Bɩ d yɩ neb nins sẽn tar tẽebã

“Tõnd yaa neb nins buud sẽn tar tẽeb n paamd sɩɩg fãagrã.” —HEBRE DÃMBA 10:39, NW.

1. Bõe yĩng tɩ b tõe n yeel t’a Zeova sõgen fãa sẽn yaa kɩs-sɩd soab tẽebã tara yõod wʋsgo?

NINDAARE, y sã n wa kẽ a Zeova balemdbã Rĩung Roogẽ, bɩ y yaas bilf n ges neb nins sẽn gũbg yãmbã. Tags-y n ges manesem toɛ-toɛ wʋsg nins pʋsẽ b sẽn wilgd tẽebã. Y tõe n yãa nin-kẽemb sẽn sõgend Wẽnnaam sẽn na maan yʋʋm pi-gĩna, kom-bɩɩs sẽn yalsd kãn-kãe b taabã weoogr taoor daar fãa, la roagdb sẽn modgd wʋsg n wubd b kambã tɩ b lebgd Wẽn-zoɛtba. D tara tigingã kẽem dãmb la ministɛɛrã sõgen dãmb sẽn tʋkd zɩɩb wʋsgo. N-yẽe, y tõe n yãa tẽeb saam-biis la saam-bi-pogs sẽn tar yʋʋm toɛ-toɛ sẽn tõogd bõn-gɩdgds ne manesem buud fãa sẽn na yɩl n sõgen a Zeova. Ad ned kam fãa tẽebã sɩd tara yõod wʋsgo!—1 Pɩɛɛr 1:7.

2. Bõe yĩng t’a Poll sagls nins sẽn be Hebre dãmb sak 10 la 11 pʋgẽ wã be nafr ne tõnd rũndã-rũndã?

² Ninsaalb sẽn pa zems zãngã sʋka, sẽn bãng-b tẽebã yõod sõma wa tʋm-tʋmd a Poll sã n beẽ me, b pa waoog ye. Sɩda, a wilgame tɩ tẽeb hakɩkã n wat ne “sɩɩg fãagrã.” (Hebre dãmba 10:39) La a Poll da miime tɩ tẽebã paamda makr la sãoongo, dũni kãngã sẽn ka tẽebã pʋgẽ. A ra maanda yɩɩr wʋsg kiris-neb nins sẽn yaa Hebre dãmb sẽn da be Zerizalɛm la Zide wã yĩnga. B ra maoodame n na n kogl b tẽebã. D sã n wa vaeesd Hebre dãmb sak 10 la 11 wã babs kẽere, bɩ d ges manesem ning a Poll sẽn tũnug ne n keng b tẽebã. Rẽ vaeesgã sasa, bɩ d ges tõnd sẽn tõe n me tẽeb sẽn tar pãng n yɩɩd tõnd mensẽ wã la neb nins sẽn gũbg tõndã pʋsẽ to-to.

Tall-y bas-yard ne taaba

3. Wãn-wãn la a Poll goam nins sẽn be Hebre dãmba 10:39 pʋgẽ wã wilgd t’a ra tara bas-yard ne a tẽebã pʋgẽ saam-biis la saam-bi-pogse?

³ Pipi bũmb tõnd sẽn tõe n yã yaa a Poll  yam-sõngã ne a karemdbã. A gʋlsame: “Tõnd ka neb nins sẽn na n targ n sãama ye, tõnd yaa neb nins sẽn tẽed n paamd sɩɩg fãagrã.” (Hebre dãmba 10:39) A Poll ra tagsda yɛl sẽn yaa sõma a kiris-nin-taasã wɛɛngẽ, la pa yɛl sẽn yaa wẽns ye. Bãng-y me t’a tũnuga ne gomd ning sẽn yaa “tõnd[ã].” A Poll ra yaa nin-tɩrga. La a pa gom n zẽk a meng a karemdbã taoore, wala yẽ tɩrlmã sã n da yɩɩda bãmb tɩrlmã zĩig sẽn zãr ye. (Mak-y ne Koɛɛg Soaba 7:16.) A pa maan woto ye, la a rɩka a mengã n fãoog-ba. A wilga a bas-yard ne a sũur fãa tɩ yẽ la a karemdbã sẽn yaa kiris-neb sẽn tar kɩs-sɩdã fãa ra na n sega yel-gɩdgds sẽn komsd raoodo. La a leb n tara bas-yard me tɩ ne raoodo b ra na n zãgsame tɩ b kõn targ n sãame, la tɩ b ra na n wilgame tɩ b yaa neb nins buud sẽn tar tẽebã.

