Bɩ d ra tol n targ n sãam ye!

“Tõnd ka neb nins buud sẽn tardã, n sãam ye.”—HEBRE DÃMBA 10:39, NW.

1. Yel-bʋs n kẽes tʋm-tʋmd a Pɛɛr dabeem?

RA SEGD n linga tʋm-tʋmdba wʋsg b Zusoab a Zezi b sẽn nongã sẽn wa n yeel-b tɩ b fãa ra na n sãeeg n bas-a lame wã. Wãn-wãn la yell a woto ra tõe n yɩ, sasa ning a sẽn da rat-b n yɩɩdã? A Pɩɛɛr da wɩngda woto: “Baa neba fãa sã n leb poorẽ, mam kõn leb poorẽ ye.” Sɩd-sɩda, a Pɩɛɛr da yaa ned sẽn tar daoodo, n pa yɛɛsd bũmb ye. La b sẽn wa n zãmb a Zezi n yõkã, tʋm-tʋmdbã n paas a Pɩɛɛr sãeegame. Kaoosg poore, b sẽn da wa n maand a Zezi sʋgsg Maankʋʋd Kãsem a Kayɩf zakẽ wã, a Pɩɛɛr ra zĩi be n tadgdẽ, ne yɩɩre. Sẽn da yaa waood wakat tɩ zĩigã tar zʋʋgrã, yaa wa a Pɩɛɛr wa n yɛɛsa b na n wa kʋ a Zezi ne ned ning fãa sẽn lagem ne-a. Neb kẽer sẽn da yas ne a Pɩɛɛr sẽn bãng t’a ra yaa a Zezi tũud-n-taag a yembrã, rabeem yõka a Pɩɛɛre. A zãgsa naoor a tãab t’a pa tar lagem-n-taar ne a Zezi ye. A Pɩɛɛr kɩɩsame n yeel meng t’a pa mi-a ye!—Mark 14:27-31, 66-72.

2. a) Bõe yĩng t’a Pɩɛɛr sẽn zoe rabeem yʋng ning b sẽn yõk a Zezi wã pa kɩtd ‘t’a yaa ned sẽn targe’? b) D segd n dɩka sard kãn-kãe bʋgo?

² Woto yɩɩ pãn-komsem sasa a Pɩɛɛr vɩɩmã pʋgẽ. Sãmbg sẽn ka be, yɩɩ sasa a sẽn maan m bãngẽ a yõorã tɛka. La a Pɩɛɛr manesmã baraar yʋngã kɩtame t’a yɩ rabɛɛm bɩ? Rẽ kɩtame t’a yɩ wa “neb” nins yell a Poll sẽn bilg kaoosg poor a sẽn wa n gʋls tɩ: “Tõnd ka neb nins sẽn na n targ n sãama” bɩ? (Hebre dãmba 10:39) Tõnd wʋsg sẽn yɩɩd na n sak n deegame t’a Poll goamã pa tɩ loe ne a Pɩɛɛr ye. Bõe yĩnga? Bala a Pɩɛɛr dabeemã yɩɩ wakat bilf rabeem, tɩ rẽ yaa kongr bilf a vɩɩmã sẽn pid ne raood la tẽeb wʋsgã pʋgẽ. Woto me, tõnd wʋsg tara yɛl sẽn zĩnd d vɩɩmã pʋgẽ sẽn yaa yãnd buud ne-do, d sã n tẽegd-b yelle. Yaa sasa rabeem sẽn ling-du, n kɩt tɩ d pa rɩk sard ne raood sɩdã yĩng wa d sẽn da ratã ye. (Mak-y ne Rom dãmba 7:21-23.) D tõe n kɩsa sɩd tɩ wakat bilf kongr a woto pa kɩtd tɩ d yaa wa neb nins sẽn tard n sãama ye. La d segd n dɩka sard kãn-kãe n da lebg wa nin-kãens buudã ye. Bõe yĩnga? La wãn-wãn la d tõe n da lebg wa nin-kãens buudã?

