1. Bõe yĩng tɩ d tõe n yeel tɩ pa bũmb nins d sẽn tʋllã fãa n yaa tɩlɛ?

BŨMB nins sẽn yaa tɩlɛ ne d vɩɩmã pa waoog ye. Wala makre, d sã n paam rɩɩbo, fut la gãag zĩiga, sekame. La bũmb nins d sẽn tʋllã yaa ka tɛka. Neb wʋsg pa mi tɩ pa bũmb nins b sẽn tʋllã fãa n yaa tɩlɛ ye.

2. Sõdg-y bũmb kẽer nebã sẽn date.

² Naoor wʋsgo, nebã sẽn tʋll bũmb ninsã bee ne b sẽn vɩ zĩig ningã. Wala makre, ned sã n vɩ tẽng sẽn pa yidg laogã wɛɛngẽ, tõe t’a na n data portaable, montɛɛre, la a toorẽ zaka. Sã n yaa ned sẽn vɩ tẽng sẽn tar laog wʋsg pʋgẽ, tõe t’a na n data fut ligd sẽn yaa toogo, zag-bedre, la mobill-neere. La baa sẽn yaa zĩig ning la d vɩ, d nug zãadame tɩ pa zãad me, d tõe n wa yik n dat n baoo teed n same. Tõe meng tɩ yaa teed sẽn pa tɩlɛ, wall sẽn yɩɩd d tõogo.

3. Bõe n wilgd tɩ ned nonga laogo?

³ Bõe n wilgd tɩ ned nonga laogo? Yaa a soabã sã n basame  tɩ laogã baoob pak-a n yɩɩd Wẽnnaam tũubu. A sã n paam sẽn yaa tɩlɛ ne-a wã, a getame tɩ pa sek ye. A ket n maoodame n na n paam n paase. Baa ned nug sẽn pa zãad wall sẽn pa tõe n da te-bɛd tõe n nonga laogo, tɩ pa le yaa Wẽnnaam Rĩungã yell n pak-a n yɩɩd ye.—Ebre. 13:5.

4. Wãn-wãn la a Sʋɩtãan tũnugd ne d “ninã sẽn get bũmb nins n datã” n bẽt tõndo?

⁴ A Sʋɩtãan tũnugda ne bũmb nins fãa sẽn be dũniyã pʋgẽ wã, n dat tɩ d tẽ tɩ yaa d sã n tar teed wʋsg bal la d vɩɩmã yɩt noogo. Rẽ n so t’a tũnugd ne d “ninã sẽn get bũmb nins n datã,” n na n kɩt tɩ d bao teed wʋsgo. (1 Zã 2:15-17; Sɩng. 3:6; Yel. 27:20) Koaasdbã wae n pẽdgda ne piblisite-rãmbã, n dat tɩ nebã ra b teedã. Yãmb zoe n daa bũmb a neermã yĩng bala, wall y sẽn yã-a piblisite pʋgẽ, n yaool n wa mik t’a pa tɩlɛ ne-y bɩ? D sã n daad teed sẽn pa tɩlɛ ne-do, d gĩta d vɩɩmã. Tõe n tiis-d lame tɩ d pa tõog n tũ a Zeova wa sẽn segdã ye. Wala makre, tõe n wa kɩtame tɩ d pa le tar sẽk n karemd Biiblã, n segend tigissã, n kẽnd tigissã, pa rẽ bɩ n moond koɛɛgã n pa vaandẽ ye. D tẽeg tɩ tʋm-tʋmd a Zã keoog-d lame tɩ “dũni loogdame la a ratem wẽngã me loogdame.”

5. Bõe n tõe n paam neb nins sẽn dɩkd b sẽkã ne b pãngã fãa n baood teedã?

⁵ A Sʋɩtãan pa rat tɩ d rɩk d sẽkã la d pãngã fãa n tũ a Zeova ye. A sẽn dat yaa d maood d pãng fãa n na n paam ligd la teed n paase. (Mat. 6:24) La sã n yaool n yaa teedã bao n paasã n pak tõndo, d vɩɩmã pa na n tall bark ye. D tõe n wa lebga sũ-to-neda, wall d paam ligd zu-loeese. Sẽn yaa wẽng n yɩɩd menga, d tõeeme n wa pa le tẽed a Zeova la a Rĩungã ye. (1 Tɩm. 6:9, 10; Vẽn. 3:17) A Zeezi yeelame tɩ ned sã n wʋm Rĩungã koɛɛgã, ‘bũmb a taab ratem’ tõe n kẽ a sũurẽ wã, n ‘dɩ koɛɛgã t’a ka wom biis ye.’—Mark 4:14, 18, 19.