4. Yaa bʋʋm bʋs yĩng la a Poll tall bas-yard ne a tẽed-n-taasã?

⁴ Wãn-wãn la a Poll ra tõe n tall bas-yard woto? A ra muma a nin kiris-neb nins sẽn yaa Hebre dãmba kongr taoor bɩ? Sẽn yaa lebende, a kõ-b-la sagls sẽn yaa takɩ sẽn na yɩl n sõng-b tɩ b tõog b tẽebã pãn-komslem. (Hebre dãmba 3:12; 5:12-14; 6:4-6; 10:26, 27; 12:5) Baasgo, a Poll ra tara sẽn na ta bʋʋm a yiib sẽn tar pãng n na n tall bas-yard ne a saam-biisã. 1) A Poll sẽn da rɩkd a Zeova togs-n-taarã, a modgame n ges Wẽnnaam nin-buiidã wa a Zeova sẽn get-b to-to wã. A ra pa maand woto b kongrã wɛɛngẽ bal ye, la yaa b zʋg-sõma wã, la b sẽn da tõe n yãk n maan sẽn yaa sõma beoog-daar pʋgẽ wã wɛɛngẽ me. (Yɩɩl Sõamyã 130:3; Efɛɛz rãmba 5:1) 2) A Poll ra tara tẽeb sẽn pa tar sãmb-sãmb ne vʋʋsem sõngã pãn-tõogo. A ra miime tɩ bõn-gɩdgds bɩ ninsaal pãn-komslem ba a ye ra pa tõe n gɩdg a Zeova t’a pa kõ “pãng ning sẽn yɩɩd pãn-zaalgã” kiris-ned buud fãa sẽn modgd n na n sõgen Yẽ ne kɩs-sɩd ye. (2 Korẽnt dãmba 4:7, NW; Filip rãmba 4:13, NW) Woto, a Poll bas-yardã ne a saam-biisã la a saam-bi-pogsã ra pa kɛgre, bũmb sẽn pa zems bɩ saagr tallg zond-yaar ye. Bʋʋm sẽn tar pãng n da teend-a, la ra yẽbg Gʋlsg Sõamyã zug kãn-kãe.

5. Wãn-wãn la d tõe n dɩk togs-n-taar ne a Poll bas-yardã, la a biisã na n yɩɩ bõe?

⁵ Sɩd-sɩda, bas-yard ning a Poll sẽn tallã kɩtame tɩ neb a taab me maan wa yẽ. Woto ra segd n yɩɩ bũmb sẽn be nafr ne Zerizalɛm la Zide tigimsã, b sẽn paam t’a Poll gom ne-b ne manesem sẽn kõt raood woto wã. B kɩɩsdbã sẽn yaa Zʋɩf rãmbã paoogr sẽn sãamd tẽebã la yam-kaalg sẽn naag ne tɩtaamã taoore, kiris-neb nins sẽn yaa Hebre dãmba ra paama sõngr ne goam a woto. Gom-kãensã sõng-b lame tɩ b rɩk sard kãn-kãe b sũyẽ wã n yɩ neb nins buud sẽn tar tẽebã. Tõnd me tõe n maana woto ne taab rũndã-rũndã bɩ? Yaa nana wʋsg tɩ d yã pãn-komslem la zʋg-wẽns wʋsg neb a taabã nengẽ. (Matɩe 7:1-5) La d tõe n sõnga taab n yɩɩd zĩig sẽn zãre, d sã n ges la d tall naneb ne tẽeb sẽn pa wõnd a taab ning ned fãa sẽn tarã yõodo. D sã n kõ taab raood woto, yaa vẽeneg n yɩɩd tɩ tẽebã na n bɩɩme.—Rom dãmba 1:11, 12, NW.

