MAM doga yʋʋmd 1926 soabã, Krooksvɩll sẽn be Ohio Etazĩni soolmẽ wã. M baaba ne m ma ra pa wẽn-tũudba, la b sagla tõnd b kamb a nii wã tɩ d kẽnd meese. Mam da kẽnda metodist-rãmbã pʋʋsgo. Mam sẽn wa n tar yʋʋm 14, pastɛɛrã kõo maam keoore, bala yʋʋmdã pʋgẽ, mam pa tol n vaal hat daar pʋʋsgã ye.

Wakat kãnga, tõnd yak sẽn da yaa a Zeova Kaset soab t’a yʋʋr boondẽ t’a Margaret Walker n sɩng m ma kaagre, tɩ b sõsd Biiblã zugu. Daar a yembre, mam yãka yam n na n zĩnd n kelge. M ma tagsame tɩ mam na n tiisa bãmb sõsgã, n yeel maam tɩ yik n yi yɩnga. La mam maana m sẽn tõe n kelg b sõsgã. A Margaret waoong a yiib-n-soabã poore, a soka maam woto: “Fo mii Wẽnnaam yʋʋr bɩ?” Tɩ mam leok tɩ “nebã fãa miime t’a yʋʋr la Wẽnnaam.” T’a yeel maam tɩ m tɩ rɩk m Biiblã n karem Yɩɩn-sõamyã 83:19. * Mam tɩ gesame n mik tɩ be, b yeelame tɩ Wẽnnaam yʋʋr la a Zeova. Rẽ poore, mam zoe n yiime n tɩ yeel m  zo-rãmbã woto: “Y sã n kul zaabrã, bɩ y karem Yɩɩn-sõamyã 83:19 wã Biiblã pʋgẽ, n bãng Wẽnnaam yʋʋrã.” Yaa wa m sẽn sɩng koɛɛgã mooneg zĩig pʋgẽ bala.

Mam zãmsa Biiblã, n deegd lisg yʋʋmd 1941 soabã. Rẽ poor bilfu, b yãka maam tɩ m lʋɩt taoor tigingã sebr zãmsg sasa. Mam boola m ma ne m ma-biisã tɩ b wat tigis-kãngã, tɩ b sɩng waoongo. La m baaba toog ra kae ne tigissã ye.

Mam wa n paama tʋʋm a taab tigingã pʋgẽ, n bao zĩig n bĩngd m sɛbã. La daar a yembre, m baaba teesa sɛbã n yeel maam woto: “Fo nee seb-kãensã? Mam datame tɩ f yiis-b roogẽ ka, la fo mengã tõe n kell n yi m zakẽ wã.” Mam yi n tɩ rɩka roog Zanɛsvɩll sẽn pa zãr ne tõnd zakã, la m da ket n wata yir n kengd m roagdbã raoodo.

M baaba makame n na n gɩdg m ma t’a ra kẽng tigissã ye. A ra mi n babsa m ma sorã zug n tɛ-a n wa zakẽ, la m ma tũuda zakã noor a to wã n kẽng tigsgã. Mam wa n yeela m ma woto: “Da maan yɩɩr ye. A na n wa yaame n kong n bas-fo.” M baaba sɩd wa n bas-a lame t’a kẽnd tigissã tɩ yell kae ye.

Yʋʋmd 1943 wã pʋgẽ, b sɩnga Wẽnnaam tʋʋmdã lekoll tigingã pʋgẽ, tɩ b mi n kõ maam sõsg tɩ m wɛgse. Sagls nins m sẽn da paamd sõsg fãa poorẽ wã sõng-m lame tɩ m tõe n gom ne bas-m-yam.

Dũni gill zabr a yiib-n-soabã sasa, yʋʋmd 1944 soabã pʋgẽ, b boola maam Foor Hayɛs sẽn yaa sodaas zak n be Kolõmbus, Ohio soolmẽ wã, tɩ mam kẽng tɩ b vaees-m n ges m sã n tara laafɩ, la b kɩt tɩ m gʋls sebre. Rẽ poore, mam yeela nanambsã tɩ m pa rat n yɩ sodaaga, tɩ b sak n bas maam tɩ m kuili. Rasem a wãn poore, polɩɩs n wa mam zakẽ wã, n yeel maam woto: “Corwin Robison, b kõo maam noor tɩ m wa tall yãmb n wa.”

