ yaa ziri, a Zeova basame t’a Zeezi nams n yaool n ki. (Zoob 2:1-5; 1 Pɩy. 2:21) Tũudmã taoor dãmb sẽn wa n yaand a Zeezi wã, sodaasã sẽn wa n pãbd-a wã, la b sẽn wa n kaad-a ra-lukã zugã t’a Zeova neeme. Rẽ poore, a Zeova Bi-nongrã paa ra-lukã zug n nams hal n wa ki, t’a Zeova getẽ. (Mat. 27:28-31, 39) Sẽn da yaa wakat ning fãa, a Zeova ra tõe n kɩtame t’a Zeezi namsgã sa. Wala makre, bɛɛbã sẽn wa n yeele: “Bɩ Wẽnnaam fãag-a masã, sã n mik t’a taa a yamã,” a Zeova ra tõe n maana woto. (Mat. 27:42, 43) La Wẽnnaam sã n da maan woto, a Zeezi ra pa na n ki tɩ yɩ maoong ye. Tõnd da pa na n paam saagr me ye. Rẽ n so t’a Zeova bas t’a Biigã nams hal n tãag a kũum.
8. Bõe n kɩt tɩ d miẽ t’a Zeova sẽn wa n get a Biigã sẽn namsdã, sãama a sũur wʋsgo. (Ges-y fotã me.)
8 A Zeova sẽn wa n get a Biigã sẽn namsd n pa kẽes a toogã, rat n yeelame tɩ bũmb pa tõe n yɩ-a noog wall sãam a sũur bɩ? Ayo. A naana ninsaalbã tɩ bũmb tõe n yɩ-b noog wall sãam b sũuri. Biiblã sẽn yeel t’a naana tõnd a meng wõnegã yĩnga, rat n yeelame tɩ bũmb tõe n yɩ-a-la noog wall sãam a sũuri. Sɩd me, Biiblã yeelame tɩ wakat n zĩnd t’a “sũur sãam wʋsgo.” (Yɩɩn. 78:40, 41) Woto wã, a Zeova sẽn wa n get a Biigã t’a namsdẽ wã, a tagsg yɩɩ wãna? Tẽeg-y-yã a Abrahaam ne a Izaak kibarã yelle. A Zeova yeela a Abrahaam t’a rɩk a bi-yendã n kõ tɩ yɩ maoongo. (Sɩng. 22:9-12; Ebre. 11:17-19) Mams-y n ges-y-yã a Abrahaam sũurã sẽn da sãam to-to, a sẽn wa n segend a meng n na n kʋ a Izaak ne sʋʋgã. La sẽn yɩɩd fãa, mams-y n ges-y-yã a Zeova sũurã sẽn sãam to-to, a sẽn wa n get a Biigã tɩ wẽn-kɩɩsdbã tar-a n namsdẽ hal t’a wa ki wã.—Kẽ-y jw.org n ges video ning gom-zug sẽn yaa: Tall-y b tẽebã buudu: A Abrahaam, babg a 2.
A Zeova sẽn wa n getẽ tɩ b namsd a Biigã, sãama a sũurã wʋsgo (Ges-y sull a 8)
9. Bõe la Rom dãmb 8:32, 38, 39 sõng yãmb tɩ y bãng a Zeova nonglmã wɛɛngẽ?
9 A Zeezi sẽn ki tɩ yɩ maoongã wilgdame tɩ ned kae n nong tõnd n ta a Zeova ye. Baa d roagdbã wall d zo-rãmbã. (Karm-y Rom dãmb 8:32, 38, 39.) D tõe n kɩsa sɩd zãng-zãng t’a Zeova nonga tõnd n yɩɩd tõnd mengã. Yãmb dat n vɩɩmda wakat sẽn kõn sa bɩ? A Zeova sẽn dat rẽ wã n yɩɩda. Yãmb dat n paama y yel-wẽnã sugr bɩ? A Zeova ratame tɩ y paam sugr n yɩɩda. A sẽn dat bal yaa d wilg tɩ d sũur nooma a sẽn kɩt t’a Zeezi wa ki tɩ yɩ maoongã, n tẽ yẽ la d sak-a. A Zeezi sẽn ki tɩ yɩ maoongã wilgdame tɩ Wẽnnaam sɩd nonga tõndo. Dũni-paalgã pʋgẽ, d na n bãnga bũmb wʋsg n paas a Zeova nonglmã zugu.—Koɛ. 3:11.
