“Bõn-sõma” n pit a Zeova roogã

“M [a Zeova] na n dĩmsa tẽn-tẽnsã fãa, la tẽn-tẽnsã fãa bõn-sõma tog n kẽeme; la m na n pidsa ro-kãngã ne ziiri.”—AZZE 2:7, NW.

1. Yel-yãgdem wakate, bõe yĩng tɩ d rengd n tagsd d nin-nongdsã yelle?

BÕN-SÕMA bʋs n pid yãmb roogã? Yãmb tara te-neeba, ordinatɛɛr sẽn mi a menga, mobil-paall y garaasẽ wã bɩ? Baa y sẽn tar bõn-kãensã fãa, y pa sak tɩ bũmb nins sẽn tar yõod n yɩɩd yãmb yirã yaa nebã, yãmb zakã neb sɩda? Mams-y n ges yãmb sẽn na n nek yʋng n wʋm bug-zõos yũugu. Yãmb roogã yõka bugum, tɩ y tar minit a wãn bal n na n zoe n põse! Bõe n deng n pak yãmba? Yaa y teeda bɩ? Yaa y ordinatɛɛrã bɩ? Yaa y mobillã bɩ? Y kõn bas bõn-kãensã n tags y nin-nongdsã yell sɩda? Yaa vẽeneg tɩ y na n maana woto, bala nebã yõod yɩɩda teedã.

2. A Zeova naanegã yalem taa zĩ-bʋgo, la naaneg kãng bab-bʋg la a Zezi ra nong n yɩɩda?

² Masã, tags-y a Zeova Wẽnnaam la a Biribl a Zezi Kirist yelle. A Zeova yaa ned ning sẽn “naan yĩngri la tẽnga la ko-kãsenga ne bũmb nins fãa sẽn be b pʋsẽ” wã. (Tʋʋma 4:24) A Biriblã yaa “tʋʋm-mit” ning a Zeova sẽn da tũnug ne n maan bũmb a taabã fãa wã. (Yelbũna 8:30, 31; Zã 1:3, NW; Kolos rãmba 1:15-17, NW) Sɩd-sɩda, a Zeova ne a Zezi fãa getame tɩ bũmb nins fãa b sẽn naana tara yõodo. (Mak-y ne Sɩngre 1:31.) La yãmb tagsdame tɩ naanegã fãa pʋgẽ, yaa bõe n tar yõod n yɩɩd ne-ba: yaa bõn-yoodã bɩ yaa nebã? B sẽn bilgd-a t’a yaa yam sẽn wõnd nedã pʋgẽ a Zezi yetame: “Mam sẽn tɩ loe ne bũmb ninsã ra bee ne ninsaalbã kambã,” bɩ wala Bible du Semeur lebgrã sẽn wilgdã, a Zezi ra “maanda sũ-noog ne ninsaalbã.”

3. Bãngr-gom-bʋg la a Zeova tũnug ne a Azze n togse?

³ Sãmbg sẽn ka be, a Zeova getame tɩ nebã tara yõod wʋsgo. D yãta bũmb sẽn wilgd rẽ bãngr-goam nins a sẽn tũnug ne no-rɛɛs a Azze n togs yʋʋmd 520 S.D.T.W. A Zeova togsame: “La m na n dĩmsa tẽn-tẽnsã fãa, la tẽn-tẽnsã fãa bõn-sõma tog n kẽeme, la m na n pidsa ro-kãngâ ne ziiri. . . . Ro-kãng ziir na n yɩɩga pĩnd soabã.”—Azze 2:7, 9, NW.

4, 5. a) Bõe yĩng tɩ pa zems tɩ d kʋmb n yeel tɩ gomd ning sẽn yaa “bõn-sõma” wã gomda laog yelle? b) Wãn-wãn la y ra na n wilg “bõn-sõma” wã võore, la bõe yĩnga?