Semen a yiib poore, bʋ-kaood n yeel maam woto: “Sã n da kellẽ-la maam, m da na n kɩtame tɩ b pag foo, f yõor tɛka. Fo tara gomd bɩ?” Tɩ mam leoke: “Naaba, yãmb da segd n geelga maam wa koe-moonda. * Bala, mam kẽnda zak-zaka, n taasd neb wʋsg Wẽnnaam Rĩungã koe-noogo.” La bʋ-kaoodã yeela a tʋmd-n-taasã woto: “Yãmb pa be ka n na n wilg bi-bɩ-kãngã sã n yaa koe-moond bɩ a pa koe-moond ye. Y bee ka n na n wilg a sã n sɩd sak n gʋlsa a yʋʋr n na n kẽ sodaarã bɩ a pa sake.” Bʋ-kaoodbã tɩ yãa taaba. La sẽn pa yã n maan lɛɛr la pʋɩ-sʋka, b wa n yeela maam tɩ m tara taale, tɩ b segd n pag maam bãens yʋʋm a nu Aslãnd, Kẽntuki soolmẽ wã.

Pipi semen a yiibã, mam zĩnda bãens roog Kolõmbus, Ohio soolmẽ wã, la mam pa tol n yi yɩng pipi raarã ye. Mam pʋʋsa a Zeova n yeel-a woto: “Mam pa tõe n zĩnd bãens roog yʋʋm a nu ye. Sõng-ma.”

Vẽkembeoogã, gũudbã basa maam tɩ m yi m doogẽ wã. Mam sõsa ne nin-daoog sẽn da be roogẽ wã. Tõnd da yasa fenetrẽ n get yɩnga, t’a  sok maam woto: “Ra-koɛɛga, yaa bõe n wa ne foo ka?” Tɩ mam leok-a tɩ m yaa a Zeova Kaset soaba. T’a paase: “A Zeova Kaset soab bɩ bõe? Bõe yĩng tɩ fo be ka?” Tɩ mam yeel-a tɩ yaa a Zeova Kaset rãmbã sẽn pa kẽnd zabre, b sẽn pa rat n kʋ nebã yĩngã. T’a leok maam yaa: “B kẽesa foo roog f sẽn pa rat n kʋ neb yĩnga, n yaool n pag sãnda b sẽn kʋ neb yĩnga. Woto tara võor sɩda?” Tɩ mam leok-a tɩ sɩd ka võor ye.

Rẽ poore, a yeela woto: “Mam zĩnda bãens roog a to pʋgẽ yʋʋm 15, n da paamd yãmb sɛbã n karemdẽ.” Mam pʋʋsa a Zeova n yeel-a t’a sõng-m tɩ ra-kãngã ra zãag n bas-m ye. Raoã yʋʋr la a Polle. Mam sẽn pʋʋs n sa wã bala, a yeela woto: “Bi-beesã ned ning fãa sẽn sɩɩs foo bɩ f maan dãamd tɩ m wʋme, tɩ m na n gesa a yelle.” Mam tɩ yii bãensã roogẽ tɩ neb 50 wã sẽn da be ne maamã pa nams maam ye.

B sẽn wa n yiis maam n tɩ pag Aslãndã, mam tɩ mika saam-biis wʋsg tẽeb sẽn bɩ sẽn da zoe n be be. B tũud-n-taarã sõnga maam ne neb a taab tɩ d tẽebã pãng paase. B ra mi n yãka Biiblã sags n kõ tõnd tɩ d karem semennã pʋgẽ n segl sogsg la leoore, tɩ d wa seg taab n sõse. Sẽn paase, tõnd da tara ned sẽn get koe-moonegã yelle. Tõnd sẽn da gãe zĩig ningã ra yalmame, tɩ gãasã teeg lalsã n tong taaba. Sẽn get-a koe-moonegã yellã tõe n yeela maam woto: “Robison, fo n na n ges sẽn sɩng gã-kãngã n tãag gã-kãngã nebã yelle. Fo segd n modgame tɩ ned ra wa gãand be n yi tɩ f pa taas-a koɛɛgã ye.” Woto la tõnd da sigl koe-noogã moonego.