6. Yam bʋg la d tõe n dɩk a Baruk kibarã pʋgẽ?

⁶ D tẽeg no-rɛɛs a Zeremi seb-gʋlsd a Baruk yelle. A wa n sɩnga ‘bõn-kãsems’ baoobo, t’a Zeova yeel-a tɩ Zerizalɛm sãoongã kolgame, la a pʋlm-a woto: ‘M na n gũu fo vɩɩmã.’ (Zer. 45:1-5) Yaa a Baruk yõorã bal la a Zeova ra na n kogle, pa bũmb a to ye. A ra pa na n kogl nebã paoong ye. (Zer. 20:5) A Sʋɩtãan dũniyã sãoong me kolgdame. Rẽnd pa masã la d segd n bao teed n sam ye. D pa segd n tẽ me tɩ to-kãsengã sasa, a Zeova na n kogla d teedã, baa teed nins d sẽn nong n yɩɩdã ye.—Yel. 11:4; Mat. 24:21, 22; Luk 12:15.

7. Gom-bʋs la d na n wɛgse, la bõe yĩnga?

⁷ Woto wã, d maanda a wãn n tõog n get d meng la d zakã rãmb yelle, la d lʋɩɩsd bũmb nins sẽn tar yõod n yɩɩdã taoore? A Zeezi sẽn wa n sõsd ne nebã tãngã zugã, a kõo sagl-sõma sẽn tõe n sõng-d tɩ d gil laogã nonglem sẽn yaa bẽdgã, la d ra maan yɩɩr tɩ loog noor me ye. (Mat. 6:19-21) D na n wɛgsa a goam nins sẽn be Matye 6:25-34. Rẽ, d na n maneg n kɩsa sɩd tɩ d segd n deng n ‘baoa Wẽnnaam soolmã,’ la d ra bao laog ye.—Luk 12:31.

8, 9. a) Bõe yĩng tɩ d pa segd n maan yɩɩr tɩ looge, baa bũmb nins sẽn yaa tɩlɛ ne-dã wɛɛngẽ? b) Bũmb nins sẽn yaa tɩlɛ ne ninsaalbã wɛɛngẽ, bõe la a Zeezi ra mi?

⁸ Karm-y Matye 6:25. A Zeezi ra miime t’a karen-biisã ra maanda yɩɩr b sẽn na n dɩ bɩ n yũ, wall b sẽn na n  yeelgã wɛɛngẽ. A sẽn wa n sõsd ne-b tãngã zugã, a yeel-b-la woto: “Dẽ n kɩt tɩ mam yet yãmb tɩ y ra maan yɩɩr ne y vɩɩmã yelle.” A Zeezi ra ratame tɩ b bãng b sẽn pa segd n maan yɩɩr tɩ loog noorã võore. A ra miime tɩ b sã n maand yɩɩr tɩ looge, baa yaa bũmb nins sẽn yaa tɩlɛ ne-bã wɛɛngẽ, tõe n kɩtame tɩ b yĩm sẽn tar yõodã. A Zeezi ra rata a karen-biisã neere. Rẽ n so t’a le keoog-b yel-kãng wɛɛngẽ hal naoor a naase.—Mat. 6:27, 28, 31, 34.

⁹ La bõe yĩng t’a Zeezi yeel tɩ d ra maan yɩɩr d sẽn na n dɩ, d sẽn na n yũ wall d sẽn na n yeelgã wɛɛngẽ? Bõn-kãensã pa tɩlɛ ne-d la? Yaa tɩlɛ ne-do! Ned sã n pa tõe n paam dɩɩb la futu, n maand yɩɩr dẽ yĩnga, a bee bʋʋm. A Zeezi ra mii rẽ. A ra mii sẽn yaa tɩlɛ ne ãdem-biig daar fãa wã. A pʋd n da miime tɩ ‘yaoolem wakatã,’ a karen-biisã vɩɩm na n yɩɩ toogo. (2 Tɩm. 3:1) Sɩd me, rũndã-rũndã, tʋʋm paoong yaa toogo, tɩ teedã ligd me tar paasgo. Zĩis wʋsgo, nebã yaa naong rãmba, n pa tõe n paam n dɩ tɩ seke, wall b pʋd n pa tõe n paam dɩɩb ye. La a Zeezi ra miime me tɩ ninsaal vɩɩmã yõod yɩɩda rɩɩbo, la tɩ yĩng yõod yɩɩda futu.

