Neb kẽer sẽn yeel pʋʋsgã wɛɛngẽ
“M sã n pʋʋsdẽ, yaa wa Wẽnnaam bee ne maam, n gãd mam nugã, la a wilgd-m sore, m sã n wa pa mi m sẽn maande.”—A MARIYA.
“Mam pagã maoo ne kãnsɛɛr n kaoos yʋʋm 13 n maan kaalem. M tẽrame tɩ m da pʋʋsda Wẽnnaam daar fãa, n neẽ t’a sɩd kelgda maam m toogã pʋgẽ. Rẽ kɩtame tɩ m paam sũur pʋgẽ bãane.”—A RAWULL.
“Pʋʋsgã yaa kũun sẽn yaa kãseng Wẽnnaam sẽn kõ ninsaalbã.”—A ARNE.
Sã n yaa ne a Mariya, a Rawull, a Arne la neb wʋsgo, pʋʋsgã yaa kũun sẽn ka to. B getame tɩ ne pʋʋsgã maasem, b tõe n goma ne a Zeova, n pʋʋs-a barka, la b kos a sõngre. B sak n deega ne b sũur fãa tɩ Biiblã sẽn yet bũmb ning pʋʋsgã wɛɛngẽ wã yaa sɩda. Biiblã yetame yaa: “Ad bas-m-yam ning tõnd sẽn tar ne Wẽnnaamã: Yaa tɩ sẽn wa n yaa bũmb ning fãa la d kos bãmb tɩ zems b raabã, b kelgda tõndo.”—1 Zã 5:14.
La neb wʋsg n yaool n pa tẽed bũmb ning Biiblã sẽn yet pʋʋsgã wɛɛngẽ wã ye. A Stiiv togsa yẽ sẽn tagsd to-to pʋʋsgã wɛɛngẽ: Ad a sẽn yeele: “Mam sẽn wa n tar yʋʋm 17, m zo-rãmb a tãab n maan kaalem. A yembr tũu ne mobill agsɩdã, t’a yiibã ki mogrã pʋgã.” Bõe la a Stiiv maan-yã? A yeelame: “Mam pʋʋsa Wẽnnaam n dat n bãng bõe yĩng tɩ yel-beed a woto maane, la m pa paam leoor ye. Kɩtame tɩ m sok m meng yaa: ‘Pʋʋsgã yõod meng yaa bõe?’” Neb wʋsg me sẽn pa paamd b pʋʋsg leoor kɩtame tɩ b sokd b mens bõe yĩng tɩ b na n ket n pʋʋsdẽ.
Bũmb a taab me n kɩt tɩ neb kẽer sokd b mens pʋʋsgã sã n tara yõodo. B yetame tɩ sẽn mik tɩ Wẽnnaam mii bũmb fãa wã, sãmbg kae t’a zoe n mii bũmb nins d sẽn datã, la d zu-loeesã. Rẽnd pa tar yõod tɩ d le gom rẽ yell ne-a ye.
Neb a taab tagsdame tɩ yaa bãmb sẽn maan yel-wẽn pĩndã yĩng n kɩt tɩ Wẽnnaam pa kelgd b pʋʋsgã. Wala makre, a Zeni yeelame: “Bũmb ning sẽn namsd maam n tɩ yɩɩdã, yaa m sẽn get tɩ m ka võorã. Mam tʋma tʋʋm sẽn pa sõma, n maand m bãngẽ. Rẽ kɩtame tɩ m tagsd tɩ pa tar daar tɩ Wẽnnaam kelg m pʋʋsg ye.”
Yãmb tagsg yaa wãn ne pʋʋsgã? Yãmb me sã n tara sãmbs a woto pʋʋsgã wɛɛngẽ, bɩ y bas y yam tɩ Biiblã tõe n sõng-y lame tɩ y paam y sogsgã leoore. Y tõe n basa y yam tɩ bũmb ning Biiblã sẽn yet pʋʋsgã wɛɛngẽ wã yaa sɩda. * Biiblã tõe n sõng-y lame tɩ y paam y sogsg wʋsg leoore. Wala makre:
-
Wẽnnaam sɩd kelgda d pʋʋsgã bɩ?
-
Bõe yĩng tɩ Wẽnnaam pa kelgd pʋʋsg kẽere?
-
Wãn to la y tõe n pʋʋs tɩ Wẽnnaam kelg-yã?
-
Wãn to la pʋʋsgã tõe n naf yãmba?
^ sull 9 Biiblã pʋgẽ, d yãta wẽnd-sakdb wʋsg pʋʋsgo, a Zeezi me nengẽ sẽn naage. Biiblã babg ning b sẽn da gʋls ne Ebre wã tɩ b wae n boondẽ tɩ Kãab-kʋdgã pʋgẽ, pʋʋsg sẽn yɩɩd bãmb 150 n be beenẽ.
Découvrez aussi…
SOGSG BIIBLÃ SẼN LEOKDE
Bõe yĩng tɩ m segd n pʋʋse? Wẽnnaam na n leoka m pʋʋsgã bɩ?
Wẽnnaam na leok yãmb pʋʋsgã bɩ a kõn leokã bee ne yãmb n yɩɩda.
SOGSG KOM-BƖƖSÃ SẼN SOKDE
Bõe yĩng tɩ m segd n pʋʋsdẽ?
Pʋʋsgã yaa bũmb sẽn sõngd maam tɩ m yamã gãe bãan bal bɩ, bɩ a yõodã yɩɩda rẽ?
