ÃDEM-BIISÃ

Biiblã sẽn yete: Wẽnnaam “ka naan [dũniyã] t’a yaa zaalem ye. B naan-a lame tɩ neb tõe n zĩnd a pʋgẽ.” —EZAYI 45:18.

TẼNGÃ D SẼN VƖ A ZUGÃ

Biiblã sẽn yete: “Zamaan loogdame, tɩ zamaan a to wa, la dũniyã paada woto wakat fãa.”—KOƐƐG SOABA 1:4.

RẼ SẼN DAT N YƐƐLGA: Biiblã wilgdame tɩ tẽngã d sẽn vɩ a zugã pa na n tol n sãame, la tɩ neb n na n kell n zĩnd a zug wakat fãa. Woto wã, dũniyã saab rat n yeelame tɩ bõe?

TAGS-Y N GES-Y: Biiblã rɩka dũni-kãngã saabã n mak ne bũmb ning sẽn zĩnd a Nowe wakatẽ wã. Wakat kãnga, dũniyã ra “pida ne tʋʋm-beedo.” (Sɩngre 6:13) La a Nowe yẽ ra yaa nin-tɩrga. Rẽ n so tɩ Wẽnnaam kogl a Nowe ne a zakã rãmba, la a kɩt tɩ sa-kãseng ni n sãam nin-wẽnsã. Biiblã goma rẽ yell n yeel yaa: “Wakat kãng dũniyã paama sãoong ne bõn-kãens maasem, sasa ning koomã sẽn lim-a wã.” (2 Pɩyɛɛr 3:6) Woto yɩɩ dũni saabo. La bõe n meneme? Pa tẽngã d sẽn vɩ a zugã ye. Yaa nin-wẽnsã sẽn da be tẽngã zugã. Dẽnd Biiblã sã n gomd dũniyã saab yelle, a pa gomd tẽn-gãongã sãoong yell ye. Yaa nin-wẽnsã n paas bũmb nins fãa b sẽn siglã sãoong yell la a gomda.

ZU-LOEESÃ LA WẼNEMÃ

Biiblã sẽn yete: “Keta bilf bala, tɩ nin-wẽng ka leb n zĩnd ye! Fo na n gẽes-a lame n ka yãnd ye! Sik-m-mens rãmbã n na n soog tẽngã, la b na n paama vɩ-bãane, ne sũ-noog meng-menga.”—YƖƖN-SÕAMYÃ 37:10, 11.

RẼ SẼN DAT N YƐƐLGA: A Nowe wakatẽ sa-kãsengã pa sãam nin-wẽnsã, tɩ yaa sẽn kell n sa ye. Sa-kãsengã poore, nin-wẽns n le wa n yik n namsd nebã vɩɩm. La ka la bilfu, Wẽnnaam na n kɩtame tɩ wẽnemã sa. Sɩd me, yɩɩn-gʋlsdã yeelame tɩ ‘nin-wẽng ka na n le zĩnd ye.’ Wẽnnaam na n tũnuga ne a Rĩungã n kɩt tɩ wẽnemã fãa sa. A Rĩungã yaa goosneema sẽn be saasẽ, sẽn na n dɩ naam nin-tɩrsã zugu.

TAGS-Y N GES-Y: Neb nins sẽn dɩt naam dũniyã zug rũndã-rũndã wã na n saka Wẽnnaam Rĩungã bɩ? Biiblã wilgdame tɩ b pa na n sak ye. B na n maana yalemdo, n dat n zab ne Wẽnnaam Rĩungã. (Yɩɩn-sõamyã 2:2) La na n baasa wãna? Wẽnnaam Rĩungã na n sãama ninsaalbã goosneemã-rãmbã fãa, “la a na n zĩnda wakat sẽn kõn sa.” (Dãniyɛll 2:44) La bõe yĩng tɩ ninsaalbã naam segd n sa?

Biiblã sẽn yete: “Ninsaal ka so a meng vɩɩm yell ye.”—ZEREMI 10:23.

RẼ SẼN DAT N YƐƐLGA: Wẽnnaam pa naan ninsaal t’a segd n dɩ naam a to zug ye. B pa rɩt b naamã nebã zug sõma, b leb n pa tõogd n welgd nebã zu-loeesã ye.

TAGS-Y N GES-Y: Sebr a yembr wilgame tɩ “ninsaalbã goosneema-rãmbã pa tõogd n welgd ãdem-biisã zu-loees kẽer wala naongã, komã, bãasã, sabab-wẽnsã, zabã, la nen-kɛglem tʋʋmã ye.” Sebrã paasame yaa: “Neb kẽer tẽedame tɩ yaa ninsaalbã sã n paam tɩ yaa goosneema-yɛng n dɩt naam dũniyã gill zug la b na n tõog n welg ãdem-biisã zu-loeesã.” La baa dũniyã goosneema-rãmbã fãa sã n zems taab n na n dɩ naam, na n ket n yaa ninsaalb sẽn pa zems zãng n dɩt naam, n pa tol n tõe n welg zu-loees nins yell d sẽn gomã ye. Wẽnnaam Rĩungã bal n yaa goosneema ning sẽn tõe n kɩt tɩ ãdem-biisã zu-loeesã sa wakat fãa yĩngã.

Sã n yaa ne Biiblã, nin-tɩrsã pa segd n yɛɛs dũni-wẽn-kãngã saabã ye. Pʋd n yaa koe-noogo, bala Wẽnnaam na n ledga dũni-kãngã sẽn pa le yaa sõma wã, ne dũni-paalg sẽn yaa sõma hal wʋsgo!

Rẽ na n yɩɩ wakat bʋgo? Sõsg ning sẽn pʋgdã wilgda Biiblã sẽn leokd sok-kãngã to-to.