BÃNGDBÃ bilgame tɩ ninsaal kalkõtã zɩslem pa yɩɩd kilo la pʋɩ-sʋk ye. La b yeelame tɩ bũmb nins fãa ãdem-biisã sẽn vaees n yã wã sʋka, ninsaal kalkõtã par tar to, bala, ned pa tõe n bãng a sẽn tʋmd to-to wã fasɩ ye. Ninsaal kalkõtã sɩd yaa yel-solemde. D sã n bãngd kalkõtã sẽn tʋmd to-to ninsaal zugẽ wã n paasdẽ, d sũur na n maneg n yɩ noog ne a Zeova, a tʋʋm-kãsemsã yĩnga. (Yɩɩn. 139:14) Ninsaal kalkõtã kɩtame t’a tõe n maan bũmb ka tɛka. La d na n goma a sẽn kɩt tɩ d tõe n mams bũmb d yamẽ wã yelle. Ninsaal tõe n mamsa bũmb a sẽn zɩ n yã wall bũmb a sẽn zɩ n maane. Sɩd me, daar ne a to fãa, d mamsda bũmb toor-toor d yamẽ. Tõe tɩ y zoe n karma kibare, wall y wʋma kibar sẽn gomd zĩig y sẽn zɩ kẽng yelle. Sãmbg kae tɩ y sẽn wa n karemdẽ, pa rẽ bɩ y kelgdẽ wã, y mamsa zĩigã sẽn yaa to-to y yamẽ. Vẽenega, y sã n wa tagsd bũmb y sẽn zɩ n yã yelle, wall bũmb y sẽn zɩ n lembe, pa rẽ bɩ n sɩɩse, y mamsd-a a sẽn yaa to-to wã. Biiblã yeelame tɩ Wẽnnaam naana ninsaal a meng wõnego. (Sɩng. 1:26, 27) Rẽnd yẽ mengã tõe n mamsa yell a yamẽ. A sẽn naan tõnd tɩ d tõe n mams bũmb d yamẽ wã wilgdame t’a ratame tɩ d tũnug ne tõog kãng n bao n bãng a raabã sõma. (Koɛ. 3:11) La bõe la d tõe n mams tɩ sõng-d tɩ d maneg n bãng Wẽnnaam daabã, la bõe la d pa segd n mamse?

1) D gũus tɩ wakatã zemse, la ra yɩ bũmb sẽn pa sõma me ye.

D sã n mamsd bũmb d yamẽ, pa wẽng ye. Pʋd n tõe n naf-d lame. La Koɛɛg soab 3:1 yeelame tɩ “bũmb fãa tara a wakate.” Rẽnd d sã n pa gũusi, d tõe n wa maanda bũmb tɩ yaool n pa bõn-kãng wakat ye. D rɩk makr wa d sẽn na n be tigsgẽ, pa rẽ bɩ d sẽn na n zãmsd Biiblã, tɩ d yamã gõodẽ. Rẽ yĩnga, tigsgã bɩ zãmsgã na naf-d sɩda? A Zeezi yeelame tɩ d gũus n da wa tagsd yoob yell ye. (Mat. 5:28) Woto wilgdame tɩ bũmb kẽer la d tõe n mams d yamẽ wã tɩ pa ta a Zeova yam ye. Ned sã n tagsd yoob yelle, tõe n kɩtame t’a wa baas n yo. Bɩ d mao, n da tol n mams bũmb sẽn tõe n wa sãam tõnd ne a Zeova zoodã ye.

2) D ra wa tagsdẽ tɩ arzɛk tõe n kogla ned wakat fãa ye.

