1-3. a) Bõe la kiris-neb maan n wilg tɩ b nonga tigissã? (Ges-y fotã sẽn be yĩngrã.) b) Bõe yell la d na n gom sõs-kãnga pʋgẽ?

A KORINA sẽn wa n tar yʋʋm 17, b yõka a ma wã n tɩ pag zĩig b sẽn da modgd nebã tɩ b tʋmdẽ. B wa n yõka a Korina me n tall n kẽng Siberi. Be taa kilo tusa ne a sẽn da beẽ wã. B kɩtame t’a tɩ tʋmd rũms gʋʋlg zĩigẽ, n da namsd-a wa yamba. B ra mi n modg-a lame t’a tʋm waoodẽ wã, t’a yaool n da pa tar waood fuug ye. Baa ne rẽ, a Korina ne saam-bi-poak a to yãka yam n na n maan b sẽn tõe fãa n kẽng tigsga.

² A Korina yeela woto: “Tõnd yii d tʋʋmã zĩigẽ ne zaabre, n kẽn kilo 25 n kẽng tẽrã gaarẽ. Tẽrã looga yʋng wakat a yiibu, n kẽn lɛɛr a yoobe. Rẽ poore, tõnd kẽna nao kilo 10, n yaool n ta tigsgã zĩigẽ.” La a Korina sũur yɩɩ noog ne b sẽn maanã. Ad a sẽn yeele: “Tigsgã sasa, d zãmsa Gũusg Gasgã, la d yɩɩl Rĩungã yɩɩla. Woto sɩd kenga d raoodo, la keng d tẽebo.” B leba b tʋʋmã zĩigẽ rasem a tãab poore. La baa ne rẽ, b tʋʋmdã taoor soab pa bãng tɩ b ra ka be ye.

³ Hal baa pĩnd wẽndẽ, a Zeova nin-buiidã ra nong  n tigimda taaba. Wala makre, Kiris tũudmã luglg poor bala, kiris-nebã ra wae n “naagda taab noor a yembr n be wẽnd doogẽ wã.” (Tʋʋ. 2:46) Sãmbg kae tɩ yãmb me nonga tigissã kẽnde. La yɛl kẽer mi n kɩtame tɩ tigissã kẽnd pa nana ye. Tõe tɩ yaa y tʋʋmã, wall y sẽkã n pa waooge, pa rẽ bɩ yaamse. La bõe n na n sõng-y tɩ baa ne rẽ fãa bɩ y kẽnd tigissã n pa vaandẽ?  ^[1] Wãn to la d tõe n sõng neb nins d sẽn zãmsd Biiblã, la neb a taab tɩ b bãng tigissã kẽnd yõodo? Sõs-kãnga pʋgẽ, d na n goma bũmb a tãab yelle: Tõnd sẽn kẽnd tigissã sẽn nafd tõnd mengã to-to, sẽn nafd d tẽed-n-taasã to-to, la sẽn noom a Zeova wã võore. Rẽ na n sõng-d lame tɩ d bãng bũmb a nii sẽn kɩt tɩ d segd n tigimd taaba. ^[2]

4. Bõe la d maand tigissã sasa tɩ sõngd tõnd tɩ d bãngd a Zeova?

⁴ Tigissã maasem yĩnga, d paamda minim la bãngre. Tigsg fãa sasa, d zãmsda bũmb wʋsg a Zeova zugu. Wala makre, sẽn nan pa kaoose, Tigingã Biibl zãmsgã sasa, d zãmsa Kell-y n pa-y “Wẽnnaam nonglmã pʋgẽ” sebrã. D goma a Zeova sẽn yaa Wẽnnaam ning buudã yell wʋsgo. D sẽn wa n kelgdẽ, tɩ d tẽed-n-taasã me kẽesd b toog n gomd tɩ d kelgdẽ wã, pa kɩt tɩ d maneg n nong d saasẽ Ba wã sɩda? Tigissã sasa me, d kelgda sõsse, Biiblã karengo, la d get mak-n-wilg toor-toor b sẽn mi n maandẽ, n paamd n wʋmd Wẽnnaam Gomdã võor n paasdẽ. (Nee. 8:8) Semen fãa me, b yãkda Biiblã sags d sẽn segd n karme. Y sã n wa karemdẽ, y pa yãt zĩis kẽer sẽn noom-y sɩda? Y sã n wa kelgd y tẽed-n-taasã sẽn wilgd bũmb nins bãmb me sẽn yã wã, y sũur pa noom sɩda?

