B makda saasẽ pãens-rãmb sẽn da na n sãam Zerizalɛm, la sẽn na n sãam a Sʋɩtãan dũniyã Armagedõ zabrã sasa. Yaa woto la d segd n wʋm a võor masã. Bõe yĩnga?

A Zeova vẽnega a Ezekɩyɛll t’a yã bũmb toor-toor sẽn na n maan Zerizalɛm pʋgẽ nand tɩ b wa sãam-a yʋʋmd 607 sẽn deng a Zeezi rogmã. A reng n yãa tʋʋm-beed nins wẽn-kɩɩsdbã sẽn da tʋmdã. Rẽ poore, a yãa rap a yoobe, tɩ b ned kam fãa zãad “sãang zab-teoog a nugẽ,” la a yã rao a to sẽn be ne-ba, n yer “fu-pɛɛlg n zãad bũmb sẽn tar n gʋlsdẽ.” (Eze. 8:6-12; 9:2, 3, Wẽnnaam Sebre, 1983) B yeela fu-pɛɛlgã soab t’a saag tẽngã “n ning neb nins fãa sẽn wẽed sir la b wõosd tʋʋm-beed nins fãa sẽn maand tẽngã pʋgã yĩngã dĩir bãnde.” A sẽn ning bãndã n sa wã, b yeela rap a yoobã sẽn zãad zab-teedã tɩ b kʋ neb nins fãa sẽn pa paam bãndã. (Eze. 9:4-7) A Ezekɩyɛll sẽn yã bũmb ningã wilgda tõnd bõe, la rao ning sẽn zãad bũmb sẽn tar n gʋlsdẽ wã makda ãnda?

Yɩɩ yʋʋmd 612 sẽn deng a Zeezi rogmã la Wẽnnaam sẽn vẽneg a Ezekɩyɛll t’a yã bõn-kãensã wã. Yɩɩ bãngr-gomde. A reng n pidsa yʋʋm a nu poore, wakat ning a Zeova sẽn kɩt tɩ Babilond nebã sãam Zerizalɛmmã. A Zeova tũnuga ne Babilond nebã n sɩbg a nin-buiidã sẽn da kɩɩsd-a wã. (Zer. 25:9, 15-18) La zʋɩf-rãmb nins sẽn da ket n sakd Wẽnnaam, tɩ wẽn-kɩɩsdbã tʋʋm-beedã namsd-bã yẽ? A Zeova maana bũmb sẽn na yɩl tɩ b paam n põse.

A Ezekɩyɛll sẽn yã bũmb ningã pʋgẽ, yẽ mengã pa ning ned rĩir bãnde, a pa naag me n sãam tẽngã ye. Yaa malɛgs n lʋɩ taoor Zerizalɛm sãoongã sasa. Bãngr-gom-kãngã sõngda tõnd tɩ d bãng bũmb sẽn maan saasẽ. A Zeova kõ a malɛgsã noor tɩ b sigl b sẽn na n sãam tẽngã to-to, n tõog n bak nin-wẽnsã n sãam la b sõng nin-tɩrsã tɩ b põse. *

Bãngr-gomdã pidsg a to wã nan watame. Pĩnda, tõnd ra tẽedame tɩ rao ning sẽn zãad bũmb sẽn tar n gʋlsdẽ wã makda sẽn paam-b vʋʋsem sõng zaeeb n ket tẽng zugã. D ra tẽedame me tɩ neb nins sẽn kelgd koɛɛgã d sẽn moondã la b sakdẽ wã paamda bãnde, n na n wa põse. La d wa n mikame tɩ d segd n demsa d sẽn wʋmd bãngr-gom-kãngã to-to wã. Matye 25:31-33 goamã wilgdame tɩ yaa a Zeezi n na n kao nebã bʋʋdo. Yaa to-kãsengã sasa la a na n kao nebã bʋʋdo, n welg-b wa b sẽn welgd piis ne bʋʋsã. A sẽn na n geelg b rãmb wa piisã na n põsame, t’a sẽn na n geelg b rãmb wa bʋʋsã paam sãoongo.

Woto wã, a Ezekɩyɛll sẽn yã bũmb ningã wilgda tõnd bõe? Wilgda tõnd bũmb a nu:

1. Nand tɩ b sãam Zerizalɛmmã, a Ezekɩyɛll ne a Zeremi yɩɩ wa gũudba, n keoog nin-buiidã tɩ b na n sãama tẽngã, wa a Ezayi me sẽn da pĩnd n keoog-bã nand tɩ to-kãsengã me sɩnge, a Zeova wilgda a nin-buiidã a raabã la a keoogd dũniyã neb fãa. A tũnugda ne sẽn paam-b vʋʋsem sõng zaeebã sõor bilf n maand woto. La yaa Wẽnnaam nin-buiidã fãa sẽn yaa Kirist zakã rãmbã n naag taab n keoogd dũniyã nebã.—Mat. 24:45-47.

2. A Ezekɩyɛll pa naag n ning neb nins sẽn da na n põsã rĩy bãnd ye. Rũndã-rũndã me,  Wẽnnaam nin-buiidã pa ningd sẽn na n põs-bã rĩy bãnd ye. B wɩngda ne koɛɛgã mooneg bala, n keoogd nebã tɩ toog n wate. Yaa malɛgsã n sõngd-b tɩ b tʋmd tʋʋm-kãngã dũniyã gill zugu.—Vẽn. 14:6.

3. A Ezekɩyɛll wakatẽ wã, ned baa a ye pa paam bãnd sɩdem-sɩdem a rĩirẽ ye. Yaa woto me rũndã-rũndã. Bõe la nebã segd n maan tɩ yɩ wa b paama bãnd n na n wa põse? B segd n kelga koɛɛg ning tõnd sẽn moondã, n toeem b vɩɩmã n bao n wõneg Kiristã, n dɩk b mens n kõ a Zeova, la b sõng Kiristã ba-biisã n moond koɛɛgã. (Mat. 25:35-40) Woto, to-kãsengã sasa, b na n paama bãnde, sẽn dat n yeel tɩ b na n bak-b-la toore, tɩ b põse.

4. Rao ning sẽn zãad bũmb sẽn tar n gʋlsdẽ wã makda a Zeezi. To-kãsengã sasa, a Zeezi na n geelga kʋʋn-kãsengã neb wa piisi, tɩ yɩ wa a sẽn ning-b bãnde. Woto na n kɩtame tɩ b wa paam n vɩɩmd wakat sẽn kõn sa tẽngã zugu.—Mat. 25:34, 46. *

5. Tõnd wakatã, rap a yoobã sẽn zãad sãang zab-teedã makda a Zeezi ne a malɛgsã. Ka la bilfu, b na n sãama dũniyã n kɩt tɩ wẽng buudã fãa sa.—Eze. 9:2, 6, 7; Vẽn. 19:11-21.

D sẽn bãng woto wã sõngda tõnd tɩ d maneg n kɩs sɩd t’a Zeova pa na n naag nin-tɩrsã ne nin-wẽnsã n sãam ye. (2 Pɩy. 2:9; 3:9) Sõngd-d lame me tɩ d bãng tɩ koe-moonegã tara yõod wʋsg rũndã-rũndã. D segd n keooga nebã fãa nand tɩ dũniyã sɛɛb ta.—Mat. 24:14.