Sẽn yɩ to-to tɩ Biiblã wa be rũndã-rũndã

Sẽn yɩ to-to tɩ Biiblã wa be rũndã-rũndã n kell n pa toeemã sɩd yaa yel-solemd meng-menga. Yʋʋmd 1 900 la woto, b sẽn gʋls Biiblã n sa wã. B gʋls-a-la bũmb toor-toor sẽn tõe n sãam zutu. Wala makre, papirisi, la rũmsã gãnd zutu. Sẽn paase, b sẽn da gʋls Biiblã buud-gomd ning pʋgẽ sɩngrẽ wã, neb nins sẽn wʋmd buud-gom-kãens rũndã-rũndã wã sõor le pa waoog ye. Pãens-rãmba, nanambs la tũudum taoor-dãmb me maana b sẽn tõe fãa, n na n menes Biiblã la b pa tõog ye.

B maana wãn tɩ Biiblã kaoos n tãag rũndã n lebg sebr ning yʋʋr sẽn yi n yɩɩd sɛb a taabã? D gom bũmb a yiib yelle.

Sẽn ges-b Wẽnnaam gomdã n lebs n gʋls ne nusã kogl-a lame

Israyɛll nebã Wẽnnaam sẽn da gũnug Biiblã pipi sɛbã kogla seb-pindem-kãens neere, n ges-b n lebs n gʋls bãmb wʋsgo. Wala makre, Wẽnnaam da yeela Israyɛll rĩm-dãmbã tɩ b segd n “lebs n gʋlsa Tõogã sebr a to zugu. Yaa tõod nins maan-kʋʋdbã sẽn yaa Levi buudã nebã sẽn bĩngã.”—Tõodo 17:18.

Israyɛll neb wʋsg ra nonga Gʋls-sõamyã karengo, bala b ra miime tɩ yaa Wẽnnaam Gomde. Rẽ n so tɩ yɩ seb-gʋlsdb sẽn tar minim sõma n ges Biiblã n maag b yĩng n lebs n gʋls ne nusi. Biiblã pʋgẽ, b goma a Ɛsdras sẽn yɩ wẽn-zoet la seb-gʋlsdã yelle, n yeel t’a yaa “seb-gʋlsd sẽn mi a Moyiiz Tõogã Israyɛll Wẽnnaam a Zeova sẽn da kõ wã sõma.” (Ɛsdras 7:6) Yʋʋmd 500 wã n tall n tãag yʋʋmd 900 wã sẽnese, Masorɛt-rãmbã sẽn ges Biiblã babg ning b sẽn da gʋls ne Ebre wã bɩ “Kãab-kʋdgã” n lebs n gʋls ne nusã ra sõta gom-biisã menga, sẽn na yɩl tɩ tudgr da zĩnd ye. B sẽn da maand woto wã sõngame tɩ Biiblã goamã pa toeeme, la sõng me tɩ Biiblã ket n be rũndã-rũndã, baa ne bɛɛbã sẽn maan b sẽn tõe fãa n na n menes-a wã.

Wala makre, yʋʋmd 168 S.D.Z.R, Siiri rĩm a Ãntiyoos naas-n-soabã makame n na n menes Biiblã babg ning b sẽn da gʋls ne Ebre tɩ nebã ges n lebs n gʋls ne nusã Palɛstin soolmã pʋgẽ. Zʋɩf-rãmbã kʋdemdã yɛl sebr a yembr pʋgẽ, b yeelame yaa: “B sã n da yã tõogã seb-pindem fãa, b ra pãrsd-a lame n yõog bugum.” Sebr a yembr pʋgẽ, (The Jewish Encyclopedia says) b yeelame yaa: “Sodaas nins b sẽn yãk tɩ b na n pãrs seb-pindmã la b yõ-bã ra maanda rẽ ne yẽesem wʋsgo . . . Ned sã n da tar seb-pindem-kãensã . . . a ra segda ne kũum.” La baa ne rẽ, Zʋɩf-rãmb nins sẽn da be Palɛstin, la Zʋɩf-rãmb nins sẽn da be tẽns a taabã ra ket n tara Gʋls-sõamyã b sẽn da ges n lebs n gʋls ne nusã.