10. A Zeezi sẽn wa n na n wilg a karen-biisã b sẽn tog n pʋʋs to-to wã, a yeel-b lame tɩ bõe n segd n pak-b n yɩɩda?

¹⁰ A Zeezi sẽn wa n sõsd ne a karen-biisã tãngã zugã, a reng n wilg-b lame tɩ b tõe n pʋʋsa b saasẽ Ba wã, n kos bũmb nins sẽn yaa tɩlɛ ne-bã. A wilg-b lame tɩ b tõe n yeela woto: “Kõ-y tõnd d daar woo daar dɩɩbã dũndã.” (Mat. 6:11) Daar a to me, a wilg-b lame tɩ b tõe n kosa woto: ‘Kõ-y tõnd d daar o daar dɩɩbã daar fãa.’ (Luk 11:3) La pa rat n yeel tɩ d sã n na n pʋʋse, yaa bũmb nins sẽn yaa tɩlɛ ne-dã yell bal n segd n pak-d ye. Sɩd me, a Zeezi yeela a karen-biisã tɩ sẽn segd n pak-b n yɩɩd yaa b kos tɩ Wẽnnaam Rĩungã wa. (Mat. 6:10; Luk 11:2) Sẽn na yɩl n sõng-b tɩ b ra le maan yɩɩre, a tẽeg-b lame t’a Zeova geta a bõn-naandsã fãa yelle.

11, 12. A Zeova sẽn get liuuli wã yell to-to wã wilgda tõnd bõe? (Ges-y sõsgã sɩngrẽ fotã.)

¹¹ Karm-y Matye 6:26. Vɛrse wã pʋgẽ, a Zeezi sagl-d lame tɩ d ges “bõn-pɩgsã sẽn yɩgd yĩngrã.” Sɩd me, baa liuuli wã sẽn yaa kɩds-kɩdsã, b rɩta wʋsgo. Liuul bedrem sã n da taẽ ninsaala, a ra na n dɩtame n yɩɩd ninsaala. Liuuli wã rɩta tɩɩs biisi, koodo, bõn-yɩgdɩ la bũmb a taaba. La b pa bʋte, b pa kood me. A Zeova n get tɩ b paamd rẽ fãa. (Yɩɩn. 147:9) La yaa vẽeneg t’a pa baood rɩɩbã n suiid b noorẽ ye. Yaa liuuli wã n segd n saag n bao. La b sã n bao me, b paamdame.

¹² A Zeezi ra kɩsa sɩd t’a Ba wã sẽn get liuuli wã yellã, a na n gesa ãdem-biisã me yelle. ^[1] (1 Pɩy. 5:6, 7) Tõnd me segd n baoa d noorã rɩɩb wa liuuli wã, n da maan kʋɩɩng ye. D segd n koome wall d tʋm n bao ligd n tõog n paam rɩɩbo. La a Zeova na n ninga d modgrã barka, tɩ d paam d sẽn datã. Rɩɩb wall ligd sã n wa paoog-do, a na n kell n gesame tɩ d paame. Wala makre, a tõe n kɩtame tɩ neb sõng-do. A Zeova maaname tɩ liuuli wã tõe n paam gãag zĩiga. A kõ-b-la yam tɩ b tõe n maan tʋgdo. A naana bũmb nins liuuli wã sẽn tar n maand tʋgdã me. Rẽnd a tõe n sõnga tõnd ne d zakã rãmb me tɩ d paam gãag zĩiga.

13. Bõe n wilgd tɩ tõnd yõod yɩɩda liuuli wã?

 ¹³ A Zeezi sẽn tẽeg a karen-biisã tɩ Wẽnnaam geta liuuli wã yellã, a bas n sok-b-la woto: “Yãmb ka yɩɩd [liuuli wã] wʋsg sɩda?” (Ges-y Luk 12:6, 7.) Yaa vẽeneg t’a Zeezi sẽn wa n yet woto wã, a ra tagsda yẽ sẽn na n sak n ki ãdem-biisã yĩngã. Kiristã sẽn ki tɩ yɩ maoongã pa liuuli wã yĩnga, pʋd n pa rũng baa a yembr yĩng ye. Yaa tõnd yĩng la a sẽn ki wã, sẽn na yɩl tɩ d wa paam n vɩɩmd wakat sẽn kõn sa.—Mat. 20:28.