Yaa sɩd tɩ teed kẽer yaa tɩlɛ ne-do. Baasgo, ned sã n wa tagsdẽ t’a sã n tar arzɛk bɩ teed wʋsgo, na n kogl-a lame la kɩt t’a paam sũ-noog hakɩɩka, a belgda a menga. A Salomo yeela woto: ‘Arzɛk soab arzɛk n yaa a pãnga. Yẽnda tagsdame t’a arzɛkã yaa wa lalg sẽn zãnte.’ (Yel. 18:11) Wala makre, yʋʋmd 2009 bõn-bɩʋʋng kiuugã, sa-kãseng n ni Filipin soolmẽ wã. Koomã kẽe Maniyn sẽn yaa b na-tẽngã fãa la bala. Rao a ye nug sẽn zãad n bõn a teed wʋsgo. A yeelame tɩ  “waa ne toog la namsg n kõ rakãag-rãmb la naong rãmba.” Ned tõe n wa tagsdame tɩ arzɛk bɩ paoong tõe n sɩd kogl-a lame. La sɩd-sɩda, pa wakat fãa la arzɛk kogend ned ye.

3) D ra wa tagsd yɛl sẽn tõe n pa zĩnd ye.

A Zeezi yeelame tɩ d ra maan yɩɩr d zu-loeesã poorẽ tɩ loog noor ye. (Mat. 6:34) Ned sẽn maand yɩɩr wakat fãa nong n mamsda bũmb wʋsg a yamẽ. La f sã n tagsd yɛl sẽn tõe n pa wa zĩndi, f namsda f meng zaalem. Gʋlsg Sõamyã wilgame tɩ yɩɩr a woto tõe n komsa ned raoodo, wall kɩt t’a yam yi a menga. (Yel. 12:25) Rẽnd sẽn são yaa d sẽn na n tũ a Zeezi saglgã n da maand yɩɩr tɩ loog noore, n bʋʋd daar fãa ne a yell bala.

D SẼN TÕE N MAMS TƖ NAF-DO

1) D tõe n pĩnd n mamsa yell sẽn tõe n wa, n tõog n gil-a.

Biiblã sagenda tõnd tɩ d yɩ neb sẽn gũusd b mense. (Yel. 22:3) D sã n wa rat n maan bũmbu, d tõe n pĩnd n mamsa rẽ sẽn tõe n baas to-to. Wala makre, neb tõe n wa boola yãmb tɩ y wa tɩ y kok pemsem. Sã n yaa woto, bɩ y pĩnd n mams sẽn tõe n yɩ to-to wã y yamẽ, n bãng y sã n na n kẽngame. Y tõe n tagsa neb nins sẽn na n zĩnd be wã yelle, nebã sõore, la sẽn na n yɩ zĩig ning la wakat ninga. Rẽ poor bɩ y sok y meng woto: ‘Bõe n tõe n zĩnd be? Pemsmã kokr sẽn tõe n yɩ to-to wã na n zemsa ne Biiblã noy la keng m daood bɩ?’ Bʋgsg a woto tõe n sõngame tɩ y mams yɛlã sẽn tõe n yɩ to-to wã y yamẽ. Woto na n sõng-y lame tɩ y gil bũmb sẽn tõe n wa koms y tẽebã.

2) D tõe n mamsa d sẽn na n welg zu-loɛɛg to-to.

D sẽn tõe n mams bũmb d yamẽ wã me kɩtame tɩ d tõe n bãng n welg yelle. D rɩk makr wa yãmb ne y tẽed-n-taag moor sẽn na n yõsge. Y maanda a wãn tɩ y moorã manege? Bũmb kẽer yell la y segd n deng n tagse. Makre, y tõe n soka y meng woto: ‘A soabã nong n yẽsda wãn-wãna? Wakat bʋg la m tõe n gom ne-a tɩ zemse? Bõe la m na n yeel-a, la wãn to la m na n gome?’  Y sã n pĩnd n mams y sẽn na n welg yellã to-to wã, y bãngda y sẽn na n maaneg tɩ yɩ sõma. (Yel. 15:28) Woto, y na n sõngame tɩ zems-n-taar kell n zĩnd tigingã pʋgẽ. D sã n mi n mamsd yɛlã woto d yamẽ, na n naf-d lame.

3) Yɩl tɩ Biiblã zãmsg la a kareng naf-do, rẽnda d mamsd a kibayã sẽn yɩ to-to wã.