Wẽnnaam Gomdã rɩk-n-tʋm sẽn zemse

6. Yaa seb-bʋg pʋgẽ goam la a Poll sẽn da lebgd n dɩkdẽ wã, a sẽn wa n gʋls goam nins sẽn be Hebre dãmba 10:38 pʋgẽ wã?

⁶ A Poll kenga a tẽed-n-taasã tẽeb me, ne a sẽn dɩk Gʋlsg Sõamyã n tʋm ne minimã. Wala makre, a gʋlsame: “La mam nin-tɩrga na n vɩɩ ne tẽebo, la yẽ sã n targe, mam sũur kõn yɩ noog ne-a ye.” (Hebre dãmba 10:38) Ka wã a Poll ra lebg n dɩkda no-rɛɛs a Habakuk goamã. * Wõnda a Poll karemdbã sẽn yaa kiris-neb sẽn yaa Hebre dãmba ra mii gom-kãensã sõma. Karemdb kãens ra mii bãngr-goamã sɛb sõma. D sã n ges a bõn-datlã, sẽn yaa paas kiris-neb  nins sẽn da be Zerizalɛm la sẽn da kɛg be yʋʋmd 61 sẽnẽ T.W. tẽebã, a sẽn yãk n na n gom a Habakuk mak-sõngã yellã ra zemsame. Bõe yĩnga?

7. Yaa wakat bʋg la a Habakuk gʋls a bãngr-gomdã, la yɛlã ra yaa wãn to Zida rẽ wẽnde?

⁷ Vẽenega, a Habakuk gʋlsa a sebrã sẽn yɩɩd yʋʋm pisi bal sẽn deng Zerizalɛm sãoongã sẽn zĩnd yʋʋmd 607 S.D.T.W. Yãab pʋgẽ, no-rɛɛsã yãa Kalde nebã, (bɩ Babilon nebã) sẽn yaa “nin-toose, la sũ-tʋʋlem dãmba” sẽn pigd Zida ne tʋʋlem la b sãamd Zerizalɛm, n deesd neb la buud a sorã zugu. (Habakuk 1:5-11) La b ra reng n togsa yel-beed a woto a Ezai wakatã, sẽn yɩɩd yʋʋm koabg sẽn da renge. A Habakuk wakatã, Rĩm sõng a Zozias poore a Zeoyakim n deeg naamã, tɩ wẽnemã ye piuug Zida. A Zeoyakim namsame la a kʋ neb nins sẽn da gomd a Zeova yʋʋr yĩngã menga. (2 Kɩbaya 36:5; Zeremi 22:17; 26:20-24) Pa lingr la no-rɛɛs a Habakuk sẽn kaas woto ne yɩɩrã ye: “Zusoaba, yaa wakat a wãn[a]?”—Habakuk 1:2.

8. Bõe yĩng t’a Habakuk mak-sõngã ra segd n yɩ sõngr ne kiris-nebã yʋʋm kob-yendẽ wã la rũndã-rũndã?

⁸ A Habakuk ra pa mi Zerizalɛm sãoongã sẽn da kolg wʋsg to-to wã ye. Woto me, yʋʋm kob-yendẽ kiris-nebã ra pa mi wakat ning Zʋɩf rãmbã yɛl siglg sẽn da na n sa wã ye. Rũndã-rũndã tõnd me pa mi a Zeova bʋ-kaoorã sẽn na n pids yɛl siglg wẽng kãngã zugã “daar kãnga la wakat kãng ye.” (Matɩe 24:36) Rẽ, bɩ d ges a Zeova sẽn leok a Habakuk ne manesem a yiibã. Pipi, a kõo no-rɛɛsã bas-yard tɩ saabã ra na n waa a wakate. “A ka na n kaoos tɩ loog . . . ye,” woto la Wẽnnaam yeel-yã, baa ne a sẽn tõe n wõneg a kaoosda wʋsg ninsaal nif gesgẽ wã. (Habakuk 2:3, NW) Yiib-n-soaba, a Zeova tẽega a Habakuk woto: “La nin-tɩrg na n vɩɩ ne tẽebo [kɩs-sɩda, NW].” (Habakuk 2:4) Sɩd sẽn be rasãnd la võor-wʋmb sẽn yaa nana tek woto! Bũmb ning sẽn pak n yɩɩdã pa saabã sẽn wat wakat ningã ye, la yaa tõnd sã n ket n vɩɩ ne tẽebo.