Targ n sãam sẽn dat n yɛɛlga

3. Wãn-wãn la no-rɛɛsdb a Eli la a Zonas zoe rabeem?

³ A Poll sẽn gʋls “neb nins sẽn na n targ[ã]” wɛɛngẽ wã, a ra pa rat n yeel tɩ yaa neb nins sẽn kong raood wakat bilf pʋgẽ wã ye. Sɩd-sɩda, a Poll bãnga a Pɩɛɛr sẽn vɩɩmd yell ningã la yɛl a taab sẽn wõnd woto. Vugri, a Eli sẽn yaa no-rɛɛs sẽn tar yẽesem la sẽn togsd sɩd vẽenegã zoee rabeem n zoe n bao a yõore, Rĩm poak a Zezabɛll sẽn da rat n kʋ-a wã yĩnga. (1 Rĩm dãmba 19:1-4) No-rɛɛs a Zonas talla rabeem sẽn yaa kãseng n yɩɩda. A Zeova tʋm-a lame t’a kẽng Niniiv galʋ-tẽngẽ wã, neb wʋsg sẽn mi t’a ra pida ne nen-kɛglem la wẽnemã. Tao-tao t’a Zonas rɩka koom koglg sẽn digd Tarsis. Tarsis ra zãra ne kɩlometr 3500 ne zĩig ning a sẽn da segd n kẽngẽ wã. (Zonas 1:1-3) Baasg zãnga d pa tõe n yeel ne bʋʋm tɩ no-rɛɛsdb kãensã sẽn yaa kɩs-sɩd dãmbã bɩ tʋm-tʋmd a Pɩɛɛr yaa neb nins buud sẽn tard n lebd poorẽ wã ye. Bõe yĩng tɩ d pa tõe n yeel woto?

4, 5. a) Wãn-wãn la yɛlã sẽn da yaa to-to wã sõngd tõnd tɩ d bãng a Poll sẽn da rat n yɛɛlga, a sẽn gom ‘sãoong’ yell Hebre dãmba 10:39 pʋgẽ wã? b) Bõe la a Poll ra rat n yeele, a sẽn wa n togs tɩ: “Tõnd ka neb nins sẽn na n targ n sãama”?

 ⁴ Ges-y a Poll gomdã tõre: ‘Tõnd ka neb nins sẽn na n targ n sãama ye.’ A sẽn yeel tɩ “sãama” a ra rat n yeelame tɩ bõe? Gerɛk gom-biig ning a sẽn tũnug ne wã rat n yeela wakat ning tɩ sãoong sẽn-kõn-sa. Võor-wilgr kãngã zemsa ne yɛlã sẽn da yaa to-to wã. A Poll ra nan keooga woto: “Tõnd sã n paam vẽnegre n bãng sɩda n yaool n maand yel-wẽna ne yamleoogo, dẽ, maoong ka le be yel-wẽna yĩng ye. La sẽn keta, yaa tɩ gũ bʋʋdo la sũ-puugr sẽn wẽnd bugum sẽn na n dɩ nin-kɩɩsdba ne dabeem.”—Hebre dãmba 10:26, 27.

⁵ Woto, a Poll sẽn wa n yeel a tẽed-n-taasã tɩ, “Tõnd ka neb nins sẽn na n targ n sãama,” a ra rat n yeelame tɩ yẽ ne a karemdbã sẽn yaa kiris-neb sẽn tar kɩs-sɩdã ra rɩka sard kãn-kãe n pa na n tol n zãag ne a Zeova la b bas a sõgeneg ye. Rẽ maaneg ra na n wa baasa ne sãoong sẽn-kõn-sa bala. A Zida Iskariot yɩɩ ned sẽn targ n leb poorẽ n sãam woto. Yɩɩ woto me ne sɩdã bɛɛb a taab sẽn kɩɩs a Zeova vʋʋsem sõngã ne yamleoogã. (Zã 17:12, NW; 2 Tesalonik rãmba 2:3) Nin-kãensã bee “rabeem rãmba” sẽn paamd sãoong sẽn-kõn-sa wã makr bugum mogrẽ wã sʋka. (Wilgri 21:8) D pa tol n dat n yɩ nin-kãensã buud ye, ayo!

6. A Sʋɩtãan Munaafɩɩk ratame tɩ d tall manesem bʋgo?

⁶ A Sʋɩtãan Munaafɩɩk ratame tɩ tõnd targ n leb poorẽ n sãame. A sẽn yaa “sɩlem” karen-saambã, a miime tɩ manesem kãngã sẽn wãad nedã nong n sɩngda bilf-bilfu. (Efɛɛz rãmba 6:11) A sã n wa ne namsg kiris-nebã zut b tẽebã yĩng t’a sẽn datã pa yɩ, a Sʋɩtãan baood n na n sãama kiris-neb hakɩɩkã tẽeb bilf-bilf ne sɩlem n yɩɩda. A ratame t’a Zeova Kaset rãmb nins sẽn tar raood la yẽesmã yɩ sɩddd. Bɩ d ges a sẽn tũnug ne manesem nins n zab ne kiris-neb nins sẽn yaa Zʋɩf rãmbã a Poll sẽn gʋlsã.

