D ra bas a Zeova tũub neb a taab kongr yĩng ye
“Maan-y taab neere, n kʋmd taaba, la y kõ taab sugri.”—EFƐ. 4:32.
YƖƖLA: 121, 75
1, 2. Bõe la Biiblã ra pĩnd n yeel a Zeova nin-buiidã fɩɩgr wɛɛngẽ?
DŨNIYÃ gill zugu, siglg a ye n be t’a nin-buiidã fãa yaa neb sẽn nong a Zeova, n dat ne b sũy fãa n maan a raabã. Yaa a Zeova Kaset rãmbã. Baa b sẽn yaa pãn-komsem dãmb n mi n kongdẽ wã, a Zeova wilgd-b-la sor ne a vʋʋsem sõngã maasem. Sɩd me, bũmb toor-toor la a maanda, tɩ wilgdẽ t’a ningd-b-la barka. D na n goma rẽ yelle.
2 Yʋʋmd 1914 soabã t’a Zeova nin-buiidã sõor pa waoog ye. La a Zeova ninga b koe-moonegã barka. Woto kɩtame tɩ neb milyõ-rãmb zãms Biiblã n bãng sɩdã, n lebg a Zeova Kaset rãmba. A Zeova ra bilga a nin-buiidã sẽn da na n fɩɩg to-to wã, n yeele: “Ned ning sẽn yaa-a bilfã na n lebga neb tusri, la sẽn paood-a n yɩɩdã na n lebga buud sẽn tar pãnga. Maam a Sẽn-Ka-Saab na n kɩtame t’a wakatã sã n ta bɩ yɩ tao-tao.” (Eza. 60:22) Bãngr-gom-kãngã pidsda rũndã-rũndã. A Zeova nin-buiidã fɩɩgame n lebg “buud sẽn tar pãnga.” Sɩd me, tẽns wʋsg n be tɩ b nin-buiidã sõor pa ta a Zeova Kaset rãmbã ye.
3. Bõe la Wẽnnaam nin-buiidã maan tɩ wilgdẽ tɩ b nonga taaba?
1 Zã 4:8) A Zeezi sẽn dɩk Wẽnnaam togs-n-taar nonglmã wɛɛngẽ wã yeela a karen-biisã woto: “Mam kõta yãmb tõ-paalga: ‘Nong-y taaba. . . . Yãmb sã n nong taaba, nebã fãa na bãng tɩ yãmb yaa mam karen-biisi.’” (Zã 13:34, 35) Baa dũniyã tẽns sẽn da wa n yik zabr ne taabã, a Zeova Kaset rãmbã wilgame tɩ bãmb sɩd nonga taaba. Wala makre, dũni gill zabr a yiib-n-soabã kʋʋ na maan neb milyõ 55. La Zeova Kaset rãmbã sẽn pa kẽng zabrã yĩnga, b pa tol n kʋ ned baa a yembr ye. (Karm-y Miise 4:1, 3.) Rẽ sõngame tɩ b pa tar zɩɩm samd ye.—Tʋʋ. 20:26.
3 Yaoolem wakatã, a Zeova sõnga a nin-buiidã tɩ b maneg n nong taaba. A sõng-b lame tɩ b rɩkd yẽ sẽn yaa ‘Wẽnnaam sẽn yaa nonglmã,’ togs-n-taare. (4. Bõe yĩng t’a Zeova nin-buiidã sõor sẽn fɩɩgdã wõnd yel-solemde?
4 A Sʋɩtãan yaa Wẽnnaam nin-buiidã bɛ-kãsenga. Baa ne rẽ, b sõorã ket n fɩɩgdame. Yẽ n yaa “dũni-kãngã wẽnnaamã.” (2 Kor. 4:4, Wẽnnaam Sebre, 1983) Dũni-kãngã politikã sigls la bũmb nins fãa nebã sẽn tũnugd n yeelgd kibayã be a Sʋɩtãan nugẽ. A tũnugda ne rẽ n dat n kɩt tɩ d bas koɛɛgã moonego, la a pa tõe ye. Baasgo, a sẽn mi t’a wakatã keta bilfã, a maanda sɩlem toor-toor n dat n kɩt tɩ d bas a Zeova tũubu.—Vẽn. 12:12.
