1, 2. a) Bõe n pa nana ne roagdbã, la bõe la b tõe n maan tɩ sõng-ba? b) Bõe yell la d na n gome?

DAAR a ye, rao ne a pag sẽn be Fãrens n tar kamb yeelame: “Tõnd tẽeda a Zeova, la rẽ pa wilgd tɩ d kambã me tẽed-a lame ye. Bala, tẽebã pa bũmb f sẽn dogd ne ye. Yaa bilf-bilf la d kambã wat n tall tẽebo.” Ad Ostrali saam-biig me sẽn yeele: “Bũmb kae n yaa toog ne roagdbã, n ta b sẽn segd n sõng biig fãa t’a tall tẽebã ye.” A paasame: “F tõe n tagsdame tɩ f tõog n leoka f biig sokre, tɩ kaoosg zugẽ bɩ a le wa sok-f sok-kãnga. Leoor tõe n yɩ-a-la noog rũndã, tɩ beoog bɩ a getẽ tɩ rẽnda a bãng n paase.” Kambã sã n bɩtẽ, roagdb wʋsg mikdame tɩ lebgda tɩlɛ tɩ b maneg n wɛgs bũmb kẽer b sẽn da zoe n wilg-ba. B wat n neeme tɩ b segd n baoo yam buud toor-toor n sõng b kambã tɩ b nong a Zeova.

² Y sã n tara kamba, y mi n sokda y meng y sã na n tõog n sõng-b lame tɩ b nong a Zeova, la b kell n tũ-a b bɩʋʋngã zugẽ bɩ? Togs sɩda, ned kae n tõe n maan dẽ ne a meng pãng ye. (Yel. 20:24) Rẽ n so tɩ d segd n teeg a Zeova. Rẽ wɛɛngẽ, a kõo roagdbã sagls wʋsgo. D na n goma sagls a naas yelle. 1) Modg-y  n bãng-y biig fãa sõma, 2) segdame tɩ y sẽn zãmsd-b bũmb ning a Zeova zugã yit y sũurẽ, 3) mi-y n dɩk-y makr sẽn na n sõng-ba, la 4) teeg-y-yã a Zeova, la y tall sũ-mare.

3. Kambã zãmsg wɛɛngẽ, wãn to la roagdbã tõe n dɩk a Zeezi togs-n-taare?

³ A Zeezi ra nong n sokda a karen-biisã b tagsgo. (Mat. 16:13-15) Y tõe n dɩka a togs-n-taare. Y sã n wa sõsd ne y kambã, wall y maand bũmb ning ne-ba, bɩ y sok-b b tagsgo, la y bas tɩ b togs sẽn be b sũurẽ. Bao-y n bãng-y b sã n maanda sãmbs ne bũmb kẽere. Ostrali saam-biig sẽn tar yʋʋm 15 yeela woto: “M baaba ra mi n sokda maam sogsg m sẽn tẽed bũmb ninsã wɛɛngẽ, la a sõngd-m tɩ m tagsd neere. A mi n soka woto: ‘Bõe la Biiblã yet rẽ zugu? Fo tẽeda a sẽn yetã bɩ? Bõe yĩnga?’ A ra ratame tɩ m leok ne m meng goama, la m da lebs n togs bũmb yẽ wall m ma sẽn togs ye. M sẽn wa n bɩtẽ wã, a ra ratame tɩ m sã n na n leok sokr bɩ m wɛgs m goamã.”

4. Bõe yĩng tɩ roagdbã segd n kelg b kambã sogsg neere? Rɩk-y makre.

⁴ Y biig sã n pa sak n deeg bũmb Biiblã sẽn yete, bɩ y maan sũ-mare. Sõng-y-yã-a t’a paam a sogsgã leoore. Rao sẽn tar kamb yeela woto: “Kelg-y y biigã sogsg neere. Ra maan-y wa pa tar yõodo, wall y tõdg leokr yãnd yĩng ye.” Sɩd me, a sogsgã pa wẽng ye. Wilgdame t’a rat n bãnga bũmb kẽere. Baa a Zeezi meng sẽn wa n tar yʋʋm 12 wã, a soka sogsg sẽn tar yõod wʋsgo. (Karm-y Luk 2:46.) Danemark bi-bɩɩg sẽn tar yʋʋm 15 n yeel woto: “M wa n yeela m doagdbã tɩ m sokda m meng d tũudmã sã n yaa tũudum hakɩɩkã. La baa sẽn da sek na sãam b sũurã, b pa yik b sũur ye. B talla Biiblã n leok m sogsgã fãa.”

