1, 2. Futã la mengã manegr wɛɛngẽ, bõe yĩng t’a Zeova Kaset rãmbã pa maand b sẽn date? (Ges-y fotã sẽn be yĩngrã.)

TŨUDUM taoor dãmb n da maan b tigis-kãsenga, tɩ Peyiba zʋrnall a yembr gom b yelle, n yeel tɩ zĩigã sẽn da tʋʋlã yĩnga, b wʋsg futã ra yaa wa neb sẽn yi n na n kok pemsem. A paasame: “Pa woto a Zeova Kaset rãmbã tigis-kãsemsã sasa ye. Rapã ne kom-dibli wã ningda vɛst la karvate, tɩ pagbã la kom-pugli wã zip-rãmb woglem sakd gesgo. La pa wa pĩnd dãmb fut me ye.” Nebã sɩd wae n pẽgda a Zeova Kaset rãmbã b sẽn manegd b mens to-to wã yĩnga. Tʋm-tʋmd a Poll wilgame tɩ kiris-nebã segd n “yera fut sẽn yaa sõama n zems gesgo, la ne sik-m-menga, . . . wa sẽn zems [neb] sẽn sakd Wẽnnaam sẽn tog n maane.” (1 Tɩm. 2:9, 10) Yaa sɩd tɩ yaa pagbã la a ra gomd ne, la a saglgã paka rapã me.

² Tõnd sẽn yaa a Zeova nin-buiidã, a pa rat tɩ d maan d yam futã la mengã manegr wɛɛngẽ ye. (Sɩng. 3:21) Biiblã sõngda tõnd tɩ d bãng tɩ yĩngr la tẽng Naab a Zeova tara noy futã la mengã manegr wɛɛngẽ, n dat t’a nin-buiidã tũ. Woto yĩnga, pa sẽn noom tõndã bal la d segd n bao ye. D  segd n bao n bãnga sẽn noom a Zeova sẽn yaa d Naabã me.

3. Noy nins Wẽnnaam sẽn da kõ Israyɛll nebã futã wɛɛngẽ wã wilgda tõnd bõe?

³ Tõod nins Wẽnnaam sẽn da kõ Israyɛll nebã pʋgẽ, noy n da be n sõngd-b tɩ b ra rɩk tẽn-yagsã neb sẽn vɩ to-to wã togs-n-taar ye. No-kãens ra wilgda vẽeneg t’a Zeova kisa fut sẽn kɩtd tɩ b pa tõe n bãng pag bɩ rao n welge. La rũndã-rũndã, neb wʋsg fu-yerdɩ yaa woto. (Karm-y Tõod 22:5.) A Zeova sũur pa noom ne fut sẽn kɩtd tɩ pag wõnd raoa, tɩ rao me wõnd paga, tɩ yaa toog tɩ b bãng pag la rao n welg ye.

4. Bõe n tõe n sõng-d tɩ d bãng n yãk fut sẽn sakd ne kiris-neda?

⁴ Biiblã tara sagls sẽn tõe n sõng kiris-nebã tɩ b bãng fut nins b sẽn tõe n yelge. Baa d sẽn vɩ tẽng ninga, nebã minimd sẽn yaa a soaba, pa rẽ bɩ sã n yaa waood wall tʋʋlgo, sagl-kãens tõe n sõng-d lame. Pa tɩlɛ tɩ b sõdg fut sẽn sakd la sẽn pa sakdã n wilg-d ye. D sã n tũ Biiblã sagls bala, d tõogd n yãka d yam fut sẽn sakd ne kiris-neda. Sõs-kãngã pʋgẽ, d na n tẽega Biiblã sagls a wãn sẽn tõe n sõng-d futã yelgr wɛɛngẽ, tɩ d bãng sẽn tat Wẽnnaam yam. Bala, Wẽnnaam daabã yaa sõma, n zems zãnga, t’a tũub me noome.—Rom. 12:1, 2.

5, 6. Tõnd ratame tɩ d fu-yerdɩ wã kɩt tɩ nebã maan bõe?

⁵ Wẽnnaam kɩtame tɩ tʋm-tʋmd a Poll kõ kiris-nebã saglg ning sẽn be 2 Korẽnt-rãmb 6:4. (Karm-y-yã.) Nebã sã n yã tõnd futã la d sẽn maneg d meng to-to wã, b zoe n tara b sẽn tagsd tõnd zugu, bala, “ninsaal geta nin sẽn ne.” (1 Sãm. 16:7, Wẽnnaam Sebre, 1983) Woto yĩnga, tõnd sẽn yaa Wẽnnaam nin-buiidã, d miime tɩ d pa segd n ningd fut sẽn tat tõnd yam bal ye. D sẽn mi Biiblã noyã, segd n kɩtame tɩ d ra yelgd fut sẽn mobgd yĩngã, pa rẽ bɩ sẽn wilgd d yĩngã wil kẽer nebã sẽn pa segd n yã, wall sẽn yaa wa yoaadb fut ye. D fu-yerdɩ wã pa segd n kɩt tɩ ned sã n yã-d bɩ yaa tɩlɛ t’a lob a neng kɛɛng ye.