Y TẼED-N-TAAG SÃ N WA KONGE, Y NA N KELL N SAKA A ZEOVA BƖ?
5. Bõe yĩng tɩ baa d tẽed-n-taag tõe n wa sãam d sũuri? (Ges-y sõsgã sɩngrẽ fotã.)
5 Wẽnnaam sõnga a nin-buiidã tɩ b bãng tɩ b segd n nonga yẽ la b nong b taabã. Sɩd me, a Zeezi yeela woto: “‘Nong Zu-soaba fo Wẽnnaam ne f sũur fãa, la ne f sɩɩgã fãa, la ne f tagsgã fãa.’ Yẽnda n yaa pipi tõogo, n leb n yɩɩd b fãa. La tõog a to me sẽn pʋgd yẽnda n yaa kãseng wa yẽnda: ‘Nong f to wa f menga.’” (Mat. 22:35-39) La Biiblã wilgame tɩ d yaab a Ãdem sẽn kɩɩs Wẽnnaamã, ãdem-biisã fãa rogda ne yel-wẽndã, n yaa neb sẽn pa zems zãnga. (Karm-y Rom-dãmb 5:12, 19.) Woto kɩtame tɩ tigingã pʋgẽ, nina tõe n wa goma gomde, wall a maan bũmb tɩ sãam d sũuri. A buud sã n paam-do, d manesem na n yɩɩ wãna? D na n ket n tuuda a Zeova la d nong d tẽed-n-taasã fãa bɩ? Biiblã tara kibay sẽn wilgd wẽn-sakdb sẽn gom wall b maan bũmb tɩ sãam b taab sũuri. D ges d sẽn tõe n dɩk yam ning kiba-kãens pʋgẽ.
Yãmb sã n da beẽ a Eli ne a kom-dibli wã wakatẽ, y manesem na n yɩɩ wãna? (Ges-y sull a 6)
6. Bõe yĩng tɩ d tõe n yeel t’a Eli pa kibl a kambã sõma?
6 Wala makre, maan-kʋʋdb kãsem a Eli ra tara kom-dibli a yi sẽn da kɩɩsd a Zeova tõodã. Biiblã yeela woto: “A Eli kambã rag n yaa kom-yoodo, b rag n ka mi Sẽn-Ka-Saab ye.” (1 Sãm. 2:12) A Eli ra miime t’a kom-dibli wã maanda sẽn pa segde. Baa ne rẽ, a pa kibl-b sõma ye. La a Zeova wa n sɩbga a Eli ne a kamb a yiibã. Kaoosg zugẽ, a kɩtame t’a Eli roogã ned baa a ye pa le tõe n yɩ maan-kʋʋdb kãsem ye. (1 Sãm. 3:10-14) Yãmb sã n da beẽ a Eli wakatẽ wã, n bãng a kambã tʋʋm-beedã, ra na n kɩtame tɩ y bas a Zeova tũub bɩ?
7. Bõe la a Davɩɩd maan tɩ yaa wẽng wʋsgo, la Wẽnnaam manesem yɩɩ wãna?
7 A Zeova ra nonga a Davɩɩde, n yeel meng t’a yaa rao ‘sẽn ta yẽ yam.’ (1 Sãm. 13:13, 14; Tʋʋ. 13:22) La a Davɩɩd wa n yoo ne a Batseba t’a rɩk pʋga. Rẽ t’a Batseba sɩd a Uuri kẽnga zabre. A Uuri wa n lebg n waa yiri, t’a Davɩɩd maan sɩlem, n dat t’a kul n tɩ kẽ ne a Batseba, tɩ biigã sã n wa rog bɩ b tags tɩ yaa yẽ la a ba. La a Uuri pa sak n kul ye. Rẽ poore, a Davɩɩd maana yam t’a Uuri ki zabrẽ wã. La a Davɩɩd ne a zakã rãmb paama toog yel-kãngã poorẽ. (2 Sãm. 12:9-12) Baasgo, a Zeova zoeya a Davɩɩd nimbãanega, n kõ-a sugri. A ra miime t’a Davɩɩd rata ne a sũur fãa n maan sẽn yaa tɩrga. (1 Rĩm 9:4) Yãmb sã n da beẽ wakat kãnga, y manesem da na n yɩɩ wãna? Y ra na n basa a Zeova tũub a Davɩɩd yel-wẽndã yĩng bɩ?
