ZÃMSGÃ YĨNGA 2
YƖƖLL 132 Tõnd lebga yĩng a yembre
Pʋg-sɩdba, waoog-y y pagbã
“Yãmb a pʋg-sɩdbã, . . . bɩ y waoog-ba.”—1 PƖY. 3:7.
D SẼN NA N BÃNGE
D na n yãa rao sẽn tõe n tũnug ne a no-goam la a tʋʋm-tʋmdɩ to-to n wilg t’a waoogda a paga.
1. Togs-y bũmb a ye sẽn kɩt t’a Zeova lugl kãadmã.
A ZEOVA yaa “Wẽnnaam sẽn yaa sũ-noog soaba,” n dat tɩ tõnd me paam sũ-noogo. (1 Tɩm. 1:11) A kõo tõnd bũmb wʋsg sẽn tõe n sõng-d tɩ d vɩɩmã yɩ noogo. (Zak 1:17) Kãadmã naaga bõn-kãense. Pag ne rao sã n wa na n kẽ kãadem, b pʋlemdame tɩ b na n nonga taab la b waoogd taaba. Pagã ne a sɩdã sã n modg tɩ b nonglmã kell n tall pãnga, tõe n kɩtame tɩ b paam sũ-noog hakɩɩka.—Yel. 5:18.
2. Neb wʋsg kãadem yaa wãn to rũndã-rũndã?
2 Zu-bʋko, neb wʋsg sẽn kẽ kãadem rũndã-rũndã yĩma pʋleng ning b sẽn maan b kãadmã daarã. Rẽ kɩtame tɩ b zĩnd-n-taarã pa noomẽ ye. Sẽn nan pa kaoose, Nasiõzĩni wã siglg ning sẽn get laafɩ wã yellã wilgame tɩ rap wʋsg pãbda b pagba, n tʋʋd-ba, wall b maand bũmb a taab n namsd-ba. Rap kẽer tõe n waoogda b pagbã nebã nifẽ, tɩ b sã n wa yaa b ye bɩ b yaool n namsd-ba. Pʋg-sɩdb wʋsg me geta yoob yɛla, tɩ sãamd b pagbã sũyã.
3. Bõe n tõe n kɩt tɩ rao weoogd a paga?
3 Bõe n kɩt tɩ rap kẽer weoogd b pagba? Tõe tɩ b ba wã ra yaa nen-kɛglem soaba, tɩ kɩt tɩ b getẽ tɩ pag weoogr pa wẽng ye. Sãnda maanda woto, rap a taabã sẽn be bãmb babgẽ wã sẽn maand woto n tagsdẽ tɩ “rao hakɩɩk” segd n maana a pag pãnga, n wilg tɩ yẽ la zakã soabã yĩnga. B pa zãms rap kẽer tɩ b sũur sã n yiki b segd n modg n tõoga b meng ye. Rap sãnda minim n geta yoob yɛla, tɩ kɩt tɩ b tar tags-kɛg pagbã zutu, la pag ne rao lagengã wɛɛngẽ. Sẽn paase, kibay wʋsg wilgdame tɩ koronavirisã bã-loangdgã wa n maneg n zẽna yɛlã. La bõn-kãensã baa a ye pa kõt rao sor t’a weoog a pag ye.
4. Pʋg-sɩdb nins sẽn yaa kiris-nebã segd n gũusa b mens ne bõe, la bõe yĩnga?
4 Pʋg-sɩdb nins sẽn yaa kiris-nebã segd n gũusame n da wa tall tags-kɛg pagbã zug ye. a Bõe yĩnga? Bũmb a ye yaa tɩ ned manesem wae n zemsda ne a tagsa wã. Tẽn-tʋmd a Poll sagla Rom kiris-nebã sẽn da paam vʋʋsem sõng zaeebã tɩ b ‘ra le bas tɩ dũni-kãngã nebã kɩt tɩ b yɩ wa bãmb ye.’ (Rom. 12:1, 2) A Poll sẽn wa n na n gʋls a lɛtrã n tool Rom kiris-nebã, rẽ tɩ b tigingã sẽn luglã kaoosa bilfu. La a Poll goamã wilgdame tɩ tigingã neb kẽer yel-manesem la b tagsa wã ra ket n wõnda dũniyã nebã. Yaa rẽ yĩng la a sẽn sagl-b tɩ b toeem b tagsa wã la b manesmã. Yaa vẽeneg tɩ kiris-neb nins sẽn yaa pʋg-sɩdbã segd n tũu sagl-kãng rũndã-rũndã me. Zu-bʋko, b kẽer da tagsda wa dũniyã rãmba, hal n weoogd b pagb menga. b A Zeova ratame tɩ rao manesem yɩ wãn to ne a paga? Sok-kãngã leoorã bee sõs-kãngã sẽn tik vɛrse ningã pʋgẽ.
