Y ROGMÃ tɛka, rabʋr la y sũur yɩ noog n yɩɩg ray a taabã? Tõe tɩ yɩɩ daar ning y sẽn kẽ kãadem, wall y pipi biigã rogem daare, pa rẽ bɩ yɩɩ daar ning y sẽn deeg lisgu, n wilg tɩ y rɩka y meng n kõ a Zeova wã. Y sã n tagsdẽ tɩ daar ning y sẽn deeg lisgã yɩɩ ra-kãseng la sũ-noog daare, y bee bʋʋm. Baraare, y tẽed-n-taasã sẽn yã y sẽn wilg nebã taoor tɩ y nonga Wẽnnaam ne y sũur fãa, y yalẽ fãa, y tagsg fãa la ne y pãng fãa wã, b sũy yɩɩ noog wʋsgo.—Mark 12:30.

Sãmbg sẽn kae, y lisgã reegr tɛka, y paama sũ-noog wʋsg a Zeova tũudmã pʋgẽ. La koe-moondb kẽer sũy pa le noom wa pĩndã ye. Bõe n kɩt tɩ b sũ-noogã booge, la bõe la d tõe n tik n kell n tũ a Zeova ne sũ-noogo?

Rĩungã koɛɛg noom-d-la wʋsgo. Bõe yĩnga? A Zeova pʋlmame tɩ ka la bilfu, a Rĩungã na n sãama dũni-kãngã, la a lugl dũni-paalga. Sofoni 1:14 yeta woto: “Sẽn-Ka-Saab daarã sẽn yaa ra-kãsengã kolgame, a kolgame, la a wata tao-tao!” La tõe tɩ y ra pa tagsd tɩ y na n gũume n kaoos woto ye. Rẽ tõe n kɩtame tɩ y sũur pa le noom wa pĩndã, tɩ y pa le tʋmd Wẽnnaam tʋʋmdã ne y sũur fãa me ye.—Yel. 13:12.

D sã n be ne d tẽed-n-taasã, d paamda raood n ket n tũud a Zeova ne sũ-noogo. Tõe tɩ yaa d sẽn yã a Zeova nin-buiidã sẽn zãad b mens sõma wã n kɩt tɩ d kẽ tũudum hakɩɩkã, la kɩt me tɩ d maand Wẽnnaam daabã ne sũ-noogo. (1 Pɩy. 2:12) La d tẽed-n-taag sã n wa beeg tɩ b kibl-a, d manesem na n yɩɩ wãna? Yell a woto tõe n kɩtame tɩ neb kẽer sẽn yã a Zeova nin-buiidã yel-manesmã sẽn yaa sõma n wa naag tõndã koms raoodo, tɩ b sũy pa le noom wa pĩndã ye.

Dũni-kãngã nebã sẽn nong ligdã manesem me tõe n kɩtame tɩ d sũ-noogã booge. A Sʋɩtãan tũnugda ne a dũniyã n dat tɩ tõnd tẽ tɩ d segd n paama bũmb kẽere, tɩ bõn-kãens yaool n pa tɩlɛ ne-d ye. La tẽeg-y t’a Zeezi yeela woto: “Ned ba a yembr ka tõe n sak zu-soben-dãmb a yiib ye. Bala, a na n kisga a yembr la a nong a to wã, wala a loe a meng ne a yembr la a paoog a to wã. Yãmb ka tõe n sak Wẽnnaam la y sak arzegs me ye.” (Mat. 6:24) D sã n maand d sẽn tõe fãa n dat n paam bũmb wʋsg dũniyã pʋgẽ, d pa na n tõog n tũ a Zeova ne sũ-noog ye.

