‘Ned ninga sẽn yaa bilfã’ lebga “tusri”
‘Ned ninga sẽn yaa bilfã’ lebga “tusri”
“Ned ninga sẽn yaa bilf n yɩɩd a taaba na n lebga tusri. La ned ninga sẽn paooda na n lebga bu-kãsenga.”—EZAI 60:22.
1, 2. a) Bõe yĩng tɩ lik lim tẽngã rũndã-rũndã? b) Wãn-wãn la a Zeova vẽenemã yãg a nin-buiidã zut bilf-bilfu?
“LIK meng n na n lud tẽngã, tɩ lik bida lud buud sulã; la a Zeova na n yãga fo zugu, la b na n yãa a mengã ziir fo zugu.” (Ezai 60:2, NW) Gom-kãensã bilgda yɛlã sẽn yaa to-to tẽngã zug yʋʋmd 1919 tɛkã sõma-sõma. Dũni kiris-nedemdã zãgsa a Zezi Kirist sẽn yaa “dũniyã vẽenem” belem a naam pʋgẽ wã. (Zã 8:12; Matɩe 24:3, NW) A Sʋɩtãan sẽn yaa “lik soaadba sẽn so pãng masã” naabã ‘sũ-puugr kãsengã’ yĩnga, yʋʋm kob-gĩnd 20 soabã yɩɩ ninsaal kʋdemdã sasa ning b sẽn tall nen-kɛglem la b kʋ neb n yɩɩge. (Wilgri 12:12; Efɛɛz rãmba 6:12) Neb wʋsg sẽn yɩɩd bee tẽeb lik pʋgẽ.
2 Ne rẽ fãa, vẽenem sɩd yãgda rũndã-rũndã. A Zeova ‘yãgda’ a sõgen dãmbã sẽn yaa sẽn zae-bã kell sẽn yaa a yĩngr “pagã” lɛdgdb tẽng zugã zutu. (Ezai 60:1, NW) Sẽn yɩɩd fãa b paam-m-mengã ne Babilon yembdã yʋʋmd 1919 wã tɛka, b puka Wẽnnaam ziirã la b bas tɩ b ‘vẽenemã yãg neba sʋka.’ (Matɩe 5:16) Sẽn sɩng ne yʋʋmd 1919 n tɩ ta yʋʋmd 1931, Rĩungã vẽenem talla pɩlb n paasdẽ, nin-kãensã sẽn yãk Babilon tagsa nins sẽn da ket n gɩdgd b tʋʋma n basã. B sõorã fɩɩgame n ta tus pi-gĩna, a Zeova sẽn pids kãab-kãngã wã: “N-ye, mam na n tigma Israɛll neb nins fãa sẽn ketã. Mam na n tigma bãmb tɩ b lebg wa piis sẽn be yãgr pʋgẽ, la a wa rũm-bõoneg sẽn be bãoogẽ n wãbdẽ, tɩ tẽnga pid ne ninsaalb wʋsgo.” (Miise 2:12) Yʋʋmd 1931, a Zeova ziirã a sõgen dãmbã zutã lebga vẽeneg n paas menga, b sẽn wa n sak yʋʋr ning sẽn yaa a Zeova Kaset rãmbã.—Ezai 43:10, 12, NW.