A ZEEZI SẼN KI TƖ YƖ MAOONGÃ SẼN WILGD TÕND YẼ MENGÃ ZUGU
10. a) A Zeezi sã n da tagsd b sẽn na n kʋ-a to-to wã yelle, bõe n da sãamd a sũur n tɩ yɩɩda? b) Bõe la a Zeezi maan n kɩt t’a Zeova yʋʋrã paam waoogre? (Ges-y zĩ-gũbrã me: “ A Zeezi sẽn kell n maan sɩdã kɩtame t’a Zeova yʋʋrã paam waoogre.”)
10 A Zeezi ratame t’a Ba wã paam yʋ-noog ne a sũur fãa. (Zã 14:31) A Zeezi sã n da tagsd b sẽn na n dõd-a t’a yaa wẽn-tʋʋs la tõatã sẽn tõe n sãam a Ba wã yʋʋrã yelle, ra sãamda a sũurã wʋsgo. Yaa rẽ yĩng la a sẽn pʋʋs Wẽnnaam n yeel yaa: “M Ba, sã n tõe bɩ f kɩt tɩ bõn-yũudl-kãngã loog n bas maam.” (Mat. 26:39) A Zeezi sẽn kell n sak a Zeova n tãag a kũumã, a wilgdame t’a Sʋɩtãan sẽn yet bũmb ning a Ba wã zugã yaa ziri.
11. Wãn to la a Zeezi wilg t’a nonga ninsaalbã wʋsgo? (Zã 13:1)
11 A Zeezi sẽn ki tɩ yɩ maoongã wilgdame t’a nonga nebã wʋsgo, sẽn yɩɩd fãa a karen-biisã. (Yel. 8:31; karm-y Zã 13:1.) Wala makre, a Zeezi ra miime tɩ bũmb kẽer a sẽn na n maan tẽngã zugã na n yɩɩ toog wʋsgo, sẽn yɩɩd fãa a sẽn na n ki kũ-toaagã. Baasgo, a sẽn wa n be tẽngã zugã, a ra pa tʋmd a tʋʋmdã rok-m-zugẽ ye. A ra moonda koɛɛgã ne a sũur fãa, n zãmsd nebã la a sõngd-ba. Baa a Zeezi yõkrã yʋngo, a waasa a tẽn-tʋmdbã naoã, n zãms-b bũmb wʋsgo, n keng b raood la a bels-ba. (Zã 13:12-15) Rẽ poore, baa a sẽn wa n be ra-lukã zug n namsdẽ wã, a kõo bi-bɛɛg b sẽn da ka n yɛgl-a saagre, la a wilg t’a ma wã yell pak-a lame, n kos a Zã t’a yõd n ges a yelle. (Luk 23:42, 43; Zã 19:26, 27) Rẽnd pa a Zeezi sẽn ki ninsaalbã yĩngã bal n wilgd t’a nong-b-la wʋsg ye. A sẽn maan bũmb nins a vɩɩmã tõrã me wilgda rẽ.