A Zeova noyã tũub pa toog ne neb nins sẽn nong-a wã ye. (1 Zã 5:3) A Zeezi yeelame: “Bɩ y wa mam nengẽ yãmb-dãmb fãa sẽn yɛ, la sẽn tʋk zɩɩb sẽn yaa zɩsgo, la mam na n kõo yãmb vʋʋsgo. Rɩk-y mam yubl-balgr n pidi, la y sak mam zãmsgã. Bala mam yaa nin-bʋgsgo, la m yaa sũ-mar soaba, la yãmb na paam vʋʋsgo. Bala, yubl-balgr ning mam sẽn pit yãmbã yaa faoogo, la zɩɩb ning mam sẽn tʋkd yãmbã yaa faasga.” (Mat. 11:28-30) Yɩ Kiris karen-biig wata ne yolsg la sũ-noogo. Sẽn paase, bũmb toor-toor n kɩt tɩ d tõe n kell n tũ a Zeova ne sũ-noogo. Masã, d na n goma bũmb a tãab yelle. Bõn-kãens wilgda d sẽn tõe n ‘kɩdem ne Wẽnnaam sẽn yaa d fãagdã’ võore.—Hab. 3:18.

D tũuda d Naandã sẽn yaa Wẽnnaam sẽn yaa sũ-noog soabã. (Tʋʋ. 17:28; 1 Tɩm. 1:11, MN) D miime tɩ yaa d Naandã maasem yĩng la d sẽn vɩ wã. Rẽ n so tɩ d ket n tũud-a ne sũ-noogo, baa d sẽn deeg lisgã sẽn kaoos to-to.

D gom a Hɛgtoor yelle. A yɩɩ tigims sull yel-gɛt n maan yʋʋm 40. Baa a sẽn kʋʋlã, a ket n tũuda a Zeova ne sũ-noogo. (Yɩɩn. 92:13-15) A pagã lʋɩɩ bãag me. Rẽ kɩtame t’a Hɛgtoor pa le tõe n tʋm Wẽnnaam tʋʋmdã wa a sẽn datã ye. Baa ne rẽ, a sũ-noogã pa boog ye. A yeela woto: “Baa m pagã bãagã sẽn tar kengrã, n paas a zãabã sẽn lebgd toogã, m pa bas tɩ rẽ kɩt tɩ m pa le tũud Wẽnnaam sɩd-sɩdã ne sũ-noog ye. Mam sẽn mi tɩ yaa a Zeova n naan maamã, la t’a naana ninsaal a raabã yĩngã seka m na nong-a la m tũ-a ne m sũur fãa. M modgdame n ket n moond koɛɛgã, la m tagsd bõn-sõma nins Rĩungã sẽn na n maan tõnd yĩngã yell wakat fãa. Rẽ kɩtame tɩ m sũ-noogã pa boogdẽ ye.”

A Zeova tʋma a Zeezi t’a wa ki tɩ yɩ maoongo, tɩ d tõe n paam vɩɩm sẽn tar barka. Sɩd me, “Wẽnnaam nonga dũniyã wʋsgo, hal tɩ b kõ b Bi-ribl yendã, tɩ ned ning fãa sẽn na tẽ bãmb kõn sãam ye, la a na paam vɩɩm sẽn kõn sa.” (Zã 3:16) D sã n wilg tɩ d tẽeda a Zeezi sẽn ki tɩ yɩ maoongã, d tõe n paama d yel-wẽnã sugri, la d wa vɩɩmd wakat sẽn kõn sa. D sẽn mi woto wã pa sek d na wilg Wẽnnaam tɩ d sũur noomame sɩda? Sẽn paase, d sã n tagsd a Zeezi sẽn ki tɩ yɩ maoongã yelle, na n kɩtame tɩ d kell n tũ a Zeova ne sũ-noogo.

Saam-biig a Resus sẽn be Megsikã yeela woto: “Mam da yaa m tʋʋmdã yamba. Wakat ninga, mam mi n tonga ray wʋsg n tʋm n pa sig ye. Pa sẽn da yaa tɩlɛ yĩng ye. M da maanda woto sẽn na yɩl n paam ligd wʋsgo. La mam wa n bãnga  a Zeova. M bãngame t’a tʋma a Bi-ribl-nongrã t’a wa ki ãdem-biisã yĩngã. Woto kɩtame tɩ m da rat n maan a raabã ne m sũur fãa. Rẽ n so tɩ m dɩk m meng n kõ a Zeova. Mam wa n yãka yam n bas m tʋʋmdã n lebg wakat fãa so-pakda. M sẽn wa n na n basã tɩ m sẽn sɩng tʋʋmdã taa yʋʋm 28. Yaa na maan yʋʋm wʋsg masã la m sẽn tũud a Zeova ne sũ-noogã.”