Dũni gill zabr a yiib-n-soabã saa yʋʋmd 1945 soabã, la mam kell n paa bãens roog n kaoos bilfu. Mam da maanda yɩɩr m doagdbã yĩnga. Bala, m baaba ra yeela maam woto: “Mam sã n tõog foo, sẽn ket-bã tõogr na n yɩɩ nana.” Mam sẽn yi bãensã roog poore, mam yãa bũmb tɩ yɩ-m noogo. Baa m baaba sẽn da namsd m ma ne m ma-biisã, zakã neb a yopoe n da ket n kẽnd tigissã, tɩ mam kẽem bi-pugl a ye meng reeg lisgu.

Yʋʋmd 1950 wã pʋgẽ, zabr n sɩng Koore. Wakat kãnga, b le boola maam tɩ m wa sak Foor Hayɛs. B soka maam sogsg n mik tɩ m zugã vɩɩ sõma, tɩ soda-naab yeel maam woto: “Yãmb sullã pʋgẽ, fo naaga neb nins zut sẽn vɩ sõma wã.” Tɩ mam leok-a: “Yaa kiba-noogo. La mam pa rat n kẽng sodaarã ye.” Mam togsa  2 Tɩmote 2:3 goamã n wilg-a tɩ mam zoe n yaa Kiris sodaaga. A paa sɩɩ, n wa yeel maam tɩ m looge.

Rẽ poor bilfu, tigis-kãseng n zĩnd Sẽnsinati, Ohio soolmã pʋgẽ. B wa n yeelame tɩ tigsg la b na n maan sẽn dat-b n tɩ tʋm Betɛllẽ wã yĩnga, tɩ mam kẽnge. Tigsgã sasa, saam-biig a Milton Henschel yeela tõnd tɩ Betɛllã rata saam-biis sẽn tʋll n tʋm ne b sũur fãa Rĩungã yĩnga. Mam gʋlsa m yʋʋre, tɩ b bool maam Burkilin Betɛllẽ wã yʋʋmd 1954 sa-sik kiuugã. Mam kell n paa be n tãag rũndã.

Mam sẽn kẽng Betɛllẽ wã tɛka, mam zɩ n kong tʋʋmd ye. Sɩd me, m tʋma zĩis toor-toore. Na maan yʋʋma, m tʋma sɛbã yiisg zĩigẽ la masĩn-dãmb manegr zĩigẽ. M manega kʋɩlems me. Sẽn paase, mam tʋma Niuyork tigis-kãsemsã rotẽ.

Betɛllã pʋgẽ, bũmb toor-toor n noom maam. Wala makre, daar vɛrse wã d sẽn vaeesd yibeoog fãa wã, Gũusg Gasgã zãmsgo, la koɛɛgã mooneg ne m tigingã nebã. Y sã n maag y yĩng n gese, y mikdame t’a Zeova Kaset rãmbã fãa zags pʋsẽ, b tog n maanda bõn-kãensã. Roagdbã ne b kambã sã n naagd taab n vaeesd daar vɛrse wã, n maand zak pʋgẽ Biiblã zãmsgã n pa vaandẽ, n segend tigissã sõma la b moond koe-noogã, paasda zakã ned fãa tẽebo.

