1, 2. a) Bõe yĩng tɩ neb wʋsg mi Tõod 6:4 goamã? b) Bõe yĩng t’a Moyiiz togs Israyɛll nebã gom-kãense?

HAL sẽn kaoose, zʋɩf-rãmbã lebsd n dɩkda Tõod 6:4 goamã b pʋʋsg a ye pʋgẽ. B boonda pʋʋs-kãng tɩ Shema. Shema wã yaa ebre gom-bila. Tõod 6:4 goamã sɩngda ne gom-bi-kãnga. Zʋɩf-rãmb wʋsg togsda pʋʋs-kãngã ne zug yibeoog la zaabre, n dat n wilg tɩ yaa Wẽnnaam bal la bãmb tũuda.

² Tõod 6:4 goamã naaga yaoolem goam nins a Moyiiz sẽn togs Israyɛll nebã. Yɩɩ yʋʋmd 1473 sẽn deng a Zeezi rogmã. Rẽ tɩ b tigma taab Moaab soolmẽ wã, n dat n pasg Zʋrdẽ kʋɩlgã n tɩ zab n deeg kãabg tẽngã. (Tõo. 6:1) Yʋʋm 40 la woto a Moyiiz sẽn da yaa b taoor lʋɩta. A gomame n na n keng b raoodo, bala b ra na n paama zu-loees wakat kãnga. Rẽ n so tɩ b ra segd n kɩs b Wẽnnaam a Zeova sɩda, la b kell n sak-a. Rẽnd a Moyiiz yaoolem goamã yaa sẽn na n sõng-b rẽ wɛɛngẽ. A reng n tẽeg-b-la tõogã noy piigã, la noy a taaba, n yaool n togs-b Tõod 6:4, 5 goamã. (Karm-y-yã.)

3. Sogs-bʋs la d na n leok sõs-kãngã pʋgẽ?

 ³ Israyɛll nebã ra sɩng n miime tɩ bãmb Wẽnnaam a Zeova yaa a ye tãa. Sɩd me, Israyɛll wẽn-sakdbã fãa ra tũuda Wẽnnaam-yɛnga, b yaab-rãmbã Wẽnnaamã. Sã n yaa rẽ, bõe yĩng t’a Moyiiz tẽeg-b tɩ bãmb Wẽnnaam a Zeova yaa a ye tãa? Yaa a Zeova sẽn yaa a ye tãa wã yĩng la b sẽn da segd n nong-a ne b sũur fãa, ne b yalẽ fãa la ne b pãng fãa wã bɩ? Rũndã-rũndã, Tõod 6:4, 5 goamã wilgda tõnd bõe?

4, 5. a) B sẽn yeel t’a Zeova yaa a ye tãa wã võor yaa bõe? b) Bõe n kɩt t’a Zeova ne bu-zẽmsã wẽnnaam-dãmbã pa yembre?

⁴ A to kae ye. B sẽn yeel t’a Zeova yaa a ye tãa wã rat n yeelame t’a ka to, la tɩ sẽn zem yẽ ka be ye. Bõe yĩng t’a Moyiiz yeel woto? Wõnda pa sẽn na n wilg tɩ tũudum nins sẽn yet tɩ Wẽnnaam yaa mens a tãabã ka bʋʋm ye. A Zeova n naan bũmba fãa. A yaa yĩngr la tẽng Naaba. Yẽ a ye bal n yaa Wẽnnaam sɩd-sɩda, a pa tar mak-n-taag ye. (2 Sãm. 7:22) Rẽnd a Moyiiz ra rat n tẽeg-b lame tɩ yaa a Zeova a ye tãa la b segd n tũ. B pa segd n tũ tẽn-yagsã wẽnnaam-dãmbã sẽn da be pogs la raadã ye. Tẽn-kãens nebã ra tẽedame tɩ bãmb wẽnnaam fãa tara a pãn-toogo.