5. Sã n yaa ne 1 Pɩyɛɛr 3:7, manesem-bʋg la rao segd n tall ne a paga?
5 Karm-y 1 Pɩyɛɛr 3:7. A Zeova yeela pʋg-sɩdbã tɩ b waoog b pagbã. Waoog ned bilgda manesem ning f sẽn tar ne ned f sẽn nande. Pʋg-sɩd sẽn waoogd a pag geta a yell ne bʋgsem la nonglem. Sõs-kãngã pʋgẽ, d na n yãa rao sẽn tõe n wilg to-to t’a waoogda a paga. La d na n deng n yãa manesem kẽer pʋg-sɩdb sãnda sẽn tare, tɩ wilgdẽ tɩ b pa waoogd b pagbã ye.
RA MAAN-Y BŨMB SẼN NA N SÃAM Y PAGÃ SŨUR YE
6. A Zeova tagsg yaa wãn ne rao sẽn pãbd a paga? (Kolos rãmbã 3:19, la notã)
6 Rao pa segd n pãb a pag ye. A Zeova kisa ned ning fãa sẽn yaa nen-kɛglem soaba. (Yɩɩn. 11:5) A yeela vẽeneg t’a kisa rao sẽn maand a pag pãnga. (Mal. 2:16; karm-y Kolos rãmb 3:19 la notã.) Sã n yaa ne 1 Pɩyɛɛr 3:7 sẽn yaa vɛrse ning zug sõs-kãngã sẽn tikã, rao sã n pa zãad a pag sõma, tõe n sãama yẽ ne Wẽnnaam zoodã. Tõe n kɩtame meng t’a Zeova pa le kelgd a pʋʋsg ye.
7. Sã n yaa ne Efɛɛz rãmb 4:31, 32, gom-bʋs buud la pʋg-sɩd pa segd n gome? (Ges-y “Gomdã võorã” me.)
7 Rao pa segd n gom a pag põaas ye. Pʋg-sɩdb kẽer wae n gomda ne b pagbã ne sũ-yikri, n togsd goam sẽn sãamd sũur wʋsgo. La a Zeova kisa “sũ-puugri, ne sũ-yikri, la tãsga, ne tʋya.” c (Karm-y Efɛɛz rãmb 4:31, 32.) A mii bũmb fãa. Rao sẽn gomd ne a pag to-to wã, baa b sã n wa yaa b yembr b zakã pʋgẽ wã tara yõod wʋsg a Zeova nifẽ. Rao sẽn gomd ne a pag ne toolem pa sãamd b kãadmã bal ye. A sãamda yẽ ne Wẽnnaam zoodã me.—Zak 1:26.
8. A Zeova tagsg yaa wãn ne yoob yɛl gesgo, la bõe yĩnga?
8 Pʋg-sɩd pa segd n ges yoob yɛl ye. A Zeova tagsg yaa wãn ne yoob yɛl gesgo? A kisa rẽ. Rẽnd rao sẽn get yoob yɛl sãamda yẽ ne a Zeova zoodã, la a paoogd a pagã. d A Zeova ratame tɩ pʋg-sɩd tʋʋm-tʋmdɩ la a tagsa wã wilg t’a maanda sɩd ne a pagã. A Zeezi yeelame tɩ rao sã n ges pag hal t’a yam wa kẽ-a, a zoe n yoo ne-a “a sũurẽ wã.” e—Mat. 5:28, 29.
9. Pag ne rao lagengã wɛɛngẽ, rao sã n modgd a pag n dat t’a maan bũmb sẽn paoogd-a, bõe yĩng t’a Zeova kis rẽ?
9 Pag ne rao lagengã wɛɛngẽ, rao pa segd n modg a pag t’a maan bũmb sẽn paoogd-a ye. Pag ne rao lagengã wɛɛngẽ, pʋg-sɩdb kẽer modgda b pagbã tɩ b maand bũmb sẽn pa noom-ba, wall sẽn kɩtd tɩ b sũur-kasetã ningd-b taale. A Zeova kisa manesem a woto sẽn pukd rat-m-ye la nonglem kaalmã. A ratame tɩ pʋg-sɩdbã wilgdẽ tɩ b nonga b pagbã, n get b yell sõma la b ra maand b toog kae ne b tagsg ye. (Efɛɛ. 5:28, 29) La pʋg-sɩd sẽn yaa kiris-ned sã n zoe n maanda bũmb sẽn paoogd a pagã, pa rẽ bɩ a weoogd-a lame, wall a geta yoob yɛla, bõe la a segd n maane? Bõe la a tõe n maan n toeem a tagsa wã la a manesmã?
