Zoa sẽn pa zoa hakɩɩka

Mams-y wa yãmb sẽn na n tar “zoa” y sẽn paam hal y bi-bɩɩlem wakate. A ra kɩtame tɩ y tagsdẽ tɩ y pa le yaa yãag ye. Sẽn paase, a ra kɩtame tɩ kom-bɩɩs a taabã nand yãmba. Sẽn da yaa wakat ning fãa la y maand yɩɩre, y tõe n baoo “belsg” a nengẽ. Sɩd me, wa n lebga yẽ la y teeg zu-loees wʋsg sasa.

La bilf-bilfu, y wa n bãngame t’a yaa zo-yoogo. A ratame n be ne-y wakat fãa, baa rẽ sẽn kɩt tɩ y sã n ta zĩis kẽer bɩ b get-y kɛgr-kɛgrã. La baa a sẽn kɩt tɩ y getẽ tɩ y pa le yaa yãag yɛsã, a boogda y laafɩ wã. Sẽn na n baase, a sãamda yãmb paoongã.

Sẽn nan pa kaoose, yãmb baoome n na n sãam zoodã, la a pa sak ye. Yãmb lebga a yamba. Y maanda y bãngẽ, y sẽn yõg zood ne-a wã.

D TÕE n yeelame tɩ sɩga-yũudb wʋsg ne sɩgaarã yaa woto. Pag a ye yʋʋr sẽn boond t’a Earline yũu sɩgaarã yʋʋm 50 n yaool n base. A yeelame: “Sɩgaarã ra sõngda maam n yɩɩd ned sẽn na n be ne maam. A ra pa sɩng n yaa m zoa bal ye. Wakat ninga, yẽ bal n da yaa m zoa.” La a Earline wa n bãngame tɩ sɩgaarã pa zoa hakɩɩk ye. Sɩd-sɩda, a pʋd n yaa zo-wẽng meng-menga. Goam nins sẽn be sɩngr wã tõe n bilga a yɛlã sẽn da yaa to-to wã. La bũmb n wa n maane. A sẽn wa n bãng tɩ sɩgaarã yũub yaa wẽng Wẽnnaam nifẽ, bala rẽgemda yĩngã sẽn yaa Wẽnnaam kũunã, a basa sɩgaarã yũubu.—2 Korẽnt rãmbã 7:1.

Rao a ye yʋʋr sẽn boond t’a Frank me yãka yam n na n bas sɩgaarã yũubu, sẽn na yɩl n noog Wẽnnaam sũuri. La a sẽn bas sɩgaarã vẽkembeoogo, a wa n yik n vũnumdame n vaees a roogã pẽgsẽ, n gẽesd a sã n pa na n yã sɩga-gɩrg a sẽn da yũ n lobe. A Frank yeelame: “Rẽ vẽnega m yamã. Mam sẽn wa n mik tɩ m vũnumdame n gẽesd sɩga-gɩrg rẽgdẽ wã, m sũur sãama ne m menga. M pa le tol n yũ sɩgaar ye.”

Bõe yĩng tɩ sɩgaarã basg yaa toog woto fãa? Bãngdbã vaeesame n wilg bũmb a wãna: 1) Sɩgaarã tõe n yõka ned wala dorge. 2) Ned sã n fõog sɩgaare, nikotinnã tõe n taa a kalkõtẽ wã segõnd a yopoe pʋgẽ bala. 3) Ned sẽn yũud sɩgaar wae n maanda rẽ a vɩɩmã nens fãa pʋgẽ. Wala makre, a sã n dɩtẽ, a sã n yũuda, a sã n sõsda, a sã n kokd pemsem, la a maand bũmb a taaba.

La ned sẽn yũud sɩgaar tõe n basa minim-wẽn-kãnga, wa a Earline ne a Frank kibarã sẽn wilgdã. Yãmb sã n yũuda sɩgaar n dat n base, y sã n karem sõss nins sẽn pʋgdã, tõe n sõng-y lame tɩ y tõoge.