⁵ Wala makre, Ezɩpt nebã ra pʋʋsda b wẽnnaam a Ra, n yetẽ tɩ yẽ n so wĩntoogã, la b pʋʋsd b wẽn-poak a Nut n tẽed tɩ yẽ n so sa-gãongã. B ra tẽedame me tɩ b wẽnnaam a Zɛɛb n so tẽn-gãongã, tɩ b wẽnnaam a Hapi so Nill kʋɩlgã. A Zeova sẽn kɩt tɩ tood piig paam Ezɩpt nebã wilgame tɩ b wẽn-kãens fãa yaa wẽn-faado. Kanaã nebã wẽnnaam ning yʋʋr sẽn da yi wã yaa a Baal. B ra tẽedame tɩ yẽ n kɩtd tɩ tɩɩsã, rũmsã la ninsaalbã sõor fɩɩgdẽ, la tɩ yaa yẽ n so sa-gãongã, saagã, la sebgã. B tẽns wʋsg pʋgẽ, nebã ra baooda koglg a Baal nengẽ me. (Sõd. 25:3) Rẽ n so tɩ Israyɛll nebã ra segd n tẽeg tɩ bãmb Wẽnnaam a Zeova yaa a ye tãa, n yaa Wẽnnaam sẽn “ka tar to.”—Tõo. 4:35, 39.

6, 7. B sẽn yeel t’a Zeova yaa a ye tãa wã rat n yeelame me tɩ bõe? Bõe la a Zeova maan tɩ wilg t’a yaa a ye tãa?

⁶ A raab pa toeemde, a maanda sɩd wakat fãa. B sẽn yeel t’a Zeova yaa a ye tãa wã wilgdame t’a raabã pa toeemde, la t’a maanda sɩd a tʋʋm-tʋmdɩ wã fãa pʋgẽ. A pa yam a yiib soab ye. A leb n pa Wẽnnaam b sẽn pa tõe n bãng a manesem sẽn na n yɩ to-to ye. A togsda sɩda, n maand sɩd wakat fãa, a yam pa yuusd me. Wala makre, a ra pʋlma a Abrahaam t’a yagensã na n wa sooga kãabg tẽngã. Sẽn na yɩl n pids a pʋlengã, a maana yel-soalem toor-toore. Baa sẽn kaoos yʋʋm 430 wã, a gomdã pa vaal ye.—Sɩng. 12:1, 2, 7; Yik. 12:40, 41.

⁷ Yʋʋm kobs poore, a Zeova boola Israyɛll nebã t’a kaset rãmba, n yeel-b woto: “Sẽn deng maam, Wẽnnaam a to ka be b sẽn naane, la a to me ka be sẽn na n leb n zĩnd ye.” Sẽn na yɩl tɩ b bãng tɩ yẽ raab pa toeemde, a paasa woto: “Hal sẽn sɩng badaare, yaa maam.” (Eza. 43:10, 13; 44:6; 48:12) Israyɛll nebã sẽn da paam n tũud Wẽnnaam sẽn pa toeemde, tɩ b tõe n teeg-a wakat fãa wã ra yaa zu-zẽkre. Yaa woto me ne tõnd rũndã-rũndã.—Mal. 3:6; Zak 1:17.

8, 9. a) Bõe la a Zeova rat t’a nin-buiidã maane? b) Bõe la a Zeezi yeel tɩ wilgdẽ tɩ tõnd me segd n tũ a Moyiiz sẽn yeelã?

 ⁸ A Moyiiz tẽega Israyɛll nebã t’a Zeova sẽn nong-ba, la a get b yell to-to wã pa na n tol n toeem ye. Rẽnd a Zeova sẽn yeel-b tɩ yẽ a ye bal la b segd n tũ, la tɩ b segd n nonga yẽ ne b sũur fãa, b yalẽ fãa, la ne b pãng fãa wã zemsame. Kambã me ra tog n tũ a Zeova a ye tãa, bala b ra yeela roagdbã tɩ b tũnug ne segb buud fãa n sõng-b tɩ b bãng a Zeova.—Tõo. 6:6-9.

⁹ A Zeova raabã sẽn pa toeemdã yĩnga, yaa vẽeneg tɩ noy nins a sẽn dat t’a nin-buiidã tũ wã me pa toeemd ye. D sã n dat t’a Zeova sũur yɩ noog ne d sẽn tũud-a to-to wã, d segd n tũu yẽ a ye tãa, la d nong-a ne d sũur fãa, ne d yalẽ fãa, la ne d pãng fãa. Sɩd me, a Zeezi yeelame tɩ no-kãngã n yaa kãseng n yɩɩd noy a taabã. (Karm-y Mark 12:28-31.) Bɩ d bao n bãng d sẽn tõe n wilg to-to ne d tʋʋm-tʋmdɩ wã tɩ d kɩsa sɩd tɩ tõnd Wẽnnaam a Zeova yaa a ye tãa.