3. Wãn-wãn la lebg vẽeneg tɩ sẽn zae-bã toor sẽn ka be, a Zeova vẽenemã ra na n yãga neb a taab zutu?
3 A Zeova na n yãga “bãg-bila” kell sẽn zaeyã neb zut bal bɩ? (Luk 12:32, NW) Ayo. Yʋʋmd 1931, bõn-bɩʋʋng kiuug pipi daar Gũusg Gasgã goma sull a to yelle. A wɛgsa Ezekɩɛll 9:1-11 võorã sõma, n wilg tɩ rao ning sẽn tar rʋb-tʋkã yell b sẽn gom verse kãens pʋsẽ wã makda kellã sẽn zaeyã. Yaa ãnd dãmb n paamd bãnd b rĩirẽ “rao” kãngã nengẽ? Yaa “piis a taab[a],” sẽn yaa neb nins sẽn tar saagr n na n vɩɩmd wakat sẽn-kõn-sa tẽng zug arzãnẽ wã. (Zã 10:16; Yɩɩl Sõamyã 37:29) Yʋʋmd 1935, b bãngame tɩ “piis a taab[a]” sul-kãngã ra yaa “kʋʋng [kãsengã, NW] . . . sẽn yi soolem fãa” tʋm-tʋmd a Zã sẽn yã yãab pʋgẽ wã. (Wilgri 7:9-14) Yʋʋmd 1935 wã tɛk n tõk masã, sẽn pak n yɩɩd yaa kʋʋng kãsengã tigisgu.
4. Yaa ãnd dãmb la “rĩm dãmba” la “tẽn-tẽnsa” yell b sẽn gom Ezai 60:3 pʋgẽ wã?
4 B goma tiging kãng yell a Ezai bãngr-gomdẽ wã woto: “Buud a taaba na n waa fo vẽenema pʋgẽ. La rĩm dãmb na n waa fo vẽenema yãgb yĩnga.” (Ezai 60:3) “Rĩm dãmb” nins yell b sẽn gom ka wã yaa ãnd dãmba? Yaa neb 144 000 kell sẽn naag ne a Zezi Kirist n yaa saasẽ Rĩungã naam rogem pʋɩt-n-taasã, la b lʋɩt taoor kasetã tʋʋmd pʋgẽ wã. (Rom dãmba 8:17, NW; Wilgri 12:17; 14:1) Rũndã-rũndã, “buud a taaba” sõor yɩɩda kellã sẽn zaeyã neb tus a wãna hal wʋsgo. Buud a taab kãens yaa neb nins sẽn tar saagr n na n vɩɩmd tẽngã zug n wat a Zeova nengẽ n na n paam zãmsg la b boond neb a taabã tɩ b maan woto wã.—Ezai 2:3.
A Zeova sõgen dãmb sẽn tar yẽesma
5. a) Yel-bʋs n wilgd t’a Zeova nin-buiidã yẽesem pa booge? b) Tẽn-bʋs n paam fɩɩgr wʋsg yʋʋmd 1999? (Ges-y tablo wã sẽn be seb-vã-neng 27-30.)
5 Ad sɩd yaa yẽesem tɛkẽ la a Zeova rũndã-rũndã Kaset rãmbã wilg yʋʋm kob-gĩnd 20 soabã pʋgẽ! La baa ne weoogrã sẽn tall paasgã, b yẽesmã pa boog yʋʋmd 2000 wã sẽn da tar kolgrã sasa ye. B kell n pa reem ne a Zezi no-kãngã ye: ‘Maan-y buudã fãa neb tɩ b yɩ karen-biisi.’ (Matɩe 28:19, 20, NW) Yʋʋm kob-gĩnd 20 soabã yaoolem tʋʋmd yʋʋmdã, koe-noogã moondb sẽn sɩd moondã sõor sẽn sãd yaa 5 912 492. B rɩka hal lɛɛr dãmb 1 144 566 849 n sõs ne neb a taabã Wẽnnaam la a raabã wɛɛngẽ. B maana lebg-n-tɩ-ges rãmb 420 047 796 neb sẽn wilgd ratem ne sɩdã nengẽ, la b maan Biibl zãmsg 4 433 884 ne neb b yiy tɩ pa tũ ne ligd yaoob ye. Ad sɩd yaa yẽesem tʋʋm kãseng menga!
