1-3. a) Bõe n kɩt tɩ d miẽ tɩ d tõe n lebga Wẽnnaam zo-rãmba? b) Ãnd dãmb yell la d na n gom sõs-kãngã pʋgẽ?

BIIBLÃ pʋgẽ, b boola a Abrahaam naoor a tãab tɩ Wẽnnaam zoa. (2 Kib. 20:7; Eza. 41:8; Zak 2:23) Yaa yẽ a ye bal la b bool woto. La rat n yeelame tɩ yaa a Abrahaam bal n yɩ ninsaal sẽn tõog n lebg a Zeova zoa bɩ? Ayo. Biiblã wilgame tɩ tõnd ned kam fãa tõe n lebga Wẽnnaam zoa.

² Kibay wʋsg n be Biiblã pʋgẽ n gomd neb sẽn yɩ wẽn-zoɛtb yelle. B tẽe Wẽnnaam n tõog n lebg a zo-rãmba. Wẽnnaam Sebr ning sẽn yi yʋʋmd 1983 pʋgẽ, Yɩɩn-sõamyã 25:14 yeta woto: “Zu-soabã zood yaa neb nins sẽn zoet bãmbã yĩnga, la bãmb kãabg zãmsda bãmb bãngre.” Tʋm-tʋmd a Poll goma “kaset dãmb wʋsg” yelle, tɩ d miẽ tɩ nin-kãens fãa yɩɩ Wẽnnaam zo-rãmba. (Ebre. 12:1) B yɩɩ neb buud toor-toore.

³ Bɩ d gom neb a tãab yelle. Yaa neb sẽn paam n yɩ a Zeova zo-rãmba, tɩ b gom b yell Biiblã pʋgẽ. Yaa 1) a Rut sẽn da yaa pʋg-kõor n yit Moaabe, n yɩ kɩs-sɩd soabã, 2) Zʋʋda rĩm a Ezekɩyaas sẽn yɩ rĩm-sõngã, la 3) a Zeezi ma a Maari sẽn yɩ sik-m-meng soabã. D na n yã b ned kam fãa sẽn maan to-to  n lebg Wẽnnaam zoa, la yam ning d sẽn tõe n dɩk b kibayã pʋgẽ wã.

4, 5. Bõe n kɩt tɩ pa yɩ nana ne a Rut t’a yãk a sẽn na n maanega? (Ges-y sõsgã sɩngrẽ fotã.)

⁴ Mams-y n ges-y pʋg-kõap a tã sẽn kẽnd sor zugu, n pɩʋʋgd Moaab weoogã tɩ sebgã lengd b futã. Yaa a Naomi ne a bi-pagb a Rut ne a Orpa la sẽn da kẽndã. A Orpa wa n lebgame, n kuus a ba-yirã Moaabe. La a Naomi sẽn dat yaa a paam n ta a ba-yirã Israyɛlle. A Rut yẽ na n maana a wãna? A ra tõe n yãka yam n leb a nebẽ wã Moaabe, wall a kell n pa ne a sɩd-ma a Naomi, n tũ-a n kẽng Betlehɛm. La yaa vẽeneg tɩ pa yɩ nana ne-a t’a yãk a sẽn na n maanegã ye.—Rut 1:1-8, 14.

⁵ A Rut sẽn da yaa pʋg-kõorã, a ra tõe n getame tɩ yẽ sẽn lebd Moaab n são. A ma wã, n paas a roagdb a taab n da be be, n tõe n ges a yell sõma. Moaab pʋd n yaa a ba-yiri. A ra mii tẽngã nebã, b buud-gomdã la b minimdã. A Naomi ra pa tõe n sõng-a Betlehɛm wa a roagdbã ye. Rẽ n so t’a yeel a Rut t’a pa Moaabe. A ra miime t’a pa na n tõog n paam sɩda, wall roog n kõ a bi-pagã ye. A Rut maana wãna? A pa maan wa a Orpa sẽn ‘lebg n leb a nebẽ wã la a wẽnnaam-dãmbẽ’ wã ye. (Rut 1:9-15) A Rut ra pa rat n leb a nebẽ wã, n tɩ tũud b wẽn-faadã ye.