D sẽn yaa yɩlem Wẽnnaam nifẽ wã kõt-d-la sũ-noogo. Tags-y yãmb vɩɩmã sẽn da yaa a soab nand tɩ y bãng a Zeova wã yelle. Tʋm-tʋmd a Poll tẽega Rom kiris-nebã tɩ b ra ‘yaa yel-wẽnã yembse,’ la tɩ b “lebga tɩrlem yembse.” B sẽn modg n lebg yɩlem Wẽnnaam nifẽ wã, b ra saagd n na n wa vɩɩmda wakat sẽn kõn sa. (Rom. 6:17-22) Tõnd me sẽn tũud a Zeova noyã, d ginda zu-loees nins tʋʋm-dẽgdã la nen-kɛglmã rãmb sẽn paamdã. Rẽ pa noom-d sɩda?

D gom a Zem yelle. A ra yaa ned sẽn tẽed tɩ Wẽnd kae, la tɩ bũmb fãa wa n bee woto tɩ pa tũ ne Naand sabab ye. A ra pãbda bõgs me. A Zem wa n sɩnga tigissã kẽnde. A sẽn yã kiris-nebã sẽn wilgd to-to tɩ b nonga taabã yɩ-a-la noogo. A Zem sẽn da rat n toeema yĩnga, a pʋʋsa a Zeova n kos t’a sõng-a t’a tẽ-a. A yeela woto: “Bilf-bilfu, m bãngame tɩ Wẽnnaam beeme, la t’a yaa Ba sẽn nong tõndo, la nimbãan-zoɛta. Mam sẽn tũud a Zeova noyã sõng-m lame tɩ m gil yɛla. Mam sã n da pa toeeme, tõe tɩ b ra na n kʋʋ maam, wa m zo-rãmb kẽer mam sẽn da naagd n pãbd bõgsã sẽn ki wã. Mam dogmã tɛka, m da nan zɩ n paam sũ-noog wa m sẽn tũud a Zeova wã ye.”

D sẽn gũud dũni-kãngã sãoongã, d tagsg segd n yɩɩ wãna? D pa segd n yĩm tɩ d ‘bʋta Wẽnnaam Sɩɩgã yĩnga,’ n na n wa paam “vɩɩm sẽn kõn sa” wã ye. Woto wã, “bɩ d da yɛ ne tʋʋm-sõama maaneg ye. Bala, wakat sã n ta, tõnd na n tigsame, a sã n yaa tɩ tõnd ka bas n vʋʋs ye.” (Gal. 6:8, 9) Bɩ d kos a Zeova t’a sõng-d tɩ d kell n maan sũ-mare, la d bɩɩs zʋg-sõma nins sẽn na n kɩt tɩ d wa põs “to-kãsengã” sasa wã. D kos-a me t’a sõng-d tɩ d kell n tũ-a ne sũ-noogo, baa zu-loees sasa.—Vẽn. 7:9, 13, 14; Zak 1:2-4.

D tõe n kɩsa sɩd tɩ d sã n kell n maan sũ-mare, a Zeova na n wa keo-d lame. Bala, a nee d tʋʋm-sõma wã, la d sẽn wilgd to-to tɩ d nong-a lame, la tɩ d ratame t’a yʋʋrã paam waoogrã. D sã n kell n tũ a Zeova ne sũ-noogo, d na n yɩɩ wa yɩɩn-gʋlsd a Davɩɩde. A yeela woto: “Mam geta Sẽn-Ka-Saab daar fãa. Bãmb sã n be mam dɩtgo, bũmb kõn tol n miim maam ye. Rẽ kɩtame, tɩ mam sũur noomẽ, tɩ m sɩɩgã kɩdemd ne sũ-noogo. La m yĩngã me na n gãanda bãane.”—Yɩɩn. 16:8, 9.