D TÕE n maka neb nins sẽn zãmsd Biiblã ne b sũur fãa wã ne neb sẽn baood sãnem. Sẽn na yɩl n paam yam ning sẽn be Wẽnnaam Gomdã pʋgẽ t’a yõodã ka to wã, sẽn zãmsd-b Biiblã segd n modga wʋsg la b ket n wɩngdẽ. D na n goma bũmb a tãab sãnem-baoodbã sẽn maand n paamd sãnemã, n ges yam ning d sẽn tõe n dɩke.

Mams-y wa yãmb sẽn na n kẽnd kʋlg noore, n wa yã bõn-kɩdg sẽn dɩga, tɩ wĩntoogã kɩt t’a pɩnda. Yãmb sulgame n na n gese, n mik tɩ yaa sãnem-pɛdga, hal tɩ y sũur noome. A yaa fĩ-fĩi n zems almet zugu, la a paoong yaa toog wa diama. Vẽenega, y na n maneg n gẽesame n ges y kõn yã a taaba.

Woto me, tõe tɩ y tẽra daar ning a Zeova Kaset soab sẽn wa y nengẽ pipi n gom Biiblã yell ne-yã, n wilg-y tɩ manegr n watã. Tõe tɩ y ket n tẽra pipi bõn-sõng y sẽn bãng Biiblã pʋgẽ, tɩ yaa wa sãnem-pɛdg y sẽn paame. Tõe tɩ yɩɩ y sẽn bãng tɩ Wẽnnaam tara yʋ-peelle, la tɩ yʋ-kãng yaa Zeova wã. (Yɩɩn. 83:18, MN) Tõe me tɩ yɩɩ y sẽn bãng tɩ y tõe n lebga a Zeova zoa wã. (Zak 2:23) Zĩig pʋgẽ, y bãngame tɩ y paama bũmb yõod sẽn yɩɩd sãnem hal zĩig sẽn zãre! Tõe tɩ yɩ-y-la noogo, hal tɩ y tʋll n bãng bõn-sõma a taab Biiblã pʋgẽ n paase.

Naoor wʋsgo sãnem-peds n mi n be kʋɩls kẽer pʋsẽ. Kiis a wãn pʋgẽ bala, sãnem-baoodb sẽn tʋmd ne b sũur fãa wã tõe n paama sãnem-peds a woto kilo-rãmba, tɩ b sã n na n koos bɩ tõe n ta milyõ tusa.

Y sẽn wa n sɩng Biiblã zãmsg ne a Zeova Kaset soabã, y ra yaa wa ned sẽn baood sãnem-pedse. Y sã n da bãng Biiblã vɛrse võore, y bʋgsdame, tɩ y bãngrã paasdẽ, tɩ y tẽebã me pãng paasdẽ. Y sẽn da maagd y yĩng n bʋgsd Biiblã bõn-sõma nins y sẽn bãngdã zugã, y bãnga y sẽn tõe n maan to-to n paam a Zeova zoodo, la y kell n pa a nonglmã pʋgẽ n wa paam vɩɩm sẽn kõn sa wã.—Zak 4:8; Zʋʋd 20, 21.

Tõe tɩ yãmb me nanga pãng n bao bõn-sõma nins sẽn be Biiblã pʋgẽ wã wa ned sẽn baood  sãnem-pedse. Y zãmsa Biiblã, n wa n bãng bũmb kẽer sẽn sek y na reeg lisgu. Kɩtame tɩ y rɩk y meng n kõ a Zeova, n deeg lisgu.—Mat. 28:19, 20.

Sãnem-baood tõe n yãa sãnem-peds sẽn sud kuga. Kug-kãens tõe n tara sãnem-peds wʋsg tɩ sek b na wã kugã n yãk sãnemã. La nif gesgẽ, f tõeeme n pa yã sãnemã sẽn be kugẽ wã ye. Bõe yĩnga? Bala, kug-kãens kilo tusr tõe n tara sãnem sẽn zems garam 10 bala. La ne rẽ fãa, sãnem-baoodbã getame tɩ seka b na wã kugã.

Baa ned sã n wa bãng Kiristã “goamã zãms-naana wã,” a segd n ket n maanda modgre. (Ebre. 6:1, 2) A segd n kell n modgame n bao bõn-sõma a taabã sẽn be Wẽnnaam Gomdã pʋgẽ wã, la sagls sẽn na n sõng-a. Woto wã, baa y sã n sɩng n zãmsda Biiblã sẽn na maan yʋʋma, bõe n tõe n sõng-y tɩ y ket n paamd bãngr n paasdẽ?

Tʋlg-y ne y sũur fãa n bãng n paase. Y sã n zãmsd Biiblã, maag-y y yĩng n get baa yel-bõonesã. Ket-y n modgd-y tɩ y na n paama yam ning sẽn yit Wẽnnaam nengẽ wã, la sagls sẽn na n naf-yã. (Rom. 11:33) Tall-y siglgã tʋʋm-teed nins sẽn be yãmb buud-gomdã pʋgẽ wã n maneg n vaees Biiblã n wʋm a goamã võor n paase. Vaeesgã sasa bɩ y maag y yĩng n bao sagls sẽn na n sõng-yã, la y bao sogsg nins y sẽn sokd y meng Biiblã zugã leoore. Kos-y y tẽed-n-taasã tɩ b wilg-y Biiblã vɛrse-rãmb sẽn sõng-ba, wall sõss b sẽn karem sɛbã pʋsẽ tɩ naf-ba. Wilg-y-b bũmb ning y sẽn yã y zãmsgã sasa tɩ yɩ-y noogo.

La y sẽn zãmsd Biiblã pa sẽn na n pids y zugã ne bãngr bal ye. Sɩd me, tʋm-tʋmd a Poll keooga kiris-nebã tɩ “bãngr wata ne wuk-m-menga.” (1 Kor. 8:1) Woto wã, ket-y n bɩɩsd-y sik-m-menga, la y paasd y tẽebã pãnga. Y sã n zãmsd Biiblã y toore, la y maand y zak pʋgẽ Biibl zãmsgã n pa vaandẽ, na n kɩtame tɩ y tũud a Zeova noyã, la y sõngd y taabã. Sẽn yɩɩd fãa, y sũur na n yɩɩ noogo, bala, y paama bũmb yõod sẽn yɩɩd sãnem hal wʋsgo.—Yel. 3:13, 14.