6. a) Bõe yĩng tɩ d tõe n yeel t’a Rut sẽn yãk yam ningã zemsame? b) Bõe yĩng t’a Boaaz yeel t’a Rut wa n soonda a Zeova maasmẽ?

⁶ Tõe tɩ tũu ne a Rut sɩdã, wall a Naomi t’a Rut bãng a Zeova. A bãngame t’a Zeova pa wa Moaab wẽnnaam-dãmbã ye. A ra nonga a Zeova, n miẽ t’a yaa Wẽnnaam sẽn segd ne waoogre. Rẽ n so t’a yãk yam n na n tũ a Zeova, tɩ d miẽ t’a sẽn yãk yam ningã zemsame. A yeela a Naomi woto: “Yãmb nebã na n yɩɩ mam neba, la yãmb Wẽnnaamã na n yɩɩ mam Wẽnnaam.” (Rut 1:16) D sã n tags a Rut sẽn da nong a Naomi to-to wã yelle, d sũur nooma wʋsgo. La yaa a sẽn da nong a Zeova wã n noom-d n yɩɩda. Rẽ n yɩ a Boaaz me noogo, t’a pẽg-a a sẽn wa n soond a Zeova maasmẽ wã yĩnga. (Karm-y Rut 2:12.) Y sã n karem a Boaaz sẽn yeel a Rut bũmb ningã, tõe tɩ y na n tagsa no-bil sẽn mi n tɩ soond a ma wã pɩgs tẽngrã yelle. (Yɩɩn. 36:8; 91:1-4) Woto me, a Rut paamame t’a Zeova kogl-a, la a keo-a a tẽebã yĩnga. A pa tol n maan a bãngẽ ne a sẽn yãk yam ningã ye.

7. Bõe yĩng tɩ y pa segd n yɛɛsdẽ, n pa rat n dɩk y meng n kõ a Zeova?

⁷ Neb wʋsg zãmsa Biiblã n bãng a Zeova, la b pa baood koglg a nengẽ ye. B yɛɛsdame n pa rat n dɩk b mens n kõ a Zeova n deeg lisg ye. Sã n yaa woto ne yãmb bɩ y bao n bãng bũmb ning sẽn kɩt tɩ y yɛɛsdẽ wã. Bãng-y tɩ ned sã n pa tũud a Zeova sẽn yaa Wẽnnaam sɩd-sɩdã, a tũuda wẽn-faado. (Zoz. 24:15) La y sẽn yãkd yam n tũ a Zeova n são. Y sã n dɩk y meng n kõ a Zeova, y wilgdame tɩ y kɩsa sɩd t’a na n kogl-y lame. Sẽn paase, a na n sõng-y lame tɩ y tõog n tũ-a wa y sẽn pʋlm-a wã. Baa sẽn wa n yaa zu-loɛɛg ning fãa la y segda, a na n sõng-y-la wa a sẽn sõng a Rutã.

8. Bilg-y yɛlã sẽn yɩ to-to a Ezekɩyaas yãadmẽ wã.

⁸ A Ezekɩyaas yɛlã yɩɩ toor fasɩ ne a Ruti. A buudã neb yaa neb sẽn dɩk b mens n kõ a Zeova. La pa Israyɛll nebã fãa n kell n sak Wẽnnaam ye. Wala makre, rĩm a Akaaz sẽn yaa  a Ezekɩyaas ba wã. Rĩm-kãng sẽn yɩ na-wẽngã kɩtame tɩ Zʋʋda nebã pʋʋs bõn-naandse. A pʋd n dẽgma Zeruzalɛm wẽnd-doogã ne ziri tũudmã yɛla. A rɩka a kamb meng n yõog bugum tɩ yɩ maoong n kõ wẽn-faoogo. Rẽnd a Ezekɩyaas yãadmã pa yɩ nana ye.—2 Rĩm. 16:2-4, 10-17; 2 Kib. 28:1-3.

