ZÃMSGÃ YĨNGA 1
YƖƖLL A 2 Tõnd Wẽnnaam, fo yʋʋrã la a Zeova
Kõ-y-yã a Zeova ziiri
YƲƲMD 2025 VƐRSE WÃ: “Kõ-y-yã a Zeova ziir ning a yʋʋrã sẽn segd ne wã.”—YƖƖN. 96:8.
D SẼN NA N BÃNGE
D na n yãa d sẽn tõe n kõ a Zeova ziir ning a sẽn segd ne wã to-to.
1. Bõe n pak neb wʋsg rũndã-rũndã n yɩɩda?
YÃMB gũus n gesame tɩ ne neb wʋsgo, yaa b mensã yell bal n pak-b bɩ? Wala makre, rezo sosiyo-rãmbã pʋsẽ, neb wʋsg nong n wilgda b mens la bũmb nins b sẽn tõog n maanã. La neb sõor sẽn yaa bilf n kõt a Zeova ziir rũndã-rũndã. Sõs-kãngã pʋgẽ, d na n yãa kõ a Zeova ziir sẽn dat n yɛɛlga, la bũmb ning sẽn segd n kɩt tɩ d maan woto wã. D leb n na n yãa d sẽn tõe n kõ Wẽnnaam ziir ning a sẽn segd ne wã to-to, la yẽ mengã sẽn na n kɩt t’a yʋʋrã paam waoogr to-to ka la bilfu.
KÕ A ZEOVA ZIIR RAT N YEELAME TƖ BÕE?
2. Bõe la a Zeova maan n wilg a ziirã Sinayi tãngẽ wã? (Ges-y fotã me.)
2 Ziir yaa bõe? Biiblã pʋgẽ, gom-bil ning sẽn yaa “ziirã” tõe n maka bũmb ning fãa sẽn kɩtd tɩ ned yaa kãsenga. Israyɛll nebã sẽn paam b mens ne yembdã n yi Ezɩptã poor bilfu, a Zeova maana bõn-kãsems n wilg a ziirã. Mams-y n ges-y sẽn yɩ to-to wã: Israyɛll neb milyõ-rãmb n tigim taab Sinayi tãngã sɛɛgẽ n na n sɛg b Wẽnnaamã. Sawad-taok n lud tãngã. Zĩig pʋgẽ, tẽn-digimd-kãseng n zĩndi. Tõe tɩ tãngã ra pusdame. Tẽngã rigimda b naoã tẽngre. B ra nee saagã sẽn yãgd la tãsdẽ, la b wʋmd baorg rãamd sẽn zẽkd wʋsgo. (Yik. 19:16-18; 24:17; Yɩɩn. 68:8) Mams-y n ges-y Israyɛll nebã sẽn yɛɛs to-to a Zeova sẽn wilg a ziirã ne pãng woto wã.
Sinayi tãngẽ wã, a Zeova maanã bõn-kãsems n wilg Israyɛll nebã a ziirã (Ges-y sull a 2)
3. Kõ a Zeova ziir rat n yeelame tɩ bõe?
3 La ninsaalbã yẽ? D tõe n kõo a Zeova ziir bɩ? N-ye. D tõeeme. Bũmb a ye d sẽn tõe n maan n kõ a Zeova ziir yaa d sẽn na n gomd a pãn-kãsengã la a zʋg-sõma wã yell ne neb a taabã. D sã n pẽgd Wẽnnaam bũmb nins d sẽn tõogd n maand ne pãng ning a sẽn kõt-dã yĩng me, d kõt-a-la ziiri. (Eza. 26:12) Rĩm a Davɩɩd kõo mak-sõng kõ a Zeova ziirã wɛɛngẽ. Daar a ye, a pʋʋsa Wẽnnaam Israyɛll nin-buiidã taoor n yeel yaa: “Zeova, yãmb yaa kãseng n tar pãnga, la yãmb n so neerem la naam. Bala bũmb ning fãa sẽn be saasẽ la tẽngã zugã yaa yãmb n so.” A Davɩɩd sẽn pʋʋs n sa wã, “nin-buiidã fãa pẽga . . . a Zeova.”—1 Kib 29:11, 20.
