A Zeezi bɛɛbã wẽe no-koeemd ne yẽ la a karen-biisã bũmb wʋsg poorẽ, n na n wilg tɩ b maana sẽn pa segde. Nusã pɛgsgã yaa makr a ye. A Moyiiz tõogã ra wilga bũmb toor-toor sẽn tõe n kɩt tɩ ned lebg rẽgdo. Wala makre, rao sã n bẽed a taoorẽ, pag sã n yã a pekre, ned sã n bẽed wãoodo, la ned sã n sɩɩs ninsaal wall rũng sẽn ki. Tõogã leb n da wilga ned sẽn yaa rẽgd bɩ sẽn dẽgem a meng sẽn segd n maan n lebg yɩlemde. A soabã yɩlgr da tõe n tũu ne maando, koom soob wall koom mesbo, pa rẽ bɩ pɛgsgo.—Maan., sak 11-15; Sõd., sak 19.

Zʋɩf-rãmbã karen-saam-dãmb b sẽn boond tɩ rabẽ-rãmbã wa n paasa noy a taaba. Sebr a ye yeelame tɩ b wa n gãnega noy wʋsg sẽn wilgd yel-bõoneg sẽn tõe n kɩt tɩ ned lebg rẽgdo, wall a rẽgem a taaba. B ra gãnega noy me sẽn wilgd laas la teed sẽn tõe n lebg rẽgdo, la b wilg yel-maandɩ ned sẽn yaa rẽgd sẽn tog n maan n tõog n le yɩ yɩlemde.

A Zeezi bɛɛbã sok-a-la woto: “Bõe yĩng tɩ yãmb karen-biisã ka sakd b yaab-rãmbã miningu, n dɩt ne nus-rẽgdo?” (Mark 7:5) B sẽn gom pek f nus n yaool n dɩ wã yellã, pa sẽn na yɩl n da wa lʋɩ bãag ye. B ra rɩka nusã pɛgsg tɩ lebg tũudum yel-maandɩ. Sebr ning yell d sẽn gom zugẽ wã yeelame tɩ nusã pɛgb wɛɛngẽ, rabẽ-rãmbã ra wẽeda no-koɛɛm wʋsgo. Wala makre, “laas la teed nins b sẽn tog n ning koomã n pɛg nusã, koom ning buud b sẽn segd n tall n pɛgã, ned ning sẽn tog n sĩin f nusã, la f sẽn segd n pɛg f nusã n tãag zĩig ninga.”

A Zeezi manesem yɩɩ wãn ne no-kãensã fãa sẽn da yaa ninsaalb n gãnegã? A yeela zʋɩf-rãmbã tũudum taoor-dãmb woto: “Zãmb-dãmba, a Ezayi sɩd togsa bãngr goam ne yãmb yelle, a sẽn gʋls n yeele: ‘Nin-kãensã waoogda maam ne b nobɩms bala, la b sũyã zãra ne maam [a Zeova]. La bãmb sẽn waoogd maamã yaa zaalem, bala, bãmb zãmsa nebã kaoreng sẽn yaa ninsaalb tõod bala.’ Yãmb basda Wẽnnaam tõod n sakd ninsaalb minindu.”—Mark 7:6-8.