ZÃMSGÃ YĨNGA 3
YƖƖLL 35 D bao n bãng sẽn tar yõod n yɩɩdã
Yãkd-y yam sẽn noom a Zeova
“A Zeova zoees n yaa yam sɩngre. Fo sã n bãng sẽn yaa-a sõng n yɩɩdã, rẽ n yaa bãngre.”—YEL. 9:10.
D SẼN NA N BÃNGE
D na n yãa d sẽn tõe n tikd bãngre, yam la yam-vẽenem to-to n bãngd n yãkd yam.
1. Bõe n tõe n yɩ toog ne d fãa?
BEOOG sẽn vẽeg fãa d yãkda yam. Yam-yãkr kẽer pa toog ye. Wala makre, bõe la d na n dɩ, pa rẽ bɩ wakat-bʋg la d na n kẽ gãaga? La bũmb kẽer wɛɛngẽ, yɩl n yãk yam tõe n yɩɩ toog bilfu. D yam-yãkrã tõe n nafa tõnd ne d zakã rãmb bũmb kẽer wɛɛngẽ bɩ n wã-do. Wala makre laafɩ wã wɛɛngẽ wall a Zeova tũubã wɛɛngẽ. Tõe n paasa d sũ-noogã wall boog-a me. D ratame tɩ d yam-yãkr toor-toorã naf tõnd ne d zakã rãmba. La sẽn yɩɩd fãa, d ratame tɩ d yam-yãkrã yɩ a Zeova noogo.—Rom. 12:1, 2.
2. Bõe la y tõe n maan tɩ sõng-y tɩ y bãngd n yãkd yam?
2 Bũmb sẽn tõe n sõng-y tɩ y bãng n yãk yam yaa y sẽn na n bao n bãng y sẽn segd n yãk yam bũmb ning wɛɛngẽ wã sõma, y sẽn na n bao n bãng a Zeova tagsg sẽn yaa soab bõn-kãng zugu, la y tags n ges y sẽn tõe n yãk yam ninsã sẽn tõe n baas to-to. Sõsg-kãngã pʋgẽ d na n goma bõn-kãens yelle. Sõsgã na n sõng-d lame me tɩ d bãng d sẽn tõe n maan to-to n tagsd sõma.—Yel. 2:11.
BAO-Y N BÃNG-Y Y SẼN SEGD N YÃK YAM BŨMB NING WƐƐNGẼ WÃ SÕMA
3. Rɩk-y makr n wilg y sẽn segd n deng n bao n wʋm yell vɩʋʋg n yaool n yãk yamã võore.
3 Pipi bũmb y sẽn segd n maan tɩ sõng-y tɩ y bãng n yãk yam, yaa y sẽn na n bao n bãng y sẽn segd n yãk yam bũmb ning wɛɛngẽ wã sõma. Bõe yĩng tɩ rẽ tar yõodo? Mams-y wa bãad sẽn na n kẽng logtor yir ne a bã-kɛgenga. Logtorã na n yɩɩ tao-tao n kõ-a tɩɩm n pa reng n maag a yĩng n maan vaeesgo, wall a sok-a sogsg sɩda? A pa na n saag n maan a buud ye. Sẽn na yɩl n bãng n yãk yam, yãmb me na n deng n bao n wʋma yellã vɩʋʋgo. Wãn to la y tõe n maan dẽ?
4. Bõe la y tõe n maan n wʋm yell vɩʋʋgo? (Yel-bũnã 18:13) (Ges-y fotã me.)
4 Naoor wʋsgo, y tõe n soka sogsg n wʋm yell vɩʋʋgo. Mams-y wa ned sẽn na n bool yãmb tɩ y wa soaare. Y na n kẽngame bɩ? Yãmb sã n pa mi soaare wã soaba, wall bũmb nins a sẽn magd n na n maanã, na n yɩɩ tɩlɛ tɩ y sok-a sogsgo. Wala makre: Yɛ la soaare wã na n maane, la na n yɩɩ wakat-bʋgo? Neb a wãn n na n wa? Ãnd n na n ges tɩ zũnd-zãnd ra zĩndi? Ãnda rãmb n na n wa? Bõe la b magd n na n maane? Rãam na n zĩndame bɩ? Y sã n paam sogs-kãensã leoore, tõe n sõng-y lame tɩ y bãng n yãk yam.—Karm-y Yel-bũn 18:13.