9, 10. a) Bõe n da tõe n kɩt t’a Ezekɩyaas lebg sũ-to-neda? b) Bõe yĩng tɩ d pa segd n yik d sũur ne Wẽnnaam? d) Bõe yĩng tɩ d pa segd n tags tɩ ned vɩɩm sẽn na n yɩ to-to wã bee ne a roagdbã manesem?

⁹ A Akaaz sẽn pa kõ mak-sõngã ra tõe n kɩtame t’a biig a Ezekɩyaas lebg sũ-to-neda, wall a yik a sũur ne a Zeova. Rũndã-rũndã, neb n paam zu-loees sẽn pa ta a Ezekɩyaas rẽnda, n bas tɩ rẽ kɩt tɩ b sũur yik ne a Zeova, wall ne a siglgã nebã. (Yel. 19:3) Neb kẽer me tagsdame tɩ b roagdbã sẽn pa kõ mak-sõngã, bãmb vɩɩmã pa tõe yɩ sõma ye. Tõe tɩ b tagsdẽ tɩ bãmb me na n maana yel-wẽn nins b roagdbã sẽn maanã. (Eze. 18:2, 3) Sẽn tagsd-b woto wã bee bʋʋm bɩ?

¹⁰ Ayo. A Ezekɩyaas vɩɩmã sẽn yɩ to-to wã wilgda rẽ. Bũmb ka be ned sẽn tõe n tik n yik a sũur ne a Zeova ye. Bala, yel-beed nins sẽn paamd ninsaalbã pa a tʋʋmd ye. (Zoob 34:10) Yaa sɩd tɩ roagd manesem tõe n kɩtame t’a biig yɩ nin-sõng wall nin-wẽnga. (Yel. 22:6; Kol. 3:21) La ned vɩɩm sẽn na n yɩ to-to wã pa be ne a roagdbã manesem ye. Bala, a Zeova naana tõnd tɩ d tõe n yãk d toorẽ yam, n maan sẽn yaa sõma wall d maan sẽn yaa wẽnga. (Tõo. 30:19) A Ezekɩyaas nengẽ wã, a yãka yam n maan bõe?

11. Bõe n kɩt tɩ Zʋʋda rĩm a Ezekɩyaas yɩ rĩm-sõngo?

¹¹ Baa a Ezekɩyaas ba wã sẽn yɩ rĩm-wẽngã, yẽ mengã yɩɩ rĩm-sõngo. (Karm-y 2 Rĩm-dãmb 18:5, 6.) Yaa sɩd t’a ba wã pa kõ mak-sõng ye. La neb n da kõt mak-sõngo, t’a Ezekɩyaas ra tõe n dɩk b togs-n-taare. Wala makre, a Ezayi, a Miise la Ooze ra yaa Wẽnnaam no-rɛɛsdb wakat kãnga. D tõe n kɩsa sɩd t’a maaga a yĩng n kelg goam nins a Zeova sẽn da kɩtd tɩ nin-kãensã togsdẽ wã. Woto, a Zeova saglsã la a noyã  kẽ a Ezekɩyaas sũurã. Rẽ kɩtame t’a modg n maneg bũmb nins a ba wã sẽn da sãamã. A manega wẽnd-doogã, n kos Wẽnnaam sugr nin-buiidã yel-wẽnã yĩnga, la a sãam bõn-naands nins fãa nebã sẽn da pʋʋsd a soolmã pʋgẽ wã. (2 Kib. 29:1-11, 18-24; 31:1) A sẽn wa n seg zu-loe-kɛgemse, a wilgame t’a tara tẽeb la raoodo. Wala makre, Asiiri rĩm a Senakeriib sẽn wa n dat n zab n deeg Zeruzalɛmã, a teega Wẽnnaam, la a keng nin-buiidã raoodo, n kõ-b mak-sõng me. (2 Kib. 32:7, 8) Kaoosg zugẽ, a Ezekɩyaas wa n wuka a meng n maan bũmb t’a Zeova sũur pa yɩ noog ne-a ye. La a Zeova sẽn sagl-a wã, a sika a meng n sak n deege. (2 Kib. 32:24-26) Vẽenega, a Ezekɩyaas basa mak-sõng d sẽn segd n tũ. A pa bas t’a roagdbã sẽn pa kõ mak-sõngã sãam a vɩɩmã ye. A modgame n yɩ a Zeova zoa.

