ZÃMSGÃ YĨNGA 5
YƖƖLL 108 Wẽnnaam nonglmã ka sat abada
A Zeova nonglmã sẽn nafd tõnd to-to
“Kirist Zeezi waa dũniyã zug n na n fãag yel-wẽn-maandba.”—1 TƖM. 1:15.
D SẼN NA N BÃNGE
D na n yãa a Zeezi sẽn ki tɩ yɩ maoongã sẽn nafd tõnd to-to la bũmb nins d sẽn tõe n maan n wilg a Zeova tɩ d sũur nooma ne rẽ.
1. Bõe la d tõe n maan noog a Zeova sũuri?
MAMS-Y wa y sẽn na n bao bũmb sẽn yaa neer n leb n tar yõod n kõ ned y sẽn nonge. A soabã sã n deeg kũunã n bao zĩig n bĩng n pa le tagsd a yelle, y sũur kõn sãam sɩda? La y sã n neẽ t’a soabã tara y kũunã n tʋmd sõma n wilgdẽ t’a sũur nooma ne rẽ, yaa vẽeneg tɩ y sũur na n yɩɩ noog wʋsgo. Rẽ wilgda tõnd bõe? A Zeova kõo a Biigã tõnd yĩnga. A sã n neẽ tɩ d wilgdame tɩ d sũur nooma wʋsg ne kũun-kãng sẽn tar yõodã, la ne a sẽn kɩt t’a Zeezi wa ki tɩ yɩ maoong a sẽn nong tõndã yĩnga, a sũur segd n yaa noog wʋsgo.—Zã 3:16; Rom. 5:7, 8.
2. Bõe yell la d na n gom sõs-kãngã pʋgẽ?
2 La sã n kaoosdẽ, d tõeeme n wa pa le getẽ t’a Zeezi sẽn ki tɩ yɩ maoongã yaa kũun sẽn tar yõod wʋsg ye. Yɩta wa d sẽn dɩk Wẽnnaam kũunã n bao zĩig n bĩngi. D sũur nooma ne kũunã, la d basame n pa le tagsd a yell ye. Sẽn na yɩl tɩ bũmb a woto ra paam-do, d segd n nong n tagsda bũmb nins Wẽnnaam ne Kiristã sẽn maan n kõ-dã yelle. Sõs-kãngã na n sõng-d lame tɩ d tõog n maan dẽ. D na n yãa a Zeezi sẽn ki tɩ yɩ maoongã sẽn nafd tõnd to-to rũndã-rũndã, la sẽn tõe n naf tõnd to-to beoog sẽn wate. D leb n na n yãa d sẽn tõe n maan to-to n wilg tɩ d sũur nooma ne a Zeova nonglmã, sẽn yɩɩd fãa Tẽegrã sẽn wat n kolg la a loogr poore.
SẼN NAFD TÕND TO-TO RŨNDÃ-RŨNDÃ
3. Wãn to la a Zeezi sẽn ki tɩ yɩ maoongã zoe n nafd tõndo?
3 Kiristã sẽn ki tɩ yɩ maoongã zoe n nafda tõndo. Wala makre, a Zeova tikda rẽ n kõt d yel-wẽnã sugri. Pa tɩlɛ ne-a t’a kõ-d sugr ye. La a rata rẽ. Yɩɩn-gʋlsdã sũur sẽn da noom ne a Zeova wã, a yeelame yaa: “Bala yãmb a Zeova yaa sõma, la y kõt sugr wʋsgo.”—Yɩɩn. 86:5; 103:3, 10-13.
4. Yaa ãnda rãmb yĩng la a Zeova sẽn kɩt t’a Zeezi wa ki tɩ yɩ maoongã? (Luk 5:32; 1 Tɩmote 1:15)
4 Neb wʋgs tõe n tagsdame tɩ b pa zems ne a Zeova sugrã ye. Sɩd-sɩda, tõnd baa a ye pa zems ne rẽ ye. Tẽn-tʋmd a Poll yeelame tɩ “pa zems tɩ b bool-a tɩ tẽn-tʋmd ye.” Bala a ‘ra namsda Wẽnnaam tigingã.’ Baasgo, a yeelame yaa: “Wẽnnaam barkã maasem yĩnga, mam yaa m sẽn yaa bũmb ningã.” (1 Kor. 15:9, 10) D sã n tek yam n kos d yel-wẽnã sugri, a Zeova kõt-d-la sugri. Bõe yĩnga? Pa tõnd sẽn zems ne rẽ yĩng ye. Yaa a sẽn nong tõndã. Woto wã, y pãn-komsem sã n kɩt tɩ y tagsdẽ tɩ y ka võore, bɩ y tẽeg tɩ pa neb sẽn pa tar yel-wẽn yĩng la a Zeova kɩt t’a Zeezi wa ki ye. Yaa yel-wẽn-maandb nins sẽn tek yam n kos sugrã yĩnga.—Karm-y Luk 5:32; 1 Tɩmote 1:15.