 ⁴ Yaa “bõn-sõma” bʋs n da na n pid a Zeova roogã n wa ne ziir buud to sẽn da zɩ n zĩndi? Yaa roog teed wʋsg la ro-nagsg teed sẽn be rasãnd bɩ? Yaa sãnem, wanzũri bɩ kug-sõma? Ra na n yɩɩ toog tɩ woto yɩ bũmb sẽn zemse. Tẽeg-y tɩ pĩnd wẽn-doogã b sẽn pak yʋʋm kob-gĩn a nu sẽn dengã ra yaa roog meeb ligd sẽn yaa dolaar milyaar dãmb wʋsgo! * Sɩd-sɩda, a Zeova ra pa gũud tɩ wẽn-doogã, Zʋɩf rãmb bilf sẽn lebg n wa b ba-yirã sẽn me wã, yɩɩg a Salomo wẽn-doogã ne ziir laogã wɛɛngẽ ye!

⁵ La “bõn-sõma” sẽn segd n pid a Zeova roogã yaa bõe? Vẽenega segd n yɩɩ neba. Sẽn yɩɩd fãa, bũmb ning sẽn kɩt t’a Zeova sũurã noomẽ wã pa wanzũri la sãnem ye, la yaa neb nins sẽn sõgend-a nonglem yĩngã. (Yelbũna 27:11; 1 Korẽnt dãmba 10:26) N-yẽe, a Zeova getame tɩ roapã, pagbã la kamb nins fãa sẽn balemd-a tɩ sakd a reegrã tara yõod wʋsgo. (Zã 4:23, 24) Bõn-kãensã yaa “bõn-sõma,” la a Zeova nifẽ, b tara yõod n yɩɩd bõn-neebã fãa sẽn da nags a Salomo wẽn-doogã tɩ be rasãndã zĩig sẽn zãre.

6. Bõn-datl bʋg yĩng la b rɩk Wẽnnaam pĩnd wẽn-doogã n tʋme?

⁶ Baa ne kɩɩsgã sẽn da pa lebd poorẽ wã, b ra tõog n baasa wẽn-doogã yʋʋmd 515 S.D.T.W. Hal n ta a Zezi maoongã wakate, wẽn-doog ning sẽn da be Zerizalɛmã kell n paame n yɩ baleng hakɩkã nif ne “bõn-sõma” wʋsgo. Bõn-sõma kãens ra yaa Zʋɩf rãmb la Buzẽms neb sẽn tuubi. La wẽn-doogã ra makda bũmb sẽn yaa kãseng n yɩɩd woto zĩig sẽn zãre, wa d sẽn na n yã wã.

Pidsg yʋʋm kob-yendẽ wã

7. a) Bõe la Wẽnnaam pĩnd wẽn-doogã sẽn da be Zerizalɛmã ra makda? b) Bilg-y maan-kʋʋd kãsmã tʋʋm Paasg Daarã.

⁷ Wẽn-doogã sẽn da be Zerizalɛmã ra makda seglg sẽn yaa kãseng n yɩɩd balengã yĩnga. Yaa tẽeb wẽn-doogã, a Zeova sẽn lugl yʋʋmd 29 T.W t’a Zezi yaa a Maankʋʋd Kãsmã. (Hebre dãmba 5:4-10; 9:11, 12) Ges-y yɛl sẽn wõnd taaba, Israɛll maan-kʋʋd kãsmã tʋʋmẽ la a Zezi tʋʋmẽ wã. Yʋʋmd fãa Paasg Daarã sasa, maan-kʋʋd kãsmã ra kolgda tẽn-kugrã sẽn be wẽn-doogã samandẽ wã n maan loalg maoong tɩ yɩ paasg maan-kʋʋdbã yel-wẽn yĩnga. Rẽ poore, a kẽeda wẽn-doogẽ wã ne loalgã zɩɩm, n pasg fu-lilldg ning sẽn welg samandã ne Zĩsõngã, la rẽ poore n pasg noy nins sẽn welgd Zĩsõngã ne Zĩsõng sẽn Yɩɩdã. A sã n wa kẽ Zĩsõng sẽn Yɩɩdẽ wã, maan-kʋʋd kãsmã mesda zɩɩmã kaoolã koglg taoore. Rẽ poore, a maanda woto n maan boɛɛg maoong Israɛll buud 12 sẽn pa maan-kʋʋdbã yĩnga. (Maankʋʋre 16:5-15, NW) Wãn-wãn la yel-kãens maanegã tɩ loe ne Wẽnnaam tẽeb wẽn-doogã?