6. Segl-paalg bʋg la b ra rɩk so-pakdbã yĩnga, la manesem bʋg la rẽ wa ne?
6 Yʋʋm-vẽkr kiuug ning sẽn loogã, Siglgã Zug sull wilga toeeng b sẽn maan lɛɛr dãmb sõor b sẽn baood tɩ so-pakdbã kõ wã wɛɛngẽ. Neb wʋsg tũnuga ne rẽ n kẽ wakat fãa la sõngr so-pakdbã sʋka. Wala makre, yʋʋmd 1999 pipi kiis a naasã, Peyiba filiallã paama wakat fãa so-pakr kosg sɛb sõor naoor a naas n yɩɩd rɩẽ wakat kãnga. Gãna wilga woto: “So-pakdbã lɛɛr dãmb sẽn toeema yĩnga, tõnd wakat fãa so-pakdbã sõor talla paasgo.” Yʋʋmd 1999 tʋʋmd yʋʋmdã pʋgẽ, dũniyã gill zugu, so-pakdbã sõor taa 738 343, tɩ woto wilgd sõm-sõma tɩ b ‘wɩnga ne tʋʋm sõama maanego.’—Tɩt 2:14.
7. Wãn-wãn la a Zeova ning a sõgen dãmbã yẽesem tʋʋmd barka?
7 A Zeova ninga tʋʋm-kãngã b sẽn maan ne yẽesmã bark bɩ? N-yẽe. A tũnuga ne a Ezai n yeele: “Zẽk f neng n ges zĩiga fãa. Bãmb fãa tigimdame n wat fo nengẽ. Fo komdibli wã yita zĩ-zãrsẽ n watẽ, la neb bugda fo kompugli wã b nusẽ.” (Ezai 60:4) “Komdibli” la “kompugli” sẽn zae b sẽn tigma ket n sõgenda Wẽnnaam ne yẽesem. La masã, b tigimda a Zezi piis a taabã a Zeova “komdibli” la a “kompugli” sẽn zaeyã sɛɛgẽ tẽns 234 pʋsẽ la mogrã-sʋk-tẽnsẽ.
“Tʋʋm sõng fãa”
8. ‘Tʋʋm sõama’ bʋs la a Zeova Kaset rãmbã maanda?
8 Rĩungã koe-noog mooneg la sõng sɩdã ratb tɩ b lebg karen-biis yaa zɩɩb sẽn zao kiris-nebã zutu. La b paama “seglg zãng tʋʋm sõng fãa yĩnga.” (2 Tɩmote 3:17, NW) Woto, b geta b zagsã yell sõma, n yaa sãamb reegdba, la b get bãad dãmbã. (1 Tɩmote 5:8; Hebre dãmba 13:16) Yamleoog tʋm-tʋmdb me n kẽesd b toog tʋʋm wala Rĩungã rot meeb pʋsẽ. Rẽ me yaa tʋʋmd sẽn kõt kaseto. Togo, Rĩung roog a yembr meeb poore, egiliiz karismatik a yembr taoor dãmb ra rat n bãnga bũmb ning sẽn kɩt t’a Zeova Kaset rãmbã ra tõe n me b rotã b toore, tɩ yaool n da yaa tɩlae ne egiliizã tɩ b yao neb tɩ b me bãmb rẽndã võore! Togo wilgame tɩ Rĩungã Rot sẽn yaa sõma meebã talla pãn-tusdg sẽn yaa sõma yagsã zut hali n kɩt tɩ neb kẽer makd n na n luaas bɩ b me rot sags nins pʋsẽ b sẽn na n me Rĩung Rotã.