5. Wãn to la tigissã sõng-y tɩ y bãng n tũ Biiblã saglse, la y paas y koe-moonegã minim?

⁵ Tigissã sasa, d bãngda d sẽn tõe n tũ Biiblã sagls to-to bũmb fãa pʋgẽ. (1 Tes. 4:9, 10) Wala makre, Gũusg Gasgã sõss nins d sẽn zãmsdã kell n zemsa ne-do. Tõe tɩ y zoe n wʋma bũmb Gũusg Gasgã zãmsg sasa, tɩ kɩt y toeem y sẽn da magd n na n maane, wall kɩt tɩ y kõ y tẽed-n-taag sẽn da beeg-y sugri, pa rẽ bɩ y maneg n pelgd y pʋg n pʋʋsd Wẽnnaam. Tigsg ning d sẽn boond tɩ Kiris-nebã vɩɩm la b tʋʋma wilgda d sẽn na n moon koɛɛgã to-to tɩ yɩ sõma, la d zãms nebã Biiblã tɩ kẽ-ba.—Mat. 28:19, 20.

6. Bõe la d maand d tigissã zĩigẽ tɩ kengd d raoodo?

⁶ Tigissã maasem yĩnga, d paamda raood kengre. A Sʋɩtãan tũnugda ne a dũniyã n dat n koms d tẽebã la a kɩt tɩ yɛlã loog d nugu, tɩ d koms raoodo. La d tigissã kengda d raoodo, la kõt-d pãng tɩ d tõe n kell n tũ a Zeova. (Karm-y Tʋʋm 15:30-32.) Naoor wʋsgo, tigissã sasa, d gomda Biiblã bãngr-goam sẽn pids yelle. Rẽ kɩtdame tɩ d maneg n kɩs sɩd t’a Zeova pʋlems a taabã me na n pidsame. Pa d tẽed-n-taasã sã n wa be taoor n sõsd ne-d bal la b kengd d raood ye. B sẽn mi n paam weer n gome, la b sẽn yɩɩnd ne b sũur fãa wã me kengda d raoodo. (1 Kor. 14:26) D sẽn sõsd ne d tẽed-n-taasã nand tɩ tigissã sɩnge, la tigissã poorã me noom-d lame. Bala, d neeme tɩ d tara zo-rãmb sẽn nong-d wʋsgo.—1 Kor. 16:17, 18.

7. Bõe yĩng tɩ tigissã kẽnd tar yõodo?

 ⁷ Tigissã maasem yĩnga, d paamda vʋʋsem sõngã sõngre. A Zeezi wilgda tigimsã sor ne vʋʋsem sõngã maasem. Sɩd me, a yeelame tɩ d segd n ‘kelga bũmb ning Sɩɩg-sõng sẽn yet wẽnd-dotã.’ (Vẽn. 2:7) Vʋʋsem sõngã tõe n sõnga tõnd tɩ d yals kãn-kãe makr pʋgẽ, la d moon koɛɛgã ne raoodo. A leb n tõe n sõnga tõnd tɩ d bãng n yãk yam tɩ zemse. Yaa rẽ yĩng la d sẽn segd n maan d sẽn tõe fãa n kẽnd tigissã, n paam vʋʋsem sõngã sõngrã.

8. D tẽed-n-taasã sã n yã tõnd tigissã zĩigẽ, n wʋm d sẽn gome, la d sẽn yɩɩnde, wãn to la nafd-ba? (Ges-y zĩ-gũbr ning gom-zug sẽn yaa: “Tigsg fãa poore, yaa wa a toogã boogame.”)

⁸ D tigissẽ wã, d paamd n wilgda d tẽed-n-taasã tɩ d nong-b lame. D tẽed-n-taas wʋsg maooda ne zu-loeese. Rẽ n so tɩ tʋm-tʋmd a Poll yeel tɩ d “tẽeg taab yelle.” (Ebre. 10:24, 25, Wẽnnaam Sebre, 1983) D sã n kẽnd tigissã, d paamd n kengda d tẽed-n-taasã raoodo, tɩ wilgdẽ tɩ d nong-b lame. Wilgdame me tɩ d nonga b zĩigẽ, tɩ d rat n sõsa ne-ba, la tɩ b yell pak-d lame. Sẽn paase, d sẽn mi n paam weer n gome, la d sẽn yɩɩnd ne d sũur fãa wã kengda b raoodo.—Kol. 3:16.