Segdame tɩ d karemd Biiblã daar fãa. La d pa segd n karemd-a d we n karem bal ye. D tog n bao n dɩka yam karengã pʋgẽ, la d mogd n tũ. Biiblã kareng segd n kɩtame tɩ d sũur maneg n yɩ noog ne bũmb nins a Zeova sẽn maandã. La yaa d sã n mamsd kibayã sẽn yɩ to-to wã. D rɩk makr ne Tall-y b tẽebã buud sebrã. D sã n wa karemd kibar a pʋgẽ wã, d tõe n mamsa sẽn yɩ zĩig ningã, kibarã sẽn gomd neb nins yellã, la b minimdã sẽn da yaa to-to. D tõe n mamsa d sẽn be beenẽ, n wʋmd bʋʋrã, n ne bũmb nins fãa sẽn maandã, la d wʋmd yũugã. D tõeeme me n mams bũmb nins sẽn noom nebã la sẽn sãamd b sũyã. Rẽ, d tõogd n dɩka yam kibay d sẽn da tagsd tɩ d mii sõma pʋgẽ. Vẽenega, d sã n karemd Biiblã wall d zãmsd-a, n mi n yals n mams yɛlã sẽn yɩ to-to wã d yamẽ, na n naf-d lame.

4) D tõe n mamsa ned zu-loɛɛg sẽn namsd-a to-to.

D sã n tõog n bãng ned zu-loɛɛg sẽn namsd-a to-to, yaa bõn-sõngo. A Zeova ne a Zeezi mii nebã zu-loees sẽn mamsd-b to-to wã. D segd n dɩka b togs-n-taare. (Yik. 3:7; Yɩɩn. 72:13) Wãn-wãna? Bũmb a ye yaa d sẽn na n mamsd nebã zu-loees sẽn namsd-b to-to wã. D tẽed-n-taag tõe n tara zu-loɛɛga, t’a buud zɩ n paam-d ye. Baasgo, d tõe n soka d meng woto: ‘Sã n da yaa maam, m maanda wãna? Bõe la m na n dat tɩ m taabã maan n sõng-ma?’ Sogsg a woto buud tõe n sõng-d lame tɩ d bãng d tẽed-n-taagã zu-loɛɛg sẽn namsd-a to-to wã. Sɩd-sɩda, d sã n kʋmd d taabã, na n naf-d-la wʋsgo. Wala makre, na n sõng-d-la koe-moonegã pʋgẽ, la paas tõnd ne d tẽed-n-taasã zems-n-taare.

5) D tõe n mamsa vɩɩmã sẽn na n yɩ to-to dũni-paalgã pʋgẽ.

Gʋlsg Sõamyã pida ne vɛrse-rãmb sẽn bilgd vɩɩmã sẽn na n yɩ to-to dũni-paalg ning Wẽnnaam sẽn pʋlem tɩ watẽ wã pʋgẽ. (Eza. 35:5-7; 65:21-25; Vẽn. 21:3, 4) Tõnd sɛbã pʋsẽ, b mi n paasa fot-neeb sẽn bilgd vɩɩmã sẽn na n tall bark to-to dũni-paalgã pʋgẽ. Bala, fot-rãmbã sõngd-d lame tɩ d tõe n mams d sẽn zoe n be dũni-paalgã pʋgẽ, n paamd bark nins Wẽnnaam sẽn pʋlmã. A Zeova sẽn naan tõnd tɩ d tõe n mams bũmb d yamẽ wã, yẽ n mi rẽ sẽn tõe n naf tõnd to-to wã n yɩɩda. D sã n mamsd a pʋlemsã sẽn na n pids tɩ vɩɩmã yɩ to-to wã, d na n maneg n kɩsa sɩd tɩ b na n pidsame. Leb n na n sõng-d lame tɩ d kell n sak-a baa ne zu-loeesã.

A Zeova sẽn naan tõnd tɩ d tõe n mams yɛlã d yamẽ wã wilgdame t’a sɩd nong-d lame. Tõog kãngã tõe sõng-d lame tɩ d tũ-a ne d sũur fãa. Bɩ d modg tɩ d sẽn mamsd bũmb nins d yamẽ sɩd naf-do, tɩ wilg tɩ d sũur nooma ne a Zeova, a sẽn kõ tõnd tõog a woto wã.