RAO SẼN TÕE N MAAN TO-TO N BAS MANESEM-WẼNSE
10. Wãn to la a Zeezi mak-sõngã tõe n naf pʋg-sɩdbã?
10 Rao sã n weoogd a pag wall a maand bũmb sẽn paoogd-a, bõe n tõe n sõng-a t’a toeeme? A tõe n modg n dɩka a Zeezi togs-n-taare. Baa a Zeezi sẽn pa kẽ kãadmã, a manesem sẽn yɩ to-to ne a karen-biisã yaa mak-sõng sẽn wilgd pʋg-sɩdbã sẽn segd n tall manesem ning ne b pagbã. (Efɛɛ. 5:25) Wala makre, d ges yam ning pʋg-sɩdbã sẽn tõe n dɩk a Zeezi manesem sẽn yɩ to-to ne a tẽn-tʋmdbã, la a sẽn da gomd ne-b to-to wã pʋgẽ.
11. A Zeezi manesem da yaa wãn ne a tẽn-tʋmdbã?
11 A Zeezi ra geta a tẽn-tʋmdbã yell ne bʋgsem la waoogre. A zɩ n gom ne-b ne toolem wall a maan-b pãng ye. Baa ne a sẽn da yaa b Zu-soab la b Soaalã, a pa tũnug ne a zu-sobendã n modg-b tɩ b tũ a raab ye. A pʋd n sika a meng n sõng-ba. (Zã 13:12-17) A yeela a karen-biisã yaa: “Rɩk[-y] yam mam nengẽ, bala mam yaa sũ-maasem soab la sik-m-meng soaba. Dẽ, y na paam yolsgo.” (Mat. 11:28-30) A Zeezi yeelame t’a yaa sũ-maasem soaba. Sũ-maasem soab pa ned sẽn ka pãng ye. Yaa ned sẽn tar pãnga, n tõe n yõk a menga. Baa b sã n maan-a bũmb t’a sũur yiki, a tõogd n yõka a menga.
12. Wãn to la a Zeezi ra gomd ne neb a taabã?
12 A Zeezi ra tũnugda ne a no-goamã n belsd neb a taabã la a kengd b raoodo. A ra pa gomd ne a karen-biisã ne toolem ye. (Luk 8:47, 48) Baa a bɛɛbã sẽn wa n tʋʋd-a la b baood a noorã, “a pa tʋʋs n lebs ye.” (1 Pɩy. 2:21-23) Wakat kẽere, a yãka yam meng n sĩndi, n pa leok ne toolem ye. (Mat. 27:12-14) Ad a sɩd kõo pʋg-sɩdb nins sẽn yaa kiris-nebã mak-sõngo!
13. Wãn to la rao tõe n “zĩnd” ne a paga? (Matiye 19:4-6) (Ges-y fotã me.)
13 A Zeezi sagla pʋg-sɩdbã tɩ b maan sɩd ne b pagbã. A lebs n dɩka a Ba wã goama, n yeel tɩ rao segd n ‘zĩnda’ ne a paga. (Karm-y Matiye 19:4-6.) Gɛrk gom-bil ning b sẽn lebg ka tɩ “zĩndã” võor meng-mengã yaa “tabende.” Rẽnd nonglem ning sẽn be pag ne a sɩd sʋkã segd n talla pãng wʋsgo, tɩ yaa wa b tabend-b-la taaba. B nin-yend sã n maan bũmb n sãam a to wã sũuri, namsda b yiibã fãa. Rao sẽn nong a pag woto pa na n sak n ges yoob yɛl baa bilf ye. A sã n yã “bũmb sẽn ka yõodo,” a na n yɩɩ tao-tao n wẽnemd a neng kɛɛnga. (Yɩɩn. 119:37) Na n yɩɩ wa a maana kaool ne a ninã, n pa na n ges pag a to n zʋʋg a pagã hal t’a yamã wa kẽ-a ye.—Zoob 31:1.