5. Baa sã n wõnd kambã nonga a Zeova, bõe la roagdbã segd n maane?

⁵ Modg-y n bãng-y y biig fãa sõma. Ra n tags-y tɩ b sẽn tũud yãmb n yit koe-moonegã la b kẽnd tigissã, wilgdame tɩ b nonga a Zeova ye. Rẽ yĩnga, b sɩd tẽeda a Zeova, la b tẽed tɩ Biiblã yaa a Gomde? Maan-y y sẽn tõe tɛk n bãng bũmb ning sã n pa kɩt tɩ yaa toog ne-b tɩ b kell n tũ a Zeova. Daar ne a to fãa, y sã n wa naag-b n maand bũmb bɩ y gom a Zeova yell ne-ba. Y sã n wa pʋʋsd y yembre, wall y pʋʋsd ne y kambã, bɩ y kos a Zeova t’a sõng-ba.

6. Roagdbã sã n bãngd a Zeova n paasdẽ, wãn to la na n sõng-b tɩ b zãms b kambã Biiblã?

⁶ A Zeezi goamã ra kẽeda nebã sũyã, bala a ra nonga a Zeova, n mi a Gomdã sõma, tɩ nebã ra neẽ me t’a nonga bãmba. (Luk 24:32; Zã 7:46) Kambã me sã n neẽ tɩ b roagdbã nonga a Zeova, na n sõng-b lame tɩ bãmb me nong-a. (Karm-y Tõod 6:5-8; Luk 6:45.) Woto wã, roagdba, zãmsd-y Biiblã sõma, la y karemd siglgã sɛbã. Bao-y n bãng-y bũmb nins a Zeova sẽn naanã sõma. (Mat. 6:26, 28) Y sã n bãngd bũmb wʋsg a Zeova zugu, y na n tõog n sõnga y kambã tɩ bãmb me bãng-a.—Luk 6:40.

7, 8. Roagdbã sã n bãng bũmb a Zeova zugu, yɩta sõma tɩ b maan bõe? Bõe la roagdb kẽer maan-yã?

⁷ Y sã n bãng bũmb a Zeova zug bɩ y gom rẽ yell ne y kambã. Ra n gũ-y y sẽn wat n segend tigissã, wall zak pʋgẽ Biibl zãmsgã sasa bal ye. Pag a ye ne a sɩd sẽn be Etazĩni maanda woto. B sã n yã bõn-neere, wall b sã n wa naag taab n dɩt rɩ-noogo, b bẽta rẽ n gom a Zeova yelle. B yeela woto: “D tẽegda d kambã tɩ bũmb nins fãa a Zeova sẽn naan n  kõ-dã wilgdame t’a reng n tagsa neere, la t’a nong-d lame.” Pag ne a sɩd sẽn be Afirikdisiid yeelame tɩ bãmb sã n wa tʋmd b zardẽ wã pʋgẽ ne b kom-pugli a yi wã, b nong n gomda bũmb nins a Zeova sẽn naanã yelle. Wala makre, b gomda sẽn sɩngd to-to tɩ bõn-buud wa bul n yi n lebg tɩɩgã, n wilg tɩ sɩd yaa yel-solemde. B paasame: “Tõnd modgdame n sõngd d kom-pugli wã, n dat tɩ b nand vɩɩmã la a yel-soalmã.”

⁸ Ostrali rao n tall a yʋʋm piig bi-ribl n kẽng miize pʋgẽ, n na n sõng-a t’a maneg n kɩs sɩd tɩ Wẽnnaam beeme, la tɩ yẽ la Naandã. A yeelame: “Tõnd yãa pĩnd wẽndẽ bõn-vɩɩs b sẽn boond tɩ amonit-rãmb la tirlobit-rãmba. Yaa mogrã pʋgẽ bõn-vɩɩlɩ, la b buudã pa le be ye. Baa ne sẽn yaa pĩnd wẽndẽ bõn-vɩɩsã, b yaa neeba, tɩ bũmb pa paoog b yalẽ wã pʋgẽ ye. Woto fãa linga tõndo. Vɩɩmã sã n sɩnga ne bõn-vɩɩg sẽn tall tedgr n wa lebg sõma, bõe tɩ bãmb da zoe n yaa sõma woto? Yaa bũmb m sẽn bãng tɩ yɩ-m noog wʋsgo, tɩ m gom rẽ yell ne m biigã.”

