Wẽnnaam sẽn naan ninsaal yĩngã to-to wã kɩtame t’a sã n pa keem bɩ a sã n pogl bɩ wat n sãooge. Ned sã n pogle, tao-tao bala, bũmb toor-toor n maand a yĩngã pʋgẽ, sẽn na yɩl tɩ zɩɩmã yõke, tɩ gãong wa yi, hal tɩ nodrã wa maag zãnga.

TAGS-Y N GES-Y: Wẽnnaam sẽn naan tõnd yĩngã, tɩ d sã n pogl bɩ tõe n maagã, d pa segd n kɩs sɩd tɩ yell sã n zabd tõnd wa sãmpogre, a na n sõng-d-la wa a sẽn pʋlmã, tɩ d paam sũur pʋgẽ bãan sɩda? Yɩɩn-gʋlsdã ra yeelame: “Bãmb belsda sũ-sãang rãmbã, la b tɩpd b poglgã.” (Yɩɩn-sõamyã 147:3) La yell sẽn loog wall sẽn nan be sã n sãamd y sũur wʋsgo, bõe n na n sõng-y tɩ y kɩs sɩd t’a Zeova na n belsa yãmb masã menga, la beoog-daare?

Wẽnnaam yeta tõnd ned kam fãa yaa: “Da zoe rabeem ye, bala, mam bee ne foom. Da maan yɩɩr ye, bala, mam yaa fo Wẽnnaam. Mam kõta foom pãnga, la m na n wa sõnga foom.” (Ezayi 41:10) Ned sã n miẽ t’a yell paka a Zeova, a yam gãee bãane, t’a tar raood n maood ne zu-loees buud toor-toorã. Ad no-rɛɛs a Ezayi sẽn yeele: “Bãmb kõta ned ning sẽn yɛ wã pãnga, la ned ning pãng sẽn booge, bãmb paasda a soab pãnga.” (Ezayi 40:28, 29) Tʋm-tʋmd a Poll boola sũur pʋgẽ bãanã d sẽn paamdã tɩ ‘Wẽnnaam laafɩ sẽn yɩɩd ninsaalbã bãngr fãa.’—Filip-rãmbã 4:4-7, 9.

Biiblã sõngda tõnd tɩ d kɩs sɩd t’a Zeova sẽn pʋlem t’a na n wa maan n kõo ãdem-biisã na n pidsame. Wala makre, Vẽnegr 21:4, 5 wã goam (sẽn be sebrã neng ning sẽn pʋgdã zugã) wilgda tõnd bũmb nins a sẽn na n wa maanã, la d sẽn tõe n kɩs sɩd ne rẽ wã võore:

• “Wẽnnaam na n yẽesa nintãm fãa” sẽn be nebã ninẽ wã. A Zeova na n kɩtame tɩ bũmb nins fãa sẽn namsd tõnd wall kɩt tɩ d maand yɩɩrã sa, baa yɛl nins sẽn wõnd yaa yel-bõones neb a taabã nifẽ.

• Pãng sẽn ka to soabã sẽn yaa bõn-naandsã fãa Naaba, n “zao geerã” saasẽ wã tara pãng la tõogo, n na n wa kɩt tɩ namsg buud fãa ra le zĩndi, la a ges tɩ d paam sõngr ning d sẽn datã.

• A Zeova wilgame tɩ d tõe n basa d yam t’a pʋlemsã fãa yaa “vẽenega la b yaa sɩda.” Rat n yeelame tɩ yaa wa a sẽn wẽen t’a na n pidsa a sẽn pʋlmã fãa, t’a yʋʋrã ra wa sãam ye.

