Ninsaalbã sẽn tʋll n vɩɩmd n kaoosã yaa wẽng bɩ? Ayo. Biiblã yetame tɩ Wẽnnaam n naan tõnd woto. (Koɛɛg soaba 3:11) A yetame me tɩ “Wẽnnaam yaa nonglem.” (1 Zã 4:8) La rẽ yĩnga, Wẽnnaam sẽn yaa nonglmã na n sak n naana tõnd tɩ d rat n vɩɩmd wakat sẽn kõn sa, tɩ yaool n yaa bũmb sẽn pa tõe bɩ?

Ned ka be n dat n ki ye. Biiblã pʋd n yetame tɩ kũumã yaa ninsaal “bɛ.” (1 Korẽnt rãmbã 15:26) Neb kẽer yõor yɩɩ koɛɛga, sãnda yẽ paam n vɩɩmd n kaoosame. La b fãa baas n kiime. Neb wʋsg pa rat n tags kũumã yell ye. Bala kẽesd-b-la rabeem. Wakat n wat tɩ kũum pa na n le zĩnd bɩ? Rẽ yĩnga, yaa bũmb sẽn tõe bɩ?

Wẽnnaam sẽn da pa rat tɩ ninsaalbã ki wã, rẽ yĩnga, yaa bũmb sẽn lingd yãmb bɩ? Biiblã pʋgẽ, Sɩngr sebrã kõta kaset tɩ Wẽnnaam da ratame tɩ ninsaalbã vɩɩmd wakat sẽn kõn sa tẽngã zugu. Wẽnnaam a Zeova manega tẽngã sõma, sẽn na yɩl tɩ ninsaalbã vɩɩmd be. Rẽ poore, a naana pipi rao a Ãdem, n maneg zĩig tɩ b boond tɩ Edɛn n ning-a be. “Wẽnnaam yãndame tɩ bũmb nins fãa bãmb sẽn naanã sɩd yaa sõama hal wʋsgo.”—Sɩngre 1:26, 31.

 Wẽnnaam naana a Ãdem n wõneg a menga, t’a yaa ned sẽn zems zãnga. (Tõodo 32:4) A Ãdem pag a Awa me ra zemsa zãnga. A Zeova yeel-b lame yaa: “Rog-y kamb n fɩɩg n pid dũniyã, la y soog-a. Soog-y zĩmã sẽn be ko-kãsengẽ wã, ne bõn-yɩgdɩ wã sẽn yɩgd yĩngrã, la y soog rũmsã sẽn vuud tẽn-gãongã zugã.”—Sɩngre 1:28.

Ra na n kaoosa yʋʋm wʋsg t’a Ãdem ne a Awa tõog n dog kamb n pid dũniyã. A Awa ra na n doga kamba, tɩ b kambã rog kamba. Tarẽ-n-tarẽ, dũniyã ra na n pida ne neb wa Wẽnnaam sẽn datã. (Ezayi 45:18) Rẽ yĩnga, yãmb tagsdame t’a Zeova ra na n yeela a Ãdem ne a Awa tɩ b rog kamb n pid dũniyã, n yaool n miẽ tɩ b tõeeme meng n pa yãnd b yagensã, tɩ b pa sokd a goamã pidsg bɩ?

A Zeova ra yeela a Ãdem ne a Awa me tɩ b soog rũmsã. A Ãdem ra segd n kõo rũng fãa yʋʋre. Rẽ ra na n kaoosame. (Sɩngre 2:19) La yɩl n soog rũmsã ra baoodame t’a bao n bãng rũng fãa sõma, la a bãng a sẽn segd n ges b yell to-to. Rẽ me ra na n kaoosame n yɩɩd yʋyã pʋdbo.

Dẽnd a Zeova sẽn yeel tɩ b rog kamb la b soog rũmsã wilgdame t’a naana a Ãdem ne a Awa n dat tɩ b vɩɩmd wakat sẽn kõn sa. A Ãdem sɩd vɩɩmd n kaoosa wʋsg me.

Biiblã wilgdame tɩ wakat n zĩnd tɩ nebã ra vɩ n kaoosd n yɩɩd rũndã-rũndã wã. A yetame yaa: “A Ãdem vɩɩmã tɛk fãa yɩɩ yʋʋm kobs-wɛ la pis-tã.” Rẽ poore, b sõdga neb a yoob sẽn vɩɩmd yʋʋm 900 la zaka. Yaa a Sɛt, a Enoose, a Kenan, a Yerɛɛde, a Matusela la a Nowe. B fãa vɩɩmda sẽn deng sa-kãsengã wakate. A Nowe vɩɩmda yʋʋm 600 nand tɩ sa-kãsengã sɩnge. (Sɩngre 5:5-27; 7:6; 9:29) Bõe yĩng tɩ b tõog n vɩɩmd n kaoos woto?

Nin-kãensã rogmã wakatã pa tolg n zãr ne wakat ning a Ãdem la a Awa sẽn da zems zãngã ye. Yaa rẽ yĩng la b sẽn vɩɩmd n kaoos woto wã. La bõe yĩng tɩ yaa neb sẽn zems zãng bal n vɩ n kaoosdẽ? La wãn to la Wẽnnaam na n sãam kũumã? Sẽn na yɩl n bãng leoorã, d segd n deng n bãnga bũmb ning sẽn kɩt tɩ ninsaalbã kʋʋndẽ la b kiidẽ wã.