9, 10. a) Bõe yĩng tɩ d tõe n yeel t’a Zeezi goamã sẽn be Zã 10:16 pʋgẽ wã wilgdame tɩ tara yõod tɩ d tigimd ne d tẽed-n-taasã? b) D sã n kẽnd tigissã wakat fãa, wãn to la nafd d tẽed-n-taas nins zak rãmb sẽn daag-b n basã?

⁹ Tigissã sõngdame tɩ d yaa wa yãgr a ye piisi. (Karm-y Zã 10:16.) A Zeezi yeelame tɩ yẽ yaa pe-kɩɩma, t’a karen-biisã yaa a bãgre. Yaa piis sẽn na n be ne taab la b yaa bãgre. La tags-y n ges-y: Piis a yiib sã n tɩ be tãng zugu, t’a yiib tɩ be tãngã longẽ, t’a ye tɩ be zĩig a to, yaa bãgr sɩda? Ayo. B tog n bee ne taaba, n tũud b pe-kɩɩmã. Tõnd me sã n pa wat tigissã, d zãagda d meng ne d tẽed-n-taasã. D sã n dat n yɩ “bãgr a yembre,” n sakd “pe-kɩɩm-yɛnga,” d segd n tigimda taaba.

¹⁰ Tõnd sã n kẽnd tigissã, sõngdame tɩ tõnd ne d tẽed-n-taasã sɩd yaa wa zak a ye neba. (Yɩɩn. 133:1) D tẽed-n-taas sãnda zak rãmb raag-b lame n base, b sẽn yaa a Zeova Kaset rãmba yĩnga. La a Zeezi yeelame t’a na n kɩtame tɩ b le paam neb sẽn na n nong-b wa b zak rãmba, n get b yelle. (Mark 10:29, 30) Y sã n kẽnd tigissã n pa vaandẽ, y tõe n lebga nina ba, a ma, a kẽema, wall a yao. D sã n tags rẽ, na n kɩtame tɩ d rat n maan d sẽn tõe fãa n da vaand tigissã ye.

11. Bõe yĩng tɩ d yetẽ tɩ d sã n kẽnd tigissã, d kõta a Zeova bũmb a sẽn segd ne?

¹¹ D sã n kẽnd tigissã, d kõta a Zeova bũmb a sẽn segd ne. Sẽn mik t’a Zeova n yaa tõnd Naandã, a toga ne pẽgre, waoogre, bark pʋʋsgo, la ziiri. (Karm-y Vẽnegr 7:12.) D sẽn pʋʋsd tigissã sasa, n yɩɩndẽ la d gomd a Zeova yellã, d waoogd-a lame. Woto yaa bũmb a sẽn sɩd segd ne. D sẽn paam n tõe n waoog a soab ning sẽn maan bũmb wʋsg n kõ-dã, d sũur yaa noogo.

12. Bõe yĩng tɩ d sã n kẽnd tigissã bɩ noom a Zeova?

¹² Sẽn yaa a Zeova n naan tõndã, d segd n sak-a lame. A yeelame tɩ d ra bas taab tigingu, sẽn yɩɩd fãa dũniyã sɛɛb sẽn kolgdã yĩnga. D sã n tũ a sẽn yeelã, noom-a lame. (1 Zã 3:22) A nee modgr ning d sẽn maand sẽn na yɩl n kẽng tigsg fãa wã, t’a sũur noome.—Ebre. 6:10.

13, 14. Bõe yĩng tɩ d tõe n yeel tɩ tigissã paasda tõnd ne a Zeova la a Zeezi zoodã pãnga?

¹³ D sã n kẽnd tigissã, d wilgda a Zeova tɩ d ratame tɩ tõnd ne yẽ la a Biigã zoodã paase. Tigissã sasa, a Zeova tũnugda ne Biiblã n wilgd tõnd sor bũmb fãa pʋgẽ. (Eza. 30:20, 21) Baa neb sẽn pa a Zeova Kaset rãmb sã n mi n wa d tigissã, b neeme tɩ ‘Wẽnnaam sɩd bee d sʋka.’ (1 Kor. 14:23-25) D sã n tigim taaba, a Zeova bee ne tõnd ne a vʋʋsem sõngã maasem, tɩ rẽ wilgdẽ tɩ d sẽn kelgd bũmb ninsã yita yẽ nengẽ. Rẽnd yaa a Zeova la d kelgda, n sɩd neẽ t’a nong-d lame, tɩ tõnd ne yẽ zoodã pãng paasdẽ.