12. Bõe yĩng tɩ d tõe n yeel t’a Zeezi ket n kõta a meng tɩ yaa maoong tõnd yĩnga?
12 Yaa sɩd t’a Zeezi kii “vugr wakat fãa yĩnga,” la a ket n kõta a meng tõnd yĩnga. (Rom. 6:10) Wãn to? A ket n tʋmda wʋsg sẽn na yɩl tɩ d rɩ a sẽn ki tɩ yɩ maoongã yõodo. Tags-y n ges-y-yã a sẽn maand bũmb nins rũndã-rũndã wã. A yaa d Rĩma, maan-kʋʋdb kãsmã, la tigingã Zu-soaba. (1 Kor. 15:25; Efɛɛ. 5:23; Ebre. 2:17) A getame tɩ b tigimd sẽn paam-b vʋʋsem sõng zaeebã la kʋʋn-kãsengã sẽn yaa tʋʋmd b sẽn segd n tʋm n baas nand tɩ to-kãsengã sa wã. b (Mat. 25:32; Mark 13:27) A getame me tɩ d paamd bũmb nins sẽn yaa tɩlɛ sẽn na yɩl tɩ d kell n maan sɩd ne a Zeova yaoolem wakatã sasa wã. (Mat. 24:45) Sẽn paase a naamã sẽn na n kaoos yʋʋm tusrã sasa, a na n ket n maanda bũmb toor-toor tõnd yĩnga. Hakɩɩka, a Zeova kõo a Biigã tõnd yĩnga!
KET-Y N BAOOD-Y N BÃNGD-Y BÕN-PAALA
13. Wãn to la bʋgsgã tõe n sõng-y tɩ y ket n bãngd bõn-paal Wẽnnaam la Kiristã nonglmã wɛɛngẽ?
13 Y sã n ket n bʋgsd Wẽnnaam a Zeova ne Kirist Zeezi sẽn wilgd to-to tɩ b nonga tõndã zugu, y na n bãngda bõn-paala. Rõandã Tẽegrã sã n wa kolgdẽ la a loogr poore, y tõe n yãka evãnzill a ye bɩ sẽn yɩɩd rẽ n maag y yĩng n karme. Ra bao-y n karm-y sags wʋsg zĩig pʋgẽ ye. Maagd-y y yĩng n karemdẽ, la y baood n bãngd bũmb nins sẽn kɩt tɩ d segd n nong a Zeova la a Zeezi wã n paasdẽ. Sẽn paase, tũnugd-y ne segb buud fãa y sẽn paam n gomd bũmb nins y sẽn bãngdã yell ne neb a taaba.
14. Wãn to la vaeesgã tõe n sõng tõnd tɩ d bãngd bõn-paal a Zeezi sẽn ki tɩ yɩ maoongã zugu, la bũmb a taab zugu? (Yɩɩn-sõamyã 119:97 la notã) (Ges-y fotã me.)
14 Yãmb sã n bee sɩdã pʋgẽ na maan yʋʋm wʋsg masã, y tõe n sokda y meng bõn-paal sã n ket n bee y sẽn tõe n bãng Wẽnnaam tɩrlmã, a nonglmã la a Zeezi sẽn ki tɩ yɩ maoongã zugu. Sɩd-sɩda, d pa tõe n bãng bũmb fãa bõn-kãensã wɛɛngẽ n sa ye. Woto wã bõe la y tõe n maane? Karemd-y tõnd sɛbã sẽn tik Biiblã zugã la y bʋgsd b sẽn yet bũmb ninsã zugu. Y sã n wa karemdẽ n yã bũmb y sẽn pa wʋmd a võorã sõma bɩ y maan vaeesgo. Rẽ poore, y tõe n bʋgsa bũmb ning y sẽn bãngã zugu, la rẽ sẽn wilgd yãmb a Zeova, a Biigã la b sẽn nong tõnd to-to wã zug daarã tõre.—Karm-y Yɩɩn-sõamyã 119:97 la notã.