⁶ D sẽn yaa yĩngr la tẽng Naab a Zeova nin-buiidã, d sã n manegd d meng sõma, tɩ d futã yaa yɩlma, n sakd gesgo, n wilgdẽ tɩ d yaa sik-m-mens rãmba, tõe n kɩtame tɩ nebã maneg n pẽg-do. Leb n tõe n kɩtame tɩ b tʋlg n tũ tõnd Wẽnnaamã, n pẽg a siglgã, la b sak n kelg koɛɛg ning d sẽn moondã sẽn fãagd yõyã.

7, 8. Sẽn yɩɩd fãa, wakat bʋs la d segd n mao tɩ d futã zemse?

⁷ Tõnd sẽn nong d Wẽnnaamã sẽn yaa yɩlemdã, la d nong d tẽed-n-taasã la neb nins d sẽn taasd koɛɛgã, d segd n maoome tɩ d fu-yerdɩ wã la d sẽn manegd d meng to-to wã pẽgd a Zeova, la waoogd koɛɛg ning d sẽn moondã. (Rom. 13:8-10) Sẽn yɩɩd fãa, d sã n wa rat n kẽng tigsg wall d yi koe-moonegã, d segd n bãng n yãka fut nins d sẽn na n yelgã. D fu-yerdɩ wã segd n yɩɩ sõma wa sẽn zems ne neb “sẽn sakd Wẽnnaam.” (1 Tɩm. 2:10) Yaa sɩd tɩ fuug tõe n sakda tẽng ning pʋgẽ, tɩ tẽng a to pʋgẽ bɩ pa sakdẽ ye. Woto yĩnga, d sẽn yaa a Zeova Kaset rãmbã, d sẽn beẽ fãa, d  segd n gũusame tɩ d fu-yerdɩ wã ra sãam tẽngã neb sũur ye.

⁸ Karm-y 1 Korẽnt-rãmb 10:31. D sã n dabd d tigis-kãsemsẽ wã, d segd n modgame tɩ d futã zems la wilgdẽ tɩ d yaa sik-m-mens rãmba. D pa segd n maneg d mens tɩ loog noor wa dũniyã neb ye. Nand meng tɩ tigis-kãsengã sɩng wall tigis-kãsengã poore, la baa d sã n wa tɩ be lotɛllẽ, d fu-yerdɩ wã pa segd me n yɩ wa d be d yiri, pa rẽ bɩ tolg n yaa wa d toog kae ye. D segd n gũusame n da ning fut sẽn pa sakd gesg ye. Woto, d pa na n zoet yãnd n pa rat tɩ nebã bãng tɩ d yaa a Zeova Kaset rãmb ye. Sẽn paase, d sã n paam segbo, d na n tõog n moona koɛɛgã ne raoodo.

9, 10. Bõe yĩng tɩ d segd n tũ Filip-rãmb 2:4 saglgã fu-yerdɩ wã wɛɛngẽ?

⁹ Karm-y Filip-rãmb 2:4. Bõe yĩng tɩ d sã n na n maneg d meng bɩ d segd n tags d tẽed-n-taasã yelle? Biiblã sagenda tõnd woto: “Kɩt-y tɩ y dũni ka yalẽ wã ki. Yaa yoobo, tʋʋm-rẽgdo, wẽng maaneg ratem.” (Kol. 3:2, 5) Wẽnnaam nin-buiidã sẽn maood n na n tũ sagl-kãnga wã kɩtame tɩ d segd n tags d tẽed-n-taasã yelle. Kẽer deng n mao n basa yoob n yaool n tõog n lebg kiris-neba. La tõe tɩ b ket n maooda ne tʋls-wẽnse. D sã n pa gũus ne d sẽn manegd d mensã to-to wã, tõe n yɩɩ toog ne-b tɩ b tũ Biiblã saglsã n tõog b tʋls-wẽnsã. (1 Kor. 6:9, 10) Yaa vẽeneg tɩ d pa rat n kɩt tɩ b maoorã maneg n yɩ toog ye, bɩ bõe?

