Sõsg ning sẽn loogã pʋgẽ, tõnd goma bãnd ning a Zeezi sẽn kõ wã yelle. Bãndã wilgda bũmb toor-toor sẽn na n n maane, tɩ yaa kaset tɩ Wẽnnaam Rĩungã zoe n lugla saasẽ, la t’a Zeezi Kirist sẽn yaa Rĩmã sɩnga a naamã.

Biiblã wilgdame t’a Zeezi sã n wa sɩng a naamã, a na n diga a Sʋɩtãan ne a zĩn-dãmbã saasẽ. Rẽ tɛka, b sẽn tõe n maan bũmb ninsã teka tẽngã zug ka bala. Woto yaa bũmb a ye sẽn kɩt tɩ dũniyã yɛlã maneg n keng yʋʋmd 1914 tɛka.—Vẽnegre 12:7, 9.

Baa ne dũniyã yɛlã sẽn tar kengrã, a Zeezi sẽn yaa Wẽnnaam Rĩungã Rĩmã maana bũmb toor-toor n na n sõng nebã dũniyã gill zugu. A Zeezi ra pĩnd n yeelame tɩ b na n sõnga nebã tɩ b bãng Biiblã sẽn yetã. Ne tʋʋm-kãnga b sẽn tʋmd dũniyã gill zugã maasem, neb wʋsg bãngda Biiblã noyã la a saglsã, la b tũudẽ. (Ezayi 2:2-4) Neb milyõ-rãmb bãnga b sẽn tõe n maan tɩ b zakã rãmb sũ-noog paase, la b sẽn tõe n maaneg me n da wa bas tɩ yaa b nug-tʋʋmã n pak-b n tɩ yɩɩd ye. B bãngda bũmb wʋsg sẽn nafd-b masã menga, la sõngd-b tɩ b lebgd neb nins buud Wẽnnaam sẽn dat tɩ b yɩ a Rĩungã poorẽ dãmbã.

Baa ne a Zeezi sẽn zoe n dɩt naam saasẽ wã, ninsaalbã goosneema-rãmb me ket n dɩta naam tẽngã zugu. La Wẽnnaam na n kɩtame t’a Zeezi soog a bɛɛbã fãa. (Yɩɩn-sõamyã 110:2) Ka la bilfu, a Zeezi na n sãama a bɛɛbã zãnga, la a kɩt tɩ neb nins fãa sẽn sakd Wẽnnaamã paam yolsgo.

Wakat kãnga, Wẽnnaaam Rĩungã

• Na n sãama ziri tũudmã fãa. Tũudum nins fãa sẽn zãmsd nebã yɛl sẽn pa sɩd Wẽnnaam zugã, la b kɩt me tɩ vɩɩmã lebg toogã na n menema fasɩ. Biiblã goma ziri tũudmã yelle, n mak-a ne pʋg-yoodre. A sãoongã na n linga neb wʋsgo.—Vẽnegre 17:15, 16.

• Na n kɩtame tɩ ninsaalbã naam sa. Wẽnnaam Rĩungã na n kɩtame tɩ ninsaalbã naam buudã fãa sa.—Vẽnegre 19:15, 17, 18.

• Na n sãama nin-wẽnsã. Bõe n na n paam neb nins sẽn wɩngd ne wẽngã maanego, la b pa rat n sak Wẽnnaamã? Biiblã yetame yaa: “B na n menesa nin-wẽnsã tẽngã pʋga.”—Yel-bũnã 2:22.

• Na n sãama a Sʋɩtãan ne a zĩn-dãmbã. A Sʋɩtãan ne a zĩn-dãmbã pa na n le tõog n “belg buud toɛy-toɛyã” neb ye.—Vẽnegre 20:3, 10.

Na n yɩɩ wãn yẽ ne neb nins sẽn teend Wẽnnaam Rĩungã?

A Zeezi sẽn yaa Rĩma, n be saasẽ n dɩt naamã na n wa maana bũmb wʋsg dũniyã nanambs baa a ye sẽn pa na n tol n tõog n maane. Neb 144 000 n na n yɩ a na-rɩt-n-taase, n sõng-a. B yãka nin-kãens ninsaalbã sʋka. (Vẽnegre 5:9, 10; 14:1, 3) A Zeezi na n kɩtame tɩ Wẽnnaam raabã maan tẽngã zugu. Bõe la Wẽnnaam Rĩungã na n maan n kõ ãdem-biisã?

• A na n kɩtame tɩ bãasã la kũumã sa. “Tẽngã ned kõn yeel t’a ka keem ye,” la ‘kũum pa na n le zĩnd’ ye.—Ezayi 33:24; Vẽnegre 21:4.

• A na n kɩtame tɩ laafɩ la bãan hakɩɩk zĩndi. “Fo kambã na n paama vɩ-bãan wʋsgo,” la “ned kam fãa na n zĩnda a reezẽ tɩɩg ne a kankang tẽngre, tɩ ned ka be n tõe n kẽes-b rabeem ye.”—Ezayi 54:13; Miise 4:4.

• A na n kɩtame tɩ d paam n tʋʋm sẽn kõt sũ-noogo. “Neb nins mam sẽn yãkã na n dɩɩ b nus tʋʋmã yõodo. Bãmb kõn tʋm n nams zaalem ye.”—Ezayi 65:22, 23.

• A na n kɩtame tɩ tẽn-gãongã rẽgengã la a sãoongã sa. “We-raoogã ne tẽng ning sẽn kʋɩ wã na n maana sũ-noogo. Zĩ-koɛɛngã na n kɩdma ne sũ-noog n ning puud wa sõse.”—Ezayi 35:1.

• A na n sõnga nebã tɩ b bãng b sẽn tog n maan n wa paam vɩɩm sẽn ka sɛtã. “Sẽn na yɩl n paam vɩɩm sẽn ka sɛtã, b segd n bãnga yãmb y ye bal sẽn yaa Wẽnnaam sɩd-sɩdã, la a Zeezi Kirist yãmb sẽn tʋm a soabã.”—Zã 17:3.

Wẽnnaam ratame tɩ y paam n dɩ bõn-sõma kãensã fãa nafa. (Ezayi 48:18) Sõsg ning sẽn pʋgdã na n sõng-y lame tɩ y bãng y sẽn tõe n maan masã menga, n wa tõog n paam n zĩnd wakat kãnga.