“Wẽnnaam na n yẽesa nintãm fãa sẽn be b ninẽ wã. Kũum kõn leb n zĩnd ye, la sũ-sãang wall yãbre, wall toog kõn leb n zĩnd ye. Bala, dẽenem bũmbã fãa loogame. Ned ning sẽn zao geerã yeelame yaa: Ade, mam maanda bũmbã fãa paalse. La b yeel yaa: Gʋlse, bala, gom-kãensã yaa vẽenega la b yaa sɩda.” —Vẽnegre 21:4, 5.

Biiblã ne bũmb nins Wẽnnaam sẽn naanã sõngda tõnd tɩ d bãng d saasẽ Ba wã sẽn yaa Wẽnnaam ning buudã. D sã n get a sẽn naan bũmb ninsã, kɩtdame tɩ d rat n bao n bãng-a sõma, n lebg a zoa. Biiblã pʋd n yeta tõnd yaa: “Kolg-y Wẽnnaam, la bãmb na pẽneg yãmba.” (Zak 4:8) Tʋʋm 17:27 yetame t’a “ka zãr ne tõnd ned ba a yembr ye.”

Y sã n mao n bãng Wẽnnaam n paase, y na n maneg kɩsa sɩd tɩ y yell pak-a lame, la t’a ‘geta yãmb yelle.’ (1 Pɩyɛɛr 5:7)

A Toru sẽn be Zapõ wã kibar wilgda rẽ. A ma wã wub-a-la Kirist tũudmã pʋgẽ, la a wa n tɩ naaga Zapõ soolmã bi-bees sull a ye. Ad a Toru sẽn yeele: “M da tẽedame tɩ Wẽnd kisa maam, la tɩ m miting sã n maan kaalem, yaa yẽ n sɩbgd-ma, sẽn yɩɩd fãa, m sã n nong a soab wʋsgo.” A paasame tɩ yẽ sẽn da nong n be ne nen-kɛglem dãmba, t’a tagsa wã me ra pa zemsã kɩtame t’a lebg ned sẽn pa tar nimbãan-zoeer baa bilfu. A leb n tẽega yẽ sẽn da magd n na n maanã, n yeel yaa: “M da ratame n kʋ ned yʋʋr sẽn yi n yɩɩd maam, n paam tɩ m yʋʋrã me yi n paase, la m ki pẽbre.”

La a Toru ne a pagã wa n sɩnga Biiblã zãmsgo. A pagã yʋʋr la a Ana. Biiblã zãmsgã sõng-a lame t’a  toeem a zʋgã la a tagsgã. Ad a Ana sẽn yeele: “M da nee vẽeneg tɩ m sɩdã toeemdame.” Masã, a Toru kɩsa sɩd tɩ tõnd ned kam fãa yell paka Wẽnnaam. Ad a sẽn yeele: “Wẽnnaam pa rat ned baa a ye kũum, a sakdame me n kõt sẽn tekd-b yam ne b sũur fãa wã sugri. A sakd n kelga baa yɛl nins d sẽn pa tõe n dɩk n togs ned tɩ pa yẽ wã, la sẽn yaa yẽ bal n tõe n wʋm a võorã. Ka la bilf bala, a Zeova na n kɩtame tɩ zu-loeesã, namsg bɩ toog buudã fãa sa. La baa masã, a sõngda tõndo, n mi n maan d sẽn da pa tẽed menga. Tõnd yell pak-a lame. Yɛlã sã n wa loog-do, a sõngd-d lame.”—Yɩɩn-sõamyã 136:23.

Wa a Toru kibarã sẽn wilgdã, d sã n mi tɩ Wẽnnaam tõe n yẽesa nintãm fãa sẽn be d nini wã la a kɩt tɩ yel-beedã fãa sa, la tɩ ka la bilfu a na n sɩd maana rẽ, sõngd-d lame tɩ d bas d yam tɩ manegr n wate, tɩ d vɩɩmã me tar bark masã menga. Hakɩɩka, baa dũniyã sẽn pid ne namsgã, y tõe n kɩsa sɩd tɩ y yell paka Wẽnde, hal tɩ naf-yã.