 ¹⁰ D sẽn manegd d meng to-to wã tog n sõngame tɩ tigingã kell n yɩ zĩig b sẽn pa pirsd ned baa a ye t’a yo ye. Yaa tigissã zĩigẽ tɩ yaa zĩig a to la d be ne d tẽed-n-taasã, segd n yɩɩ woto. D tara sor n na n yãk d yam futu. La d fãa segd n gũusame, tɩ d futã sõngd d taabã tɩ b tagsa wã, b no-goamã, la b yel-manesmã kell n yɩ sõma Wẽnnaam nifẽ. (1 Pɩy. 1:15, 16) Nonglem hakɩɩkã ka maand sẽn ka zemse, a ka baood a meng nafr bal ye.—1 Kor. 13:4, 5.

11, 12. D sã n na n ning fuugu, bõe la d segd n tẽege?

¹¹ Ned sẽn tũud Wẽnnaam sã n na n maneg a menga, a tẽegdame tɩ “yɛlã fãa tara b zĩiga,” la tɩ “tʋʋmd fãa tara a wakate.” (Koɛ. 3:1, 17) Fut nins d sẽn ningdã bee ne yɛlã sẽn yaa to-to wã. Sɩd me, waood wakate, d futã pa yembr ne tʋʋlg wakat ye. Leb n bee ne yɛl a taab me. La sẽn yaa a soab fãa, a Zeova noyã pa toeemd ye.—Mal. 3:6.

¹² Tʋʋlg sasa, yɩl n bãng n yãk fut sẽn sakd gesg la sẽn pa paoogd ned tõe n maneg n yɩɩ toogo. Baasgo, d sã n mao n pa yelgd fut sẽn mobgd yĩng wall sẽn wilgd d yĩngã zĩis kẽere, d tẽed-n-taasã na n pẽgame. (Zoob 31:1) D sã n wa rigd n na n tɩ kok pemsem kʋlg noore, wall n na n tɩ reem koom, wakat kãng me, d futã segd n zemsame. (Yel. 11:2, 20) Fut nins dũniyã neb sẽn wae n ningd n deemd koomã pa sõma ye. La kiris-ned sã n na n tɩ reem koom, a segd n ninga fuug sẽn pa paoogd tõnd Wẽnnaamã sẽn yaa sõngã.

13. Bõe yĩng tɩ d sã n na n ning fuug bɩ d segd n tẽeg 1 Korẽnt-rãmb 10:32, 33 saglgã?

¹³ Biiblã saglg a to me n tõe n sõng-d tɩ d bãng fut sẽn sakd ne kiris-neda. A tẽegda tõnd tɩ d ra maan bũmb sẽn na n sãam d tẽed-n-taasã wall neb a taab sũur ye. (Karm-y 1 Korẽnt-rãmb 10:32, 33.) Rẽnd tõnd ned kam fãa segd n gũusame n da wa yelg fuug sẽn na n sãam d taabã sũur ye. Tʋm-tʋmd a Poll yeela woto: “Bɩ tõnd ned kam fãa maan sẽn noom a to, sẽn ya sõmb wɛɛngẽ, t’a tõe n bɩ.” A paasame tɩ “bala, Kiris ka bao sẽn noom b meng ye.” (Rom. 15:2, 3) Yaa Wẽnnaam daabã maanego, la sẽn na n naf nebã n da pak a Zeezi n yɩɩda. Tõnd me rɩk a naoore. Rẽ, d pa na n yelg fuug sẽn ta d yam, tɩ yaool n tõe n kɩt tɩ ned pa sak n kelg koɛɛgã ye.

14. Wãn to la roagdbã tõe n sõng b kambã tɩ b fu-yerdɩ wã waoogd Wẽnnaam?

¹⁴ Yaa roagdbã n segd n sõng b kambã tɩ b tũ Biiblã saglse. Bãmb n segd n ges tɩ bãmb ne b kambã sẽn manegd b mens to-to wã yɩ sõma la sakd gesgo, n noogd Wẽnnaam sũuri. (Yel. 22:6; 27:11) Bõe la roagdbã tõe n maan n sõng b kambã tɩ b waoogd tõnd Wẽnnaamã sẽn yaa sõngã, la b tũud a noyã? Bãmb mengã segd n kõo mak-sõngo. Sẽn paase, b tog n sõng-b lame tɩ b bãng zĩis b sẽn tõe n paam fu-sõma, la b sẽn tõe n maan to-to n bãng n yãke. Kambã pa segd n yãk fut sẽn ta b yam bal ye. Segd n yɩɩ fut sẽn waoogd Wẽnnaam ning b sẽn tũudã.

15. Bõe n tõe n sõng-d tɩ d bãng n yãk fut sẽn yaa sõma?

¹⁵ Wẽnnaam Gomdã tara sagls sẽn  sõngd tõnd tɩ d tõe n bãng n yãk yam bũmb fãa pʋgẽ tɩ waoog Wẽnnaam. La fu-yerdɩ wã wɛɛngẽ, ned fãa tara a sẽn nonge. Sẽn paase, d tõogã pa yembr ye. La wakat fãa, d fu-yerdɩ wã segd n yɩɩ yɩlma, n zems ne d sẽn maand bũmb ningã, n wilgdẽ tɩ d yaa sik-m-mens rãmba, la sakd ne zĩig ning d sẽn vɩ wã neba.