Mam paama zo-rãmb wʋsg Betɛllẽ wã la tigingã pʋgẽ. Kẽer da yaa neb sẽn paam vʋʋsem sõngã zaeebo, n be saasẽ masã. La sãnda pa paam zaeeb ye. Baasgo, a Zeova nin-buiidã fãa, Betɛllẽ tʋm-tʋmdbã sẽn naag yaa pãn-komsem dãmba. Maam ne m tẽed-n-taag moor sã n yõsge, mam maanda m sẽn tõe fãa tɩ laafɩ lebs n zĩndi. Mam tẽegda Matye 5:23, 24 goamã, la b sẽn sagend tõnd tɩ d welg d mo-yõsã to-to wã. Yaa sɩd tɩ sugr kosg pa nana ye. La mam yãame tɩ naoor wʋsgo, maam ne m to moor sã n yõsg tɩ m kos sugri, manegdame.

Mam yʋʋmã sẽn vẽsgã yĩnga, koɛɛgã mooneg zak-zakã lebga toog ne-ma, la m pa koms raood ye. Mam zãmsa mandarẽ sẽn  yaa Sin buud-gomdã, n moond koɛɛgã sor noore. Daar ning yibeoogo, mam mi n pʋɩya periodik-rãmb 30 bɩ 40.

Mam sõsa ne ned sẽn be Sin menga! Daar a yembre, pʋg-sad sẽn maand tɩɩs biis piblisite n pɩʋʋg mam zĩigẽ wã, n la ne maam. Ma-me laa ne-a, la m kãab-a Gũusg Gasgã la Réveillez-vous ! wã ne sinoaamdo. A reega sɛbã la a yeel maam t’a yʋʋr la a Katie. Rẽ poore, a sã n pɩʋʋg n yã maam fãa, a wat n sõsa ne-ma. Mam wilg-a-la tɩ-biis nins a sẽn koosdã yʋy ne ãngilindi, la m wilg-a Biiblã vɛrse kẽere, t’a sak n deeg Biiblã yetame sebrã. La semen a wãn poore, mam wa n pa le tar a kibar ye.

Rẽ zugẽ, pʋg-sad a to sẽn maand tɩ-biis piblisite me n pɩʋʋg mam zĩigẽ wã, tɩ mam kõ-a periodik-rãmba. Semen ning sẽn pʋglã, a wa n teesa maam a selilɛɛrã, n yeel woto: “Deeg n gom ne ned sẽn be Sin.” Tɩ mam leok-a: “Mam pa mi ned Sin ye.” La a pẽdgame, tɩ mam deeg selilɛɛrã, n yeele: “Alo, yaa a Robison.” T’a soabã leok maam woto: “Robby, yaa a Katie. Mam leba Sin.” Tɩ m leoke: “Sin bɩ bõe?” T’a yeele: “N-ye. Robby, fo mii pʋg-sad ning sẽn kõ foo selilɛɛrã bɩ? Yaa mam yao. Fo wilga maam bõn-sõma wʋsgo. M bõos tɩ f wilg-a bõn-kãens me.” Mam pʋlma a Katie tɩ m na n sõnga a yaoã wa m sẽn tõe tɛka, la m pʋʋs-a barka, a sẽn wilg maam a sẽn beẽ masã wã. Rẽ poor bilfu, mam wa n pa le tar a Katie yaoã me kibar ye. La kom-pugli-kãensã sẽn tɩ beẽ fãa, mam saagdame tɩ b na n bao n bãnga a Zeova n paase.

Yʋʋm 73 la woto mam sẽn tũud a Zeova. Mam sũur nooma a sẽn sõng maam tɩ m pa kẽes m toog zabr pʋgẽ, la m kell n zĩnd a poorẽ bãens roogẽ wã. Sẽn paase, mam ma-biisã yeela maam tɩ m baaba sẽn nams maam tɩ m pa tol n koms raoodã nafa bãmb me wʋsgo. M ma ne tõnd zakã neb a yoob n wa n deeg lisgu. Baa m baaba meng wa n bʋkame. Nand t’a maan kaalem, a sak n kẽnga tigissã naoor a wãn menga.

Sã n ta Wẽnnaam yam, dũni-paalgã pʋgẽ, a na n vʋʋga m doagdb la m zo-rãmb nins sẽn maan kaalmã. Mams-y n ges-y d sũ-noogã sẽn na n yɩ to-to, d sã n wa paam n naag d nin-nongdsã n tũud a Zeova wakat fãa yĩnga! *