9. Wãn-wãn la a Zeova sõgen dãmb nins sẽn yaa sakdbã kell n vɩɩmd b kɩs-sɩdã maasem yĩng a) yʋʋmd 607 S.D.T.W.? b) yʋʋmd 66 T.W. poore? d) Bõe yĩng tɩ tar yõod wʋsg tɩ d paas d tẽebã pãnga?

⁹ B sẽn wa n sãam Zerizalɛm yʋʋmd 607 S.D.T.W., a Zeremi la a sekertɛɛr a Baruki, a Ebɛd-melɛke, la Rekabit rãmbã sẽn tar kɩs-sɩdã yãame t’a Zeova sẽn kãab a Habakuk bũmb ningã yaa sɩda. B ‘kell n vɩɩmdame’ n põs sãoong sẽn yɛɛsd ning sẽn wa Zerizalɛm zugã. Bõe yĩnga? A Zeova rol-b-la b kɩs-sɩdã yĩnga. (Zeremi 35:1-19; 39:15-18; 43:4-7; 45:1-5) Woto me, yʋʋm kob-yendẽ kiris-neb nins sẽn da yaa Hebre dãmbã ra saka a Poll saglgã sõma, bala Rom sodaasã sẽn wa n pig Zerizalɛm yʋʋmd 66 T.W., n lebg n loog tɩ b pa wʋm a võorã, kiris-nin-kãensa kelga a Zezi keoogrã ne kɩs-sɩd n zoe. (Luk 21:20, 21) B ra ket n vɩɩ b tẽebã yĩnga. Woto me, d na n ket n vɩɩme, saabã sã n wa mik tɩ d yaa kɩs-sɩd dãmba. Ad woto sɩd yaa bʋʋm sẽn tar pãng sẽn tusd tõnd tɩ d paas d tẽebã pãng masã!

Tẽeb mak-sõma bilgr sẽn tar pãnga

10. Wãn-wãn la a Poll bilg a Moiiz tẽebã, la wãn-wãn la d tõe n dɩk a Moiiz togs-n-taar dẽ wɛɛngẽ?

¹⁰ A Poll leb n tũnuga ne mak-sõma sẽn tar pãng n keng neb a taabã tẽebo. Y sã n wa karemd Hebre dãmb sak 11, bɩ y ges a sẽn bilgd neb mak-sõma Biiblã sẽn gom b yell ne pãng to-to. Wala makre, a yetame t’a Moiiz ‘talla tẽeb kãn-kãe wa a yãa neba nin sẽn ka tõe n yã a soabã.’ (Hebre dãmba 11:27) Sẽn dat n yeele,  t’a Zeova ra yaa yel-sɩd ne a Moiiz tɩ ra yaa wala a ra tõe n yãa Wẽnnaam ning ned nif sẽn pa tõe n yã wã. B tõe n yeela woto ne tõnd me bɩ? Yaa nana tɩ d gom zems-n-taar ne a Zeova yelle, la zems-n-taar kãng meeb la a pãng paasg baoodame tɩ d modg sõma. Yaa tɩlae tɩ d maan modg-kãnga! A Zeova yaa ned meng ne tõnd hal tɩ d tagsd a yelle, d sã n wa rɩkd sardo, sẽn paas sard nins sẽn wõnd b pa zem fɩ wã bɩ? Tẽeb kãng buud na n sõnga tõnd tɩ d tõog toogo, baa kɩɩsg ning sẽn yaa toaag n yɩɩdã pʋgẽ menga.

11, 12. a) Tõe t’a Enok tẽebã paama makr yel-bʋs pʋsẽ? b) Keoor bʋg sẽn kõt raood la a Enok paam-yã?