12. Wãn to la neb wʋsg rɩk a Ezekɩyaas togs-n-taare, n lebg a Zeova zo-rãmba?

¹² Rũndã-rũndã, dũniyã sẽn pid ne wẽnem tɩ neb wʋsg pa mi nonglmã yĩnga, kamb wʋsg roagdb pa ges b yell sõma, n wilg tɩ b nong-b lame ye. (2 Tɩm. 3:1-5) Baa kiris-nebã sʋka, wʋsg roagdb n pa kõ-b mak-sõngo. La nin-kãens modgame n paam a Zeova zoodo. B maana wa a Ezekɩyaase. B wilgame tɩ ned vɩɩm sẽn na n yɩ to-to wã pa be ne a roagdbã manesem ye. Wẽnnaam naana tõnd tɩ d tõe n yãk d toorẽ yam. D tõe n yãka yam n tũ-a la d waoog-a wa a Ezekɩyaas sẽn maanã.

13, 14. Bõe n da tõe n kɩt tɩ tʋʋmd ning a Zeova sẽn bobl a Maari wã pa yɩ nana, la a Gabriyɛll sẽn gom ne-a wã poore, a leokame tɩ bõe?

¹³ Yʋʋm kobs a Ezekɩyaas kũumã poore, zʋɩf-poak a ye sẽn da vɩ Nazarɛt n da yaa a Zeova zoa, hal tɩ b zoodã ra tar pãng wʋsgo. A yʋʋrã la a Maari. Wẽnnaam bobl-a-la tʋʋmde, tɩ ninsaal a to pa paam t’a bobl-a tʋʋm-kãng buudã ye. A ra na n dɩka pʋga, n dog Wẽnnaam Bi-ribl-yendã, la a wub-a. A Zeova sẽn bobl-a tʋʋm-kãseng woto wã, yaa vẽeneg t’a ra nong-a lame, n kɩs-a sɩd me. La a Maari sẽn wa n bãng tɩ Wẽnnaam bobl-a-la tʋʋm-kãngã, a manesem yɩɩ wãna?

¹⁴ D tõe n tagsda zu-zẽkr ning a Maari sẽn paamã yelle, n yĩm tɩ bũmb kẽer n kɩt tɩ pa yɩ nana ne-a ye. Wala makre, malɛk a Gabriyɛll yeel-a lame tɩ Wẽnnaam na n maana yel-solemd n kɩt t’a rɩk pʋga, tɩ pa tũ ne rao ye. La a Gabriyɛll pa tɩ togs a Maari roagdbã la a yagsã sẽn na n yɩ to-to t’a rɩk pʋgã ye. B tagsg ra na n yɩɩ wãn ne rẽ? Tõe t’a Maari ra maanda yɩɩr ne a sẽn na n  maan to-to t’a Zozɛf sak n deeg t’a pa yo n dɩk pʋgã ye. Sẽn paase, tõog n wub Wẽnnaam Bi-ribl-yendã yaa tʋʋm-kãsenga. D pa tõe n bãng bũmb nins fãa sẽn da pak a Maari a sẽn wa n kelgd a Gabriyɛll goamã ye. La d mi a sẽn leok to-to wã. A yeela a Gabriyɛll woto: “Mam yaa Zu-soabã tʋmtʋmd poaka. Bɩ yãmb sẽn yeel bũmb ningã yɩ.”—Luk 1:26-38.

15. Bõe yĩng tɩ d tõe n yeel t’a Maari tẽebã ra tara pãnga?

¹⁵ A Maari tẽebã sɩd da tara pãnga. A ra rat n maana bũmb nins fãa a Zeova sẽn na n yeel t’a maane, wa tʋm-tʋmd-poak sẽn sakd a zu-soab to-to wã. A ra kɩsa sɩd t’a Zeova na n sõng-a lame, la a kogl-a. A Maari maana wãn n paam tẽeb sẽn tar pãng a woto? Ned pa rogd ne tẽeb ye. Ned sã n dat tẽebo, rẽnda a modge, la a paam tɩ Wẽnnaam sõng-a. (Gal. 5:22, Wẽnnaam Sebre, 1983) La d tara kaset sẽn wilgd t’a Maari modgame n bɩɩs a tẽebã bɩ? N-ye. Bɩ d gom a sẽn da kelgd to-to wã yelle, la a sẽn gom goam ninsã me yelle.