9. Wãn-wãn la a Zeova Kaset rãmbã maan-yã, yel-beedã sẽn wa n wã wã?
9 Wakat ninga, tʋʋm-sõma buud a to la b segd n maane. Rɩẽ tʋʋmd yʋʋmdã, yel-beed n paam tẽns wʋsgo, la naoor wʋsgo, pipi rãmb sẽn kẽng yel-beedã zĩisẽ n tɩ sõng nebã ra yaa a Zeova Kaset rãmbã. Wala makre, sob-kãseng b sẽn boond tɩ Hurricane Mitch varga Hõnduras tẽngã bab-kãsenga. Tao-tao, filiallã sigla yel-yãgdem yell gesg sul tɩ b sigl sõngrã b sẽn na n maanã. Hõnduras la tẽns wʋsg a taab kaset rãmb kõo futu, rɩɩbo, tɩto la bõn-yood a taab sẽn yaa tɩlae. Babs Meeb Sulã tũnuga ne b minimã n lebg n me roto. Pa kaoos la tõnd saam-biis nins sẽn nams yel-beedã yĩngã paam sõngr n leb n leb b daar fãa tʋʋmẽ wã ye. Ekoatɛɛre, a Zeova Kaset rãmbã sõnga b saam-biisã, koom wʋsg sẽn waa n sãam rot kẽerã. A sẽn ges b sẽn welg yellã sõma-sõma to-to wã, goosneema nin-kãseng a ye yeelame: “Mam sã n da tõe n paam sul-kãngã fãa, m na maan yel-soalma! Yaa neb wa yãmb n segd n be dũniyã gill zugu.” Tʋʋm-sõma a woto kɩtdame tɩ b pẽgd a Zeova Wẽnnaam, la b kõta kaset tɩ tõnd tara ‘wẽn-zoeer sẽn tar yõod ne bũmb fãa’ wã.—1 Tɩmote 4:8, NW.
B ‘yɩgda wa sawat n watẽ’
10. Baa ne sẽn zae-bã sõor sẽn boogdã, bõe yĩng tɩ b moond a Zeova yʋʋrã n yɩɩd pĩndã?
10 Masã a Zeova sʋkdame: “Yaa ãnda rãmb n yɩgd wa sawato la wal sẽn dabd b tʋgdẽ wã? Tɩ bõe, tẽns nins koom sẽn gũbga tẽeda maam. Yaa tarsis koom kogend n deng taoore n na n tɩ tall fo kamba ne b wanzũri la b sãnema n yi zĩ-zãrsẽ n wa. . . . Sãamba na n le mee fo lalsa yɛsa, la b rĩm dãmba na n lebga yãmb tʋm-tʋmdba.” (Ezai 60:8-10) Pipi rãmb sẽn sak a Zeova ‘yãgbã’ ra yaa a “komdibli,” sẽn yaa kiris-neb nins sẽn zaeyã. Rẽ poore yaa “sãamba” sẽn yaa kʋʋng kãsengã n wa. B sõngda b saam-biisã sẽn yaa kiris-neb nins sẽn zaeyã ne kɩs-sɩda, n tũud b sor-wilgrã koe-noogã mooneg pʋgẽ. Woto, baa ne sẽn zae-bã sõor sẽn boogdã, a Zeova yʋʋrã moonda dũniyã gill zug n yɩɩd pĩndã.
11. a) Bõe n ket n kẽngd taoore, la rẽ biis yɩɩ bõe yʋʋmd 1999? b) Tẽn-bʋs n tall lisg sõor kãsems yʋʋmd 1999? (Ges-y tablo ning sẽn be seb-vã-neng 27-30.)
11 Rẽ kɩtame tɩ neb milyõ rãmb kaoogd n wat “wa wal sẽn dabd b tʋgdẽ,” n paamd soolg kiris-neb tigingã pʋgẽ. Yʋʋmd fãa neb tusa kobs n paasde, la kʋɩlengã pakame tɩ neb sẽn yɩɩd woto yɛs tõe n kẽ. A Ezai yeelame: “Fo kʋɩlensa na n pagsa wakat fãa. B ka na n pag wĩntoog ne yʋng ye. B na n pakame tɩ neba tõe n tall buud a taaba arzɛgs n wa kẽ be.” (Ezai 60:11) Rɩẽ, neb 323 439 n deeg lisgu, n wilg tɩ b rɩka b mens n kõ a Zeova, la woto wilgdame t’a ket n nan pa pag kʋɩlensã ye. “Tẽn-tẽnsã fãa bõn-sõma,” sẽn yaa kʋʋn-kãsengã nebã ket n kaoogdame n tũud kʋɩlens kãens n kẽedẽ. (Azze 2:7, NW) B pa gɩdgd ned ba a yembr sẽn dat n bas likã t’a ra kẽ ye. (Zã 12:46) Bɩ nin-kãensã ra tol n bas b nanebã ne vẽenemã ye!
