Rao yʋʋr sẽn boond t’a Sɛt * yeela woto: “Maam ne m pag a Pirsila fãa tʋʋmã sãama wakat yɛnga. Na maan yʋʋm a yiibu, d ra teega sõngr goosneema wã sẽn kõt zagsã rãmba, la tʋʋm-bõones d sẽn mi n paame. Sũ-sãangã looga m pagã hal tɩ lebg bãaga, tɩ ma-me ra tagsdẽ tɩ m ka võor ye.

“Bõe n sõng tõnd tɩ d tõog n mao ne d zu-loɛɛgã? A Pirsila ra wae n tẽegda a Zeezi goam nins sẽn be Matye 6:34. Beenẽ, a Zeezi yeelame tɩ d ra maan yɩɩr ne beoog yell ye, tɩ bala daar fãa yell sek-a lame. A sẽn da pʋʋsd ne a sũur fãa wã me ra kengda a raoodo. Mam nengẽ yaa Yɩɩn-sõamyã 55:23 wã n sõng-ma. Mam basa m yellã ne a Zeova wa yɩɩn-gʋlsdã. La a sɩd sõng-m lame. Baa ne m sẽn paam tʋʋm masã wã, d ket n tũuda a Zeezi saglg ning sẽn be Matye 6:20-22 wã, n pa baood tɩ zʋʋg sẽn yaa tɩlɛ ye. Sẽn noom maam n yɩɩd yaa tɩ zu-loɛɛgã pʋgẽ, tõnd ne a Zeova zoodã paase, tɩ d maneg n nong taab me.”

Rao yʋʋr sẽn boond t’a Zonatã yeelame: “Tõnd zakã rãmb ãnterepiriizã sẽn wa n lʋɩyã, m da maanda yɩɩr wʋsg ne tõnd vɩɩmã sẽn na n yɩ to-to. Yaa laog zu-loees n kẽ tẽngã, tɩ tõnd yʋʋm 20 tʋʋmdã lebg zaalem. Maam ne m pagã wa n pa le wʋmd taab ligdã poorẽ ye. Tõnd wa n pa le tõe n da bũmb ne kart dekerdi, d sẽn da zoet b na n wa tõdgã yĩnga.

“La Wẽnnaam sõnga tõnd ne a Gomdã la ne a vʋʋsem sõngã maasem tɩ d bãng d sẽn na n maanega. Mam saka tʋʋm-bõones buud toor-toore. D yãka yam me n pa le raad bũmb sẽn pa tolg n yaa tɩlɛ ye. D sẽn yaa a Zeova Kaset rãmbã, d paama d tẽed-n-taasã sõngr me. B sõng-d-la sẽn na yɩl tɩ d ra tags tɩ d ka võor ye. Yɛlã sã n da wa kenge, b sõngd-d-la ne d bõn-daab kẽer menga.”

A Rasɛll, pag ning yell d sẽn zoe n gomã yeelame: “Mam sɩdã sẽn wa n tiig n bas maamã, zaba maam hal wʋsgo, tɩ sũ-toogã ra namsd-ma. Mam sũ-sãangã ra pa tõe n bãng n bilg ye. La mam baoa Wẽnnaam sõngre, t’a sɩd bels-ma. Daar fãa, m sã n da pʋʋs Wẽnnaam, n paamda laafɩ ning a sẽn kõtã, tɩ gũud m sũurã. Ra yaa wa a sẽn tɩp m sũurã tɩ sigi.

“Biiblã sõnga maam tɩ m tõog m sũurã n pa le yaa sũ-to-ned ye. Mam maoome n tũ tʋm-tʋmd a Poll saglg ning sẽn be Rom-dãmb 12:21 wã. A yeela woto: ‘Da sak tɩ wẽng tõog foom ye. Maan neer n tõog wẽnga.’ ”

“Mam zoa n sagl maam hal tɩ sɩd sõng-m wʋsgo. A sõnga maam tɩ m bãng tɩ yellã tɩɩm yaa m sẽn na n bas taale. A tẽega maam Koɛɛg soab 3:6 goamã, n maag a yĩng n wilg maam tɩ wakat ninga, d bũmb sã n meneme, yaa tɩlɛ tɩ d sak bõnã. Saglgã tũub pa yɩ nana ye. La sɩd yɩɩ yellã tɩɩm. Mam basa taale, n maand bũmb a taab sẽn noogd m sũuri.”

Pag yʋʋr sẽn boond t’a Elizabɛt yeela woto: “Y kãadem sã n wa sãame, y rata belsgo. Mam nengẽ wã, m zoa n tall-m sõngr daar ne a to fãa. A ra mi n naaga maam n yãbe, la a bels-ma. A kɩtame tɩ m neẽ tɩ neb n ket n nong-ma. Mam kɩsa sɩd tɩ yaa a Zeova n tũnug ne-a n bels maam tɩ m sũurã sigi.”