 B sẽn da tusd kiris-nebã to-to sẽn na yɩl tɩ b targe

7. a) Yel-bʋs n zĩnd Zerizalɛm tigingã pʋgẽ? b) Yɛlã ra yaa wãn-wãn tẽebã wɛɛngẽ ne a Poll karemdb kẽere?

⁷ Yɛlã wilgdame t’a Poll gʋlsa a lɛtrã Hebre dãmbã sẽn zems yʋʋmd 61 T.W. Rãmbg n zĩnd tiging ning sẽn da be Zerizalɛmã pʋgẽ. A Zezi kũumã poore, nams-toos tẽebã yĩng n wa, tɩ yɩ tɩlae tɩ kiris-neb wʋsg sẽn da be galʋ-tẽngẽ wã sãeege. Baasg zãnga, bãan wakat n pʋgl rẽ, tɩ kiris-nebã sõor paam n fɩɩge. (Tʋʋma 8:4; 9:31) Yʋʋmã sẽn tall loogrã, namsg a taab tẽebã yĩnga, la yel-tood a taab n wa wakat-wakate. Wõnda a Poll sẽn da wa n gʋlsd a lɛtrã Hebre dãmbã tɩ tigingã ra ye tara bãan sãnsãoodo. Ne rẽ fãa, weoogr n da be. Sẽn pẽneg yʋʋm pi-gĩn a tãab n da looge, a Zezi sẽn da reng n togs tɩ Zerizalɛm na n paama sãoongã tɛkã. Wõnda neb kẽer n tags tɩ saabã ra kaoosame n yɩɩd sẽn segdã, la tɩ tõe t’a pa wa mik tɩ bãmb ket n vɩ ye. Neb a taaba, sẽn yɩɩd fãa neb nins sẽn lebg tẽedb paalmã ra nan pa paam makr ne nams-toaag b tẽebã yĩng ye, la b ra pa mi sõma tɩ b ra segd n tõoga toog makr pʋgẽ ye. (Hebre dãmba 12:4) Sɩd-sɩda, a Sʋɩtãan baoome n na n tũnug ne yɛl a woto. Yaa “sɩlem” manesem bʋs la a tũnug ne?

8. Manesem bʋg la Zʋɩf rãmb wʋsg tall ne kiris-neb tigingã sẽn da sɩngdã?

⁸ Zʋɩf rãmb nins sẽn da be Zerizalɛm la Zide wã gesa kiris-neb tigingã sẽn da sɩngdã ne paoogre. D sã n ges a Poll lɛtrã, d bãngda Zʋɩf tũudmã nanambs sẽn yaa tɩta-nebã la b poorẽ dãmbã sẽn yaal kiris-nebã to-to. Tõe tɩ b sɩd yeela woto: ‘D tara wẽn-do-kãsengã Zerizalɛm, sẽn be sẽn na maan yʋʋm kobse! D tara maan-kʋʋd kãsem sẽn tar naam sẽn tʋmd be ne a maan-kʋʋd-pʋgdsã. B kõta maand daar fãa. D tara Tõogã, malɛk rãmb sẽn taas a Moiizi. Tõog-kãngã b sẽn kõ wã luglg naaga ne yel-bãn sẽn yaa kãsems Sinai Tãngã zugu. Tũudum wil-kãngã sẽn nan sɩngdã, kiris-nin-kãensã, sẽn kɩɩs n yi Zidaismã pʋgẽ wã pa tar bõn-kãensã ba a yembr meng ye!’ Paoogr a woto ta a bõn-datlã bɩ? Vẽenega, manesem a woto kẽesa kiris-neb sãnda sẽn yaa Hebre rãmb yɩɩr pʋgẽ. A Poll lɛtrã wa n sõng-b-la wakat ning sẽn zems kɛpɩ wã sasa.

B sẽn da pa segd n targ abada n sãama võore

9. a) Gom-zu-raoog bʋg n pid lɛtr ning a Poll sẽn taas Hebre dãmbã pʋgẽ? b) Wãn to la kiris-nebã sõgend wẽn-doog sẽn yaa sõma n yɩɩd a soab ning sẽn da be Zerizalɛmã pʋgẽ?