4. Bõe la a Zeezi maan n kõ a Zeova ziiri?
4 A Zeezi sẽn wa n be tẽngã zugã, a wilgame tɩ yaa a Ba wã n kõt-a pãng ning a sẽn tar n maand yel-soalmã, t’a Ba wã yʋʋr paam waoogre. (Mark 5:18-20) A Zeezi kõo a Zeova ziir me ne a sẽn da gomd a yell to-to wã la a manesem sẽn da yaa to-to ne neb a taabã. Daar a ye, a Zeezi ra bee tigsg roogẽ n zãmsd nebã. Kɛlgdbã sʋka pag n da be be tɩ zĩn tara n namsd na maan yʋʋm 18. Zĩnã ra kɩtame t’a kuud n pa tõe n doog ye. Sɩd ra pa nana ne-a ye! Pagã nimbãaneg yõka a Zeezi t’a kolg n gom ne-a ne bʋgsem n yeel yaa: “Paga, fo paama f meng ne f komslmã.” Rẽ poore, a tik-a-la ne a nusã t’a roog zĩig pʋgẽ “n sɩng Wẽnnaam pẽgre.” A sũur da yaa noog a Zeova sẽn kɩt t’a paam laafɩ wã! (Luk 13:10-13) Pagã ra tara bʋʋm n na n kõ Wẽnnaam ziiri. Yaa woto ne tõnd me.
BÕE N KƖT TƖ D RAT N KÕ WẼNNAAM ZIIRI?
5. Bõe ne bõe n kɩt tɩ d segd n nong a Zeova?
5 D kõta a Zeova ziiri, bala d nand-a-la wʋsgo. Bũmb wʋsg n kɩt tɩ d nand-a. A Zeova yaa pãng sẽn ka to soaba. A pãngã pa tar koak ye. (Yɩɩn. 96:4-7) A sẽn maan bũmb ninsã wilgdame t’a yaa yam-kãseng soaba. Yaa yẽ n naan tõnd la a kõt-d bũmb nins sẽn yaa tɩlɛ d vɩɩmã yĩngã. (Vẽn. 4:11) A yaa sɩd soaba. (Vẽn. 15:4) Bũmb nins fãa a sẽn maand yãkda nenga. A pidsda a pʋlemsã wakat fãa. (Zoz. 23:14) Rẽnd pa lingr la no-rɛɛs a Zeremi sẽn pẽg a Zeova wã ye. A yeelame: “Buud toɛy-toɛyã yam dãmbã fãa sʋka, la b soolem toɛy-toɛyã fãa pʋsẽ, yãmb to pa tol n beẽ ye.” (Zer. 10:6, 7) Vẽenega, bũmb wʋsg n kɩt tɩ d nand d saasẽ Ba wã. La pa rẽ bal ye. D nong-a-la wʋsg me.
6. Bõe yĩng tɩ d nong a Zeova?
6 D kõta a Zeova ziiri, bala d nong-a-la ne d sũur fãa. Ad a Zeova zʋg-sõma a wãn sẽn kɩt tɩ d nong-a. A yaa nimbãan-zoɛta. (Yɩɩn. 103:13; Eza. 49:15) A ningda a meng tõnd zĩigẽ. D sã n namsdẽ, namsda yẽ me. (Zaka. 2:8) A kɩtame tɩ d tõe n paam a zood nana-nana. (Yɩɩn. 25:14; Tʋʋ. 17:27) Sẽn paase, a yaa sik-m-meng soaba. “A sulgd n geta saasã ne tẽngã, n yiisd nimbãan-ned tomẽ.” (Yɩɩn. 113:6, 7) Woto fãa pa kɩt tɩ d rat n kõ d Wẽnnaamã sẽn yaa kãsengã ziir sɩda?—Yɩɩn. 86:12.
7. Bõe la d paam n tõe n maane?
7 D kõta a Zeova ziiri, d sẽn dat tɩ neb a taabã bãng-a wã yĩnga. Neb wʋsg pa mi sɩdã a Zeova zug ye. Bõe yĩnga? Bala a Sʋɩtãan yelgda zirẽ-beed a Zeova zug n lud b yamã. (2 Kor. 4:4) A Sʋɩtãan tõogame tɩ nebã tagsdẽ t’a Zeova yaa Wẽnnaam sẽn nong neb sɩbgre, t’a toog ka be ne neda, la tɩ yaa yẽ n wat ne zu-loees nins sẽn namsd ninsaalbã fãa la bala. La tõnd mii sɩdã d Wẽnnaamã zugu. D paamame n tõe n sõng nebã tɩ b bãng sɩdã, n kõt a Zeova ziiri. (Eza. 43:10) Yɩɩn-sõamyã 96 soabã gomda kõo a Zeova ziirã yell wʋsgo. D na n goma yɩɩn-kãng vɛrse-rãmb kẽer yelle. D sã n wa maan dẽ bɩ y ges y sẽn tõe n maan to-to n kõ a Zeova ziir ning a sẽn segd ne wã.
