BÕE n kɩt tɩ y tõe n kɩs sɩd ne gom-kãensã, n miẽ t’a Zeova sɩd geta yãmb yelle? Ad bũmb a ye: Biiblã meng n yet woto. Sɩd me, 1 Pɩyɛɛr 5:7 yetame: ‘Sik-y yãmb yɩɩrã fãa n bas ne bãmba, bala, bãmb n get yãmb yelle.’ Bõe n wilgd tɩ Wẽnnaam a Zeova sɩd geta yãmb yelle?

A Zeova sẽn yaa Wẽnnaam ning buudã nooma tõndo, tɩ d rat a zoodo. Naoor wʋsgo, neb sã n yaa kõatba, n maand taab neere, b wat n lebga zo-rãmba, hal tɩ b zoodã tar pãnga. Daar ne a to fãa, a Zeova maanda ninsaalbã neere, n kõt-b bũmb wʋsgo. D nee rẽ vẽenega. Wala makre, a kɩtdame tɩ “wĩntoogã zẽkd nin-wẽnse, la nin-sõamyã yĩnga,” la a kɩtdẽ tɩ “saagã niid nin-tɩrse, la sẽn ka-b tɩrsã yĩnga.” (Mat. 5:45) Wãn to la wĩntoogã ne saagã nafd tõndo? Wĩntoogã vẽenemã n paas saagã sẽn niidã kɩtame tɩ ‘rɩɩb sekd ãdem-biisã, n pids b sũyã ne sũ-noogo.’ (Tʋʋ. 14:17) Hakɩɩka, a Zeova kɩtame tɩ tẽngã pid ne rɩɩb buud toor-toore. Ninsaal sã n yaool n paam rɩ-noog n dɩ, a sũur noomame.

La bõe yĩng tɩ komã namsd neb wʋsgo? Yellã yaa tɩ naoor wʋsgo, sẽn pak nanambsã n yɩɩd pa nin-buiidã neer ye. Yaa b kãag arzɛgs n same, la b paas b naamã pãnga. Ka la bilfu, a Zeova na n kɩtame tɩ yão-beed buud fãa sa. Bala, a na n kɩtame tɩ yẽ saasẽ Rĩungã ledg ninsaalbã goosneema-rãmbã, t’a biig a Zeezi sẽn yaa Rĩungã rĩmã soog tẽngã, n dɩ naam. Wakat kãnga, kom pa na n le yõk ned baa a yembr ye. La nananda, Wẽnnaam a Zeova  sõngda neb nins sẽn tũud yẽ ne b sũy fãa wã tɩ b paamd sẽn yaa tɩlɛ ne b vɩɩmã. (Yɩɩn. 37:25) Woto pa wilgd t’a sɩd geta tõnd yell sɩda?

Ned sã n yaa yãmb zoa hakɩɩka, a baooda sẽk n sõsd ne-yã. Sã n wa yaa bũmb sẽn pak yãmb y yiibã fãa yell la y gomda, a tõe n sõsa ne yãmb n kaoos menga. Y sã n wa togsd-a y sũur yell wall y zu-loɛɛga, a maagda a yĩng n kelg-yã. La a Zeova tara sẽk n kelgd tõnd bɩ? N-ye! Sẽn yaa wakat ning fãa la d pʋʋsd-a, a kelgdame. Yaa rẽ yĩng la Biiblã sẽn sagend tõnd tɩ d ‘wɩng ne pʋʋsgo,’ la a yetẽ meng tɩ d ‘pʋʋs n da basã.’—Rom. 12:12; 1 Tes. 5:17.

Rẽ yĩnga, baa tõnd pʋʋsg sẽn kaoosd to-to, a Zeova kelgdame bɩ? N-ye. Ad Biiblã kibar a ye sẽn wilgd rẽ. A Zeezi sẽn wa n na n yãk a karen-biis kẽer tɩ b lebg a tʋm-tʋmdbã, a “pʋʋsa Wẽnnaam yʋngã tɛk fãa.” (Luk 6:12) A pʋʋsgã pʋgẽ, wõnda a goma a karen-biis wʋsg yelle, n da pʋt b yʋyã, la a sõdgd b zʋg-sõma wã la b pãn-komsmã. A kosa a ba wã t’a sõng-a t’a yãkrã yɩ sõma. Beoogã ne a na n vẽegã t’a Zeezi ra kɩsa sɩd t’a sẽn yãk-b rãmbã sɩd tõe n tʋma tʋʋmdã neere. A Zeova sẽn yaa a soab ning “sẽn kelgd pʋʋsgã,’ ned sã n pʋʋsd-a ne pʋ-peelem, a kelgda ne yamleoogo. (Yɩɩn. 65:3) Baa ned sã n togsd a Zeova a sũur yell a pʋʋsg pʋgẽ t’a pʋʋsgã kaoosdẽ, a pa get t’a soab sãamda yẽ sẽk ye. A kelgd-a lame.