⁹ Bɩ d ges bʋʋm a yiib a Poll sẽn kõ a saam-biisã la a saam-bi-pogsã sẽn da be Zide wã sẽn na yɩl tɩ b ra targ abada n sãama. Pipi soabã yaa kiris-neb balengã siglg yɩɩdmã n pid lɛtr ning a sẽn taas Hebre dãmbã pʋgẽ. A Poll lɛtrã fãa pʋgẽ, yaa gom-zu-raoog kãng la a wɛgs-yã. Wẽn-doogã sẽn da be Zerizalɛmã ra yaa mamsg bala, ne yel-sɩd sẽn yaa kãseng n yɩɩd wʋsgo, sẽn yaa a Zeova tẽeb wẽn-doogã, sẽn yaa roog ‘sẽn ka maan ne neb nusã.’ (Hebre dãmba 9:11) Kiris-nin-kãensã ra paama zu-noog n na n sõgen tẽeb wẽn-do-kãng pʋgẽ baleng yɩlemdã yĩnga. B sõgena kaool sẽn yaa sõma n yɩɩd pʋgẽ. Kaool kãng yaa kaool paalgã b sẽn kãab hal sẽn kaoose, sẽn tall Seyõkd a Zezi Kirist sẽn yɩɩd a Moiizã.—Zeremi 31:31-34.

10, 11. a) Bõe yĩng t’a Zezi yaab rãmbã roog pa gɩdgd-a t’a sõgen wala Maankʋʋd Kãsem tẽebã wẽn-doog pʋgẽ? b) Wãn to la a Zezi ra yaa maan-kʋʋd kãsem sẽn yɩɩd Maan-kʋʋd Kãsem ning sẽn da sõgend Zerizalɛm wẽn-doogẽ wã?

¹⁰ Kiris-nin-kãensã me ra tara Maankʋʋd Kãsem a Zezi Kirista sẽn yɩɩd a to buud fãa zĩig sẽn zãrã. A ra pa a Aarõ yageng ye, ayo. La a ra yaa Maan-kʋʋd Kãsem “wa a Melkisedɛk.” (Yɩɩl Sõamyã 110:4) A Melkisedɛk yaab rãmbã roog b sẽn da pa gʋlsã ra yaa tẽn-kʋdem wẽndẽ Salɛmã rĩm la a maan-kʋʋd kãsma. Woto kɩtame tɩ sã n yaa ne bãngr-goamã wɛɛngẽ bɩ a ra makd a Zezi tɩ zemse. Yẽ maan-kʋʋrã ra pa be ne ninsaalb  sẽn pa zems zãng roogo, la a bee ne bũmb sẽn yaa kãseng n yɩɩd zĩig sẽn zãre: a ra bee ne a Zeova Wẽnnaam mengã wẽenego. Wala a Melkisedɛke, a Zezi pa sõgend wala Maankʋʋd Kãsem bal ye, la a yaa Rĩm sẽn pa na n tol n ki me.—Hebre dãmba 7:11-21.

¹¹ Sẽn paase, sẽn yaa lebend ne Zerizalɛm wẽn-doogẽ wã maan-kʋʋd kãsmã, ra pa tɩlae ne a Zezi t’a kõ maand yʋʋmd-yʋʋmd ye. A maoongã ra yaa yẽ mengã vɩɩm sẽn zems zãngã, a sẽn kõ vugr wakat fãa yĩngã. (Hebre dãmba 7:27) Maand kãensa fãa b sẽn kõ wẽn-doogẽ wã ra yaa mamsgo, makr ne a Zezi sẽn kõ bũmb ningã. A maoongã sẽn zems zãngã a sẽn kõ wã kɩtame tɩ neb nins fãa sẽn tall tẽebã sɩd paam b yel-wẽnã sugri. A Poll togsa bũmb me sẽn kõt sũ-noogo. A wilgame tɩ Maankʋʋd Kãsem kãngã kiris-nebã sẽn da bãng Zerizalɛmã sẽn yaa a Zezi wã ket n yaa wa pĩnd n pa toeemdẽ ye. A wilgame t’a yaa sik-m-meng soaba, nin-sõngo, la ned sẽn “zoet tõnd ninbãanega tõnd pãng komsem pʋgẽ.” (Hebre dãmba 4:15; 13:8) Bãng-y tɩ kiris-nin-kãensã sẽn zaeyã ra tara saagr n na n yɩ Kirist maan-kʋʋd pʋgdse! Wãn-wãn la b ra tõe n tags meng n targ n leb Zidaismã sẽn sãama “bõn-kãens sẽn ka pãnga la sẽn ka barka” pʋgẽ?—Galat dãmba 4:9.