BÕE LA D TÕE N MAAN N KÕ A ZEOVA ZIIR NING A SẼN SEGD NE WÃ?
8. Bõe la d tõe n maan n kõ a Zeova ziiri? (Yɩɩn-sõamyã 96:1-3)
8 Karm-y Yɩɩn-sõamyã 96:1-3. D tõe n kõ a Zeova ziiri, d sẽn na n gomd a yelle. Vɛrse-kãens pʋsẽ, b sagenda neb nins sẽn tũud a Zeova wã tɩ b ‘yɩɩl a Zeova yĩnga,’ tɩ b ‘pẽg a yʋʋrã,’ tɩ b ‘moon a fãagrã koe-noogo,’ la tɩ b ‘moon a ziirã bu-zemsã sʋka.’ Woto fãa yaa bũmb kẽer d sẽn tõe n maan n kõ d saasẽ Ba wã ziiri. Zʋɩf-rãmb nins sẽn da maand sɩdã ne pipi kiris-nebã ra nong n gomda bõn-sõma nins a Zeova sẽn maan n kõ-bã yell ne b taabã, la b gomd a zʋg-sõma wã yelle. (Dãn. 3:16-18; Tʋʋ. 4:29) Wãn to la d tõe n dɩk b togs-n-taare?
9-10. A Ãnzɛll kibarã wilgda yãmb bõe? (Ges-y fotã me.)
9 D gom saam-bi-poak a ye sẽn be Etazĩni t’a yʋʋr boondẽ t’a Ãnzɛll a yelle. A talla raood n gom a Zeova yell a tʋʋmã zĩigẽ. Yɩɩ a sẽn wa n sɩng tʋʋmã be wã paalem. Tʋʋmã zĩigẽ, b wae n maanda tigsg sẽn na yɩl tɩ sẽn nan wa-b paalmã tõe n gom b mens yell tɩ b tʋmd-n-taasã bãng-ba. A Ãnzɛll bao fot-rãmb n na n wilg a tʋmd-n-taasã t’a sẽn yaa a Zeova Kaset soabã kõt-a-la sũ-noogo. La ned ning sẽn da segd n gom t’a Ãnzɛll yaool n gomã yeelame t’a roagdbã yaa a Zeova Kaset rãmba. A gomame n sãbs bũmb nins tõnd sẽn tẽedã. A Ãnzɛll yeelame: “Mam sũurã ra kiuusdame. La m tagsame yaa: ‘M na n basame tɩ ned togs goam sẽn pa sɩd a Zeova zug bɩ, bɩ m na n gom n teel-a lame?’”
10 A Ãnzɛll tʋmd-n-taagã sẽn wa n gom n sa wã, a pʋʋsa koɛɛg-koɛɛg a sũurẽ wã. Rẽ poore, a maaga a yĩng n yeel-a yaa: “Maam ne foom yaa a ye. Ma-me roagdbã yaa a Zeova Kaset rãmba. La hal n tãag rũndã, m ket n yaa a Zeova Kaset soaba.” Baa sẽn da pa nana wã, a Ãnzɛll pa bas tɩ rabeem tõog-a ye. A kell n wilga a tʋmd-n-taasã fot-rãmb sẽn wilgd yẽ ne a zo-rãmb sẽn naag taab n tũud a Zeova tɩ b sũy noomẽ. A gomame n teel bũmb nins tõnd sẽn tẽedã ne bʋgsem. (1 Pɩy. 3:15) Baasa wãna? A Ãnzɛll sẽn wa n gom n sa wã, a mikame t’a tʋmd-n-taagã manesmã toeema bilfu. A sak n deegame meng t’a tẽera bũmb kẽer sẽn da noom-a a sẽn wa n yaa bilf n be ne a Zeova Kaset rãmbã. A Ãnzɛll yeelame: “Togame tɩ d gom n teel a Zeova. Paam n gom a yʋʋrã yĩng yaa zu-zẽkre.” Tõnd me paamame n tõe n pẽg a Zeova la d kõ-a ziiri, baa neb a taabã sã n wa paoogd-a.