10, 11. a) Tũ a Zeova a ye balã rat n yeelame tɩ bõe? b) Bõe la kom-bɩɩs sẽn da yaa ebre-rãmb maan tɩ wilgdẽ tɩ yaa a Zeova bal la b ra tũuda?

¹⁰ A Zeova a ye bal n yaa tõnd Wẽnnaam. Yẽ a ye bal la d segd n tũ. D pa tõe n tũud a Zeova la d tũud wẽnnaam-dãmb a taaba, pa rẽ bɩ n bas tɩ d tũudmã kalem ne tũudum a taabã neb tagsa bɩ b yel-maandɩ ye. A Zeova pa Wẽnnaam sẽn yɩɩd wẽnnaam-dãmb a taabã bal ye. Yẽ a ye tãa n yaa Wẽnnaam sɩd-sɩda. Rẽ n so tɩ yaa yẽ bal la d segd n tũ.—Karm-y Vẽnegr 4:11.

¹¹ Dãniyɛll sebrã gomda a Hananiya ne a Misayɛll la a Azariya ne a Dãniyɛll yelle. Yaa kom-bɩɩs sẽn da yaa ebre-rãmba. B tõdgame tɩ b kõn dɩ rɩbd a Moyiiz tõogã sẽn da gɩdge, tɩ wilg tɩ yaa a Zeova bal la b Wẽnnaam. La pa rẽ bal ye. B tõdgame me tɩ b kõn wõgemd n waoog sãnem bõn-naandgã a Nebukadnezaar sẽn da maanã ye. Dẽnd ra yaa vẽeneg tɩ yaa a Zeova a ye bal la b tũuda.—Dãn. 2:1–3:30.

12. D sã n dat n wilg tɩ yaa a Zeova bal la d tũuda, d segd n gũusa ne bõe?

¹² A Zeova raabã maaneg n segd n pak tõnd n yɩɩda. Rẽnd d sã n dat n wilg tɩ yaa a Zeova a ye bal la d tũuda, d segd n gũusame n da wa bas tɩ bũmb kɩt tɩ d bas a Zeova, wall d pa le tũud-a ne d sũur fãa ye. Tõe n yɩɩ bõe? Tõod piigã a Zeova sẽn da kõ Israyɛll nebã pʋgẽ, a yeelame tɩ b pa segd n tũ wẽnnaam-dãmb a taaba, la tɩ b pa segd n pʋʋs bõn-naands ye. (Tõo. 5:6-10) Rũndã-rũndã, bũmb toor-toor la nebã maanda, tɩ yaa wa bõn-naands pʋʋsgo. Tõeeme meng tɩ b pa mi ye. La noy nins a Zeova sẽn dat t’a nin-buiidã tũ wã pa toeem ye. A ket n datame tɩ d tũ yẽ a ye tãa. Bɩ d ges d sẽn na n maan to-to n da wa pʋʋsd bõn-naands n pa miẽ ye.

13. D sã n pa gũusi, bõe la d tõe n wa nong n yɩɩd a Zeova?

¹³ Karm-y Koloos-rãmb 3:5. Vɛrse wã wilga bũmb kẽer sẽn tõe n wa kɩt tɩ d pa le tũud a Zeova ne d sũur fãa, tɩ sãam tõnd ne yẽ zoodã. Tẽeg-y tɩ b yeelame tɩ rat-wʋsg bɩ yão-beed yaa bõn-naands pʋʋsgo. Bõe yĩnga? Bala, ned sã n tʋll bũmb ne a sũur fãa, wala makre, ligd bɩ te-neeba, a tʋlsmã tõe n wa soog-a lame hal tɩ bũmb ning a sẽn tʋllã lebg wa a wẽnde. Tʋls-wẽns a taabã me b sẽn sõdg vɛrse wã pʋgẽ wã tõe n wa talla pãng ned zugu, n lebg rat-wʋsgo, tɩ rẽ yaool n yaa bõn-naands pʋʋsgo. Ned sã n bas tɩ tʋls-kãensã soog-a, a tõe n wa nonga rẽ n yɩɩd Wẽnnaam. Sã n  wa lebg woto, a soab pa le tũud a Zeova a ye tãa ye. D ra tol n sak t’a buudã paam-d ye.