8. a) Bõe la a Pɩyɛɛr yeel t’a na n maaname, n yaool n pa maane? b) A Pɩyɛɛr kongrã poore, bõe yĩng t’a Zeova ra ket n kõt-a tʋʋma?
8 Makr a to sẽn be Biiblã pʋgẽ yaa tʋm-tʋmd a Pɩyɛɛr kibarã. A Zeezi ra yãk-a lame t’a lebg a tʋm-tʋmda. La a Pɩyɛɛr da mi n maana sẽn pa segde, wall a tudg a goam pʋgẽ. Wala makre, a Pɩyɛɛr da yeelame tɩ baa tʋm-tʋmdb a taabã sã n bas a Zeezi, yẽ pa na n tol n bas-a ye. (Mark 14:27-31, 50) La b sẽn wa n na n yõk a Zeezi wã, a tʋm-tʋmdbã fãa zoeeme n bas-a, baa a Pɩyɛɛr menga. Rẽ zugẽ, a Pɩyɛɛr wẽena naoor a tãab t’a pa mi a Zeezi ye. (Mark 14:53, 54, 66-72) La a sũurã wa n sãama wʋsg ne a sẽn maanã. A Zeova kõ-a-la sugri, n da ket n kõt-a tʋʋma. Yãmb sã n da beẽ wakat kãnga, n wʋm a Pɩyɛɛr sẽn maanã, ra na n kɩtame tɩ y bas a Zeova tũub bɩ?
9. Bõe yĩng tɩ y kɩs sɩd t’a Zeova maanda sẽn segd wakat fãa?
9 Kiba-kãensã wilgdame tɩ neb kẽer sẽn tũ a Zeova maana yel-kɛga, tɩ sãam b taab sũur wʋsgo. A buud sã n maan rũndã-rũndã, y manesem na n yɩɩ wãna? Y na n basa tigissã kẽnde, wall y tolg n bas a Zeova ne a siglgã bɩ? Y na n tẽegame t’a Zeova yaa nimbãan-zoɛta, la tɩ tõe t’a maanda sũ-mar ne koangdã n dat t’a tek yam n kos sugr bɩ? La nina
tõe n wa maana yel-wẽn-kãsenga, n pa rat n tek yam n kos sugr ye. Sã n wa yaa woto, y na n kɩsa sɩd t’a Zeova mii bũmb ning sẽn maanã, la t’a na n welg-a-la a wakat bɩ? A tõe n kɩtame meng tɩ b yiis a soabã tigingã pʋgẽ. Y kɩsa sɩd t’a Zeova maanda sẽn segd wakat fãa bɩ?RA N BAS-Y-YÃ A ZEOVA TŨUB YE
10. Baa a Zida Iskariot ne a Pɩyɛɛr sẽn kongã, bõe la a Zeezi pa maane?
10 Kibay wʋsg n be Biiblã pʋgẽ n wilgd neb sẽn kell n sak a Zeova la b pa ne a nin-buiidã, baa b sẽn yã b taab sẽn maan yel-wẽn-kãsemse. A Zeezi n kõ mak-sõng sẽn ka to rẽ wɛɛngẽ. Wala makre, a pʋʋsa a Ba wã yʋng tõr n kos a sõngre, n yaool n yãk a tʋm-tʋmdb 12 wã. La a Zida Iskariot sẽn yaa b nin-yendã wa n zãmb-a lame. A Pɩyɛɛr me wa n kɩɩsame t’a pa mi a Zeezi ye. (Luk 6:12-16; 22:2-6, 31, 32) Baa a Zeezi tʋm-tʋmdbã sẽn da mi n sãam a sũurã, a pa ning a Zeova taale, a pa ning a nin-buiidã me taale. A kell n saka a Ba wã, n maan a raabã ne a sũur fãa. Woto kɩtame t’a Zeova keo-a. A vʋʋg-a lame, n wa kɩt t’a lebg a Rĩungã Rĩm saasẽ.—Mat. 28:7, 18-20.