Sok-y sogsgo, n bao n wʋm yellã vɩʋʋgo (Ges-y sull a 4) a
5. Y sã n wʋm yell vɩʋʋg poore, bõe la y segd n maane?
5 Y sã n wʋm yellã vɩʋʋg poore, bɩ y maag y yĩng n tags sõma. Wala makre, y sã n bãng tɩ neb sẽn pa tũud Biiblã noy n na n zĩnd be, wall tɩ rãam na n zĩndame tɩ nebã tõe n yũ wa b sẽn date, y na n maana wãna? Y na n yãame tɩ soaare-kãng tõe n wa lebga reem sẽn naag ne tʋʋm-yood bɩ? (1 Pɩy. 4:3) La soaare wã kẽngr sã n na n kɩtame tɩ y pa tõog n kẽng tigsga wall y yi koɛɛgã mooneg yẽ? Y sã n tags yellã nens fãa zug sõma, y tõe n bãng n yãka yam. La bũmb a to me la y segd n maane. Yãmb mii yãmb tagsg sẽn yaa a soab ne yellã. La a Zeova tagsg yaa wãna?—Yel. 2:6.
BAO-Y N BÃNG-Y-YÃ A ZEOVA TAGSGO
6. Sã n yaa ne Zak 1:5 wã, bõe yĩng tɩ d segd n pʋʋs a Zeova n kos sõngre?
6 Kos-y-yã a Zeova t’a sõng-y tɩ y bãng a tagsg sẽn yaa a soab yellã zugu. A Zeova pʋlmame t’a na n kõ-d-la yam tɩ d bãng d yam-yãkr sã n na n taa a yam. A kõta yam-kãng “ne yamleoog n pa ningd taal ye.”—Karm-y Zak 1:5.
7. Bõe la y tõe n maan n bãng a Zeova tagsgo? Rɩk-y makre.
7 Y sã n pʋʋs a Zeova n kos sõngr poore, bɩ y bao n bãng a sẽn na n leok-y to-to. D rɩk makre. Yãmb sã n togd sor n tek n meneme, y tõe n kosa tẽng-n-ned sõngre. La y na n kẽng n loogame n pa yaas t’a leok sɩda? Ayo. Y na n maaga y yĩng n kelg-a t’a wilg-y sorã. Woto me, y sã n kos a Zeova yam poore, bɩ y bao n bãng Biiblã noy la a sagls nins sẽn tõe n sõng-y yellã pʋgẽ wã, tɩ rẽ la y bãngd a Zeova sẽn na n leok-y to-to. Wala makre, y sã n wa baood n na n bãng y sã n tõe n kẽnga soaare ning yell d sẽn gomã, y tõe n tagsa Biiblã sẽn yet bũmb ning reem nins sẽn naag ne tʋʋm-yoodã wɛɛngẽ wã, tũud-n-ta-wẽnsã la lʋɩɩs Rĩungã yɛl taoor n yɩɩd sẽn noom yãmbã wɛɛngẽ wã yelle.—Mat. 6:33; Rom. 13:13; 1 Kor. 15:33.
8. Y sã n wa baood kibay sẽn na yɩl n wʋm yell vɩʋʋgo, bõe la y tõe n maane? (Ges-y fotã me.)
8 Baa ne rẽ fãa, y tõe n ket n data sõngr sẽn na yɩl n wʋm yell vɩʋʋgo. Y tõe n kosa saam-biig wall saam-bi-poak tẽeb sẽn bɩ sõngre. La y sã n maan vaeesg y toor me, na n naf-y lame. Kibay wʋsg n be tõnd vaeesg tʋʋm-teedã pʋgẽ. Wala makre, Vaeesg sebre, a Zeova Kaset rãmbã yĩnga la D sẽn tõe n tũ Biiblã sagls to-to sebrã pʋgẽ. Tẽeg-y tɩ y bõn-daabã yaa tõog n yãk yam sẽn na n yɩ a Zeova noogo.