14. Bõe la tʋm-tʋmd a Zã yeel-yã?

¹⁴ Tʋm-tʋmd a Zã me keooga kiris-nebã, n yeel tɩ ned sã n nong bũmb nins sẽn be dũniyã pʋgẽ wã, rat n yeel tɩ “yĩng ratem wẽngã, la ninã sẽn get bũmb nins n datã, la wilg-m-meng arzegs sẽn wat ne wã,” wilgdame tɩ “d ba wã nonglem ka be a soab pʋgẽ ye.” (1 Zã 2:15, 16) Rẽnd d segd n mi n feesa d meng n ges d sã n pa nong dũniyã. Tõe tɩ d mik tɩ d yamã kẽe dũniyã reem kẽere, wall a nebã manesem, pa rẽ bɩ b futã wall b sẽn manegd b mens to-to wã. D sã n karemda karem-bɛda, wall d magda rẽ, tõe tɩ d sã n fees d meng bɩ d mik tɩ yaa d sẽn dat ‘bõn-kãsems’ yĩnga. (Zer. 45:4, 5) Keta bilf bal tɩ d kẽ dũni-paalgã pʋgẽ. Woto wã, yɩta sõma tɩ d ra tol n yĩm a Moyiiz sẽn yeelã ye. D sã n kɩs sɩd tɩ tõnd Wẽnnaam a Zeova yaa a ye tãa, d na n tũu yẽ a ye bala, la wa a sẽn dat to-to wã.—Ebre. 12:28, 29.

15. Bõe yĩng t’a Poll tẽeg kiris-nebã tɩ b Wẽnnaam a Zeova yaa a ye tãa?

¹⁵ B sẽn yeel t’a Zeova yaa a ye tãa wã sõngda tõnd tɩ d bãng t’a Zeova ratame t’a nin-buiidã me zems taaba, n tũud-a ne yam a yembre. Pipi kiris-nebã ra yaa zʋɩf-rãmba, gɛrk-rãmba, Rom neba, la buud a taab neba. Ra yaa neb sẽn yi tũudum toɛy-toɛy pʋgẽ, tɩ b minimdã la bũmb nins b sẽn da nongã me pa yembr ye. Woto kɩtame tɩ ra yaa toog ne sãnda tɩ b bas minimd kẽere, wall b sak toeeng ning a Zeova sẽn wa ne tũudmã wɛɛngẽ wã. Rẽ n so tɩ wa yɩ tɩlɛ tɩ tʋm-tʋmd a Poll tẽeg-b tɩ  kiris-neb hakɩɩkã fãa Wẽnnaam yaa a ye tãa, a Zeova.—Karm-y 1 Korẽnt-rãmb 8:5, 6.

16, 17. a) Bãngr-gom-bʋg n pidsd tõnd wakatã, la rẽ kɩtame tɩ yaa wãn to tigims wʋsg pʋgẽ? b) Bõe n tõe n wa ne welsg tõnd sʋka?

¹⁶ La rũndã-rũndã yẽ, yaa wãn to d tigimsã pʋsẽ? No-rɛɛs a Ezayi ra pĩnd n togsame tɩ “wakat n wate,” tɩ dũniyã buud toɛy-toɛyã neb na n naag taab n tũ a Zeova. A Ezayi paasame tɩ b na n yeela woto: “Bãmb [a Zeova] na n wilga tõnd b soayã, la tõnd na n tũu bãmb so-bugsã.” (Eza. 2:2, 3) D sẽn ne bãngr-gom-kãngã sẽn pidsdã noom-d-la wʋsgo! Kɩtame tɩ tigims wʋsg pʋgẽ, d tẽed-n-taasã yaa buud toɛy-toɛy neba, tɩ b minimdã me yaa toor-toore. Baa ne rẽ, d naaga taab n tũud a Zeova ne yam a yembre. La d sẽn yaa buud toɛy-toɛy neba, tɩ d minimdã me yaa toor-toorã tõe n waa ne zu-loeese.