Biiblã babg ning b sẽn da gʋls ne Gɛrkã bɩ “Kãab-paalgã” gʋlsg poor bilf bala, neb n ges lɛta nins Wẽnnaam sẽn vẽneg tɩ b gʋlsã, bãngr-goamã la kibay nins sẽn be bab-kãng pʋgẽ wã, n lebs n gʋls ne nus bãmb wʋsgo. Wala makre, a Zã gʋlsa a Evãnzillã Efɛɛse, pa rẽ bɩ zĩig sẽn pẽ ne be. La a Zã Evãnzillã neb sẽn ges n lebs n gʋls ne nusã babg a ye la b yã Ezɩpt sẽn be kilo 200 zĩigẽ ne Efɛɛsã. Bãngdbã yeelame t’a Zã sẽn gʋls a kibarã tɛka, yaa na maan yʋʋm 50 poor la b ges a kibarã n lebs n gʋls ne nusi. B sẽn yã bũmb ningã wilgame tɩ kiris-neb nins sẽn da be zĩ-zãrsẽ wã ra tara sɛb nins Wẽnnaam sẽn da vẽneg tɩ b gʋls tɩ nan pa kaoosã, tɩ neb ges n lebs n gʋls ne nusã.

B sẽn da pʋɩt Wẽnnaam gomdã zĩig fãa wã sõngame me t’a ra ket n be baa yʋʋm kobs Kirist kũumã poore. Wala makre, b yeelame tɩ yʋʋmd 303 wao-fugdg kiuug rasem 23 tõd-beoogã, Rom naab a Diocletian ra yasame n getẽ t’a sodaasã kao egiliiz kʋɩlemse, n kẽ n wʋk Gʋls-sõamyã b sẽn da ges n lebs n gʋlsã n yõoge. A Diocletian ra tagsdame t’a sã n tõog n menes Gʋls-sõamyã, Kirist nebã tũudmã ra pa na n le beẽ ye. Vẽkembeoogã, a yiisa noor n yeel tɩ Rom soolmã fãa pʋgẽ, b na n yõoga Biibl-dãmbã nebã sẽn ges n lebs n gʋls ne nusã nebã fãa nifẽ. La Biiblã b sẽn da ges n lebs n gʋlsã sɛb kẽer la b pa tõog n yõoge. Sẽn paase, b wa n gesa seb-kãens n lebs n gʋls ne nusi. Sɩd me, Biiblã b sẽn ges n lebs n gʋls ne nusã gɛrk buud-gomdã pʋgẽ wã, bãmb b yiib n ket hal n tãag rũndã. B gʋlsa seb-kãens a Diocletian sẽn kɩt tɩ b sɩng kiris-nebã namsgã poor bilf bala. A ye n be Rom t’a to wã be Ãngeletɛɛr sɛbã bĩngr zĩig sẽn be Lõndrã.