8. a) Wãn-wãn la b kõ a Zezi yʋʋmd 29 T.W. tɛka? b) Zems-n-taar sẽn yaa zall bʋg la a Zezi ra tar ne a Zeova a tẽng zug ministɛɛrã fãa sasa?

⁸ Sɩda, a Zezi kõo a meng Wẽnnaam daabã tẽn-kugr zugu, a sẽn da wa n deeg lisg la a paam zaeeb ne Wẽnnaam vʋʋsem sõngã yʋʋmd 29 T.W. (Luk 3:21, 22) Sɩda, yel-kãng n yɩ bãnd ne a Zezi maoong vɩɩmã sẽn kaoos yʋʋm a tãab la pʋɩ-sʋkã. (Hebre dãmba 10:5-10) Wakat kãng sasa, a Zezi paama zems-n-taar ne Wẽnnaam n dog ne vʋʋsem sõngo. Yasr kãngã sẽn ka to a Zezi sẽn da tall ne a yĩngr Ba wã ra pa bũmb ninsaalb a taabã sẽn tõe n wʋm a võor zãng ye. Ra yaa wala fu-lilldg n da lud b yam-welgrã nini, wala fu-lilldg sẽn da lud Zĩsõngã tɩ neb nins sẽn be sɛk-roogã samandẽ pa tõe n yã wã.—Yikri 40:28.

9. Bõe yĩng t’a Zezi sẽn da yaa ninsaalã ra pa tõe n kẽng saasẽ woto, la wãn-wãn la b welg yel-kãngã?

 ⁹ Baa ne a sẽn yaa Wẽnnaam Biribl sẽn zae ne vʋʋsmã, ninsaal a Zezi ra pa tõe n tɩ vɩɩmd saasẽ ye. Bõe yĩng t’a ra pa tõeyã? Bala nems ne zɩɩm pa tõe n paam Wẽnnaam yĩngr Rĩungã ye. (1 Korẽnt dãmba 15:44, 50) A Zezi yĩn-nemsã sẽn da yaa gɩdgrã yĩnga, fu-lilldgã sẽn da welgd Zĩsõngã ne Zĩsõng sẽn yɩɩdã Wẽnnaam pĩnd wẽn-doogẽ wã ra makda yĩn-nems kãng sõma. (Hebre dãmba 10:20) La rasem a tãab a kũumã poore, Wẽnnaam vʋʋga a Zezi t’a yaa malɛka. (1 Pɩɛɛr 3:18, NW) Rẽ poore, a ra tõe n kẽe Zĩsõng sẽn Yɩɩdẽ wã Wẽnnaam tẽebã wẽn-doog pʋgẽ, sẽn yaa saasẽ mengã. La sɩd yaa woto bal kɛpɩ n zĩndi. A Poll gʋlsame: “Bala Kirist pa kẽ Zĩsõng sẽn maan ne nusi, [vẽenega a ra gomda Zĩsõng sẽn Yɩɩdã yelle] sẽn yaa yel-sɩdã mamsgã ye, la yaa saasẽ mengã pʋgẽ, sẽn na yɩl n puk Wẽnnaam mengã taoor masã tõnd yĩnga.”—Hebre dãmba 9:24, NW.