11. Bõe la Biiblã pĩnd n togs a Zeova nin-buiidã zugu, tɩ pidsd rũndã-rũndã?
11 A Zeezi mak-sõngã wilgdame tɩ d segd n kell n saka a Zeova, la d pa ne a nin-buiidã. Bʋʋm waoog sẽn kɩt tɩ d segd n maan woto. D neeme t’a Zeova wilgda a nin-buiidã sor dũndã-rũndã sẽn yaa yaoolem wakatã. A sõngd-b lame tɩ b moond koɛɛgã dũniyã gill zugu. Yaa bãmb bal n tʋmd tʋʋm-kãngã. Sẽn paase, a Zeova sẽn zãmsd-b bũmb ningã kɩtame tɩ b sɩd zemsd taaba, n tũud-a ne sũ-noogo. A Zeova pĩnd n goma rẽ yell n yeel woto: “Mam tʋmtʋmdbã na n kaasa ne sũ-noogo, tɩ b sũur yaa noogo.”—Eza. 65:14.
12. D to sã n wa konge, d manesem segd n yɩɩ wãna?
12 A Zeova nin-buiidã tara sũ-noogo, bala a Zeova wilgd-b-la sore, tɩ b tõogd n maand bõn-sõma wʋsgo. La a Sʋɩtãan dũniyã nebã pa tar sũ-noogo, bala b pa mi tɩ manegr n wat ye. Woto yĩnga, ned sã n maand sẽn pa segd tigingã pʋgẽ, tɩ rẽ kɩt tɩ d bas a Zeova la a nin-buiidã n leb dũniyã pʋgẽ, d maana d menga. D segd n ket n tũuda a Zeova, la d sak a sẽn wilgd a nin-buiidã sor to-to wã. Yɩta sõma me tɩ d bao n bãng d tagsg sẽn segd n yɩɩ a soab d to sã n wa konge, la d sẽn segd n tall manesem ning tɩ zemse.
Y TẼED-N-TAAG SÃ N KONGE, Y MANESEM SEGD N YƖƖ WÃNA?
13, 14. a) Bõe yĩng tɩ d segd n maand sũ-mar ne taaba? b) Pʋleng bʋg yell la d segd n tẽegd wakat fãa?
13 D tẽed-n-taag sã n wa gom gomd wall a maan bũmb tɩ sãam d sũuri, d manesem segd n yɩɩ wãna? Biiblã sagenda tõnd woto: “Ra sak tɩ f sũur yik tao-tao ye. Bala, sũ-yikr paada yalembã pʋsẽ.” (Koɛ. 7:9) D pa segd n yĩm tɩ d fãa yaa neb sẽn pa zems zãnga, n mi kongdẽ ye. Woto wã, d pa segd n dat tɩ d tẽed-n-taasã maand sẽn segd wakat fãa, n pa tudgdẽ ye. D tẽed-n-taag sã n kong me, d pa segd n tar dẽ yell tagsg ye. Sã n pa rẽ, sũ-noog ning d sẽn tar a Zeova tũubã pʋgẽ wã na n boogame. Sẽn yɩɩd menga, tõe n komsa d tẽebã, hal tɩ d wa zãag d meng ne a Zeova nin-buiidã. Sã n wa lebg woto, d pa le tũud a Zeova ye. Tõe n wa kɩtame meng tɩ d pa paam n kẽ dũni-paalgã pʋgẽ ye.
14 Bõe n na n sõng-d tɩ d kell n tũ a Zeova ne sũ-noogo, baa d tẽed-n-taag sã n maan bũmb tɩ sãamd d sũuri? D tẽegd bũmb a ye a Zeova sẽn pʋlem tɩ sɩd kengd raoodo. A yeelame: “Mam na n maana yĩngr-paalga, la dũni-paalga. B kõn tol n leb n tẽeg sẽn zĩnd pĩnda yell ye, b kõn leb n tags a yell ye.” (Eza. 65:17; 2 Pɩy. 3:13) Ra n bas-y tɩ y to kongr kɩt tɩ y bõn bark-kãensã sẽn watã ye.