A Lʋɩ, rao ning yell d sẽn da zoe n gomã ra bẽeda sũur bãag hal tɩ pa nana ye. Hal naoor a yiib la a naan n ki. Yɩl t’a tõog n vʋʋse, daar fãa, b ningd-a-la ogsɩzɛn n kaoos lɛɛr 16. Ad a sẽn yeele: “Wakat fãa, m da pʋʋsda a Zeova. Mam sã n pʋʋs n sa, m neeme t’a kõ-m-la pãng ne a vʋʋsem sõngã maasem. Pʋʋsgã kengda m daood tɩ m ket n maoodẽ, bala m tẽeda a Zeova, n kɩs sɩd t’a geta m yelle.”

 A Petra yaa pag sẽn tar yʋʋm 80 la zaka. Ad a sẽn yeele: “Bũmb wʋsg la mam dat n maan la m pa tõe ye. M pãngã sẽn tar boogrã namsd-m lame. Wakat fãa yaa yaamse, tɩ m segd n teeg tɩt woo tɩto. Mam mi n tẽega a Zeezi sẽn wa n be yell a ye pʋgẽ, n pʋʋs a Ba wã n kos tɩ sã n tõe bɩ a kɩt tɩ yellã loog n bas-a wã. La a Zeova kõ a Zeezi raood yellã pʋgẽ. A kõta ma-me raoodo. Pʋʋsgã lebga wa m tɩɩm daar fãa. Mam sã n pʋʋs Wẽnnaam n sa, m toogã boogdame.”—Matye 26:39.

A Ziliyẽ, rao ning yell d sẽn zoe n gomã bẽeda bãag b sẽn boond tɩ ɛskelerooz na maan yʋʋm 30. Yẽ me wilgame tɩ pʋʋsgã sõngd-a lame. A yeelame tɩ yẽ zaoog lebga a puus-puusã. A paasame: “La m miime tɩ m vɩɩmã tara yõodo, bala, m dɩkda m sẽkã n sõngd d taabã. Baa ned sã n namsdẽ, a sã n yaa kõata, boogda a toogã. Sẽn paase, a Zeova sõngd-d-la d sẽn wat n dat sõngre, wa a sẽn pʋlmã. Ma-me tõe n yeela wa tʋm-tʋmd a Poll tɩ m ‘tõee fãa ne a soab ning sẽn kõt maam pãngã maasem.’ ”—Filip-rãmbã 4:13, MN.

Rao yʋʋr sẽn boond t’a Ãntoniyo yeela woto: “B fãoo mam ba wã tɩ tũ ne a yõore. Yellã paalmẽ, m da pa tẽed ye. Mam da getame tɩ b wẽga a yõorã. A ra pa tar taal ye. A ra kẽnda nao. La m da pa tar m sẽn maandg ye. A zĩnda koma pʋg rasem a nu. Mam da yõkda m meng n pa rat n yãb m ma taoor ye. La mam sã n wa yaa m yembre, m daagda nintãm. Mam da sokda m meng woto: ‘Bõe yĩng tɩ yel-kãngã paam m baaba?’

“Sasa kãng sẽn yɩ toog wʋsgã, mam da wɩngda ne a Zeova pʋʋsgo, n kotẽ t’a sõng-m tɩ m tõog m menga, n paam laafɩ m sũurã pʋgẽ. Tarẽ-n-tarẽ, m sũurã sɩd wa n sigame. M tẽega Biiblã sẽn yeel tɩ d fãa paamda ‘toog wall noogã.’ Wẽnnaam sẽn yaa sɩd soabã, m kɩsa sɩd tɩ kũum vʋʋgrã wakate, m na n le yãa m ba wã.”—Koɛɛg soaba 9:11; Zã 11:25; Tit 1:2.

A Robɛɛr yell d sẽn zoe n gomã me yeelame tɩ pʋʋsgã sõnga yẽ. Ad a sẽn yeele: “Maam ne m pagã ra pʋʋsda a Zeova. D paama laafɩ ning yell b sẽn gomd Filip-rãmb 4:6, 7 pʋgẽ wã. Kɩtame tɩ d tõog n wilg kiba-kɩtbã tɩ tõnd tẽedame tɩ kũum vʋʋgr n wate. Baa d biigã sẽn ki sɩlgã lʋɩɩs pʋgẽ wã, d ket n tẽra bũmb wʋsg d sẽn da naag-a n maane, tɩ d sũur noomẽ. Rẽ yell la d tagsd n yɩɩda.

“Tõnd tẽed-n-taas kẽer sẽn yeel tɩ b yãa tõnd televiziõ wã pʋgẽ tɩ d yõk d meng n gomd d tẽebã yellã, d leok-b lame tɩ d kɩsa sɩd tɩ yaa b sẽn pʋʋsd d yĩngã n sõng-do. Mam tẽeda ne m sũur fãa t’a Zeova tũnuga ne belsg goam nins fãa b sẽn taas tõndã n sõng-do.”

Kiba-kãensã fãa wilgdame tɩ sẽn wa n yaa yell ning fãa n paam neda, Wẽnnaam tõe n bels-a lame. Rẽnd sẽn yaa zu-loɛɛg ning fãa la y tara, y tõe n paama belsgo. * Teeg-y-yã a Zeova t’a na n sõng-y lame. Bala, a yaa “Wẽnnaam sẽn belsd nebã wakat fãa.”—2 Korẽnt-rãmbã 1:3.