10. Bõe la a Zezi maan a sẽn wa n leb saasẽ wã?

¹⁰ Saasẽ wã, a Zezi ‘mesa a maoongã zɩɩm,’ a sẽn wilg a zɩɩmã sẽn makd a vɩɩmã sẽn yaa yao-n-dɛɛkã yõod a Zeova wã. La a Zezi maana sẽn yɩɩd woto. Sẽn deng a kũumã bilfu, a ra yeela a karen-biisã woto: “M dabdame n na n tɩ maneg zĩig yãmb yĩnga. La m sã n kẽng n maneg zĩigã n sɛ, m na n lebg n wa peega yãmba, tɩ mam sẽn be zĩig ninga, bɩ yãmb me zĩnd be.” (Zã 14:2, 3) Woto, a sẽn paam n kẽ Zĩsõng sẽn Yɩɩdẽ wã, bɩ saasẽ wã, a Zezi paka sor n kõ neb a taabã tɩ b tũ. (Hebre dãmba 6:19, 20) Nin-kãensã sõor sẽn da na n yɩ 144000 ra na n yɩɩ maan-kʋʋd pʋgds Wẽnnaam tẽeb wẽn-doogẽ wã. (Wilgri 7:4; 14:1; 20:6) Wala Israɛll maan-kʋʋd kãsmã sẽn da rengd n dɩk loalgã zɩɩm n kẽ Zĩsõng sẽn Yɩɩdẽ wã n maan paasg maan-kʋʋdbã yel-wẽn yĩngã, a Zezi zɩɩmã sẽn daagã yõod rengd n nafa maan-kʋʋd pʋgds 144000. *

Rũndã-rũndã “bõn-sõma” wã

11. Ãnd yĩng la Israɛll maan-kʋʋd kãsmã maan boɛɛgã maoongo, la yaa bõe la rẽ ra makda?

¹¹ Wõnda yʋʋmd 1935 wã, sẽn zae-bã wʋsg tigisg ra saame. * La a Zeova ra pa sa ne a roogã ziir ningr ye. Ayo, “bõn-sõma” n da segd n wa kẽ be. Tẽeg-y tɩ Israɛlle, maan-kʋʋd kãsmã ra rɩkda rũms a yiib n maan maando. Loalgã yaa maan-kʋʋdbã yel-wẽn yĩnga, tɩ boɛɛgã ra yaa buud nins sẽn pa maan-kʋʋdbã yel-wẽn  yĩnga. Sẽn mik tɩ maan-kʋʋdbã ra makda sẽn zae-bã sẽn da na n zĩnd ne a Zezi saasẽ Rĩungẽ wã, yaa ãnd dãmb la buud nins sẽn pa maan-kʋʋdbã makda? D yãta leokrã a Zezi goam nins sẽn be Zã 10:16 pʋgẽ wã: “Mam tara piis a taab sẽn nan ka be yãg-kãnga pʋgẽ ye. Yaa tɩlae tɩ mam wa ne bãmba. Bãmb na n wʋma mam koɛɛga. La a na yɩ yãgr a yembr la pe-kɩɩm a yembre.” Woto yĩnga, a Zezi zɩɩmã sẽn daagã nafda neb sul a yiibu: pipi, yaa kiris-neb nins sẽn saagd n na n dɩ naam ne a Zezi saasẽ wã, la yiib-n-soaba, yaa neb nins sẽn saagd n na n vɩɩmd wakat sẽn-kõn-sa tẽng zug arzãn pʋgẽ wã. Vẽenega, yaa sull a yiib-n-soab kãngã la “bõn-sõma” sẽn be a Azze bãngr-gomdẽ wã sẽn makdã.—Miise 4:1, 2, NW; 1 Zã 2:1, 2.

12. Wãn-wãn la b takd “bõn-sõma” wã wʋsg n kẽesd Wẽnnaam doogẽ wã rũndã-rũndã?

¹² “Bõn-sõma” kãensã ket n pita a Zeova roogã. Yʋʋm sẽn pa kaoosã pʋsẽ, gɩdgr la b yãk Erop Yaangã, Afirik babs la tẽns a taab pʋsẽ, n kõ sor tɩ Wẽnnaam Rĩungã sẽn luglã koe-noog piuug n ta zĩis b sẽn da pa tõog n ta hal tɩ ta masã. Bõn-sõma sẽn wat Wẽnnaam wẽn-doogẽ wã me modgdame n na n maan karen-biis a taaba, n sakd a Zezi noorã. (Matɩe 28:19, 20) B sẽn maand woto wã, b segda neb wʋsg sẽn yaa kom-bɩɩs la kãsemba, sẽn tõe n wa lebg “bõn-sõma” sẽn na n ning a Zeova roogã ziiri. Ges-y makr a wãn bal ne rẽ sẽn maand to-to.