D tõe n kõo a Zeova ziir ne d no-goamã maasem (Ges-y sull a 9-10) b
11. Hal pĩnd wẽndẽ n tãag masã, bõe la wẽn-tũudb hakɩɩkã maand n wilgdẽ tɩ b tũuda sagl ning sẽn be Yɩɩn-sõamyã 96:8 wã?
11 Karm-y Yɩɩn-sõamyã 96:8. D tõe n kõ a Zeova ziir ne d bõn-sõma wã. Hal pĩnd wẽndẽ n tãag masã, neb nins sẽn tũud a Zeova wã maanda woto. (Yel. 3:9) Wala makre, Israyɛll nebã ra kõta kũun wẽnd-doogã meeb la a yell gesg yĩnga. (2 Rĩm. 12:4, 5; 1 Kib 29:3-9) Kiristã karen-biis n “da yãkd b paoong” n sõngd yẽ ne a tẽn-tʋmdbã. (Luk 8:1-3) Pipi kiris-neb me n kõ kũun n sõng b tẽed-n-taas kom sẽn da namsde. (Tʋʋ. 11:27-29) Rũndã-rũndã, tõnd me tõe n kõ a Zeova ziir ne kũunã d sẽn kõtã maasem yĩnga.
12. Wãn to la tõnd kũunã tõe n kõ a Zeova ziiri? (Ges-y fotã me.)
12 Ad kibar sẽn wilgd tõnd kũunã sẽn kõt a Zeova ziir to-to. Yʋʋmd 2020 wã, war n zĩnd Zĩmbabuwe n kaoos wʋsgo. Rẽ kɩtame tɩ neb milyõ-rãmb ra pa le tõe n paam rɩɩb tɩ sek ye. Wala makre, tõnd saam-bi-poak a ye yʋʋr sẽn boond t’a Priska. Baa ne warã, a Priska ra ket n moonda koɛɛgã arb la arzũm fãa, baa koobã sasa. A yagsã ra yaand-a-la a sẽn basd koobã n yit n moond koɛɛgã yĩnga. B ra yetame yaa: “Koom n na n kʋ foo.” A Priska ra leokda ne bas-m-yam yaa: “A Zeova zɩ n bas neb nins sẽn tũud-a wã ye.” Rẽ poor bilfu, tõnd siglgã toola sõngr tɩ b pʋɩ tɩ ta-a. Yaa tõnd kũunã n kɩt tɩ b tõog n tool sõngrã. Linga a Priska yagsã tɩ b yeel yaa: “Wẽnnaam sõngda foo wakat fãa. Rẽ n so tɩ d rat n bãng-a n paase.” A yags a yopoe n sɩng tigissã kẽnde.
D tõe n kõo a Zeova ziir ne d bõn-sõma wã maasem (Ges-y sull 12) c
13. Wãn to la d tõe n kõ a Zeova ziir ne d yel-manesmã maasem? (Yɩɩn-sõamyã 96:9)
13 Karm-y Yɩɩn-sõamyã 96:9. D tõe n kõ a Zeova ziir ne d yel-manesmã maasem. Maan-kʋʋdb nins sẽn da tʋmd a Zeova roogẽ wã ra segd n yɩɩ yɩlma. (Yik. 40:30-32) La bũmb n be t’a yõodã yɩɩd yĩngã yɩlemde. Yaa yɩ yɩlemd tʋʋm-tʋmdɩ wã wɛɛngẽ. (Yɩɩn. 24:3, 4; 1 Pɩy. 1:15, 16) D segd n modgame n yeeg “nin-kʋdgã,” rat n yeel tɩ d bas tags-yoodã ne tʋʋm-wẽnsã, la d yeelg “nin-paalgã,” rat n yeel tɩ d modg tɩ d tagsa wã la d tʋʋm-tʋmdɩ wã wilg tɩ d rɩka a Zeova togs-n-taar n bɩɩs zʋg-sõma. (Kolo. 3:9, 10) Ne a Zeova sõngre, baa neb nins sẽn tʋm tʋʋm-dẽgd la b yaa nen-kɛglem dãmb wʋsgã tõe n toeemame n yeelg nin-paalgã.