9. Roagdbã sã n zãmsd b kambã, bõe yĩng tɩ yaa sõma tɩ b mi n dɩk makre? Wãn to la pag a ye maan woto?

⁹ A Zeezi sã n da zãmsd nebã, a nong n dɩkda makre. A togsda kibare, wall a wẽ yel-bũnd sẽn na yɩl n sõng-b tɩ bãng bũmb sẽn tar yõodo. (Mat. 13:34, 35) Yãmb me sã n wa zãmsd y kambã bɩ y mi n dɩk makre. Rẽ na n sõng-b lame tɩ b tags neere, n bãng y sẽn dat n wilg-bã, la b ra yĩm ye. Na n kɩtame me tɩ b nong zãmsgo. Wala makre, Zapõ pag n da rat t’a kom-dibli a yiibã bãng t’a Zeova sẽn naan pemsmã to-to wã wilgdame t’a nong-d lame. Kãsmã tara yʋʋm piiga, tɩ yaoã tar yʋʋm a nii. A kõ-b-la bĩisim ne sɩkr la kafe zom, n yeel tɩ b ned kam fãa maan kafe n kõ yẽ. Pagã yeelame: “B maaga b yĩng n maan kafe wã sõma. Mam sok-b lame tɩ bõe yĩng tɩ b maan woto, tɩ b leok tɩ b ratame tɩ ta m yam. Mam yeel-b lame tɩ Wẽnnaam me sẽn maan pemsmã to-to wã kell n zemsame, tɩ sakd vʋʋsgo.” Makrã zemsa ne b yʋʋmã. Yɩɩ wa reem, la b bãnga bũmb sẽn tar yõod wʋsgo, bũmb b sẽn pa tol n tõe n yĩmi.

10, 11. a) Bõe la y tõe n maan n sõng y biig t’a bãng tɩ Naand n be? (Ges-y sõsgã sɩngrẽ fotã.) b) Wilg-y makr y sẽn zoe n dɩke, tɩ sõng y biiga?

¹⁰ Y sã n dat n sõng y biig t’a bãng tɩ Naand n be, bõe la y tõe n maane? Y tõe n baoo sebr sẽn bilgd gato sẽn maand to-to, n bool biigã t’a wa tɩ y naag taab n maan gato. Wilg-y-yã-a bũmb ning sẽn kɩt tɩ y segd n tũ sebrã sẽn yetã kɛpɩ wã. Rẽ poor bɩ y bao tɩɩg bil n kõ-a. Y tõe n kõ-a-la pomm la y sok-a yaa: “Rẽ yĩnga, fo miime tɩ bũmb n be n wilgd sẽn sɩng to-to tɩ pommã wa yaa woto wã bɩ?” Bok-y pommã, n yãk a bilã n kõ-a, la y yeel-a tɩ  pommã bil yaa wa sebrã y sẽn ges n maan gato wã. Pommã sẽn da segd n yɩ to-to wã fãa ra zoe n bee a bilã pʋgẽ. La sẽn sɩng to-to tɩ pommã wa beẽ wã toolem yɩɩda gato maanego. Y tõe n paasame: “Yaa ned n gʋls sebrã tõnd sẽn ges n maan gato wã. La yaa ãnd n ning pommã sẽn segd n yɩ to-to wã a bilã pʋgẽ?” Biigã sã n yaa bedr bilfu, y tõe n wilg-a lame tɩ bũmb nins sẽn kɩtd tɩ pomm bil wa tõe n bul n lebg pomm tɩɩga, tɩ tɩɩgã wa tõe n wom pomm-dãmbã be a bilã pʋgẽ. Y leb n tõe n wilg-a-la foto kẽer sẽn be Cinq questions à se poser sur l’origine de la vie sebrã neng 10 n tɩ ta 20 wã.