Baa ne b sẽn nan pa yã Biiblã seb-pindem meng-mengã, Biiblã tõr pa rẽ bɩ a babs b sẽn ges n lebs n gʋls ne nus bãmb tusa n ket hal ne rũndã. B kẽer kʋdga wʋsgo. Rẽ yĩnga, Biiblã b sẽn da get n lebsd n gʋlsd ne nusã kɩtame t’a goamã toeem bɩ? Biibl-mit a W. H. Green yeela Gʋls-sõamyã babg ning b sẽn da gʋls ne Ebre wã wɛɛngẽ yaa: “Sãmbg kae tɩ pĩnd wẽndẽ sebr a to ka be tɩ b lebs n dɩk a goamã kɛpɩ wa sẽn yɩ to-to ne Biiblã ye.” Biiblã babg ning b sẽn da gʋls ne Gɛrkã wɛɛngẽ, a Sir Frederic Kenyon sẽn yaa ned yʋʋr sẽn yi Biiblã b sẽn da get n lebsd n gʋlsd ne nusã wɛɛngẽ wã yeelame yaa: “Yʋʋm nins sẽn be Biiblã b sẽn da get n lebsd n gʋlsd ne nusã ne pipi seb-pindmã sʋk pa tolg n waooge, la tɩ sãmbs le kae tɩ Biiblã b sẽn da get n lebsd n gʋlsd ne nusã goamã pa toeem ye. D tõe n yeelame tɩ Kãab-paalgã sɛbã goamã la goamã võorã pa toeem ye.” A paasame yaa: “D tõe n basa d yam zãng-zãng tɩ Biiblã goamã võorã pa toeem ye. . . . Biiblã sẽn yãk a toogo, d pa tõe n yeel woto pĩnd seb-kʋdr a to wɛɛngẽ ye.”

Biiblã lebgrã

Bũmb a yiib-n-soab sẽn sõng tɩ Biiblã yaa sebr ning yʋʋr sẽn yi n tɩ yɩɩd sɛb a taabã, yaa b sẽn lebg-a buud-goam wʋsg pʋgẽ wã. Rẽ zemsa ne Wẽnnaam daabã sẽn yaa tɩ buud toɛy-toɛyã fãa neb la sẽn gomd buud-goam toor-toorã wa tõog n bãng-a la b waoog-a “ne vʋʋsem sõngã sõngre, la ne sɩda.”—Zã 4:23, 24; Mise 4:2

Biiblã b sẽn da gʋls ne Ebre wã b sẽn lebg pipi wã yaa a soab ning b sẽn boond tɩ Sɛptãntã Gɛrk buud-gomdã pʋgẽ wã. B lebg-a-la Zʋɩf-rãmb nins sẽn da pa be Palɛstin n gomd Gɛrk buud-gomdã yĩnga, la b lebg-a lame n sa yʋʋm 200 nand t’a Zeezi wa tẽngã zugu. B sẽn gʋls Biiblã tõrã, babg ning b sẽn da gʋls ne Gɛrkã sẽn naagã n sa wã, yʋʋm kobs poore, b lebg-a-la buud-goam wʋsg pʋgẽ. La kaoosg zugẽ, rĩm-dãmb la baa prɛtr-dãmb sẽn da segd n maan b sẽn tõe fãa tɩ Biiblã ta nin-buiidã pa maan woto ye. Prɛtr-dãmbã sẽn pa sak tɩ b na n lebg Wẽnnaam Gomdã buud-goam nins pʋgẽ neb wʋsg sẽn da tõe n karmã yĩnga, b kell n kɩtame tɩ b poorẽ-dãmbã pa lik pʋgẽ tẽebã wɛɛngẽ.

Rap sẽn tar raood n kɩɩs egiliiz-dãmbã taoor dãmb la tẽngã taoor dãmb noorã, n sak n gẽneg b yõor n na n lebg Biiblã buud-goam ning pʋgẽ, neb wʋsg sẽn da tõe n karmã. Wala makre, yʋʋmd 1530 wã, a William Tyndale sẽn yɩ Ãngletɛɛr nedã, la sẽn karem Oxfordã lebga babg ning b sẽn da gʋls ne Ebre wã pipi sɛb a nu wã b sẽn boond tɩ Pãntatekã. Baa ne b sẽn nams-a wʋsgã, yẽ n yɩ pipi n lebg Biiblã babg ning b sẽn da gʋls ne Ebre wã, Ãngilindã buud-gomd pʋgẽ. Neb nins sẽn lebg sɛbã ne Ãngilindã sʋka, yaa a Tyndale n yɩ pipi n ning a Zeova yʋʋrã a lebgrã pʋgẽ. Ɛspayn Biibl-mit a ye yʋʋr sẽn boond t’a Casiodoro de Reina sẽn wa n lebgd Biibl-dãmbã Ɛspayn buud-gomdã pʋgẽ wã, a vɩɩmã ra bee yell pʋgẽ sasa kãnga, bala Katolik tũudmã neb n da namsd-a. A toga sor n kẽng Ãngletɛɛre, Alemayn, Fãrense, Holãnd, la Sʋwɩs sẽn na yɩl n baas lebgrã tʋʋmdã. a