14. A Zak kibarã wilgda yãmb bõe? (Ges-y fotã me.)
14 D gom a Zak yelle. Ra yaa bi-bɛɛg sẽn tʋm nen-kɛglem tʋʋm wʋsg hal tɩ b ra boond-a t’a Zĩna. A tʋʋm-wẽnsã yĩnga, b yõk-a lame n kao a bʋʋd n yeel t’a segda ne kũum. La a Zak sẽn wa n gũud wakat ning b sẽn na n kʋ-a wã, a sakame n na n zãms Biiblã ne saam-biig sẽn wat n moond bãensã roogẽ. Baa a Zak sẽn da tʋm tʋʋm-wẽns wʋsgã, a tõog n yeega nin-kʋdgã. A wa n deega lisg n lebg a Zeova Kaset soaba. A Zak toeema wʋsgo, hal tɩ daar ning b sẽn da segd n kʋ-a wã sẽn wa n ta tɩ b tar-a n loogdẽ wã, bãensã roog gũudb kẽer raaga nintãm. Sodaag a ye sẽn da tʋmd bãensã roogẽ yeelame: “Pĩndã a Zak n da yaa wẽng n yɩɩd bi-beesã fãa sẽn be ka wã. La masã a naaga sẽn yaa-b sõma n yɩɩdã sʋka.” Semen ning sẽn pʋgl a Zak kʋʋbã, saam-biisã kẽnga bãensã roogẽ n na n tɩ maan tigsgã b sẽn maand semen fãa wã. B sẽn ta wã, b yãa bi-bɛɛg a ye sẽn wa a pipi tigsga. Bõe n kɩt t’a wa tigsgã? A Zak sẽn toeem to-to wã yɩ-a-la noogo, t’a rat n bãng a sẽn tõe n tũ a Zeova to-to. Vẽenega, d tõe n kõo d saasẽ Ba wã ziir ne d yel-manesmã maasem.—1 Pɩy. 2:12.
D tõe n kõo a Zeova ziir ne d yel-manesmã maasem (Ges-y sull 14) d
BÕE LA A ZEOVA NA N MAAN KA LA BILF N KƖT T’A YƲƲRÃ PAAM ZIIRI?
15. Bõe la a Zeova na n maan ka la bilf n kõ a yʋʋrã ziiri? (Yɩɩn-sõamyã 96:10-13)
15 Karm-y Yɩɩn-sõamyã 96:10-13. Vɛrse-kãensã sẽn yaa Yɩɩn-sõamyã 96 soabã yaoolem vɛrse-rãmbã wilgdame t’a Zeova yaa Bʋ-kaood la Rĩm sẽn yaa tɩrga. Bõe la a Zeova na n maan ka la bilf n kõ a yʋʋrã ziiri? Yaa a sẽn na n kao bʋʋd ne tɩrlmã. Ka la bilfu, a na n sãama Babilon-kãsengã a sẽn sãamd a yʋʋrã sẽn yaa sõngã yĩngã. (Vẽn. 17:5, 16; 19:1, 2) Tõe tɩ neb kẽer sã n yã Babilon-kãsengã sãoongo, b na n wa naaga tõnd tũudum hakɩɩkã pʋgẽ. Sẽn na n baase, Armagedõ zabrã sasa a Zeova na n sãama a Sʋɩtãan dũniyã tõre, n menes neb nins sẽn kɩɩsd-a la b sãamd a yʋʋrã fãa. La a na n fãaga neb nins sẽn sakd-a la b getẽ tɩ b sẽn paam n tõe n kõ-a ziirã yaa zu-zẽkrã. (Mark 8:38; 2 Tes. 1:6-10) Yaoolem makrã sẽn na n zĩnd Kirist naamã sẽn na n kaoos yʋʋm tusrã baasgẽ wã poore, rẽ t’a Zeova kɩtame t’a yʋʋrã paam waoogr zãng-zãnga. (Vẽn. 20:7-10) Wakat kãnga, “dũniyã na n pida ne neb sẽn mi a Zeova ziirã, wa mogrã sẽn pid ne koomã.”—Hab. 2:14.
16. Bõe la y rat n maan ne y sũur fãa? (Ges-y fotã me.)
16 Wakat ning nebã fãa sẽn na n kõt a Zeova ziir ning a yʋʋrã sẽn segd ne wã sã n ta, kõ zĩnd yamleoog sɩda? La nand tɩ wakat kãng ta, d tõe n tũnuga ne segb buud fãa n kõ d Wẽnnaamã ziiri. Sẽn na n yɩl n wilg tɩ rẽ tara yõodo, Siglgã taoor lʋɩtb sull yãka Yɩɩn-sõamyã 96:8 tɩ na n yɩ yʋʋmd 2025 yʋʋmdã vɛrse. Be b yetame: “Kõ-y-yã a Zeova ziir ning a yʋʋrã sẽn segd ne wã.”
Wakat n wat tɩ nebã fãa na n kõt a Zeova ziir ning a yʋʋrã sẽn segd ne wã (Ges-y sull 16)
YƖƖLL 12 Zeova, fo yaa Wẽnnaam sẽn ka to
a D toeema yʋy kẽere.
