Bao-y sõngre

“Ned tõe n tõoga nin-yende, la neb sã n yaa b yiibu, a pa tõe n tõog-b ye. Wĩir sẽn kal a tãab pa tõe n tõsg tao-tao ye.”—Koɛɛg soaba 4:12.

D SÃ N paam neb a taab sõngre, d tõe n tõoga bɛ nana-nana n yɩɩda, bɛ wã sẽn yaa ned ninga, wall a sẽn yaa bũmb ning fãa. Rẽnd y sã n dat n tõog n bas sɩgaarã, yɩta sõma tɩ y bao y zakã rãmb la y zo-rãmbã sõngre, pa rẽ bɩ ned ning fãa sẽn na n sɩd sak n teel yãmb ne sũ-mar sõngre.

Y tõe n baoo neb sẽn tõog n bas sɩgaarã yũub sõngre, bala b tõe n bãng n kʋm-y lame la b sõng-y me. A Torben sẽn yaa kiris-ned n be Danemarkã yeelame: “Neb a taabã sõngrã talla yõod wʋsg ne maam.” A Abraham sẽn be Ẽndã yeelame: “Mam zakã rãmb ne m tẽed-n-taasã sẽn wilg tɩ b nonga maam ne nonglem hakɩɩkã sõnga maam tɩ m bas sɩgaarã yũubu.” La wakat ninga, d zakã rãmb la d zo-rãmbã sõngr bal pa sek ye.

Rao a ye yʋʋr sẽn boond t’a Bhagwandas yeelame: “Mam yũu sɩgaarã yʋʋm 27, la mam sẽn bãng Biiblã sẽn yet bũmb ning minim-wẽnsã wɛɛngẽ wã, m yãka yam n na n base. Mam makame n na n boog m sẽn da yũud sɩgaarã to-to wã. Mam toeema zo-rãmba. Mam kẽnga logtor yir menga. La rẽ fãa pa yãk neng ye. La daar a yembr yʋngo, m pelga m pʋg n pʋʋs Wẽnnaam a Zeova, n yõk a sɛɛg t’a sõng-m tɩ m bas sɩgaarã. Yaa rẽ poor la m yaa n tõog n base!”

Bũmb a to sẽn tar yõod y sẽn segd n maan yaa segl y menga, zu-loees nins y sẽn tõe n seg sɩgaarã basg pʋgẽ wã yĩnga. Zu-loe-kãens la bʋse? Sõsg ning sẽn pʋgdã gomda rẽ yelle.

[Zĩ-gũbri]

Y SEGD N BAOO TƖT BƖ?

Tɩt nins b sẽn yiisd sẽn na yɩl n sõng sẽn yũud-b sɩgaarã tɩ b basã lebga bũmb sẽn kẽesd ligd wʋsgo. Wala makre, patch à la nicotine. Nand tɩ y yãk yam n bao tɩt a woto buudu, yɩta sõma tɩ y tags sogs-kãensã zugu:

B nafa wã la bʋse? Tɩt wʋsg yaa sẽn na n sõng-y tɩ baa y sã n pa yũ sɩgaarã bɩ ra nams-y wʋsgo, tɩ rẽ tõe n sõng-y tɩ y tõog n base. La neb kẽer yetame tɩ tɩtã pa tõe n sõng-y n zãag ye.

B tõe n waa ne zu-loe-bʋse? Tɩt kẽer tõe n kɩtame tɩ ned sũur yaandẽ, wall t’a yamã ka be a menga, pa rẽ bɩ kɩt t’a rat n kʋ a menga. Tẽeg-y me tɩ tɩt nins sẽn ledgd nikotinnã kɩtdame bal tɩ f yi sɩgaarã yembdẽ, n lebg bũmb a to yamba, tɩ f laafɩ wã ket n be yell pʋgẽ. Sɩd-sɩda, ned sẽn dat tɩt a woto ket n yaa yamb bala.

Bũmb a to bee y sẽn tõe n maan bɩ? B maana vaeesg n mik tɩ neb nins sẽn tõog n bas sɩgaarã bãmb koabg zugu, 88 wã tiig n bas-a-la woto bal tɩ pa tũ ne tɩɩm ye.