16. Bõe n wilgd t’a Maari ra wɩngda ne kelgre?

¹⁶ A Maari sẽn da kelgd to-to. Biiblã yeela woto: “Bɩ ned fãa wɩng ne kelgre, la a maag ne goamã.” (Zak 1:19) A Maari ra wɩngda ne kelgr bɩ? N-ye. Naoor a yiib tõr la a Luk evãnzillã yeel t’a Maari maaga a yĩng n kelg goam võor sẽn tagme, n da bʋgsd rẽ zugu. Wala makre, a Zeezi rogmã raare, pe-kɩɩmb n wa n togs a Maari goam malɛk sẽn yeele. A Zeezi sẽn wa n tar yʋʋm piig la a yi wã, a togsa gomd sẽn ling a Maari. Naoor a yiibã fãa, a Maari kelgame n dɩk rẽ n bĩng a sũurẽ, n bʋgsd a sẽn wʋmã zugu.—Karm-y Luk 2:16-19, 49, 51.

17. A Maari sẽn gom goam ninsã sõngdame tɩ d bãng bõe a zugu?

¹⁷ A Maari sẽn gom goam ninsi. Biiblã pʋgẽ, b pa wilg goam wʋsg a Maari sẽn togs ye. A goam nins sẽn be Luk 1:46-55 pʋgẽ wã n wogem n yɩɩd zĩis a taabã. D sã n karem gom-kãense, d yãtame t’a ra mii Gʋlsg Sõamyã sõma. Bõe yĩng tɩ d yet woto? Bala, a goam kẽer wõnda goam nins no-rɛɛs a Sãmwɛll ma a Ann sẽn pʋʋs a Zeova n togsã. (1 Sãm. 2:1-10) Neb n maag b yĩng n karem a Maari goamã, n wilg tɩ yaa na maan vɛrse-rãmb pisi goam la a sẽn lebs n togsã. Vẽenega, a Maari ra nong n gomda bũmb nins a sẽn bãng a zoa a Zeova zugã yelle.

18. Zĩ-bʋs wɛɛngẽ la d tõe n dɩk a Maari togs-n-taare?

¹⁸ B tõe n wa kõo tõnd me tʋʋmd a Zeova sẽn dat tɩ d tʋme, tɩ d tagsdẽ tɩ na n yɩɩ toogo. Sã n wa yaa woto bɩ d rɩk a Maari togs-n-taare, n sik d meng n sak tʋʋmdã, la d kɩs sɩd t’a Zeova na n sõng-d lame. D leb n tõe n dɩka a Maari togs-n-taare, n maagd d yĩng n kelgd bũmb nins d sẽn wʋmd a Zeova la a raabã zugã, la d bʋgsd d sẽn bãngd bũmb ninsã zutu. Sẽn paase, d tõe n gomda rẽ yell ne neb a taabã.—Yɩɩn. 77:12, 13; Luk 8:18; Rom. 10:15.

19. D sã n dɩk neb nins sẽn tall tẽebã togs-n-taare, d tõe n kɩsa sɩd ne bõe?

¹⁹ Ned tõe n yeelame t’a Ruti, a Ezekɩyaas la a Maari pa yɩ a Zeova zo-rãmb wa a Abrahaam sɩda? Bãmb ne ‘kaset dãmb wʋsgã,’ n paas pĩnd wẽndẽ wẽn-sakdb a taab n paam n yɩ Wẽnnaam zo-rãmba. Bɩ d kell n modg n tall nin-kãensã tẽebã buudu. (Ebre. 6:11, 12) D sã n maan woto, d tõe n kell n yɩ a Zeova zo-rãmb wakat sẽn kõn sa yĩnga.