Rao sẽn maand sɩd ne a pag pa sakd n ges yoob yɛl ye (Ges-y sull 13) g
14. Bõe la rao sẽn namsd a pag segd n maan sẽn na yɩl n maneg yẽ ne a Zeova zoodã, la yẽ ne a pagã zoodã?
14 Rao sẽn pãbd a pag wall sẽn gomd-a gom-põaas segd n maana bũmb toor-toor n maneg yẽ ne a Zeova zoodã, la yẽ ne a pagã zoodã. Yaa bõe la a sẽn segd n maanã? Pipi, a segd n sak n deegame t’a sẽn maandã yaa wẽng wʋsgo. Bũmb pa be sẽn solg a Zeova nifẽ ye. (Yɩɩn. 44:21; Koɛ. 12:14; Ebre. 4:13) Yiibu, a segd n basa a pagã namsgo, la a toeem a manesmã. (Yel. 28:13) Tãabo, a segd n kosa a pagã la a Zeova sugri, la a maan bũmb toor-toor sẽn na yɩl tɩ b kõ-a sugri. (Tʋʋ. 3:19) Sẽn paase a segd n kosa a Zeova t’a kõ-a raab t’a tʋll n toeeme, la t’a sõng-a t’a tõog t’a tagsa wã, a no-goamã la a tʋʋm-tʋmdɩ wã yɩ sõma. (Yɩɩn. 51:10-12; 2 Kor. 10:5; Fili. 2:13) Naase, a segd n maaname tɩ zems ne a sẽn pʋʋs n kos bũmb ningã, n modg n kisg nen-kɛglem buud fãa la gom-põaasa. (Yɩɩn. 97:10) Nu, a segd n yɩɩ tao-tao n tɩ kos tigingã kãsem-dãmb sõngre. (Zak 5:14-16) Yoobe, a segd n bao n bãnga bũmb nins sẽn na n sõng-a t’a ra le maan a buud nindaar ye. Pʋg-sɩd sẽn get yoob yɛl me segd n maana bõn-kãense. A Zeova na n ning-a-la barka, n sõng-a t’a tõog n toeeme. (Yɩɩn. 37:5) La rao sã n bas bũmb nins sẽn sãamd a pagã sũurã bala pa sek ye. A segdame me n wilgdẽ t’a waoogda a pagã. Wãn to la a tõe n maan dẽ?
Y SẼN TÕE N WILG TO-TO TƖ Y WAOOGDA Y PAGÃ
15. Bõe la rao tõe n maan n wilg t’a nong a paga?
15 Wilg-y tɩ y nong-a lame. Saam-biis kẽer sẽn kẽ kãadem tɩ bãmb ne b pagbã zĩnd-n-taar noomẽ minim n maanda bũmb daar fãa, n wilgd b pagbã tɩ b nong-b-la wʋsgo. (1 Zã 3:18) Pʋg-sɩd tõe n maana bũmb sãnda maaneg sẽn pa toogo, n wilg a pagã t’a nong-a lame. Wala makre, a tõe n gãda a nugu, wall a mobg-a. A tõe n gʋls-a-la mesaaz n yeel-a yaa: “M sũur nooma ne-fo,” pa rẽ bɩ a sok-a yaa: “Maana a wãna, m noanga?” Wakat-wakate, a tõe n baoo fɩlɛɛr-dãmb wall kũun n kõ-a, n wilg t’a nong-a-la wʋsgo. Rao sã n maand woto a waoogda a pagã, la a paasd b kãadmã pãnga.
16. Bõe yĩng tɩ rao segd n pẽgd a paga?
16 Wilg-y y pagã tɩ y sũur nooma ne a sẽn maand bũmb ninsã. Rao sã n waoogd a paga, kɩtdame t’a neẽ t’a tara yõodo, tɩ kengd a raoodo. Bũmb a ye a sẽn tõe n maan n wilg t’a nanda a pagã, yaa a sẽn na n tẽegd n pʋʋsd-a bark bũmb nins a sẽn maand n teend-a wã yĩnga. (Kolo. 3:15) Rao sã n pelg a pʋg n pẽg a paga, noom-a-la wʋsgo. Kɩtdame t’a yam gãe bãane, t’a neẽ t’a nong-a lame, la t’a waoogd-a lame.—Yel. 31:28.
