NED yãmb sẽn nong sã n maana kaalem, y sũurã sãamda wʋsgo, y tagsdame tɩ y lebga y yembre, la y pa mi y sẽn na n maan ye. Sẽn paase, tõe tɩ y sũurã mi n yikame, y ningda y meng taale, la rabeem mi n yõk-y lame. Tõeeme meng tɩ y tagsame tɩ y sẽn vɩ wã ka le tar yõod ye.

Bas-y y yam tɩ baa y sũurã sã n sãam tɩ kaoosdẽ, pa bũmb sẽn yaa wẽng ye. Y sũ-sãangã sẽn kaoosdã wilgdame tɩ y ra nonga y nedã wʋsgo. La rẽ yĩnga, bũmb bee y sẽn tõe n maan tɩ sõng-y tɩ y sũ-sãangã boog bɩ?

Sã n wõnda y sũ-sãangã pa sate, ad sagls y sẽn tõe n tũ tɩ sõng-yã.

Y SŨ-SÃANGÃ SÃ N KAOOSDẼ PA WẼNG YE

Ned sũ-sãang pa wa a to ye. Sũ-sãangã sẽn kaoosd to-to wã me pa yembr ye. La sẽn yaa a soab fãa, yãbrã tõe n yolsa y toogã bilfu. Pag ning yell d sẽn gom sɩngrẽ wã t’a yʋʋr la a Vanessa wã yeelame: “M da tara yãbr bala. M sẽn da rat yaa m sũ-sãangã booge.” A Sofia yao bi-pugl n maan kaalem. Ad a sẽn yeele: “M sã n da tags a kaalmã yelle, zabda m sũurã wʋsgo. Ra zabda wa nodr b sẽn na n wedge, n paam n tɩpe. Zabdmã pa tõe n bãng n bilg ye. La yaa sẽn na yɩl n sãoog nodrã.”

TOGS-Y NEB A TAABÃ YELLÃ SẼN NAMSD YÃMB TO-TO

Wakat ninga, y tõe n dat n bee y yembre. Yaa bũmb sẽn zemse. La sũ-sãamsã yaa wa zɩɩb sẽn zɩs wʋsgo, y  sẽn pa tõe n tʋk y yembr ye. A Zarɛd tara yʋʋm piig la a yopoe. A ba wã maana kaalem. Ad a sẽn yeele: “Mam da togsda neb a taabã yellã sẽn namsd maam to-to wã. M pa mi m sẽn da yetã sã n da tara võor ye. La m sẽn tõog n togs-b sẽn da be m sũurẽ wã, yols-m lame.” Pag ning yell d sẽn gom pipi sõsgã pʋgẽ t’a yʋʋr la a Zanissã goma rẽ yell me. A yeelame: “Fo sã n sõsd ne neb a taabã, f sɩd paamda belsgo. M bãngame tɩ b wʋmda m yellã võore, tɩ m miẽ tɩ m pa m yembr ye.”

SAK-Y NEB A TAABÃ SÕNGRE

Logtor a ye yeelame: “Ned kaalem poore, neb nins sẽn be sũ-sãang pʋgẽ wã sã n sak b zo-rãmb la b roagdb sõngre, b paamda belsg n tõog n mao ne b sũ-sãangã.” Togs-y y zo-rãmbã b sẽn tõe n maan vẽeneg n sõng-yã. Bala b rat n sõng-y lame la b pa mi b sẽn na n maan ye.—Yel-bũnã 18:24.

BAO-Y WẼNNAAM SÕNGRE

A Tina yeelame: “Mam sɩdã sẽn da tar kãnsɛɛrã sẽn wa n tɩɩg n maan kaalmã, m ra pa le tõe n togs-a m zu-loeesã ye. La m da tõe n togsa Wẽnnaam sẽn be m sũurẽ wã fãa! Yibeoog fãa, m da pʋʋsd-a lame n kot-a t’a sõng-m tɩ m tõog toog daarã tõre. M pa tõe n sõdg bũmb nins fãa Wẽnnaam sẽn maan n sõng maamã n sa ye.” A Tarsa sẽn wa n tar yʋʋm 22, a ma wã maana kaalem. Ad a sẽn yeele: “Yaa Biiblã kareng n da belsd maam daar fãa. Ra sõngda maam tɩ m tagsd bũmb sẽn kengd m raood yelle.”

MAMS-Y Y YAMẼ Y NEDÃ SẼN NA N WA VƲƲGÃ

A Tina paasame yaa: “M sɩdã sẽn maan kaalmã, sɩngrẽ wã m sã n da tags kũum vʋʋgrã yelle, ra pa kengd-m raood ye. Maam ne m kambã sẽn da rat bal yaa a zĩnd ne tõndo. La yʋʋm a naas poore, mam tagsda kũum vʋʋgrã yell wakat fãa. Rẽ n kengd mam daoodo, tɩ m tõogd toogo. M mi n mamsda m yamẽ wakat ning m sẽn na n paam n le yãnd-a wã, tɩ kõt-m sũur pʋgẽ bãane, la sũ-noog wʋsgo.”

Baa y sã n tẽed kũum vʋʋgrã, y sũ-sãangã pa na n sa zĩig pʋgẽ ye. Baasgo, a Vanessa kibarã tõe n kenga y raoodo. A yeelame: “Yãmb tagsdame tɩ y sũ-sãangã pa na n tol n sa ye. La bilf-bilfã, y na n yãame t’a boogdame!”

Tẽeg-y tɩ yãmb sũ-sãangã tõeeme n pa sa zãng ye. La pa rat n yeel tɩ vɩɩmã pa le tar yõod ye. Ne Wẽnnaam sõngre, yãmb na n kell n paama zo-rãmb sẽn na n sõng-yã, la vɩɩm sẽn tar barka. Ka la bilfu, Wẽnnaam na n vʋʋga sẽn ki-bã. A ratame tɩ y le wa paam n yãnd y nedã, n mobg-a ne sũ-noogo. Wakat kãnga, y sũ-sãangã na n tolg n saa fasɩ!