12, 13. a) Bʋʋm a yiib-n-soab bʋg la a Poll kõ n wilg tɩ d ka segd abada n targe? b) Bõe yĩng tɩ tõog toog ning Hebre kiris-nebã sẽn da tallã ra segd n kõ-b raood tɩ b ra tol n targ n sãame?

¹² Wala kaset kãngã sã n da pa sekẽ, a Poll kõo Hebre dãmbã bʋʋm a yiib-n-soab sẽn na yɩl tɩ b ra tol n targ n sãam ye. Rẽ yaa bãmb mensã sẽn da tõog toogã tẽegre. A gʋlsame: “Bɩ y tẽeg wakat sẽn looge, tɩ yãmb pʋ-tẽer sẽn vẽnege yãmb yaool n saka namsg wʋsgo.” A Poll tẽeg-b lame tɩ b ra “lebga bõn-getse” n paam tʋʋsg ne namsgo. B ra kẽesa kẽer bãens rotẽ. Neb a taab ra zoee neb nins sẽn da be bãens-rotẽ wã ninbãaneg la b sõng-ba. N-yẽe, b talla tẽeb sẽn yaa mak-sõngo, la nang-pãnga. (Hebre dãmba 10:32-34) La, bõe yĩng t’a Poll yeel-b tɩ b ket n ‘tẽegd’ yel-tood a woto b sẽn vɩɩmdã? Rẽ pa komsd raood sɩda?

¹³ Sẽn yaa lebende, ‘tẽeg wakat sẽn loogã’ ra na n tẽega Hebre dãmbã a Zeova sẽn da teel-b makrã pʋgẽ to-to. Ne a sõngre, b ra zoe n maoo ne a Sʋɩtãan makr wʋsg n tõoge. A Poll gʋlsame: “Wẽnnaam yaa tɩrga, la bãmb kõn yĩm yãmb tʋʋmda ne y nonglma yãmb sẽn wilg bãmb yʋʋra yĩnga . . . ye.” (Hebre dãmba 6:10) N-yẽe, a Zeova tẽega tʋʋm nins fãa b sẽn da tʋm ne kɩs-sɩdã yelle, n ningd-b a pʋ-tẽerã sẽn pa tõe n yĩm bũmbã pʋgẽ. B tẽega tõnd a Zezi sẽn sagl tɩ d bĩng arzɛk saasẽ wã yelle. Wagdr ba a yembr pa tõe n zu arzɛg-kãensã ye. Mogd buud bɩ tẽng-n-piisim pa tõe n dɩ-b ye. (Matɩe 6:19-21) Sɩda, yaa kiris-ned sẽn na n targ bal n sãam la arzɛg-kãensã tõe n sãame. Rẽ ra na n sãama arzɛk buud fãa a sẽn da bĩng saasẽ. Ad sɩd yaa bʋʋm sẽn tar pãng la a Poll kõ Hebre kiris-nebã a sẽn yeel-b tɩ b ra tol n tall manesem a woto wã! Bõe yĩng tɩ b na n sãam b tʋʋmdã b sẽn tʋm ne kɩs-sɩd yʋʋm wʋsg pʋgẽ wã? Sẽn são n yɩɩd zĩig sẽn zãr yaa b sẽn da na n ket n tõogd toogo.