¹¹ Ges-y a Enok tẽebã me. Yaa toog tɩ d mams kɩɩsg ning a sẽn segã. A Enok ra segd n taasa bʋ-kaoor koe-toaag sẽn ningd neb nins sẽn da vɩ rẽ wẽndã taale. (Ziid 14, 15) Namsg ning sẽn wa ra-kãngã sẽn tall kɩs-sɩdã zugã yɩɩ nams-toaag menga, namsg sẽn tall nen-kɛglem wʋsg hal t’a Zeova ‘toeem-a zĩiga,’ n kɩt t’a yi vɩɩmẽ wã n gũs kũum pʋgẽ t’a bɛɛbã nan da paam n yõk-a ye. Woto, a Henok pa yã bãngr-gomd ning a sẽn togsã pidsg ye. Baasg zãnga, a paama kũun sẽn yaa sõma n yɩɩd meng zĩis kẽer wɛɛngẽ.—Hebre dãmba 11:5, NW; Sɩngre 5:22-24.

¹² A Poll wilgdame: “Sẽn deng a zĩigã toeengo, [a Enok] paama kaset t’a ra taa Wẽnnaam yam sõma.” (Hebre dãmba 11:5, NW) Bõe la rẽ ra rat n yeele? Nand t’a gũs kũum pʋgẽ, tõe t’a Enok ra paama yãab buudu. Tõe tɩ yaa yãab sẽn tɩ loe ne tẽng zug Arzãnã, a soab ning pʋgẽ b sẽn na n wa nek-a daar a yembr ka la bilfã. Sẽn yaa to-to fãa, a Zeova kɩtame t’a Enok bãng t’A sũur da nooma ne a sẽn tall kɩs-sɩdã. A Enok nooga a Zeova sũuri. (Mak-y ne Yelbũna 27:11.) D sã n tagsd a Enok vɩɩmã zugu, d yĩng sidgdame, bɩ bõe? Y ratame n vɩɩmd ne tẽeb woto bɩ? Sã n yaa woto bɩ y tags mak-sõms a woto zutu. Ges-y-b wa neb sɩd-sɩda. Rɩk-y sard kãn-kãe n vɩɩmd ne tẽeb daar ne a to fãa. Tẽeg-y me tɩ neb nins sẽn tar tẽebã pa sõgend a Zeova n tikd wakate bɩ sasa sẽn tɩ loe ne wakat ning Wẽnnaam sẽn na n pids a kãabsã fãa zut ye. Walla tɩ d maan woto, d rɩka sard kãn-kãe n na n sõgen a Zeova wakat sẽn-kõn-sa yĩnga! Woto maaneg n yaa vɩɩm manesem ning sẽn yaa sõma n yɩɩd yɛl siglg kãngã pʋgẽ la sẽn wata wã pʋgẽ.

D sẽn na n paam pãng n paas tẽebã pʋgẽ to-to

13, 14. a) Wãn-wãn la a Poll goam nins sẽn be Hebre dãmba 10:24, 25 pʋgẽ wã tõe n sõng tõnd tɩ d maan tɩ d tigissã yɩ sũ-noog sasa? b) Kiris-neb tigissã pipi bõn-datl yaa bõe?

¹³ A Poll wilga kiris-neb nins sẽn yaa Hebre dãmba soay sẽn zems wʋsg b sẽn tõe n tũnug ne n paas b tẽebã pãnga. Bɩ d ges bãmb b yiib bala. Tõe tɩ d mii a saglg ning sẽn be Hebre dãmba 10:24, 25 pʋgẽ wã, sẽn yet tõnd tɩ d tigimd taab wakat fãa kiris-neb tigissẽ wã. La tẽeg-y t’a Poll goamã vʋʋsmã sẽn vẽneg-a t’a gʋlsã pa rat n yeel tɩ d segd n yɩɩ gɛtb sẽn ka maand bũmb bal tigis-kãens sasa ye. Wall tɩ yɩ woto, a Poll bilgda tigissã wa segb sẽn na yɩl n bãng taaba, n tus taab tɩ d sõgen Wẽnnaam sõma n paase, la d raool taaba. D kẽngda be n na n kõ, pa sẽn na yɩl n deeg bal ye. Rẽ sõngdame n kɩtdẽ tɩ d tigissã yaa sũ-noog sasa.—Tʋʋma 20:35, NW.