Bao-y n bãng-y-yã a Zeova tagsg sẽn yaa a soab yellã wɛɛngẽ (Ges-y sull a 8) b
9. Bõe n tõe n sõng-d tɩ d kɩs sɩd tɩ d yam-yãkr na n yɩ a Zeova noogo? (Efɛɛz rãmbã 5:17)
9 Bõe n tõe n sõng-d tɩ d kɩs sɩd tɩ d yam-yãkr na n yɩ a Zeova noogo? Pipi, d segd n bao n bãnga a Zeova sõma. Biiblã yetame: “Fo sã n bãng sẽn yaa-a sõng n yɩɩdã, rẽ n yaa bãngre.” (Yel. 9:10) Bãngr hakɩɩkã yaa d sẽn na n mi a Zeova sẽn yaa Wẽnnaam ning buudã, a raabã, a sẽn nong la a sẽn kisi. Sok-y y meng yaa: ‘Mam sã n tik bũmb ning m sẽn mi a Zeova zugã, yam-bʋg la m tõe n yãk tɩ yɩ-a noogo?’—Karm-y Efɛɛz rãmb 5:17.
10. Bõe yĩng tɩ Biiblã saglsã tar yõod n yɩɩd d buudã neb wall d babgẽ wã neb minundã?
10 Wakat ninga, sẽn na yɩl n noog a Zeova sũuri, d segd n maana bũmb sẽn pa noom neb a taabã ye. Wala makre, roagdb tõe n pẽdgda b bi-pugl t’a kẽ kãadem ne rao sẽn tar ligdi, la sẽn tõe n ges bãmb mengã yell baa ne a tẽebã sẽn pa tar pãngã, n tagsdẽ tɩ yaa a neer la b baooda. Yaa sɩd tɩ b rata ned sẽn na n ges b biigã yell sõma. La rẽ yĩnga a na n tõog n sõng-a lame t’a tẽebã tall pãng sɩda? A Zeova tagsg yaa wãn ne rẽ? Matiye 6:33 leokda sok-kãnga. Be, b sagenda kiris-nebã tɩ b “rengd n baood Wẽnnaam Rĩungã.” Baa ne d sẽn waoogd d roagdbã la d buudã nebã, sẽn tar yõod n yɩɩd ne tõnd yaa noog a Zeova sũuri.
TAGS-Y N GES-Y YAM-YÃKR FÃA SẼN TÕE N BAAS TO-TO
11. Zʋg-sõng-bʋg n tõe n sõng-d tɩ d bãng yam-yãkr fãa sẽn tõe n baas to-to? (Filip rãmbã 1:9, 10)
11 Y sã n bao n bãng Biiblã sẽn yet yell ning wɛɛngẽ y sẽn segd n yãk yamã poore, y segd n tagsa yam-yãkr fãa sẽn tõe n baas to-to. (Karm-y Filip rãmb 1:9, 10.) Yam-vẽenemã na n sõng-y lame tɩ y tõog n bãng yam-yãkr fãa sẽn tõe n baas to-to. Wakat ninga, d bãngd n yãka yam nana-nana. La pa wakat fãa la yaa woto ye. Yam-vẽenemã na n sõng-y lame tɩ y bãngd n yãkd yam, baa yɛl nins võor wʋmb sẽn yaa toogã wɛɛngẽ.
12-13. Wãn to la yam-vẽenemã tõe n sõng-y tɩ y bãng n yãk yam tʋʋmã wɛɛngẽ?
12 D rɩk makre. Yãmb baooda tʋʋmd sẽn na yɩl n tõog n ges y zakã yelle. B pʋlm-y-la tʋʋm a yiibu. Y tagsa bũmb kẽer tʋʋm-kãens wɛɛngẽ. Wala makre, sẽn yaa tʋʋmd ning buudu, y sẽn segd n tʋm wakat ninga, kẽngrã la lebgrã sẽn kaoosd to-to, la bũmb a taaba. Tʋʋm a yiibã baa a ye pa na n kɩt tɩ y kɩɩs Biiblã noy ye. Tõe tɩ y yamã kẽe tʋʋmd a ye, a sẽn yaa tʋʋm sẽn noom-y wall yaoodã sẽn yaa wʋsg yĩnga. La bũmb a taab yell la y segd n deng n tags n yaool n yãk yam.
13 Wala makre tʋʋm-kãens sʋka, bʋg n na n kɩt tɩ yɩ toog tɩ y kẽnd tigissã n pa vaandẽ? Bʋg n na n kɩt tɩ yɩ toog tɩ y paamd sẽk n sõngd y zakã rãmb sẽn na yɩl tɩ b yam gãe bãane, la y sõngd-b tɩ b tẽebã tar pãnga? Sogsg a woto na n sõng-y lame tɩ y lʋɩɩs “bũmb nins sẽn tar yõod n yɩɩdã” taoore, la pa arzɛkã baoob ye. Bũmb nins sẽn tar yõod n yɩɩdã yaa a Zeova tũudmã la y zakã rãmb sõngrã. Y sã n maan woto, y tõogd n yãka yam t’a Zeova ning barka.