¹⁴ A Zeezi sẽn yaa tigingã Zu-soabã yeela woto: “Zĩig ning neb a yiib bɩ a tãab sẽn tigim taab ne mam yʋʋre, mam bee bãmb sʋka.” (Mat. 18:20) Biiblã yeelame me t’a Zeezi ‘kẽnda sãnem fɩtl-dogendsã sʋka,’ rat n yeel t’a kẽnda tigimsã sʋka. (Vẽn. 1:20–2:1) Vẽenega, a Zeova ne a Zeezi bee ne tõnd d tigissã sasa, n kengd d raoodo. Yãmb pa tagsd t’a Zeova sã n ne d sẽn maand d sẽn tõe fãa n dat n paas tõnd ne yẽ la a Biigã zoodã, a sũur yaa noog sɩda?

15. Bõe yĩng tɩ tigissã kẽnd wilgdẽ tɩ d rat n saka Wẽnnaam ne d sũur fãa?

¹⁵ D sã n kẽnd tigissã, d wilgdame tɩ d sakame t’a Zeova n yaa yĩngr la tẽng Naaba. Baa a Zeova sẽn yeel tɩ d kẽnd tigissã, a pa modgd tõnd ye. (Eza. 43:23) Tõnd n segd n sak a sẽn yeelã, tɩ wilg tɩ d nong-a-la ne d sũur fãa, la tɩ d sɩd sakame t’a yaa d Naaba. (Rom. 6:17) Wala makre, d tʋʋmd taoor soab tõe n wa pẽdgda tõnd n dat tɩ d vaand tigissã n tʋmdẽ. D tẽngã taoor dãmb me tõe n wa yiisa noor n gɩdg d tigissã, n yeel tɩ d sã n kɩɩse, b na n kɩtame tɩ d yao, wall d kẽ bãens roogo, pa rẽ bɩ b sɩbg-d tɩ yɩɩg rẽ. Wakat ning me, tõnd mengã tõe n wa rat n vaala tigissã n maan bũmb a to. Sã n wa yaa woto, a Zeova kõ-d-la sor tɩ d tõe n yãk d sẽn na n maane. (Tʋʋ. 5:29) La d bãng tɩ d sã n yãk yam n sak-a, noom-a lame.—Yel. 27:11.

16, 17. a) Bõe n wilgd tɩ pipi kiris-nebã ra mii tigissã yõodo? b) Bõe la a saam-biig a George Gangas yeel tigissã wɛɛngẽ?

¹⁶ Yʋʋmd 33 Pãntekotã tɛka, pipi kiris-nebã kell n da tigimda taab n waoogd a Zeova. B ra “naagda taab noor a yembr n be wẽnd doogẽ wã.”  (Tʋʋ. 2:46) Rom tẽngã taoor dãmb ne zʋɩf-rãmbã tũudum taoor dãmb ra wa n namsd-b lame, hal tɩ yɩl n tigim taab pa nana ye. Baa ne rẽ, b ra maanda b sẽn tõe fãa n ket n tigimd taaba.

¹⁷ Rũndã-rũndã me, a Zeova Kaset rãmb wʋsg yeelame tɩ b sũur nooma b sẽn paam n tõe n tigim ne b tẽed-n-taasã. A George Gangas sẽn yɩ Siglgã taoor lʋɩtb Sull ned n maan yʋʋm 22 wã ra yeela woto: “Mam sẽn paam n tigimd ne m tẽed-n-taasã yaa bũmb sẽn noom-m wʋsgo, la kengd m raoodo. M nong n wata Rĩungã roogẽ pĩnda. Tigissã poore, sã n tõe me, m pa loogd tao-tao ye. M sã n be ne Wẽnnaam nin-buiidã n sõsda, m sũ-noogã pa tõe n bãng n bilg ye. M sã n be ne-ba, m yam gãee bãan wa m bee ne m zak rãmba. Yaa wa d bee arzãn pʋgẽ.” A paasame tɩ yẽ sẽn dat ne a sũur fãa yaa a be tigsgã zĩigẽ.

18. Yãmb tagsg yaa wãn ne d tigissã, la bõe la y rat n kell n maane?

¹⁸ Yamb me sũur nooma d sẽn tigimd taab n waoogd a Zeova wã bɩ? Bɩ d kell n maan d sẽn tõe fãa n da vaand tigissã ye. Woto, d wilgdame tɩ d tagsda wa rĩm a Davɩɩde. A ra yeelame: “Sẽn-Ka-Saabo, mam nonga roog ning yãmb sẽn be a pʋgã.”—Yɩɩn. 26:8.