13. Wãn-wãn la bipugl kɩdg sẽn be Bolivi wilg a yẽesem ne Rĩungã koɛɛga yelgre?

¹³ Bolivi, Kaset rãmb yʋʋm a nu bipugl kosa a karen-saambã sor n na n vaal karengã bab-sak sull yel-gɛtã gesg semen sasa. Bõe yĩnga? A ra rat n kẽesa a meng ministɛɛrã pʋgẽ semen zall kãngã tõr sẽn yaa tʋʋm semenã pʋgẽ. Rẽ linga a roagdbã, la b sũy ra yaa  noogo, a sẽn da tar manesem sõng woto wã. Masã bipugl kɩdgã maanda Biibl zãms rãmb a nu, la karen-bi-kãens kẽer wata kiris-neb tigissã. A talla a karen-saambã meng n wa Rĩungã Roogẽ. Tõe tɩ sã n wa beẽ-beẽ bɩ a Biibl karen-biisã kẽer yɩ “bõn-sõma” sẽn na n ning a Zeova roogã ziiri.

14. Koore, wãn-wãn la saam-bi-poak pẽdgr ne ned sẽn da wõnd a pa rat sɩdã paam keoobo?

¹⁴ A sẽn da gũud tẽr gaarẽ, kiris-nin-poak sẽn be Koore pẽnega karen-biig sẽn da kelgd mizik ne walkman. Saam-bi-poakã sʋk-a lame: “Fo tara tũudum bɩ?” Tɩ karen-biigã leoke: “Mam toog kae ne tũudum ba a yembr ye.” Saam-bi-poakã pa koms raood ye. A kẽnga taoor woto: “Sã n wa beẽ-beẽ, ned tõe n wa rat n yãka tũudum. La a sã n pa tar bãngr tũudmã wɛɛngẽ, a tõe n yãka tũudum sẽn pa sõma.” Karen-biigã manesem toeemame, t’a sɩng tõnd saam-bi-poakã kelgr ne yamleoogo. Saam-bi-poakã kãab-a-la Y a-t-il un Créateur qui se soucie de vous? sebrã, la a yeel-a tɩ seb-kãngã na n talla yõod wʋsg ne-a, a sã n wa na n yãk tũudum. A saka sebrã ne yamleoogo. Semen ning sẽn pʋglã, karen-biigã sɩnga Biiblã zãmsg ne a Zeova Kaset rãmbã, la masã a wata tigingã tigiss fãa.

15. Wãn-wãn la bipugl a yembr sẽn be Zapõ sɩng Biibl zãmsg ne neba, la wãn-wãn la a modgrã paam dolbo?

¹⁵ Zapõ, a Megumi sẽn tar yʋʋm 12 wã geta a lekollã wa mooneg la zãmsg kũun zĩig sẽn womd biisi. A tõogame meng n sɩng Biibl zãms rãmb wʋsgo. Wãn-wãn la a Megumi ra maanda? A sẽn karemd Biiblã bɩ a segend tigissã midi wã vʋʋsg sasa wã yĩnga, a karen-bi-taasã nong n sʋkd-a-la a sẽn maand bũmb ningã. Kẽer sʋkda a Megumi a sẽn pa kẽesd a toog lekollã yɛl kẽer pʋsẽ wã võore. A Megumi leokda b sʋgsgã la a wilgd-b tɩ Wẽnnaam tara yʋʋre. Rẽ nong n nekda a kɛlgdbã ratem. Rẽ poore, a kãabd-b-la Biibl zãmsgo. A Megumi zãmsda Biiblã ne neb 20 masã, tɩ bãmb 18 ya a karen-bi-taase.

16. Wãn-wãn la Kamerun saam-biig tõog n sɩng Biibl zãms rãmb ne yaandb sull neb sãnda?

¹⁶ Kamerunni, tʋm-tʋmdb a nii sull sẽn da be b tʋʋm zĩigẽ boola saam-biig sẽn da kãabd so-loaad sɛb sẽn tik Biiblã zugu. B ra rat n yaala saam-biigã n sʋk-a bũmb ning sẽn kɩt t’a pa tẽed Tãablmã, bugum yirã bɩ sɩɩg pa kiidã. Tõnd saam-biigã tũnuga ne Biiblã n leok b sʋgsgã. Rẽ kɩtame tɩ b sʋkã neb a tãab sak Biiblã zãmsgo. Bãmb ned a yembr sẽn boond t’a Daniɛll sɩngame n wat tigissã, hali n sãam tɩɩm-saoog teed nins a sẽn da tarã. (Wilgri 21:8) Pa ta yʋʋmd la a reeg lisg ye.