¹⁴ La pipi, d kẽngda kiris-neb tigissẽ wã sẽn na yɩl n balem a Zeova Wẽnnaam. D maanda woto n naagd pʋʋsgã la yɩɩllã pʋgẽ, n kelgd  ne bõn-datla, la d kõt “no-bɩmsã biisi,” sẽn yaa pẽgr goam d sẽn taasd a Zeova d leoorã pʋsẽ, la tigissã sõssẽ wã. (Hebre dãmba 13:15, NW) D sã n tall bõn-datɩ kãensã d yamẽ la d bao n ta-b tigisg fãa, d tẽebã na n paama kengr wakat fãa tɩ sãmbg ka be ye.

15. Bõe yĩng t’a Poll sagl kiris-neb nins sẽn yaa Hebre dãmbã tɩ b gãd b ministɛɛrã kãn-kãe, la bõe yĩng tɩ sagl-kãng zems rũndã-rũndã?

¹⁵ Manesem a to d sẽn na n tũnug ne n keng d tẽebã yaa moonegã tʋʋmde. A Poll gʋlsame: “Bɩ tõnd gãd d saagrã togsg zãma sʋkã kãn-kãe n da yuus ye, bala sẽn kãab-a wã yaa sɩd soaba.” (Hebre dãmba 10:23, NW) Y tõe n sagla neb a taabã tɩ b gãd bũmb kãn-kãe, sã n wa wõnd b bee yell pʋgẽ n dat n koms raoodo. Sɩd-sɩda, a Sʋɩtãan da weoogda kiris-nin-kãensa sẽn yaa Hebre dãmba sẽn na yɩl tɩ b bas b ministɛɛrã tɩ lʋɩ, la a weoogda Wẽnnaam nin-buiidã me rũndã-rũndã tɩ b maan woto. Weoogr kãngã taoore, bõe la d segd n maane? Ges-y a Poll sẽn maan bũmb ningã.

16, 17. a) Wãn-wãn la a Poll paam daood ministɛɛrã yĩnga? b) Bõe la d segd n maane, d sã n mik tɩ d kiris-ned ministɛɛrã neng a yembr kẽes-d-la rabeem?

¹⁶ A Poll gʋlsa kiris-neb nins sẽn be Tesalonikã woto: “Tõnd sẽn da reng n namse, tɩ b tall paoogr wʋsg manesem ne-d poor Filipã (wala yãmb sẽn mi wã), sẽn tall raood ne tõnd Wẽnnaamã maasem sẽn na yɩl n togs yãmb Wẽnnaam koe-noogã ne maoor wʋsg to-to wã.” (1 Tesalonik rãmba 2:2, NW) Wãn-wãn la b “tall paoogr wʋsg” ne a Poll la a tũud-n-taasã Filipi? Sã n yaa ne mitb kẽere, Gerɛk gom-biig ning a Poll sẽn tũnug ne wã rat n yeelame tɩ tʋʋsgo, yãnd bɩ paoogr manesem. Filip pãn-soaadbã ra pãb-b-la ne kalwaase, n lob-b bãens-rotẽ, n balg-b dabãongo. (Tʋʋma 16:16-24) Wãn-wãn la yel-toog kãngã tuk a Polle? A Poll misioneer so-toak ning a sẽn maan dẽ poor Tesalonikã, neba yãame t’a zoee rabeem n targ n leb poorẽ bɩ? Ayo, a ‘talla raoodo.’ A tõoga rabeemã n kẽng taoor n moon ne raoodo.