5. Ned bee tõnd sʋk n tõe n tags t’a zemsa ne a Zeova nimbãan-zoeerã bɩ? Wilg-y y leoorã võore.
5 Tõnd ned baa a ye pa segd n tags t’a zemsa ne a Zeova nimbãan-zoeerã, baa a sã n tũ-a lame n kaoos yʋʋm wʋsgo. Yaa sɩd t’a Zeova sũur nooma ne bũmb nins d sẽn maan a tʋʋmdã pʋgẽ wã. (Ebre. 6:10) La a kõo tõnd a Biigã zaalem, pa tõnd sẽn maan bũmb ninsã yĩng ye. Rẽnd d pa segd n tags tɩ d sẽn maan bũmb wʋsg a Zeova yĩngã d zemsa ne a sugrã ye. D sã n tagsd woto, yaa wa d sẽn yet tɩ ra pa tɩlɛ t’a Zeezi wa ki tõnd yĩng ye.—Ges-y Galat-rãmb 2:21.
6. Bõe yĩng t’a Poll tʋm wʋsg a Zeova yĩnga?
6 A Poll ra miime tɩ bũmb ka be a sẽn tõe n maan n zems ne Wẽnnaam lohormã ye. La bõe yĩng t’a modg woto fãa n tʋm a Zeova tʋʋmdã? Pa sẽn na n wilg t’a zemsa ne rẽ ye. Yaa sẽn na n wilg t’a sũur yaa noog wʋsg ne a Zeova barkã. (Efɛɛ. 3:7) Tõnd me tʋmda ne yẽesem wa a Poll n na n wilg tɩ d sũur nooma ne a Zeova barkã, pa sẽn na n wilg tɩ d segda ne rẽ ye.
7. Bõe me wɛɛngẽ la d zoe n dɩt a Zeezi sẽn ki tɩ yɩ maoongã yoodo? (Rom dãmbã 5:1; Zak 2:23)
7 Bũmb a to wɛɛngẽ d sẽn zoe n dɩt a Zeezi sẽn ki tɩ yɩ maoongã yõod yaa tɩ d tõe n paama zood sẽn yaa sõma ne a Zeova. a D yãa sõsg ning sẽn loogã pʋgẽ tɩ d pa rogd n yaa Wẽnnaam zoa ye. La a Zeezi sẽn ki tɩ yɩ maoongã maasem yĩnga, d tõe n paamame tɩ ‘laafɩ zĩnd tõnd ne Wẽnnaam sʋka,’ tɩ d lebg a zoa.—Karm-y Rom dãmb 5:1; Zak 2:23.
8. Bõe yĩng tɩ d sũur segd n yɩ noog ne a Zeova a sẽn kɩt tɩ d tõe n pʋʋs-a wã yĩnga?
8 Tõnd sẽn yaa a Zeova zo-rãmbã kɩtame tɩ d tõe n maan bũmb sẽn tar yõod wʋsgo. D tõe n pʋʋs-a lame t’a kelge. Pa pʋʋsg nins b sẽn pʋʋsd d sã n wa tigim taabã bal la a kelgd ye. D sã n wa yaa d yembr n pʋʋsdẽ me a kelgdame. Pʋʋsgã tõe n booga d yɩɩrã la kɩt tɩ d yam gãand bãane. La pa rẽ bal ye. A tõe n paasa tõnd ne Wẽnnaam zoodã pãnga. (Yɩɩn. 65:2; Zak 4:8; 1 Zã 5:14) A Zeezi sẽn wa n be tẽngã zugã, a ra wae n pʋʋsdame bala a ra miime t’a Zeova kelgdame la tɩ pʋʋsgã na n sõngame tɩ yẽ ne a Ba wã zoodã kell n tall pãnga. (Luk 5:16) D sũur pa noom wʋsg d sẽn paam n tõe n lebg a Zeova zo-rãmba, hal n tõe n pʋʋs-a n gom ne-a a Zeezi maoongã maasem yĩngã sɩda?