Ned tõe n maana a zoa bũmbu, t’a tõdg t’a kõn kõ-a sugr ye. Nina sakdame meng n bas zood sẽn kaoos tɩ sãame, b sẽn maan-a bũmb t’a getẽ tɩ yaa toog t’a kõ sugr yĩnga. La a Zeova pa woto ye. Biiblã pʋgẽ, b yeta sũ-tɩrs rãmbã sẽn dat Wẽnnaam sugrã tɩ b pʋʋs-a n kose, bala a ‘kõta sugr wʋsgo.’ (Eza. 55:6, 7) Bõe yĩng tɩ Wẽnnaam sakd n kõt sugr wʋsgo?

Yaa a nonglmã sẽn ka to wã yĩnga. Wẽnnaam nonga dũniyã wʋsgo, hal n sak t’a Bi-ribl a Zeezi wa ki, n na n fãag ninsaalbã ne yel-wẽndã la ne zu-loees nins fãa yel-wẽndã sẽn wa ne wã. (Zã 3:16) La a Zeezi kũumã yõod  pa rẽ bal ye. A Zeezi sẽn ki tɩ yɩ maoongã kɩtame tɩ Wẽnnaam sakd n kõt neb nins sẽn yaa a zo-rãmbã sugr wʋsgo. Tʋm-tʋmd a Zã ra yeelame yaa: “Tõnd sã n vẽneg n togs Wẽnnaam d yel-wẽnã, bãmb yaa sɩd soaba la tɩrga tɩ kõ tõnd sugr d yel-wẽnã yĩnga.” (1 Zã 1:9) A Zeova sẽn kõt sugrã yĩnga, neb buud fãa tõe n paama a zoodo. D sẽn mi rẽ wã, d sũur pa noom sɩda?

Ned sã n yaa y zoa hakɩɩka, y sã n wa rat sõngre, a sõngd-y lame. A Zeova me maanda woto bɩ? N-ye. Biiblã yetame tɩ ned sẽn tũud a Zeova ‘sã n salge, a ka lʋɩt tẽnga,’ bala a Zeova “gãda yẽnda nugu.” (Yɩɩn. 37:24) Bũmb toor-toor la a Zeova maand n sõngd sẽn tũud-b yẽ wã. Ad kibar sẽn wilgd rẽ. Yaa kibar sẽn yit Karayiib ko-sʋk tẽng a ye b sẽn boond tɩ Sẽnkʋrwa.

D saam-bi-poak a ye sẽn yaa bi-bɩɩg karen-bi-taas n da namsd-a, a sẽn zãgs t’a kõ pʋʋs tẽngã darpo wã yĩnga. A pʋʋsa a Zeova n kos sõngre, n yaool n na n bao n welg yellã. A ra tara sõsg karen-doogẽ wã, n yãk yam n na n gom darpo wã pʋʋsg yell a karen-bi-taasã taoore. A talla Biiblã kibay sebr n wilg yẽ sẽn yãk yam n pa na n pʋʋs darpo wã võore. A wilgame tɩ yẽ yam-yãkrã tika a Sadrak ne a Mesak la Abɛdnego kibarã zugu. A yeela woto: “A Zeova kogla nin-kãensã sẽn da yaa ebre-rãmbã, b sẽn pa sak n na n pʋʋs bõn-naandgã yĩnga.” A sõsgã poore, a yeela karen-biis nins sẽn da be be wã tɩ b ned kam fãa tõe n paama Biiblã kibay sebrã a yembre. Bãmb piig la ye n sak n deege. Saam-bi-poakã yãame t’a sẽn tõog n wilg tõnd sẽn pa pʋʋsd darpo wã võorã, yaa a Zeova n kõ-a pãng la yam. Rẽ kɩtame t’a sũur da noome.

Y sã n wa tagsd tɩ yãmb yell pa pak a Zeova, bɩ y karem Yɩɩn-sõamyã 34:17-19; 55:22; 145:18, 19, la y bʋgse. Kos-y d tẽed-n-taas sẽn tũud a Zeova hal sẽn kaoos tɩ b wilg yãmb a Zeova sẽn ges b yell to-to. Y sã n wa mik tɩ y rata a Zeova sõngr yell ning pʋgẽ bɩ y pʋʋs-a n kose. Y sã n maand woto, y na n sɩd yãame t’a Zeova ‘geta yãmb yell’ ye.