Bũmb ning sẽn kɩt tɩ d pa segd n tol n targ n sãama

14. Yel-tood bʋs pʋsẽ la d be tɩ wõnd b rãmb nins yʋʋm kob-yendẽ kiris-nebã sẽn segã buudu?

¹⁴ Woto me, rũndã-rũndã, kiris-neb hakɩkã tara bʋʋm sẽn tar pãng n pa na n targ ye. Pipi, bɩ d tẽeg bark ning d sẽn tar baleng yɩlemdã a Zeova sẽn kõ tõndã pʋgẽ. Wala yʋʋm kob-yendẽ kiris-nebã, d vɩɩ wakat tũudum nins b sẽn mi n yɩɩdã neb sẽn laad tõnd la b yaand tõndo, n wukd b mens n wilgd tõnd b tũudmã ro-bɛd la b rog-n-migsã sẽn sɩng hal tẽn-kʋdem wẽndẽ wã. La a Zeova kõta tõnd bas-m-yam t’a sakda tõnd balengã buudu. Sɩda, rũndã-rũndã d tara bark yʋʋm kob-yendẽ kiris-nebã sẽn pa tall ye. Tõe tɩ y sʋk tɩ ‘Wãn to la rẽ tõe n yɩ?’ La b yaool n vɩɩmda wakat ning tẽeb wẽn-doogã sẽn sɩng tʋʋmdã. Kirist lebga wẽn-do-kãng Maankʋʋd  Kãsem a lisgã yʋʋmd 29 T.W. tɛka. Bãmb neb kẽer yãa Wẽnnaam Biriblã yel-soalem tʋʋma. A kũumã poor menga, b ra maana yel-soalem n yɩɩda. La wa b sẽn deng n togsã, kũun a woto baas n yalsame.—1 Korẽnt dãmba 13:8.

15. Rũndã-rũndã, kiris-neb hakɩkã vɩɩ bãngr-gomd bʋg pidsg sasa, la rẽ võor ne tõnd yaa bõe?

¹⁵ Baasg zãnga, tõnd vɩɩ Ezekɩɛll sags 40-48 bãngr-gom-kãsengã sẽn tɩ loe ne wẽn-doogã pidsg võor sẽn tagem. * Woto d yãa Wẽnnaam sẽn dɩk segls nins n lebg n lugl baleng yɩlemdã. B yɩlga tẽeb wẽn-do-kãng n yiis tũudum dẽgeng buud fãa la bõn-naands pʋʋsg buud fãa. (Ezekɩɛll 43:9; Malaki 3:1-5) Tags-y nafa nins d sẽn paam yɩlg-kãng yĩngã yelle.

16. Manesem bʋg sẽn komsd raood la yʋʋm kob-yendẽ kiris-nebã yã-yã?

¹⁶ Yʋʋm kob-yendẽ wã, beoog-daarã ra wõnda libsg ne kiris-nebã tiging sẽn siglã. A Zezi ra reng n togsame tɩ ra na n yɩɩ wa pʋʋg b sẽn bʋd ki paalem tɩ b pʋgl n bʋd nadense, tɩ ki wã ne nadensã bãng-n-welg lebg toogo. (Matɩe 13:24-30) La yɩɩ woto. Yʋʋm kob-yendã saabã sẽnẽ, tʋm-tʋmd a Zã sẽn kʋʋlã sẽn da wa n yaa yaoolem ned ning sẽn gɩdgd zãmbã tɩ sɩdã kɩɩsg ra zoe n piuugame. (2 Tesalonik rãmba 2:6; 1 Zã 2:18) Tʋm-tʋmdbã kũum poore, pa kaoos la tũudum taoor dãmb sẽn welg toor puk n namsd bãgrã, la b ningd fut sẽn welg-b toor ye. Sɩdã kɩɩsg yelga wʋsg wa yelle. Ad woto sɩd ra komsa kiris-neb nins sẽn da tar kɩs-sɩdã raoodo! B yãa tũudum buud sẽn tar zãmb sẽn lim segls nins b sẽn dɩk baleng yɩlemdã yĩng b sẽn lugl paalmã. La rẽ maana Kiristã sẽn yẽbg tigingã poor sẽn pa ta yʋʋm koabga.