17. Wãn-wãn la saam-biis kẽer sẽn be Salvadoor tũnug ne yam wʋsg n moon rao sẽn da reng n pa rat n kelg Rĩungã koɛɛga?

¹⁷ Salvadoore, rao a yembr n da loet a baag sẽn yaa ba-wẽng a zakã noore, a sã n yã t’a Zeova Kaset rãmbã be beenẽ sẽnese. Rao wã ra gũudame tɩ Kaset rãmbã looge, t’a lok baagã n kẽes zakã pʋgẽ. Saam-biisã ra zɩ n tõog n gom ne rao wã ye. Woto, daar a yembre, b rɩka sard n mak manesem a to. B sẽn da mi tɩ rao wã ra tõe n wʋma b sẽn da yet bũmb ningã, b rɩka sard n na n moon baagã. B taa zakã noore, n pʋʋs baagã, la b yeel tɩ b sũy yaa noog b sẽn  paam sor n gom ne-a wã. B goma wakat ning arzãn sẽn da na n wa tẽng zugã yelle, wakat ning ned ba a yembr sũur sẽn da pa na n yiki, n-yẽe, wakat ning rũmsã meng sẽn na n tall bãan manesmã. Rẽ poore, b pʋʋsa baagã Wẽnd na kõ-d nindaar ne waoogre, la b sɩng loogre. Ling-b-la wʋsgo, rao wã sẽn yi zakẽ wã n kos sugr a sẽn zɩ n kõ Kaset rãmbã sor tɩ b gom ne-a wã yĩnga. A sak n deega periodik rãmbã, la Biibl zãmsg n sɩnge. Masã ra-kãngã yaa tõnd saam-biiga, “bõn-sõma” wã a yembre.

“Bɩ y ra zoe rabeem ye”

18. Yel-bʋs la kiris-neb wʋsg segda, la yaa wãn-wãn la a Zeova get a balemdba?

¹⁸ Yãmb kẽesda y toog Rĩungã mooneg la karen-biisã maaneg tʋʋmd sẽn tar yõod wʋsgã pʋgẽ bɩ? Sã n yaa woto y sɩd tara zu-noog menga. Sɩda, yaa ne tʋʋm-kãngã maasem la a Zeova takd “bõn-sõma” wã n kẽesd a roogẽ wã. (Zã 6:44) Sɩda, tõe tɩ wakat kẽer bɩ y ya wall y koms raood bilfu. Wakat sãnda, neb kẽere, baa neb nins sẽn sõgend a Zeova ne kɩs-sɩdã sʋka, maooda ne m-ka-yõod yĩn-sidsi. La ra koms-y raood ye! A Zeova geta a balemdb fãa wa bõn-sõngo, la y fãagrã pak-a-la wʋsgo.—2 Pɩɛɛr 3:9.

19. Raoolg bʋg la a Zeova tũnug ne a Azze n kõ, la wãn-wãn la gom-kãensã tõe n kõ tõnd pãnga?

¹⁹ D sã n wa neẽ tɩ d komsa raoodo, yaa kɩɩsgã yĩng bɩ yɛl a taab sẽn wat ne toog yĩnga, a Zeova goam nins a sẽn taas Zʋɩf rãmb nins sẽn lebg n wa b ba-yirã tõe n kõ-d-la raoodo. D karemda woto Azze 2:4-6 pʋgẽ: “ ‘La masã, a Zorobabɛlle, keng f sũuri. A Zotsadak biig a Zozue sẽn yaa maan-kʋʋdba kãsma ne tẽnga neba fãa, keng-y y sũy n tʋm; tɩ bala, mam bee ne yãmba. Mam yaa Saasẽ-pãng-soaba, yaa maam n yeele. Yãmb sẽn yi Eziptã, mam kãabame tɩ m na n zĩnda ne yãmba. La m sɩɩga bee ne yãmba. Bɩ y ra zoe rabeem ye. Tɩ bõe, a keta wakat bilf bal tɩ m digimd yĩngri ne dũniyã la ko-kãsengã.” Ges-y t’a Zeova pa yet tõnd bal tɩ d tall pãng ye, la a kõta tõnd bũmb nins sẽn na n kɩt tɩ d paam pãngã me. Wãn-wãna? Ges-y gom-kãensã sẽn kengd pɛlgã: “Mam bee ne yãmba.” Ad woto sɩd kengda tẽeb tɩ d bãng tɩ gɩdgr nins tõnd sẽn segdã sẽn yaa to-to fãa, a Zeova bee ne tõndo!—Rom dãmba 8:31.