¹¹ Roagdb wʋsg modgdame tɩ bãmb ne b kambã naagd taab n karemd Réveillez-vous ! wã sõsg ning gom-zug sẽn yaa “ Hasard ou conception ? ” wã. B kambã sã n nan paoodẽ, b maagda b yĩng n sõng-b tɩ b wʋm bũmb ning b sẽn karemdã võor faag-faaga. Pag a ye ne a sɩd sẽn be Danemark n maan woto. B yeela b kambã tɩ aviyõ-rãmbã wõnda liuuli wã, la b sok-ba: “La rẽ yĩnga, aviyõ tõe n loba gɛl n wek aviyõ-bi sɩda? Yaa tɩlɛ tɩ b maneg zĩig takɩ tɩ yaa be bal la liuuli wã tõe n sig bɩ? Aviyõ bʋʋr ne liuul kʋmkʋma, bʋg n noome? Woto wã, sẽn naan-a aviyõ wã yam n yɩɩd bɩ, bɩ yaa sẽn naan-a liuuli wã?” Y sã n sõsd ne y kambã woto, n sokd-b sogsgo, na n sõng-b lame tɩ b minim n tagsd neere, la paas b tẽebã.—Yel. 2:10-12.

12. Wãn to la y tõe tũnug ne makr n wilg y biig tɩ Biiblã sẽn yet fãa yaa sɩda?

¹² Y tõe n dɩka makr me n sõng y biig t’a bãng tɩ Biiblã sẽn yet fãa yaa sɩda. Wala makre, y tõe n karma Zoob 26:7. (Karm-y-yã.) Ra n yɩ-y tao-tao n yeel biigã tɩ yaa a Zeova n kɩt tɩ b togs gom-kãensã ye. Sõng-y-yã-a t’a tags neere. Tẽeg-y-yã-a t’a Zoob wakatẽ wã, nebã ra pa tar masĩn-dãmb n tõe n wõon n ges saasã, wall sɩls n tõe n yɩk n kẽng saasẽ, n ges n bãng tɩ dũniyã yaga vɩʋʋgẽ ye. Y biigã sẽn segd n maan yaa wilg tɩ tog n yɩɩ toog ne wakat-kãng neb kẽer tɩ b sak n deeg tɩ bũmb sẽn yaa bedr wa dũniyã tõe n yaga vɩʋʋgẽ. A tõe n talla ball wall kugr n wilg tɩ bũmb sẽn zɩs pa tõe n yag vɩʋʋgẽ ye. Makr a woto buud tõe n sõnga biigã t’a bãng tɩ hal sẽn kaoose, bũmb kẽer ninsaalbã sẽn da pa mi la a Zeova kɩt tɩ b gʋls Biiblã pʋgẽ.—Nee. 9:6.

13, 14. Bõe la roagdbã tõe n maan n sõng b kambã tɩ b bãng Biiblã saglsã tũub yõodo?

¹³ Tara yõod wʋsg tɩ y sõng y kambã tɩ b bãng tɩ yaa b sã n tũud Biiblã saglsã la b vɩɩmã yɩt noogo. (Karm-y Yɩɩn-sõamyã 1:1-3.) Wala makre, y tõe n yeela y kambã tɩ b mams wa b sẽn na n segd n tɩ vɩɩmd koom sʋk tẽngẽ, n segd n yãk neb sẽn na n tɩ naag-b n vɩɩmd be. Sok-y-b woto: “Y sã n dat tɩ y fãa zemsd taaba, tɩ y zĩid-n-taarã yɩ noogo, nin-bʋs buud la y na n yãke?” Rẽ poor bɩ y karem Galat-rãmb 5:19-23 sẽn wilgd neb nins buud a Zeova sẽn dat tɩ b vɩɩmd dũni-paalgã pʋgẽ wã.

¹⁴ Y sã n maand woto, y tõogd n sõnga y kambã tɩ b bãng bũmb a yiib sẽn tar yõod wʋsgo. Pipi, b na n bãngame t’a Zeova noyã sõngda tõnd tɩ d vɩɩmã tall barka, la d paam tɩ tõnd ne d taabã zĩid-n-taarã noome. Yiibu, b na n bãngame t’a Zeova saglsã sõngda tõnd tɩ d segend d mens n na n wa vɩɩmd dũni-paalgã pʋgẽ. (Eza. 54:13; Zã 17:3) Y tõeeme me n bao kibay siglgã sɛb pʋsẽ, n wilg-b Biiblã saglsã sẽn maneg d tẽed-n-taas vɩɩm to-to. Kibay a woto buud bee Gũusg Gasgã sõsg ning gom-zug sẽn yaa “Biiblã toeemda neba” pʋgẽ. Y leb n tõe n boola y tigingã ned y zakẽ wã tɩ y  sõse, t’a togs Biiblã sẽn sõng-a to-to t’a toeeme. Woto, y kambã na n yãame tɩ Biiblã saglsã tũub sɩd sõngdame.—Ebre. 4:12.