17. Wãn to la rao tõe n wilg t’a waoogda a paga?
17 Y manesem sẽn yaa a soab ne y pagã segd n yɩɩ ne bʋgsem la waoogre. Rao sẽn nong a pag nand-a lame. A getame t’a yaa kũun sẽn yit a Zeova nengẽ n tar yõod wʋsgo. (Yel. 18:22; 31:10) Rẽ n so t’a manesem sẽn yaa to-to ne-a wã yaa ne bʋgsem la waoogre, baa pag ne rao lagengã wɛɛngẽ. Lagengã wɛɛngẽ a pa na n modg-a t’a maan bũmb sẽn pa noom-a, bũmb sẽn paoogd-a wall sẽn na n kɩt t’a sũur-kasetã ningd-a taal ye. f Yẽ mengã na n modgame sẽn na yɩl t’a sũur-kasetã kell n yɩ yɩlemd a Zeova taoore.—Tʋʋ. 24:16.
18. Bõe la pʋg-sɩdbã segd n yãk yam n maane? (Ges-y zĩ-gũbrã me: “ Bũmb a naas rao sẽn tõe n maan n wilg t’a waoogda a paga.”)
18 Pʋg-sɩdba, y tõe n basa y yam tɩ y sẽn modgd sẽn na yɩl n wilg tɩ y waoogda y pagbã y vɩɩmã nens fãa pʋsẽ wã a Zeova neeme, la tɩ noom-a lame. Bɩ y yãk yam n kell n waoog y pagbã. Rẽ baoodame tɩ y ra maan bũmb sẽn yikd b sũyã, tɩ y manesmã ne-b yɩ ne bʋgsem la waoogre, la tɩ y get b yell sõma. Y sã n maand woto y wilgdame tɩ y nong-b lame, la tɩ y nand-b lame. Waoog-y y pagbã tɩ rẽ la y na n kogl zood ning y sẽn tar tɩ tar yõod n yɩɩdã, rat n yeel tɩ yãmb ne a Zeova zoodã.—Yɩɩn. 25:14.
YƖƖLL 131 “Bũmb nins Wẽnnaam sẽn lagem taabã”
a Yʋʋmd 2024 yʋʋm-vẽkr kiuug Gũusg Gasgã pʋgẽ, sõsg n be be t’a gom-zugã yaa: “Yãmb manesem sẽn yaa to-to ne pagbã yaa wa a Zeova bɩ?” Pʋg-sɩdbã sã n karem sõs-kãnga na n naf-b-la wʋsgo.
b Y sɩdã sã n namsda yãmba, y tõe n kẽe jw.org wall JW Library® aplikasiyõ wã pʋgẽ, n kẽ zĩig ning b sẽn gʋls tɩ Rubriques n ges zĩig ning b sẽn gʋls tɩ Divers, n karem sõsg ning gom-zug sẽn yaa: “De l’aide pour les victimes de violences conjugales.”
c GOMDÃ VÕORE: “Gom-põaas” tõe n yɩɩ yʋʋr f sẽn pʋd ned n boondẽ tɩ paoogd-a, wall f sẽn na n ningd-a taal wakat fãa n pa basdẽ ye. Rẽnd goam buud fãa rao sẽn na n togs a pag sẽn na yɩl n sãam a sũuri, n paoog-a bɩ n yaal-a yaa gom-põaasa.
d Y tõe n kẽe jw.org wall JW Library aplikasiyõ wã pʋgẽ n karem sõsg ning gom-zug sẽn yaa: “Yoobã yɛl gesg tõe n sãama y kãadmã.”
e Pag sɩd sã n get yoob yɛla, a tõe n karma yʋʋmd 2023 sa-sik kiuug Gũusg Gasgã sõsg ning gom-zug sẽn yaa: “Y pagã wall y sɩdã sã n get yoob yɛla.”
f Pag ne rao lagengã wɛɛngẽ, Biiblã pa wilg bũmb nins pag ne a sɩd sẽn tar sor n tõe n maan la b sẽn pa segd n maanã ball-ball ye. Kiris-neb sẽn kẽ kãadem segd n modgame tɩ yam nins b sẽn yãkd rẽ wɛɛngẽ wã wilgdẽ tɩ b rat n waooga a Zeova, tɩ b ned kam fãa rat n maana sẽn noom a to, la tɩ b ratame tɩ b sũur-kasetã kell n yɩ yɩlemde. Naoor wʋsgo, pag ne a sɩd pa na n gom bũmb nins b sẽn maand lagengã wɛɛngẽ wã yell ne neb a taab ye.
g FOT-RÃMBÃ BILGRI: Saam-biig tʋmd-n-taas sẽn pa a Zeova Kaset rãmb sẽn dat t’a wa naag-b n ges sɛb sẽn wilgd yoob yɛla.