B pa zoet rabeem kɩɩsgã taoor ye
12. Wãn-wãn la neb nins sẽn nong likã mak n na n kiis vẽenemã?
12 Neb nins sẽn nong likã kisa a Zeova vẽenemã. (Zã 3:19) Kẽer makdame meng n na n kiis vẽenem kãnga. Rẽ pa ling tõnd ye. Baa a Zezi sẽn yaa “vẽenem sɩd-sɩda sẽn wa dũniyã pʋgẽ n vẽnegd neba fãa” wã a buudã neb yaal-a lame n kɩɩs-a la b baas n kʋ-a. (Zã 1:9) Yʋʋm kob-gĩnd 20 soabã fãa pʋgẽ, b yaala a Zeova Kaset rãmbã, n kẽes-b bãens rotẽ, n gɩdg b tʋʋmdã, n kʋ-b menga, b sẽn da pukd a Zeova vẽenemã ne kɩs-sɩda yĩnga. Yʋʋm sẽn pa kaoos pʋgẽ, kɩɩsdbã tũnuga ne zɩlem-beed yelgr kɩbayã, n kãnegd neb nins sẽn pukd Wẽnnaam vẽenemã. Kẽer datame tɩ nebã tẽ t’a Zeova Kaset rãmbã yaa wẽnse, la tɩ b segd n boogame bɩ n gɩdg b tʋʋmdã. Kɩɩsdb a woto tõogame bɩ?
13. Tõnd sẽn taas yɛlã sẽn sɩd yɩ to-to kɩba-taasdbã tõnd tʋʋmdã wɛɛngẽ ne yamã biis yɩɩ bõe?
13 Ayo. Zĩig ning sẽn zemsã, a Zeova Kaset rãmbã kẽnga kɩba-kõtbã nengẽ n wilg yɛlã sẽn sɩd yaa to-to. Rẽ kɩtame t’a Zeova yʋʋrã paam mooneg zĩig fãa zʋrno rãmbã la sɛba pʋsẽ, radio wã la televiziõ wã pʋgẽ. Rẽ talla bi-sõma moonegã tʋʋmd pʋgẽ. Wala makre, Danemarke, televiziõ wã goma gom-zug kãngã yelle: “Bõe yĩng tɩ Danemark nebã tẽeb boogdẽ.” B boola a Zeova Kaset rãmbã ne tũudum a taab neb n sʋke. Rẽ poore, pag sẽn da yã emisiõ wã yeelame: “B ra tõe n yãa neb nins sẽn da tar Wẽnnaam vʋʋsmã vẽenega.” Biibl zãmsg la b sɩng ne pʋg-kãngã.
14. Ne sũ-sãoonga, na n yɩɩ tɩlae ne kɩɩsdbã tɩ b sak n deeg bõe ka la bilfu?
14 A Zeova Kaset rãmbã miimi tɩ neb wʋsg sẽn be dũni kãngã pʋgẽ na n kɩɩs-b lame. (Zã 17:14) La baasgo, b paamda kengr ne a Ezai bãngr-gom-kãngã: “Neb nins sẽn da namsd yãmba kamb na n wa n sika b mens fo taoore. Neb nins fãa sẽn da paoogd fooma na n wõgemda fo taoore. Bãmb na n boola foom tɩ Zusoaba tẽnga la Israɛll Sõng-soaba Siõ.” (Ezai 60:14) Ne sũ-sãanga, na n yɩɩ tɩlae ne kɩɩsdbã tɩ b sak n deeg tɩ b sɩd ra zabda ne Wẽnnaam menga. Ãnd n tõe n tõog zabr a woto?