SẼN NA N NAF TÕND TO-TO BEOOG-DAARE
9. Wãn to la a Zeezi sẽn ki tɩ yɩ maoongã na n naf sẽn maand-b sɩd ne a Zeova wã beoog-daare?
9 Wãn to la neb nins sẽn maand sɩd ne a Zeova wã na n dɩ a Zeezi sẽn ki tɩ yɩ maoongã yõod beoog-daare? B na n paam n vɩɩmda wakat sẽn kõn sa. Neb kẽer tagsdame tɩ rẽ yaa bũmb sẽn pa tõe, bala ninsaalbã sɩng n kiida hal daar zãra. La sɩngrẽ wã, a Zeova raabã ra yaa tɩ ninsaalbã na vɩɩmd wakat sẽn kõn sa. A Ãdem sã n da pa beege, ned baa a ye ra pa na n tags tɩ vɩɩmd wakat sẽn kõn sa yaa bũmb sẽn pa tõe ye. Baa vɩɩmd wakat sẽn kõn sa wã sẽn wõnd yaa bũmb sẽn pa tõe rũndã-rũndã wã d tõe n tẽe rẽ bala d miime t’a Zeova yaoo yaood sẽn yaa kãseng wʋsg sẽn na yɩl tɩ d paam rẽ. A kõo a meng Bi-riblã.—Rom. 8:32.
10. Bõe la sẽn paam-b vʋʋsem sõng zaeebã la piis a taabã saagd n na n wa paame?
10 Baa vɩɩm sẽn kõn sa wã sẽn yaa bũmb sẽn na n watã, a Zeova ratame tɩ d tagsd rẽ yell masã menga. Sẽn paam-b vʋʋsem sõng zaeebã gũuda vɩɩm sẽn tar bark saasẽ, wakat ning b sẽn na n naag Kiristã n dɩ naam tẽngã zugã. (Vẽn. 20:6) Piis a taabã saagd n na n wa vɩɩmda tẽngã sẽn na n lebg arzãnã zugu, tɩ toogo, namsg la sũ-sãams ka le beẽ ye. (Vẽn. 21:3, 4) Yãmb naaga piis a taabã sẽn saagd n na n vɩɩmd tẽngã sẽn na n lebg arzãnã zugã bɩ? Y sẽn na n paam keoor ningã pa keoor sẽn pa ta sẽn na n kẽng-b saasẽ wã rẽndã ye. A Zeova naana ninsaalbã tɩ b vɩɩmd tẽngã zugu. Rẽnd vɩɩmd wakat sẽn kõn sa tẽngã zugã na n kõ-d-la sũ-noog wʋsgo.
11-12. Bark-bʋs sẽn na n zĩnd arzãnã pʋgẽ la y gũud ne yãgbo? (Ges-y fot-rãmbã me.)
11 Mams-y n ges-y y vɩɩmã sẽn na n yɩ to-to tẽngã sẽn na n lebg arzãnã zugu. Y pa na n le maand yɩɩr y sẽn yɛɛsd y na lʋɩ bãag wall y na wa n ki yĩng ye. (Eza. 25:8; 33:24) A Zeova na n kõ-y-la bõn-sõma nins fãa y sẽn date. Bõe n noom-y tɩ y rat n zãmse? Y na n dat n bao n bãnga rũmsã n paas bɩ? Y na n dat n zãmsa yʋʋm-teed wẽeb bɩ? Y na n dat n zãmsa desẽ-rãmb maaneg bɩ? Arzãnã pʋgẽ, b na n data neb sẽn mi rot pãlã-rãmb maanego, rot meeb la koobo. B na n data neb me sẽn na n segend rɩɩbo, n maand tʋʋm-teedo, n paas neb sẽn na n send tɩɩs buud toor-toor sẽn be rasãnd la b get b yelle. (Eza. 35:1; 65:21) Y sẽn na n vɩɩmd wakat sẽn kõn sa wã yĩnga, y na n paama sẽk n zãms bõn-kãensã fãa la bũmb a taaba.