16. Bõe yĩng tɩ d segd n mao n paam fut sẽn yaa sõma, baa sẽn pa nana wã?

¹⁶ D sã n dat fut sẽn yaa sõma la sẽn pa hobragi futu, naoor wʋsgo, pa nana ye. Fu-koaasdbã wʋsg koosda fut nebã sẽn nong n yɩɩda. Woto kɩtame tɩ f sã n dat fut sẽn yaa sõma bɩ f segd n dɩk sẽk n gẽese. La d sã n ningd fu-sõma, d tẽed-n-taasã na n yãa d modgrã, n pẽge. D sẽn mi me tɩ waoogda d saasẽ Ba wã, kõt-d-la sũ-noogo, tɩ d yĩmd d yaamsã.

17. Bõe n tõe n sõng saam-biig t’a bãng a sã n na n basa a toɛɛnga?

¹⁷ La saam-biig sã n dat n bas a toɛɛng yẽ, sakdame bɩ? A Moyiiz tõogã ra wilgame tɩ rao pa segd n põng a toɛɛng ye. La a Moyiiz tõogã tũub pa tɩlɛ ne kiris-nebã ye. (Maan. 19:27; 21:5; Gal. 3:24, 25) Zĩis kẽere, kiris-ned sã n bas a toɛɛnga, n maneg tɩ sakd gesgo, pa wẽng ye. A sã n moond koɛɛgã, pa tiisd-nebã ye. Sɩd me, saam-biis sãnda sẽn tar tʋʋm tigingã pʋgẽ basa b toeemse. La kẽer yãka yam n pa basdẽ ye. (1 Kor. 8:9, 13; 10:32) Zĩis a taab me, rapã pa minim n basd b toeemsã ye. Woto kɩtame tɩ b getẽ tɩ koe-moond sã n bas a toɛɛnga, pa zems ye. Tõe n kɩtame tɩ nebã pa waoog Wẽnnaam, la kɩt me tɩ b pa ges saam-biigã wa ned sẽn pa tar yell ye.—Rom. 15:1-3; 1 Tɩm. 3:2, 7.

18, 19. Futã la mengã manegr wɛɛngẽ, wãn to la Miise 6:8 wã tõe n sõng-do?

¹⁸ D sũur nooma a Zeova sẽn pa sõdg noy ka tɛk n wilg fut nins sẽn sakd la sẽn pa sakdã. A basa tõnd ned kam fãa t’a tõe n yãk a yam fut tɩ zems ne Biiblã saglse. Woto kɩtame tɩ baa futã la mengã manegr wɛɛngẽ, d tõe n paam n wilg tɩ d ‘kẽnda ne d Wẽnnaamã ne sik-m-menga.’—Mii. 6:8.

¹⁹ D sak n deega ne sik-m-meng tɩ tõnd Wẽnnaam a Zeova yaa sõng la yɩlemde, la t’a saglsã sõmblem ka to ye. Woto kɩtame tɩ d sakd n tũud Biiblã sagls bũmb fãa pʋgẽ. Sik-m-mengã na n kɩtame me tɩ d sã n na n maneg d meng bɩ d gũus n da wa sãam d taabã sũuri, la d tẽeg tɩ bãmb me tara b sẽn nonge.

20. Tõnd fu-yerdɩ wã tõe n kɩtame tɩ nebã maan bõe?

²⁰ Tõnd fu-yerdɩ wã pa segd n kɩt tɩ b wa sãmbd tõnd sã n sɩd yaa a Zeova Kaset soab ye. D ned kam fãa segd n modgame tɩ d tẽed-n-taasã la nebã fãa ne vẽeneg tɩ d yaa a Zeova tʋm-tʋmda. A kõo tõnd noy sõmblem sẽn ka to, tɩ d maood n tũudẽ. D pẽgda d saam-biisã la d saam-bi-pogsã sẽn zãad b mens sõma, la b manegd b mens sõma wã. Woto kɩtame tɩ sẽn baood-b Wẽnnaamã sakd n kelgd Biiblã koɛɛg sẽn fãagd yõyã, t’a Zeova paamd waoogr la sũ-noogo. Bɩ d ket n modgdẽ tɩ d fu-yerdɩ wã waoogd a Zeova, ‘Wẽnnaam ning sẽn pid ne ziiri, la sẽn yer vẽenem wa fuugã.’—Yɩɩn. 104:1, 2.