14. Wãn to la yam-vẽenemã la nonglmã tõe n sõng-d tɩ d ra wa maan bũmb sẽn na n kɩt tɩ ned a to lak n lʋɩ?
14 Yam-vẽenemã na n sõng-d lame me tɩ d sã n wa segd n yãk yam bɩ d tags neb a taabã yelle, n da wa maan bũmb sẽn ‘na n kɩt tɩ d to lak n lʋɩ’ ye. (Fili. 1:10) Rẽ tara yõodo, d sã n wa segd n yãk yam bũmb kẽer wɛɛngẽ. Wala makre, futã la mengã manegr wɛɛngẽ. Tõe tɩ y tara fut wall zug manegr modɛll y sẽn nonge. La sã n mik tɩ rẽ sãamda tigingã neb wall yɩng rãmbã kẽer sũyã, y maanda wanã? Yam-vẽenemã na n sõng-d lame tɩ d ra maan d toog kae ne b tagsgã ye. Nonglmã na n kɩtame tɩ d bao neb “a taabã nafre,” la d yɩ sik-m-meng soaba. (1 Kor. 10:23, 24, 32; 1 Tɩm. 2:9, 10) Rẽ, d tõogd n yãka yam sẽn wilgd tɩ d nonga d taabã, la tɩ d waoogd-b lame.
15. Y sã n dat tɩ y yam-yãkr yãk nenga, bõe la y segd n deng n maane?
15 Y sã n wa segd n yãk yam bũmb sẽn tar yõod wʋsg wɛɛngẽ, yɩta sõma tɩ y reng n tags bũmb nins y sẽn segd n maan sẽn na yɩl tɩ yãk nengã zugu. A Zeezi yeelame tɩ d “reng n zĩnd n geelge.” (Luk 14:28) Bɩ y reng n tags n ges rẽ sẽn baood sẽk ninga, ligd la modgr ninga. Wakat ninga yɩta sõma tɩ y sõs ne y zakã rãmbã, n bao n bãng b ned kam fãa sẽn tõe n maan bũmb ning n teel-yã. Bõe yĩng tɩ woto maaneg tar yõodo? Tõe n sõng-y lame tɩ y bãng tɩ y segd n toeema bũmb kẽer y yam-yãkrã pʋgẽ, wall y toeem y yam-yãkrã menga. Sẽn paase, y sã n sok y zakã rãmb b tagsg la y kelg-ba, b na n sak n sõng-y-la ne yamleoog tɩ yãk nenga.—Yel. 15:22.
BÃNGD-Y N YÃKD-Y YAM
16. Sẽn na yɩl n yãk yam sẽn na n yãk nenga, bõe ne bõe la y segd n maane? (Ges-y zĩ-gũbrã me: “ Y sẽn tõe n bãngd n yãkd yam to-to.”)
16 Y sã n maan bũmb nins b sẽn sõdg yĩngrã, y segl n saame n na n yãk yam sẽn yaa sõma. Y bao n bãnga yellã vɩʋʋgo, la Biiblã sagls nins sẽn na n sõng-y tɩ y yãk yam sẽn na n yɩ a Zeova noogo. Rẽ poore y tõe n pʋʋsa a Zeova t’a sõng-y tɩ y yam-yãkrã yãk nenga.
17. Sẽn na yɩl n bãng n yãk yam, bõe n yaa tɩlɛ?
17 Baa y sã n zoe n yãka yam naoor wʋsg tɩ yɩ sõma, tẽeg-y tɩ pa y sẽn na n teeg y bãngr wall y minim la y na n bãngd n yãkd yam ye. Yaa y sẽn na n teeg yam ning a Zeova sẽn kõtã. Yaa yẽ bal n tõe n kõ-y bãngr la yam-vẽenem hakɩɩk sẽn yaa yam yẽbgrã. (Yel. 2:1-5) A Zeova tõe n sõngda yãmb tɩ y yãkd yam sẽn noom-a.—Yɩɩn. 23:2, 3.
YƖƖLL 28 Ãnd n tõe n paam a Zeova zoodo?