¹⁷ A Poll raoodã ra yita yɛ? Yẽ mengã nengẽ bɩ? Ayo, a yeelame t’a tõog n paama raood “tõnd Wẽnnaamã maasem” yĩnga. Sõngr sebr Biiblã lɛbgdb yĩng yetame tɩ b tõe n lebga togsg kãngã woto: “Wẽnnaam yiisa rabeem tõnd sũyã pʋsẽ.” Woto, sẽn yɩɩd fãa, yãmb sã n neẽ tɩ y pa tar daood y ministɛɛrã pʋgẽ, bɩ ministɛɛrã neng ning sã n wõnd a kẽesda yãmb rabeem, bõe yĩng tɩ y pa na n kos a Zeova t’a sõng yãmb me woto? Kos-y-yã t’a yiis rabeemã y sũurẽ wã. Kos-y-yã t’a sõng-y tɩ y tall daood n tʋm tʋʋmdã. Sẽn paase, maan-y yɛl a taab sẽn zemse. Wala makre, segl-y n tʋm ne ned sẽn tar minim kaset kũun ning buud sẽn pak yãmbã pʋgẽ. A tõe n tɩ loee ne leebgã zĩisẽ teritoaar dãmbã, sor zug kasetã, kaset sẽn pa yãk wakat bɩ kaset kũun ne telefonã. Tõe tɩ y tũud-n-taagã  na n sak n yɩɩ pipi n kõ kasetã. Sã n yaa woto bɩ y ges a sẽn maand to-to n dɩk yam. La rẽ poor bɩ y tall daood n mak n gese.

18. Bark bʋs la d tõe n paame, d sã n tall daood d ministɛɛrã pʋgẽ?

¹⁸ Yãmb sã n sɩd tall daoodo, bɩ y tags a biisã sẽn tõe n wa yɩ a soaba. Y sã n pẽdg n pa koms raoodo, y na n vɩɩmdã yɛl sẽn kõt sũ-noog sɩdã taasg pʋgẽ, yɛl y sẽn da na n kongẽ, y sã n da pa maan woto. Y sũur na n yɩɩ noog tɩ y bãng tɩ y taa a Zeova yam, y sẽn maan bũmb sẽn yaa toog ne-yã. Y na n paama a sõngr la a bark n tõog y rabeemã. Y tẽebã pãng na n paasame. Sɩd-sɩda, y pa tõe n mao n keng neb a taabã tẽeb n pa keng yãmb mengã tẽeb ye.—Ziid 20, 21.

19. Bõe keoor sẽn tar yõod wʋsg n gũud “neb nins buud sẽn tar tẽebã”?

¹⁹ Bɩ y ket n paasd y tẽebã la neb nins sẽn gũbg yãmbã tẽeb pãnga. Y tõe n maana woto n keng y mengã la neb a taabã tẽeb n tũnug ne Wẽnnaam Gomdã ne minim, n zãmsd tẽeb mak-sõma nins Biiblã sẽn gom b yellã la y bilgd-b y yamẽ wã vẽenega, n segendẽ la y kẽesd y mens kiris-neb tigissẽ wã, n gãt zãma sʋk ministɛɛrã sẽn yaa zu-noog sẽn tar yõod wʋsgã. Y sẽn maand bõn-kãensa wã sasa, bɩ y kɩs sɩd tɩ y sɩd bee “neb nins sẽn tẽed [tar tẽebã, NW]” sʋka. Tẽeg-y me tɩ nin-kãensã buud tara keoor sẽn tar yõod wʋsgo. B yaa “neb nins sẽn tẽed n paamd sɩɩg fãagrã.” * Bɩ y tẽebã ket n bɩtẽ, la bɩ a Zeova Wẽnnaam kogl-y vɩɩm pʋgẽ wakat sẽn ka sɛt yĩnga!

[Tẽngr not rãmbã]

Y na n leokẽ-la wãn to?

• Wãn-wãn la a Poll wilg bas-yard ne kiris-neb nins sẽn yaa Hebre dãmba, la bõe la rẽ tõe n zãms tõndo?

• Bõe yĩng t’a Poll sẽn gom no-rɛɛs a Habakuk yellã zems wʋsgo?

• Gʋlsg Sõamyã tẽeb mak-sõms bʋs la a Poll bilg ne manesem sẽn tar pãnga?

• Tẽeb kengr bʋg sẽn zems la a Poll sagl tɩ d tũ?

[Zãmsgã sogsgã]

[Foto, seb-neng 15]

B sẽn nams a Poll Filipã poore, a talla raood n ket n moondẽ

[Foto rãmba, seb-neng 16]

Y tõe n talla raood n mak kasetã kũun nens toɛ-toɛ bɩ?