14. Baa ned sã n maand yɩɩre, bõe la a pa tol n tõe n maane?

¹⁴ Karm-y Matye 6:27. Bõe yĩng t’a Zeezi yeel tɩ ned sã n maand yɩɩre, a pa tõe n paas a vɩɩmã woglem kãntɩɩg a yembre? A ra rat n wilgame bal tɩ baa ned maand yɩɩr bũmb nins sẽn yaa tɩlɛ wã poorẽ, pa tõe n paas a yõorã woglem ye. Ned sã n pʋd n maand woto, a tõe n lʋɩɩ bãaga, wall a kʋʋg a yõore.

15, 16. a) A Zeova sẽn get weoog rulg lɛlem yell to-to wã wilgda tõnd bõe? (Ges-y sõsgã sɩngrẽ fotã.) b) Yɩta sõma tɩ ned fãa sok a meng sogs-bʋse, la bõe yĩnga?

¹⁵ Karm-y Matye 6:28-30. D sã n paam fuug sẽn yaa neere, d sũur pa noom sɩda? Yaa vẽeneg tɩ d sũur noomame. Sẽn yɩɩd fãa sã n yaa fuug d sẽn tõe n yeelg n kẽng tigissã bɩ tigis-kãsemsã, pa rẽ bɩ n yi n moon koɛɛgã. La rẽ yĩnga, d tog n maana yɩɩr futã wɛɛngẽ sɩda? Ayo. A Zeezi leb n tẽega a karen-biisã a Zeova sẽn get a bõn-naandsã yell to-to wã. A goma weoog rulg lɛlem yelle. La tõe t’a ra  tagsda tɩ-puud a taab sẽn yaa neeb me yelle. Tɩ-puud pa wĩid lamdo, b pa wʋgd fut me ye. La Wẽnnaam naan-b lame tɩ b yaa neeba, hal t’a Zeezi yeel t’a “Salmo mengã ne a sẽn dag n tar ziir to-to wã fãa, a ka tõog n yeelg a meng tɩ be neer n ta rulg lelemd a yembr ye.”

¹⁶ Bɩ d tẽeg a Zeezi sẽn yeel bũmb ning rẽ poorã. A yeelame yaa: “Yãmb tẽeb bilf rãmba! Sã n yaa tɩ Wẽnnaam nagsa mood ning sẽn be weoogẽ . . . , bãmb kõn ges yãmb fut yell n yɩɩd sɩda?” Yaa vẽeneg t’a na n gesame tɩ b paam futu! La a Zeezi yeela a karen-biisã tɩ yellã yaa tɩ b tẽebã paoodame. (Mat. 8:26; 14:31; 16:8; 17:20) B ra segd n kɩsa sɩd t’a Zeova rat n gesa b yelle, la t’a sɩd na n gesa b yelle. La tõnd yẽ? Rẽ yĩnga, d basa d yam zãng-zãng t’a Zeova na n gesa d yell bɩ?

17. Bõe n tõe n sãam tõnd ne a Zeova zoodã?

¹⁷ Karm-y Matye 6:31, 32. Naoor wʋsgo, bũmb ning sẽn pak sẽn pa mi-b a Zeova wã yaa b mao n paam ligd la teed wʋsgo. La tõnd sã n maan wa bãmba, na n sãama tõnd ne a Zeova zoodã. D miime t’a Zeova yaa tõnd Ba, la t’a nonga tõndo. D kɩsa sɩd me tɩ d sã n maan a raabã, n deng n bao a Rĩungã, a na n gesame tɩ d paam bũmb a taabã sẽn yaa tɩlɛ ne-dã hal tɩ seke. Sẽn paase, d miime tɩ yaa d sẽn tar zood ne a Zeova wã n kõt-d sũ-noog n tɩ yɩɩda, la tɩ yaa rẽ n kɩt tɩ d sã n paam “dɩɩb ne futu,” bɩ sek tõndo.—1 Tɩm. 6:6-8.