Baa d sã n bee sɩdã pʋgẽ na maan yʋʋm wʋsgo, d ket n tõe n zãmsda bõn-paal a Zeezi sẽn ki tɩ yɩ maoongã zugu, tɩ kɩt tɩ d sũur maneg n yɩ noog ne a Zeova la a Zeezi sẽn maan bũmb ninsã (Ges-y sull 14)
15. Bõe yĩng tɩ d segd n ket n baood n bãngd bõn-paal Biiblã pʋgẽ?
15 Y sã n karemdẽ wall y maand vaeesg n pa yãt bõn-paal wall bũmb sẽn noom-y wakat fãa bɩ y ra koms raood ye. Y tõe n dɩka y meng n mak ne ned sẽn baood sãnem. Wakat ninga ned sẽn baood sãnem tõe n tuu lɛɛr-dãmba, pa rẽ bɩ rasem meng n yaool n paam sãnem bilfu. La a pa komsd raood n bas ye. Bala a miime tɩ baa sãnem bilf tara yõod wʋsgo. Bõn-paal nins tõnd sẽn bãngd Biiblã pʋgẽ wã yõod yɩɩda sãnem hal zĩig sẽn zãre! (Yɩɩn. 119:127; Yel. 8:10) Woto wã, bɩ y tall sũ-mar n ket n karemd Biiblã la y maand vaeesgo.—Yɩɩn. 1:2.
16. Wãn to la d tõe n dɩk a Zeova ne a Zeezi togs-n-taare?
16 Y sã n wa zãmsd Biiblã bɩ y baood n bãngd y sẽn tõe n tũ bũmb nins y sẽn bãngdã to-to. Wala makre, y tõe n dɩka a Zeova togs-n-taar tɩrlmã wɛɛngẽ, n pa bakd neb n sõngdẽ ye. Rɩk-y-yã a Zeezi togs-n-taar nonglmã wɛɛngẽ. A nonga a Ba wã la neb a taabã. Rẽ baoodame tɩ y sak n nams a Zeova yʋʋrã yĩnga, la y maand y sẽn tõe fãa n sõngd y tẽed-n-taasã. Y leb n tõe n dɩka a Zeezi togs-n-taar n moond neb a taabã koe-noogã, sẽn na yɩl tɩ bãmb me bãng bũmb nins a Zeova sẽn maan ninsaalbã yĩngã, la b tẽ a Zeezi sẽn ki tɩ yɩ maoongã.
17. Bõe yell la d na n gom sõsg ning sẽn pʋgdã pʋgẽ?
17 D sã n wʋmd a Zeezi sẽn ki tɩ yɩ maoongã võor n paasdẽ, d sẽn nong a Zeova la a Biigã to-to wã me pãng na n paasdame. Rẽ na n kɩtame tɩ bãmb me maneg n nong tõndo. (Zã 14:21; Zak 4:8) Woto wã, bɩ d tũnugd ne Biiblã la bũmb nins siglgã sẽn yiisdã n baood n wʋmd a Zeezi sẽn ki tɩ yɩ maoongã võor n paasdẽ. Sõsg ning sẽn pʋgdã pʋgẽ, d na n yãa a Zeezi sẽn ki tɩ yɩ maoongã sẽn nafd tõnd bũmb kẽer wɛɛngẽ, la tõnd me sẽn tõe n wilg to-to tɩ d sũur yaa noog ne a Zeova nonglmã.
YƖƖLL 107 D tall nonglem wa a Zeova
a GOMDÃ VÕORE: “Bʋgsg” yaa maag f yĩng n tags bũmb zug neere, n bao n wʋm a võor sõma.
b Efɛɛz rãmb 1:10 pʋgẽ, a Poll sẽn gom “tigim bũmb nins fãa sẽn be saasẽ” wã yellã yaa toor ne “nin-tũusdsã” tigung yellã a Zeezi sẽn gom tɩ be Matiye 24:31 la Mark 13:27 wã. A Poll ra gomda wakat ning a Zeova sẽn yãkd neb nins sẽn na n tɩ naag a Zeezi n dɩ naamã, n zaeed-b ne a vʋʋsem sõngã yelle. A Zeezi ra gomda wakat ning b sẽn na n tigim sẽn paam-b vʋʋsem sõng zaeeb n ket tẽngã zug to-kãsengã sasa wã, n tall-b n kẽng saasẽ wã yelle.