Rũndã-rũndã, b ket n lebgda Biiblã buud-goam wʋsg pʋsẽ. B ẽmpirimda Biibl-kãensã b sẽn yiisdã bãmb milyõ-rãmba. Biiblã sẽn ket n be rũndã-rũndã, n leb n yaa sebr ning yʋʋr sẽn yi n yɩɩd sɛb a taabã yaa kaset t’a Zeova sẽn vẽneg tẽn-tʋmd a Pɩyɛɛr t’a gʋls bũmb ningã yaa sɩda. A ra yeelame yaa: “Moodã kʋɩtame, tɩ puudã sʋʋgdẽ, la a Zeova gomdã paada wakat fãa.”—1 Pɩyɛɛr 1:24, 25.

[Tẽngr note]

[Zĩ-gũbri/​Foto]

BIIBL-BƲG LA M SEGD N KARME?

B lebga Biiblã buud-goam wʋsg pʋgẽ. Biibl kẽer b sẽn lebg kareng yaa toogo, bala gom-biisã võor wʋmb yaa toogo, n leb n yaa kʋda. Biibl sãnda pʋsẽ, b sooga b mens n kʋms goamã sẽn na yɩl t’a kareng yɩ noogo. B pʋd n pa lebg goamã tɩ zems kɛpɩ ye. Kẽer pʋsẽ, b lebga gom-biisã tɩ b tong taab kɛpɩ wa b sẽn da gʋls-a to-to pĩnd buud-goamã pʋsẽ wã.

Biiblã a Zeova Kaset rãmbã sẽn lebg ne Ãngilind tɩ b boond tɩ Gʋls-sõamyã, Dũni-paalgã lebgrã yaa pĩnd Biibl-dãmbã b sẽn da gʋls ne nusã la b ges n lebge. La b pa togs Biiblã lebgdbã sull neb yʋy ye. B gesa Biibl-kãng goamã n lebg Biibl-dãmb a taab buud-goam 60 pʋgẽ. Neb nins sẽn lebg Biiblã ne buud-gom-kãensã gesa pĩnd Biibl-dãmb nins b sẽn da gʋls ne nusã. Gʋls-sõamyã, Dũni-paalgã lebgrã lebgr sasa, b lebga goam kẽer tɩ b tong taab kɛpɩ wa b sẽn da gʋls-a to-to pĩnd buud-goamã pʋsẽ wã, sã n mikame tɩ nebã na n wʋma a võore. Sẽn lebg-b Biiblã modgame sẽn na yɩl tɩ nebã sã n wa karemd-a bɩ b tõog n wʋm a võor sõma wa pĩnd wẽndẽ dãmbã sẽn da wʋmd pĩnd Biibl-dãmbã goamã võor to-to wã.

Neb kẽer sẽn tar minim buud-goamã wɛɛngẽ maaga b yĩng n vaees Gʋls-sõamyã, Dũni-paalgã lebgrã, la Biibl-dãmb a taab b sẽn lebge, n na n ges b sẽn lebg-b to-to wã sã n yaa kɛpɩ, wall b sã n pa paas goam a taaba. B sʋkã ned a ye yʋʋr la a Jason David BeDuhn. Yaa tũudmã yɛl-mita, n yaa Université du nord de l’Arizona sẽn be Etazĩni wã karen-saamb a yembre. Yʋʋmd 2003 wã, a yiisa sebr sẽn tar nens 200, n gom Biibl-dãmb a wɛ yelle. Yaa Biibl-dãmb “b sẽn lebg ne Ãngilind tɩ sẽn wʋmd-b Ãngilindã karemd n tɩ yɩɩda.” b A vaeesgã pʋgẽ, a wilgame tɩ b sẽn lebg Biiblã goam kẽer to-to wã pa zemse, la t’a võorã me pa woto, bala Biibl kẽer pʋsẽ “b paasa goam a taaba.” A gesa b sẽn da lebg-a to-to ne Gɛrkã n mak ne b sẽn lebg-a to-to ne Ãngilindã, n na n ges b sã n pa paas goam a taab tɩ kɩt tɩ gomdã võor toeeme. Bõe la a bãng-yã?

