Sõsg ning sẽn loogã pʋgẽ, d yãame tɩ Wẽnnaam na n sãama dũni-wẽn-kãngã, la a kɩt tɩ zu-loeesã fãa sa. D tõe n kɩsa sɩd tɩ na n yɩɩ woto. Bõe yĩnga? Bala Biiblã sẽn yaa Wẽnnaam Gomdã pʋgẽ, b pʋlmame yaa:

“Dũniyã loogdame.”—1 ZÃ 2:17.

D tõe n kɩsa sɩd tɩ neb n na n põse. Bala vɛrse wã pʋgẽ, b paasame yaa:

“Ned ning sẽn maand Wẽnnaam daabã paada wakat fãa.”

Dẽnd d sã n dat n wa paam n põse, yaa tɩlɛ tɩ d maand Wẽnnaam daabã. La d segd n deng n bao n bãnga Wẽnnaam, n yaool n tõog n bãng a raabã.

A Zeezi yeelame: “Sẽn na yɩl n paam vɩɩm sẽn ka sɛtã, b segd n bãnga yãmb y ye bal sẽn yaa Wẽnnaam sɩd-sɩdã.” (Zã 17:3) D sã n dat n wa paam n põs dũniyã saab sasa n vɩɩmd wakat sẽn kõn sa, yaa tɩlɛ tɩ d bao n bãng Wẽnnaam. Woto pa rat n yeel tɩ d sak n deeg bal tɩ Wẽnnaam beeme, bɩ n mi bũmb a wãn bal Wẽnnaam zug ye. Yaa tɩlɛ tɩ d bao n lebg a zoa. D sã n dat tɩ tõnd ne ned zood paase, yaa tɩlɛ tɩ d yãt sẽk n sõsd ne a soabã. Yaa woto me, d sã n dat n paam zood sõma ne Wẽnnaam. D ges bũmb kẽer Biiblã sẽn sõng tõnd tɩ d bãnge, tɩ rẽ tõe n kɩt tɩ d paam zood sõma ne Wẽnnaam, la sõng me tɩ d zoodã pãng ket n tar paasgo.

Sẽn na yɩl n vɩɩmde, d rɩta daar fãa. La a Zeezi yeelame: “Ninsaal pa tog n vɩ ne rɩɩb bal ye. A tog n vɩɩ ne gomd ning fãa sẽn yit a Zeova noorẽ wã me.”—Matiye 4:4.

Rũndã-rũndã, a Zeova goamã bee Biiblã pʋgẽ. Y sã n zãmsd Biiblã, y na n bãnga Wẽnnaam sẽn maan pĩnd wẽndẽ, a sẽn maand masã menga, la a sẽn na n wa maan ka la bilfu.

Y sã n dat n sak Wẽnnaam noyã, tɩ yaool n yaa toog tɩ y tõog n bas bũmb kẽer a sẽn yeel tɩ pa sõma maanego, bõe la y tõe n maan tɩ sõng-yã? Sã n yaa woto, y sã n bao n bãng Wẽnnaam sõma, na n sõng-y lame.

D gom pag a ye yʋʋr sẽn boond t’a Sakuura yelle. A ra yoodame. A sẽn wa n sɩng Biiblã zãmsgã, a bãngame tɩ Wẽnnaam Gomdã pʋgẽ, b yetame tɩ d ‘zoe yoobo.’ (1 Korẽnt rãmbã 6:18) A Sakuura pʋʋsa Wẽnnaam n kos sõngre, n tõog n bas yoobã. Baa ne rẽ, ket n yaa a pãn-komsem a sẽn maood ne. Ad a sẽn yeele: “Mam sã n wa tagsd yoobã yɛl yelle, mam pʋʋsda a Zeova, n pelg m pʋg n gom ne-a, n miẽ tɩ m pa tõe n mao ne m meng pãng ye. Pʋʋsgã kɩtame tɩ maam ne a Zeova zoodã pãng paase.” Wala a Sakuura, neb milyõ-rãmb n baood n bãngd Wẽnnaam. Wẽnnaam sõngd-b lame tɩ b tõogd n toeemd yɛl kẽer b vɩɩmã pʋgẽ, tɩ b sẽn vɩ to-to wã tat a yam masã.—Filip rãmbã 4:13.

Y sã n bao n bãng Wẽnnaam sõma, y na n paamame tɩ ‘Wẽnnaam mi yãmb’ n get-y wa a zo-nongre. (Galat rãmbã 4:9; Yɩɩn-sõamyã 25:14) Woto, y na n wa tõog n põsa dũniyã saab sasa, n paam n vɩɩmd Wẽnnaam dũni-paalgã pʋgẽ. La vɩɩmã na n yɩɩ wãn to dũni-paalgã pʋgẽ? Sõsg ning sẽn pʋgdã gomda rẽ yelle.