15. Wãn-wãn la a Zeova Kaset rãmbã ‘yẽsemd tẽn-tẽnsã bĩisim,’ la wãn-wãn la d ne rẽ b zãmsgã la b moonegã tʋʋmd pʋgẽ?
15 A Zeova leb n kãabda woto: “La mam na n kõo foom naam wakat fãa tɩ yɩ zamaan fãa sũ-noogo. Fo na n yẽsma buud a taab bĩisim. Fo na n yẽsma rĩm dãmb bĩisa. La fo na n bãngame tɩ mam sẽn yaa Zusoabã n yaa fo fãagda.” (Ezai 60:15, 16) N-yẽe, a Zeova yaa a nin-buiidã Fãagda. B sã n teeg-a, b na n kaoosa “wakat fãa.” La b na n “yẽsma buud a taab bĩisim,” n tũnug ne yɛl kẽer sẽn be b pʋsẽ n kɩt tɩ baleng hakɩɩkã kẽng taoore. Wala makre, ordinatɛɛr dãmbã la kɩbae taasgã bõn-tũnugds kɩtdame tɩ b tõe n yiis Gũusg Gasgã ne buud-goam 121 la Révéillez-vous! wã ne buud-goam 62 wakat yɛng nana-nana. Ordinatɛɛr program sẽn yaa zall la b maan sẽn na yɩl n sõng n lebg Traduction du monde nouveau wã buud-goam a taab pʋsẽ, la woto kõta sũ-noog wʋsgo. Kiris-neb Gerɛk Gʋlsgã sẽn wa n yi ne Korwat rãmbã buud-gomd yʋʋmd 1999 wã, neb tusa raaga sũ-noog nintãm. Saam-biig a yembr sẽn kʋʋl yeela woto: “Mam gũu Biibl kãngã n kaoose. Masã m tõe n kii ne bãane!” Traduction du monde nouveau wã sẽn be a tõr bɩ a bɛk yɩɩda bãmb milyõ 100 buud-goam 34 pʋsẽ.
Vɩɩm-manesem sẽn yaa sõma wʋsgo
16, 17. a) Baa ne sẽn yaa toogã, bõe yĩng tɩ tar yõod wʋsg tɩ d ket n tũud a Zeova noyã sẽn yaa sõma wʋsgã? b) Yel-bʋg n wilgd tɩ kom-bɩɩsã tõe n laka b mens ne dũniyã rẽgdo?
16 A Zezi yeelame: “Ned ninga fãa sẽn maan wẽnga, a kisgda vẽenem.” (Zã 3:20) Sẽn yaa lebend ne rẽnda, neb nins sẽn paad vẽenemẽ wã nonga a Zeova noyã sẽn yaa sõma wʋsgã. A Zeova tũnuga ne a Ezai n yeele: “Fo neba na n yɩɩ nin-tɩrse.” (Ezai 60:21a) Tõe n yaa toog wʋsg tɩ d ket n tũud no-tɩrs dũni sẽn pid ne yoobo, zɩlem-n-beedo, yão-beed la wuk-m-meng pʋgẽ. Wala makre, tẽns sãnda tara yidgr laogã wɛɛngẽ n paasdẽ, tɩ yaa nana tɩ f bʋdg n kẽ arzɛkã yen-yen baoob pʋgẽ. Baasg zãnga, a Poll kõo keoog-kãngã: “Neb nins sẽn dat n yɩ arzɛgs rãmba kẽeda makre la kũusr pʋgẽ la ratem wʋsg sẽn yaa yalemdo sẽn sãamd bãmba n kẽesd bãmb toog ne sãoong pʋgẽ.” (1 Tɩmote 6:9) Ad sɩd yaa yel-beed menga, ned sã n fõr n kẽ ligd-baoorã tʋʋm pʋsẽ hal tɩ kɩt t’a bas bũmb nins sẽn sɩd tar yõod wala kiris-neb lagem-n-taarã, baleng tʋʋmdã, vɩɩm manesem noyã la zak pʋgẽ zɩɩbã!