A BeDuhn yeelame tɩ nebã, la Biibl-mitb wʋsg tagsdame tɩ bũmb ning sẽn kɩt tɩ Gʋls-sõamyã, Dũni-paalgã lebgrã yaa toorã yaa tɩ sẽn lebg-b Biibl-kãngã lebg-a lame tɩ zems ne b tũudmã neb sẽn tẽed bũmb ninsã. La yẽ mengã togsa a tagsgo, n yeel yaa: “Bũmb ning sẽn kɩt tɩ Gʋls-sõamyã, Dũni-paalgã lebgrã yaa toorã yaa tɩ b lebg-a lame t’a zems kɛpɩ, tɩ gom-biisã tong taab kɛpɩ wa b sẽn da gʋls-a to-to pĩnd buud-goamã pʋsẽ wã, la b gũus me t’a võorã pa toeem ye.” Baa ne a BeDuhn sẽn wilg tɩ b sẽn lebg Gʋls-sõamyã, Dũni-paalgã lebgrã goam kẽer to-to wã pa zemsã, a wilgame tɩ “Biibl nins fãa b sẽn lebgã sʋka, Biibl-kãng lebgrã n zems n tɩ yɩɩda.” A bool-a lame tɩ Biibl b sẽn “lebg tɩ yaa sõma n yɩɩda.”

A Benjamin Kedar sẽn yaa bãngd sẽn yit Israyɛllã yeela bũmb sẽn wõnd a BeDuhn sẽn yeelã, Gʋls-sõamyã, Dũni-paalgã lebgrã wɛɛngẽ. Yʋʋmd 1989 wã, a yeelame yaa: “Neb nins sẽn lebg Gʋls-sõamyã, Dũni-paalgã lebgrã modgame n wʋm goamã võor sõma sẽn na yɩl n tõog n lebg-a tɩ zems kɛpɩ. . . . M zɩ n yã gomd b sẽn paas Gʋls-sõamyã, Dũni-paalgã lebgrã pʋgẽ sẽn na yɩl tɩ zems ne b tũudmã neb sẽn tẽed bũmb ning ye.”

Sok-y y meng yaa: ‘Mam sẽn karemd Biiblã yaa bõe yĩnga? Rẽ yĩnga, m baooda Biibl kareng sẽn yaa nana, baa a lebgrã pa kɛpɩ bɩ? Bɩ m baooda Biibl b sẽn lebg tɩ zems kɛpɩ ne pĩnd Biibl-dãmbã b sẽn da gʋls ne nusã?’ (2 Pɩyɛɛr 1:20, 21) Yaa y sẽn karemd Biiblã ne bõn-daab ningã, n na n sõng-y tɩ y bãng Biibl ning y sẽn segd n karme.

[Tẽngr note]

[Foto]

“Gʋls-sõamyã, Dũni-paalgã lebgrã” bee ne buud-goam wʋsgo

[Foto]

Masorɛt-rãmbã sẽn ges Biiblã n lebs n gʋls ne nusã

[Foto]

Seb-pɛdga, tɩ b gʋls Luk 12:7 wã goamã: “. . . Bɩ y ra maan dabeem ye. Yãmb yõod yɩɩda yirs wʋsgo”

 [Kartã soaadbã]

Foreground page: National Library of Russia, St. Petersburg; second and third: Bibelmuseum, Münster; background: © The Trustees of the Chester Beatty Library, Dublin