20. Wãn-wãn la ziir buud sẽn ka to pit a Zeova roogã masã?

²⁰ A Zeova sɩd wilgame t’a bee ne a nin-buiidã. Sɩda, yaa wala a sẽn tũnug ne no-rɛɛs a Azze n togsã bala: “Ro-kãng ziir na n yɩɩga pĩnd soabã. La mam na n kõo laafɩ wʋsg zĩ-kãng pʋgẽ.” (Azze 2:9) Sɩda, ziir ning sẽn yaa kãseng n yɩɩd rũndã-rũndã wã be a Zeova tẽeb wẽn-doogẽ wã. Ges-y-yã, neb tusa kobs n kaoogd n wat sɩd balengã pʋgẽ yʋʋmd fãa. Nin-kãensã paamda rɩlgr sõma tẽebã wɛɛngẽ, la baa dũni kãngã sẽn gudgã pʋgẽ, b paamda bãan sẽn ka mak-n-taaga, sã n pa bãan ning sẽn na n zĩnd Wẽnnaam dũni paalgã pʋgẽ wã n na n yɩɩg-a.—Ezai 9:5, 6; Luk 12:42, NW.

21. Tõnd sard rɩkr kãn-kãe segd n yɩɩ bõe?

²¹ A Zeova sẽn na n dĩms tẽn-tẽnsã Armagedõ wã yaa bũmb sẽn wat ka la bilf bala. (Wilgri 16:14, 16) Woto yĩng bɩ d rɩk sẽk ning sẽn ketã n tʋm n sõng n fãag neb a taab yõyã. Bɩ d tall pãng la d tall bas-yard zãng fasɩ ne a Zeova. Bɩ d rɩk sard kãn-kãe n ket n balemd a Zeova tẽeb wẽn-do-kãsengẽ wã, n pidsd ro-kãng ne “bõn-sõma” n paasdẽ, hal t’a Zeova wa yeel tɩ d tʋʋmdã tʋma zãng n sa.

[Tẽngr not rãmbã]

Y tẽrame bɩ?

• Bõe n tar yõod a Zeova nifẽ n yɩɩd laogã?

• A Zezi zɩɩmã sẽn daagã nafda neb sul a yiib bʋse?

• Yaa ãnd la “bõn-sõma” nins sẽn da segd n pids a Zeova roogã ne ziirã?

• Kaset bʋg n wilgd t’a Azze bãngr-gomdã pidsda rũndã-rũndã?

[Zãmsgã sogsgã]

[Wẽn-doogã plan, seb-neng 10]

(Sebrã meng pʋgẽ la y tõe n yã fãa)

Yãmb mii a Zeova pĩnd wẽn-doogã makr tẽeb wɛɛngẽ bɩ?

Zĩsõng sẽn yɩɩdã

Fu-lilldgã

Zĩsõngã

Noorã

Tẽn-kugrã

Samandã

[Foto, seb-neng 11]

Maan-kʋʋd kãsmã ra maanda loalg maoong maan-kʋʋdbã yel-wẽn yĩnga, la boɛɛg maoong Israɛll buud nins sẽn pa maan-kʋʋdb buudã yel-wẽn yĩnga

[Foto, seb-neng 12]

Rĩungã mooneg tʋʋmd sẽn maand dũniyã gill zugã takda neb wʋsg n wat a Zeova roogẽ wã