¹⁷ Wala makre, yãmb manesem yaa wãn ne y tẽed-n-taas nins sẽn pa yãmb buudã nebã? Tõe tɩ b buud-gomdã, b fu-yerdɩ wã, b minimdã, la b rɩbdã yaa toor fasɩ. Yãmb zãagda y meng ne-ba, tɩ yaa y tẽed-n-taas nins yɛl sẽn wõnd yãmb nengẽ wã zĩigẽ bal la y nong bɩ? Y manesem yaa wãn me ne kãsem-dãmb nins yʋʋm sẽn pa ta yãmba, wall minimd sẽn yaa toore, pa rẽ bɩ sẽn yaa bu-zẽms nebã? D sã n pa gũusi, d tõe n basame tɩ bõn-kãens wa ne welsg tõnd sʋka.

18, 19. a) Sagl-bʋg n be Efɛɛs-rãmb 4:1-3? b) Bõe la d tõe n maan tɩ welsg ra zĩnd tigingã pʋgẽ?

¹⁸ Bõe n na n sõng tɩ welsg ra wa zĩnd d sʋka? A Poll kõo Efɛɛs kiris-nebã saglg rẽ wɛɛngẽ. Rẽ tɩ Efɛɛs yaa tẽng sẽn tar laogo, tɩ buud toɛy-toɛy neb ra vɩ be. (Karm-y Efɛɛs-rãmb 4:1-3.) A sagl-b lame tɩ b kẽn ne sik-m-menga, ne sũ-bʋgsem la sũ-mare, la ne nonglem. D tõe n maka zʋg-sõma-kãens ne zãnd ra-lugds a naasã. Yaa ra-lugdsã n kɩt tɩ zãnd yasẽ. La sẽn na yɩl t’a kell n tall pãnga, yaa tɩlɛ tɩ d get a yelle, tɩ bũmb sã n dat manegr bɩ d manege. A Poll ra ratame tɩ Efɛɛs kiris-nebã mao tɩ ‘laafɩ ning sẽn loe-a bãmb ne taabã’ kell n zĩndi.

¹⁹ D fãa segd n maana d sẽn tõe tɛk tɩ welsg ra zĩnd tigingã pʋgẽ ye. Wãn to la d tõe n maan dẽ? Pipi, d fãa segd n modgame n bɩɩs zʋg-sõma nins yell a Poll sẽn gomã: Sik-m-menga, sũ-bʋgsem, sũ-mare, la nonglem. Yiibu, d segd n maoome tɩ ‘laafɩ ning sẽn loe-a tõnd ne taabã’ kell n zĩndi. Mo-yõsã yaa wa mogd sẽn tõe n mok zãn-daoogo. Rẽnd yɩlẽ tɩ laafɩ la zems-n-taar kell n zĩnd d sʋka, yaa tɩlɛ tɩ d mao n welg-ba.

20. Bõe la d tõe n maan n wilg tɩ d kɩsa sɩd tɩ tõnd Wẽnnaam a Zeova yaa a ye tãa?

²⁰ B sẽn yeel tɩ tõnd Wẽnnaam a Zeova yaa a ye tãa wã yaa gomd sẽn tar pãng wʋsgo! Gom-kãngã sõnga Israyɛll nebã tɩ b tõog n mao ne zu-loees nins fãa b sẽn paam kãabg tẽngã reegr sasa wã. Tõnd me sã n ket n tẽegdẽ tɩ d Wẽnnaam a Zeova yaa a ye tãa, d na n tõog n maoo ne zu-loees nins sẽn na n zĩnd to-kãsengã sasa wã, la d sõng tɩ laafɩ la zems-n-taar zĩnd arzãnã pʋgẽ. Woto yĩnga, bɩ d ket n wilgdẽ tɩ yaa a Zeova bal la tõnd tũuda, n nong-a ne d sũur fãa, ne d yalẽ fãa, la ne d pãng fãa. D segd n maoome me tɩ welsg ra zĩnd d sʋk ye. Rẽ, d na n yɩɩ neb nins a Zeezi sẽn na n geelg wa a piisã. A na n yeel-d-la woto: “Yãmb dãmb sẽn tar m ba wã barkã, wa-y-yã! Reeg-y soolmã sẽn dag n segl yãmb yĩng hal dũni naaneg wakatã tɩ yɩ y pʋɩɩre.”—Mat. 25:34.