17 Sẽn yɩɩd fãa, tõe n yaa toog ne kom-bɩɩsã tɩ b ket n tũud no-tɩrsã, b reem-n-taas wʋsg sã n dɩkd dorg la b maand yoobo. Surinam tẽngã, yʋʋm 14 bipugl la biribl sẽn yaa ra-sãng yeel t’a wa tɩ b gãand taaba. Bipuglã tõdgame n wilg tɩ sã n pa kãadem pʋgẽ Biiblã gɩdga yel-kãensã buudu. Kompugli a taabã sẽn be lekollẽ wã yaal-a lame n mak n na n tus-a t’a toeem yam, n yetẽ tɩ ned fãa rat n gãanda ne biribl kãngã. Ne rẽ fãa bipuglã gãda kãn-kãe. Semen a wãn poore, vaees-n-gɛsg wilgame tɩ biriblã ra tara SIDA wã, la a lʋɩɩ bã-kɛgenga. Bipuglã sũur yɩɩ noogo, a sẽn da sak a Zeova noor ning sẽn yet tɩ d “ra maan yoob[ã].” (Tʋʋma 15:28, 29) A Zeova Kaset rãmbã sũy yaa noog wʋsg ne kom-bɩɩs nins sẽn be b sʋk n gãt no-tɩrsã kãn-kãe wã. B tẽebã la b roagdbã tẽeb kɩtdame t’a Zeova Wẽnnaam yʋʋrã ‘tall dasãnde,’ n paam waoogre.—Ezai 60:21b, NW.
A Zeova n wa ne fɩɩgrã
18. a) Bõn-kãseng bʋg la a Zeova maan n kõ a nin-buiidã? b) Bõe n wilgd tɩ fɩɩgrã na n ket n kẽngda taoore, la saagr bʋs sẽn tar ziir n gũud neb nins sẽn paad ne vẽenemã?
18 N-yẽe, a Zeova yelgda vẽenem a nin-buiidã zugu, n ningd-b barka, n wilgd-b sor la a kõt-b pãnga. Yʋʋm kob-gĩnd 20 soabã sasa, b yãa a Ezai gom-kãensã pidsgu: “Ned ninga sẽn yaa bilf n yɩɩd a taaba na n lebga tusri. La ned ninga sẽn paooda na n lebga bu-kãsenga. Mam yaa Zusoaba. A wakata sã n ta, mam na n maan-a-la tao-tao.” (Ezai 60:22) B sõorã sẽn da yaa bilf yʋʋmd 1919 wã, “ned ninga sẽn yaa bilf” yɩɩga “tusri.” La fɩɩgr a woto nan pa sa ye! Rɩẽ, neb 14 088 751 n wa a Zezi kũumã Tẽegrẽ. Bãmb wʋsg ra pa Kaset rãmb sẽn moond ye. D sũy yaa noog b sẽn wa yel-kãngã sẽn tar yõodã, la d sagend-b lame tɩ b ket n kẽngd taoor vẽenemã pʋgẽ. A Zeova ket n yãgda a nin-buiidã zut n pɩnda. A siglgã kʋɩleng ket n paka hãuu. Rẽ, bɩ d fãa rɩk sard kãn-kãe n pa ne a Zeova vẽenemã. Ad woto sɩd wata ne bark wʋsg n kõt-d masã! La ad sɩd yaa sũ-noog wʋsg la rẽ na n wa ne beoog-daare, bõn-naandsa fãa sẽn na n wa pẽg a Zeova la b kɩdem a ziirã yãgb pʋgẽ wã!—Wilgri 5:13, 14.
Y tõe n wilga a võor bɩ?
• Ãnda n puk a Zeova ziirã yaoolem day kãensã?
• Bõe n wilgd t’a Zeova nin-buiidã yẽesem pa booge?
• Tʋʋm sõma kẽer bʋs la a Zeova Kaset rãmbã rɩkd sẽk wʋsg n maandẽ?
• Baa ne kɩɩs-toaagã, ne bõe la d bas yardo?
[Zãmsgã sogsgã]
[Taablo, seb-neng 27-30]
A ZEOVA KASET RÃMBÃ TƲƲMD RAPOOR DŨNIYÃ GILL ZUGU, YƲƲMD 1999
(Ges-y volim relie wã)
[Foto rãmba, seb-neng 26]
Nebã ket n kaoogd n debda a Zeova siglgẽ wã
[Foto, seb-neng 31]
D sũur yaa noog a Zeova sẽn bas kʋɩlengã tɩ pak hãuu neb nins sẽn nong vẽenemã yĩngã