15. A Zeezi yeelame tɩ ned sã n beeg-do, d segd n maana bõe?
15 D nan pa be dũni-paalgã pʋgẽ ye. Rẽ wã, d tẽed-n-taag sã n wa gom gomd wall a maan bũmb tɩ sãamd d sũuri, d segd n bʋgsame, n bãng a Zeova sẽn dat tɩ d tall manesem ningã. Wala makre, a Zeezi yeelame: “Yãmb sã n kõ nebã sugr b beegr yĩnga, yãmb ba sẽn be arzãnã na n kõo yãmb me sugri. La yãmb sã n ka kõ nebã sugr b beegr yĩnga, yãmb ba kõn kõ yãmb me sugr y beegrã yĩng ye.” Tẽeg-y me t’a Pɩyɛɛr soka a Zeezi n na n bãng sã n yaa “naoor a yopoe” la d segd n kõ ned sugri, t’a Zeezi leok yaa: “M pa yet tɩ naoor a yopoe bal ye, yaa naoor pisopoe la a yopoe.”—Mat. 6:14, 15; 18:21, 22, Sebr sõngo.
16. Mak-sõng bʋg la a Zozɛf kõ-yã?
16 A Zozɛf kõo mak-sõng sẽn wilgd d manesem sẽn segd n yɩ a soaba, ned sã n wa maan bũmb tɩ sãam d sũuri. A Zozɛf ne a yaoã n da yaa a Zakoob pag a Rasɛll kamba. A Zakoob ra tara kom-dibli a taab bãmb piiga. La a Zozɛf la a ra nong n yɩɩda. Rẽ kɩtame tɩ kom-dibli a taabã ra maand sũ-kĩir ne a Zozɛfe. B ra kis-a lame, hal n yõk-a n koos yembdo, tɩ b tall-a n kẽng Ezɩpte. Yʋʋm wʋsg poore, a Zozɛf sẽn da tʋmd sõma wã kɩtame tɩ Ezɩpt naabã yãk-a t’a lebg yiib-n-soab yẽ soolmã pʋgẽ. Rẽ zugẽ, kom n wa kẽ tẽngã, tɩ yɩ tɩlɛ t’a Zozɛf ba-biisã kẽng Ezɩpt n tɩ ra rɩɩbo. B sẽn ta t’a Zozɛf yã-bã, a bãng-b lame. La bãmb pa bãng-a ye. Baa b sẽn da maan-a wẽngã, a pa bao n na n dok a sũur ye. A baoome n na n bãng b sã n toeemame. A Zozɛf sẽn mik tɩ b toeemame wã, a togs-b lame tɩ yaa yẽ la a Zozɛfe. A wa n yeel-b-la woto: “Bɩ y ra leb n zoe rabeem ye. Mam na n gesa yãmb yell ne bũmb fãa, la m ges yãmb kambã yelle.” Biiblã paasame t’a “Zozɛf goma ne bãmb a woto n bels-ba, la b pɛlgã gãandame.”—Sɩng. 50:21.
17. Y tẽed-n-taag sã n konge, bõe la y na n maane?
17 Yɩta sõma me tɩ d tẽegdẽ tɩ d fãa sẽn pa zems zãngã, tõnd me tõe n wa maana bũmb tɩ sãam d taabã sũuri. D sã n mik tɩ bũmb d sẽn maan sãama d tẽed-n-taag sũuri, d segd n tũu Biiblã sẽn yeelã, n kẽng a nengẽ n tɩ maneg yellã, tɩ laafɩ le zĩndi. (Karm-y Matye 5:23, 24.) D sã n beeg ned t’a kõ-d sugri, noom-d lame. Rẽnd ned sã n wa beeg-do, tõnd me segd n kõo sugri. Efɛɛs-rãmb 4:32 yeta woto: “Maan-y taab neere, n kʋmd taaba, la y kõ taab sugri, a wa Wẽnnaam sẽn kõ yãmb sugr Kiris maasem yĩngã.” Pipi Korẽnt-rãmb 13:5 me yetame tɩ nonglem “ka bĩngd wẽng ning b sẽn maan-a wã a sũurẽ ye.” D sã n minim n kõt d taabã sugri, a Zeova me na n kõt-d-la sugri. Rẽnd d tẽed-n-taag sã n wa konge, bɩ d yɩ nimbãan-zoɛt n kõ-a sugr wa tõnd Ba a Zeova.—Karm-y Yɩɩn-sõamyã 103:12-14.