12 Y sã n wa reegd neb nins b sẽn na n vʋʋgã, y sũur kõn yɩ noog wʋsg sɩda! (Tʋʋ. 24:15) Mams-y n ges-y y sũur sẽn na n yɩ noog to-to me, y sã n wa baood n na n bãng bũmb nins a Zeova sẽn naanã tɩ kɩt tɩ y bãngd yẽ mengã n paasdẽ wã. (Yɩɩn. 104:24; Eza. 11:9) La sẽn yɩɩd fãa, y pa na n tol n le maan yel-wẽnd a bada! Rẽnd y na n tõog n tũuda a Zeova tɩ y yamã gãe bãane, n pa le ningd y meng taal baa bilf ye. Y na n sak n teka bark-kãensã ne “sũ-noog ning yel-wẽndã sẽn kõt tɩ pa kaoosdẽ wã” sɩda? (Ebre. 11:25) A bada! Vɩɩm sẽn tar barkã d sẽn na n paamã yõod yɩɩda bũmb nins fãa d sẽn tõe n paam dũni-kãngã pʋgẽ rũndã-rũndã wã hal zĩig sẽn zãre. Tẽeg-y-yã: Pa wakat fãa la d na n saagdẽ tɩ tẽngã lebg arzãn ye. Na n wa lebga bũmb sẽn be. Bõn-kãensã fãa na n pidsame, a Zeova sẽn nong tõnd wʋsg hal n kõ a biigã t’a ki tɩ yɩ maoongã yĩnga.
Bark-bʋs sẽn na n zĩnd arzãnã pʋgẽ la y gũud ne yãgbo? (Ges-y sull 11-12)
WILG-Y TƖ Y SŨUR NOOMA NE A ZEOVA NONGLMÃ
13. Bõe la d tõe n maan n wilg tɩ d sũur yaa noog ne a Zeova nonglmã? (2 Korẽnt rãmbã 6:1)
13 Bõe la d tõe n maan n wilg tɩ d sũur nooma ne a Zeova, a sẽn kɩt t’a Zeezi ki tɩ yɩ maoongã yĩnga? Yaa d sẽn na n lʋɩɩsd a raabã maaneg taoore. (Mat. 6:33) Sɩd me, a Zeezi kii “sẽn na yɩl tɩ neb nins sẽn vɩ wã ra le vɩ b mens yĩnga, la b vɩ a soab ning sẽn ki bãmb yĩng n lebg n vʋʋgã yĩnga.” (2 Kor. 5:15) Yaa vẽeneg tɩ d pa rat n deeg a Zeova barkã zaalem yĩng ye.—Karm-y 2 Korẽnt rãmb 6:1.
14. Wãn to la d tõe n wilg tɩ d tũuda sor ning a Zeova sẽn wilgd tõndã?
14 D leb n tõe n wilgame tɩ d sũur yaa noog ne a Zeova nonglmã, d sẽn na n kɩs-a sɩd la d tũud sor ning a sẽn wilgd tõndã. Wãn to la d tõe n maan dẽ? D sã n wa segd n yãk yam bũmb kẽer wɛɛngẽ, wala makre, karengã la tʋʋmã wɛɛngẽ d segd n deng n bao n bãnga bũmb ning a Zeova sẽn dat tɩ d maane. (1 Kor. 10:31; 2 Kor. 5:7) D sã n yãkd yam sẽn wilgd tɩ d tẽeda a Zeova d tẽebã pãng paasdame, tɩ tõnd ne yẽ zoodã me pãng paasdẽ. D sẽn saagd n na n wa vɩɩmd wakat sẽn kõn sa wã me manegd n lebga vẽeneg ne-do.—Rom. 5:3-5; Zak 2:21, 22.