15. Bõe n na n sõng-y tɩ y tõog n zãms y kambã sõma?

¹⁵ Mi n tags-y n ges-y y sẽn tõe n maan tɩ zãmsgã tall yamleoogo, la yɩ y kambã noogo. Bao-y y sẽn na n maan n sõng-b tɩ b rat ne b sũur fãa n bãng a Zeova la b paas bãmb ne yẽ zoodã. Baa b sã n wa bɩtẽ bɩ y ket n maand woto. Roagd a ye yeelame: “Ket-y n baood-y yam buud toor-toor sẽn na n sõng-y tɩ y zãmsd y kambã bũmb nins b sẽn zoe n miẽ wã.”

16. Kambã zãmsg wɛɛngẽ, bõe yĩng tɩ y segd n maan sũ-mare? Wãn to la roagdb kẽer maan sũ-mare?

¹⁶ Ne a Zeova vʋʋsem sõngã sõngre, y kambã tẽebã tõe n talla pãnga. (Gal. 5:22, 23) Wa tɩɩg bil sẽn pa bɩt zĩig pʋgẽ wã, y kambã tẽebã me bɩta bilf-bilfu. Rẽ wã, maan-y sũ-mar ne-ba, la y ket n zãmsd-ba. Zapõ rao a ye sẽn tar kamb a yiib yeelame: “Mam ne m pagã ra baooda weer n be ne d kambã. B yãadmẽ wã, m da modgda daar fãa n zãmsd-b bũmb minit 15 pʋgẽ. Minit 15 wã ra pa namsd kambã, a paoong me ra pa toog ne tõnd ye.” Tigims sull yel-gɛt n yeel woto: “M bi-bɩɩlmã wakate, sogsg la sãmbs sẽn da be m yamẽ ra yɩɩda b rãmb nins m sẽn sak n togs tɩ ned wʋmã. Tarẽ-tarẽ, m paama b fãa leoor tigissã sasa, zak pʋgẽ Biibl zãmsgã sasa, la m sẽn wa n zãmsd Biiblã m ye. Yaa rẽ yĩng la roagdbã sẽn pa segd n ya ne b kambã zãmsgã.”

17. Bõe yĩng tɩ roagdbã segd n ket n paasd b tẽebã pãnga? Wãn to pag ne a sɩd sõng b kom-pugli tɩ b maneg n kɩs a Zeova sɩda?

¹⁷ Yãmb mengã mak-sõngã tara yõod wʋsgo. Y kambã geta y sẽn maandã. Woto wã, segdame tɩ y ket n paasd y tẽebã pãnga. Modg-y tɩ y kambã neẽ tɩ y teega a Zeova. Wala makre, pag a ye ne a sɩd sẽn be Bɛrmiid yeelame tɩ bãmb sã n wa maand yɩɩr bũmb poorẽ, bãmb ne b kom-pugli wã naagda taab n pʋʋs a Zeova n kos sõngre. B sagenda b kambã tɩ bãmb me mi n pʋʋsdẽ. B paasame: “Tõnd yeta kãsmã woto: ‘Teeg a Zeova zãng-zãnga, la f tʋm Rĩungã tʋʋm ne f sũur fãa, la f ra maan yɩɩr tɩ loog ye.’ A sã n wa yã yɛlã sẽn baas to-to wã, a bãngdame t’a Zeova sɩd sõngda tõndo. Rẽ sõngame t’a maneg n kɩs a Zeova sɩda, la a bas a yam tɩ Biiblã yaa a Gomde”

18. Bõe la roagdbã pa segd n yĩmi?

¹⁸ Roagdba, tẽeg-y tɩ y pa tõe n modg y kambã tɩ b tẽ a Zeova ye. Yãmb tʋʋmd yaa y sele, la y zãgs koom. La yaa Wẽnnaam n kɩtd tɩ bɩ. (1 Kor. 3:6) Woto wã, modg-y n sõng-y y kambã tɩ b bãngd a Zeova, la y kot-a t’a sõng-b ne a vʋʋsem sõngã maasem tɩ b tall tẽebo. Rẽ, y tõe n basa y yam t’a Zeova na n ninga y modgrã barka.—Efɛ. 6:4.