18. Bõe yĩng tɩ d tõe n yeel t’a Zeova mii sẽn yaa tɩlɛ ne tõnd ned kam fãa wã? Bõe la a na n maane?

¹⁸ Karm-y Matye 6:33. Wa a Zeezi sẽn yeelã, tõnd sã n deng n bao Wẽnnaam Rĩungã, Wẽnnaam na n gesame tɩ d paam sẽn yaa tɩlɛ ne-dã fãa. A Zeezi wilga d sẽn tõe n kɩs sɩd ne rẽ wã võore. A yeelame yaa: “Yãmb ba sẽn be arzãnã miime tɩ yãmb data bõn-kãense.” Sɩd me, a Zeova mii tõnd sẽn datã, tɩ d nan pa kos meng ye. (Fili. 4:19) Sã n wa yaa tɩlɛ tɩ d paam fuugu, a miime. A mii rɩɩb ning sẽn na n yɩ sõma ne tõndo, la sẽn na n sek-dã. A miime me tɩ yaa tɩlɛ tɩ tõnd ne d zakã rãmb paam ro-gãaga. Hakɩɩka, a Zeova na n gesame tɩ d paam sẽn yaa tɩlɛ ne-dã fãa.

19. Bõe yĩng tɩ d pa segd n maan yɩɩr ne sẽn wat beoogo?

¹⁹ Karm-y Matye 6:34. Vɛrse-kãngã pʋgẽ yɛsa, a Zeezi le yeela a karen-biisã tɩ b “ra maan yɩɩr” ye. Daar fãa, a Zeova na n gesame tɩ d paam sẽn yaa tɩlɛ wã. Rẽ n kɩt tɩ pa tar yõod tɩ d maan yɩɩr ne sẽn wat beoog ye. Sã n pa rẽ, d tõe n wa basa a Zeova teegre, n teeg d mense, tɩ rẽ sãam tõnd ne yẽ zoodã. Sẽn segd yaa d teeg a Zeova zãng-zãnga.—Yel. 3:5, 6; Fili. 4:6, 7.

20. a) Rĩungã tʋʋm-bʋg la y tõe n yãk yam n wa tʋme? b) Wãn-wãn la y tõe n manes yɛl kẽer y vɩɩmã pʋgẽ?

²⁰ D sã n dɩk d sẽkã la d pãngã n baood ligd la teed n na n paase, tɩ rẽ kɩt tɩ d pa le tõe n tũ a Zeova wa sẽn segdã, sɩd yaa kaeto! D segd n tũ a Zeova ne d sũur fãa. Fees-y y meng n ges y sã n pa tõe n tɩ sõng tiging sẽn pa tar koe-moondb wʋsgo, wall y sã n pa tõe n yɩ wakat fãa so-pakda. Sã n mik tɩ y zoe n yaa wakat fãa so-pakda, y tõe n kosame n kẽng Rĩungã koe-moondb lekolle. Nina me tõe n mi n tɩ sõnga ne Betɛllã tʋʋma, wall a tɩ sõng n tʋm sɛbã lebgr biru-rãmbẽ. Sãnda me tõe n tɩ naaga sẽn sõngd-b n met Rĩungã rot la siglgã rot a taabã. Tags-y n ges-y y sẽn tõe n maan to-to n manes yɛl kẽer y vɩɩmã pʋgẽ, n tõog n tʋm Rĩungã tʋʋm n paase. Pʋʋs-y-yã a Zeova n gom dẽ yelle, la y karem zĩ-gũbrã gom-zug sẽn yaa: “ Y sẽn tõe n manes y vɩɩmã yɛl kẽer to-to.” Rẽ poor bɩ y toeem y sẽn segd n toeemã n da bas tɩ kaoos ye.

21. Bõe n na n sõng tɩ yãmb ne a Zeova zoodã pãng paase?

²¹ A Zeezi sẽn sagl tõnd tɩ d reng n bao Wẽnnaam Rĩungã la d ra bao laogã, a bee bʋʋm. D sã n deng n bao Wẽnnaam Rĩungã, na n kɩtame tɩ d ra maand yɩɩr wʋsgo, bũmb nins sẽn yaa tɩlɛ ne-dã wɛɛngẽ ye. Rẽ me, na n kɩtame tɩ tõnd ne a Zeova zoodã pãng paase, bala, d na n kɩsa sɩd t’a na n gesa d yelle. D na n tõogame me n yõkd d meng n pa raad dũniyã bũmb nins d ninã sẽn ne n datã, wall d sẽn dat fãa, baa d sã n tara tõogo. D sã n manes yɛl kẽer d vɩɩmã pʋgẽ masã tɛka, na n sõng-d lame tɩ d kell n sak a Zeova, n wa tõog “n paam vɩɩm hakɩɩkã.”—1 Tɩm. 6:19.