15. Wãn to la d tõe n tũnug ne Tẽegrã n wilg tɩ d sũur nooma ne a Zeova nonglmã?
15 La bũmb n ket d sẽn tõe n maan n wilg tɩ d sũur nooma ne a Zeova nonglmã. Yaa d sẽn na n tũnug ne Tẽegrã n wilg a Zeova tɩ d sũur yaa noog a sẽn kɩt t’a Zeezi ki tɩ yɩ maoongã. D sẽn na n maan d sẽn tõe fãa n kẽng Tẽegrã sẽn yãk a toogo, d na n boola neb a taab me. (1 Tɩm. 2:4) Wilg-y neb nins y sẽn na n boolã d sẽn maand a Zeezi kũumã tẽegr to-to. D tõe n wilg-b-la Bõe yĩng t’a Zeezi ki? ne D tẽeg a Zeezi kũumã video-rãmb sẽn be jw.org pʋgẽ wã. Kãsem-dãmbã na n modg n boola neb nins sẽn pa le wat tigissã. Mams-y n ges-y sũ-noog sẽn na n zĩnd saasẽ la tẽngã zug to-to, a Zeova piis kẽer sẽn da menem sã n yãk yam n lebg n wa bãgrẽ wã. (Luk 15:4-7) D sã n ta Tẽegrã zĩigẽ bɩ d ra pʋʋsd taab bal ye. Sẽn yɩɩd fãa d segd n pʋʋsda sãambã la neb nins sẽn bas tigissã waoong hal sẽn kaoosã. D ratame tɩ b neẽ tɩ d sũur nooma b sẽn wa wã.—Rom. 12:13.
16. Bõe yĩng tɩ d segd n tags n ges d sã n pa tõe n paas d koe-moonegã pãng Tẽegrã sẽn wat n kolg la a loogr poore?
16 Tẽegrã sã n wa kolgdẽ la a loogr poore, y tõe n maneg n tʋma a Zeova tʋʋmdã n paas bɩ? Rẽ yaa bõn-sõng d sẽn tõe n maan n wilg tɩ d sũur nooma ne bũmb nins Wẽnnaam la Kiristã sẽn maan d yĩngã. D sã n tʋʋmd a Zeova tʋʋmdã wʋsgo, d na n maneg n nee a sẽn teend tõnd to-to wã, tɩ kɩt tɩ d maneg n kɩs-a sɩda. (1 Kor. 3:9) D leb n tõe n modg n tũu Biiblã kareng na-kẽndr Tẽegrã yĩng sẽn be D vaees Gʋls-sõamyã daar fãa sebrã pʋgẽ wã, la Kiris-nebã vɩɩm la b tʋʋma: Tigissã na-kẽndr sebr pʋgẽ wã. Y pʋd n tõe n yãka yam n maan vaeesg Biiblã vɛrse-kãens zug n bao n wʋm b võor sõma.
17. Bõe n noom a Zeova? (Ges-y zĩ-gũbrã me: “ D sẽn tõe n wilg tɩ d sũur nooma ne a Zeova nonglmã to-to.”)
17 Yaa sɩd tɩ y yɛlã sẽn yaa to-to wã tõe n kɩtame tɩ y pa tõe n tũ sagls nins b sẽn kõ sõs-kãngã pʋgẽ wã fãa ye. La tẽeg-y t’a Zeova pa rɩkd yãmb sẽn tõe n maan bũmb ninsã n mak ne y taabã ye. A geta sẽn be y sũurẽ wã. A sã n neẽ tɩ y sũur nooma a sẽn kɩt t’a Zeezi wa ki tɩ yɩ maoongã yõod sẽn yaa wʋsgã, noom-a lame.—1 Sãm. 16:7; Mark 12:41-44.
18. Bõe yĩng tɩ d sũur noom ne Wẽnnaam a Zeova la a Zeezi Kirist sẽn maan tõnd yĩngã?
18 Yaa a Zeezi sẽn ki tɩ yɩ maoongã maasem yĩng bal la d tõe n paam d yel-wẽnã sugri, n paam n lebg a Zeova zo-rãmba, la d saagdẽ n na n wa vɩɩmd wakat sẽn kõn sa. Bɩ d wilgd wakat fãa tɩ d sũur nooma ne a Zeova nonglmã sẽn kɩt t’a pak sor tɩ d tõe n paam bark-kãensa wã. (1 Zã 4:19) Bɩ d wilgdẽ me tɩ d sũur yaa noog ne a Zeezi, bala a nonga tõnd wʋsg n sak n kõo a vɩɩmã tõnd yĩnga.—Zã 15:13.
YƖƖLL 154 Nonglem pa sat a bada