17. Wãn to la rũndã-rũndã kiris-neb tigingã kaoos n yɩɩg a soab ning sẽn zĩnd yʋʋm kob-yendẽ wã?

¹⁷ Masã, ges-y pĩndã la rũndã-rũndã wã sẽn welgẽ taab zĩig ningã. Rũndã-rũndã, baleng yɩlemdã zoe n kaoosame n yɩɩd a sẽn da kaoos to-to n ta tʋm-tʋmdbã kũumẽ wã tɛkã. Sẽn sɩng ne seb-kãngã pipi soab yiisg yʋʋmd 1879 wã tɛka, a Zeova ninga tõnd bark ne baleng yɩlemd sẽn tall paasgo. A Zeova ne Kirist Zezi kẽe tẽeb wẽn-doogẽ wã yʋʋmd 1918 sẽn na yɩl n yɩlg-a. (Malaki 3:1-5) Yʋʋmd 1919 wã tɛka, segls nins b sẽn dɩk a Zeova Wẽnnaam balengã yĩngã paama yɩlgr bilf-bilfu. Tõnd sẽn wʋmd Biiblã bãngr-goam la a noyã võor to-to wã lebga vẽeneg n paase. (Yelbũna 4:18) Yaa ãnd la b segd n pẽg bõn-kãensã yĩnga? Pa ninsaalb bal sẽn pa zems zãng ye. Yaa a Zeova bala, ne a Biriblã sẽn yaa tigingã Zugã, n da tõe n kogl A nin-buiidã tɩ b ra kẽ wẽng pʋgẽ wẽngã wakat kãngã sasa ye. Rẽ, bɩ d ra tol n bas a Zeova bark pʋʋsg ne a sẽn kõ tõnd sor tɩ d be baleng yɩlemdã pʋgẽ rũndã-rũndã n tʋmdẽ wã ye. La bɩ d rɩk sard sẽn pa vigsd n da tol n targ n sãam ye!

18. Bõe yĩng tɩ d pa segd n tol n targ n sãame?

¹⁸ Wala kiris-nin-kãensã sẽn yaa Hebre dãmbã, d tara bʋʋm a yiib-n-soab n na n zãgs rabeem la targ n leb poorẽ manesem: yaa tõnd mengã sẽn zoe n tõog toogã. D sɩnga a Zeova sõgeneg yʋʋm sẽn pa kaoos pʋgẽ tɩ d maanda woto ne kɩs-sɩd sẽn na maan yʋʋm pi-gĩn me, d maana kiris-neb tʋʋma. Tõnd neb wʋsg paama namsg b tẽebã yĩnga, b kẽes-b-la bi-bees roogẽ, n gɩdg b tʋʋmdã, n  maan-b pãng n nams-ba, bɩ b paama bõne. Neb wʋsg a taab paama kɩɩsg b zakã pʋgẽ, paoogre, yaalgo, la b seg nebã yam-kaalgo. Tõnd fãa tõoga toogo, n ket n kẽngd taoor n sõgend a Zeova ne kɩs-sɩda, baa ne vɩɩmã sẽn yaa toog la a tar zu-loeesã. D sẽn maan woto wã, d talla tõog-toog a Zeova sẽn pa na n yĩmi, tɩ rẽ yaa arzɛk wʋsg d sẽn bĩng saasẽ. Rẽnd sɩd-sɩda, pa wakat kãngã la d na n targ n kẽ dũni kʋd-kãngã sẽn yaa wẽngã pʋgẽ d sẽn bas d poorẽ wã ye! Bõe yĩng tɩ d na n maan tɩ d tʋʋm toogã yɩ faoore? Sẽn yɩɩd fãa gom-kãngã yaa sɩd rũndã-rũndã, sasa ning saabã sẽn na n wa ‘ka la bilf balã.’—Hebre dãmba 10:37.

19. Bõe yell la d na n gom sõsg ning sẽn pʋgdã pʋgẽ?

¹⁹ N-yẽe, bɩ d rɩk sard kãn-kãe n da yɩ “neb nins buud sẽn tard n sãama ye”! Sẽn yaa lebende, d yɩ “neb nins buud sẽn tar tẽebã.” (Hebre dãmba 10:39, NW) Wãn-wãn la d tõe n kɩs sɩd tɩ d zemsa ne bilgr kãngã, la wãn-wãn la d tõe n sõng d kiris-nin-taasã tɩ b maan woto? Sõsg ning sẽn pʋgdã na n vaeesa yel-kãngã.

[Tẽngr note]

Y tẽrame bɩ?

• Targ n sãam dat n yeelame tɩ bõe?

• Weoogr bʋs pʋsẽ la kiris-neb nins sẽn yaa Hebre dãmbã a Poll sẽn gʋlsã ra be?

• Bʋʋm bʋs la a Poll kõ Hebre dãmbã sẽn na yɩl tɩ b ra targ n sãame?

• Bʋʋm bʋs la d tar n na n dɩk sard n da tol n targ n sãame?

[Zãmsgã sogsgã]

[Foto rãmba, seb-neng a 7]

A Pɩɛɛr sẽn zoe rabeem wakat bilf pʋgẽ wã pa kɩt t’a yɩ wa “neb nins sẽn na n targ n sãama ye”