D tara sũ-noog ne d fãagr Wẽnnaamã

“Mam na n kell n maana sũ-noog Zusoab a Wẽnnaam sẽn yaa mam fãagda yĩnga.”—HABAKUK 3:18.

1. Bõe wɛɛngẽ la a Daniɛll paam yãab tɩ Babilon nan pa lʋɩ yʋʋmd 539 S.D.T.W.?

SẼN yɩɩd yʋʋm pi-gĩnd tɩ Babilon nan pa lʋɩ yʋʋmd 539 S.D.T.W., no-rɛɛs a Daniɛll sẽn kʋʋlã yãa yãab sẽn sidgd yĩnga. Yãab kãng ra reng n togsda dũniyã yɛl sẽn tar n debd baasg zabrẽ sẽn maand a Zeova bɛɛbã la Rĩm ning A sẽn yãkã sẽn yaa a Zezi Kiristã sʋka. A Daniɛll manesem yɩɩ wãn-wãna? A yeelame: “Maam a Daniɛll pãng sɛɛme . . . bõn-makra yɛɛsa maam.”—Danɩɛll 8:27.

2. Zab-bʋg la a Daniɛll yã yãab pʋgẽ, la yãmb tagsg yaa wãn-wãn ne a kolgrã?

² Yaa wãn to ne tõndo? Ad d sɩd kẽnga taoor wʋsg wakatã pʋgẽ! Tõnd manesem yaa wãn-wãna, d sã n mik tɩ zabr ning a Daniɛll sẽn yã yãabã pʋgẽ wã, sẽn yaa Armagedõ zabrã kolga wʋsgo? D manesem yaa wãn-wãna, d sã n wa bãng tɩ wẽnemã b sẽn wilg a Habakuk bãngr-gomdẽ wã bee wʋsg hal n kɩt tɩ Wẽnnaam bɛɛbã sãoong yaa bũmb sẽn ka tõe n gili? Vẽenega, d tagsgã wõnda a Habakuk mengã tagsgo, wala b sẽn bilg-a a sebrã sẽn yaa bãngr-gomdã sak a tãab soabã pʋgẽ wã.

A Habakuk pʋʋsd n kotame tɩ Wẽnnaam tall ninbãan-zoeere

3. A Habakuk pʋʋsa ãnd yĩnga, la wãn-wãn la a goamã tõe n mad tõndo?

³ Habakuk sak a 3 yaa pʋʋsgo. Sã n yaa ne verse a 1 wã, b maan-a lame t’a yaa sũ-sãang yɩɩlle, sẽn yaa sũ-pa-noaang bɩ wiisg yɩɩlle. No-rɛɛsã maana a pʋʋsgã wala sã n da yaa yẽ meng yĩng la a yɩɩl-a. La sɩd-sɩda, a Habakuk gomda buud ning Wẽnnaam sẽn yãkã zĩigẽ.  Rũndã-rũndã, a pʋʋsgã tara yõod wʋsg ne Wẽnnaam nin-buiidã sẽn kẽes a meng Rĩungã mooneg tʋʋmd pʋgẽ wã. D sã n karemd Habakuk sak a 3 n ningd rẽ d yamẽ, a goamã pidsda tõnd ne yɛɛsgo, la b pidsda tõnd ne sũ-noog me. A Habakuk pʋʋsgã bɩ a sũ-sãang yɩɩllã kõta tõnd bʋʋm sẽn tar pãng tɩ d na n tall sũ-noog ne a Zeova sẽn yaa d fãagr Wẽnnaamã.

4. Bõe yĩng t’a Habakuk yɛɛse, la d segd n kɩsa sɩd ne Wẽnnaam pãngã wilgr bʋgo?

⁴ Wala d sẽn zoe n togs sõss a yiibã sẽn loogã pʋsẽ wã, Zida sẽn da be zĩig ning a Habakuk wakatã ra yaa wẽng wʋsgo. La Wẽnnaam da pa na n bas tɩ yɛlã ket n kẽngd taoor woto ye. A Zeova ra na n tik n yika wa a sẽn da maan woto pĩnd wẽndẽ wã. Pa lingr la no-rɛɛsã sẽn kaas woto wã ye: “O Zeova, mam wʋma kɩbarã fo wɛɛngẽ. M yɛɛsame, O Zeova, f tʋʋmdã yĩnga”! Bõe la a ra rat n yeele? ‘A Zeova kɩbarã’ ra yaa Wẽnnaam tʋʋm-kãsemsã b sẽn gʋlsã, wala a sẽn maan Mog-Miuugẽ wã, rasempʋɩɩgẽ wã la Zeriko wã. A Habakuk ra mii tʋʋm-kãens sõma, la b yɛɛs-a lame, bala a ra miime tɩ Wẽnnaam da na n leb n tũnuga ne a pãn-kãsengã n zab ne a bɛɛbã. Tõnd sã n ges ãdem-biisã wẽnem rũndã-rũndã, tõnd me miime t’a Zeova na n tʋma wa a sẽn maan tẽn-kʋdem wẽndẽ wã. Rẽ yɛɛsda tõnd bɩ? Sɩd-sɩda n-yẽe! Baasg zãnga d pʋʋsda wa a Habakuk sẽn pʋʋsã: “Yʋʋmã sẽn tong taabã pʋgẽ, bɩ f wa ne-a vɩɩm pʋgẽ! Yʋʋmã sẽn tong taabã pʋgẽ, bɩ f kɩt tɩ b bãng-a. Gudgrã sasa, bɩ f tẽeg n tall ninbãan-zoeere.” (Habakuk 3:2, NW) Wakat ning Wẽnnaam sẽn yãkã sasa, “yʋʋmã sẽn tong taabã pʋgẽ,” bɩ a wa ne a pãngã sẽn yaa yel-solemdã yɛsa. La wakat kãnga, bɩ a tẽeg n tall ninbãan-zoeer ne neb nins sẽn nong-a wã!

A Zeova tik n yikame!

5. Wãn-wãn la ‘Wẽnnaam yit Teman n watẽ,’ la bõe la rẽ wilgd Armagedõ wɛɛngẽ?

⁵ Bõe n na n zĩndi, a Zeova sã n wʋm tõnd pʋʋsgã d sẽn pʋʋsd n kotẽ t’a zoe-d ninbãanegã? D yãta leoorã Habakuk 3:3, 4 pʋgẽ. Pipi, no-rɛɛsã yetame: “Wẽnnaam yita Teman n watẽ. Sõng-soaba yita Paran tãnga zugu.” No-rɛɛs a Moiiz wakatã, Teman la Paran ra bee sor ning Israɛll sẽn tũ n pasg rasempʋɩɩgã n kẽng Kana wã zugu. Israɛll bu-kãsengã sẽn da kẽndã sasa, ra wõnda a Zeova mengã ra kẽndame, la baa fʋɩ ra pa tõe n yals-a ye. Sẽn deng bilf bal t’a Moiiz ki, a yeelame: “Zusoaba yii Sinai n wa. Bãmb waa Seiir wa sõ-pukri n yãg Paran tãnga zugu. Bãmb waa ne neb [malɛk rãmb] tus-kẽema.” (Tõodo 33:2) A Zeova sã n wa na n yik n zab ne a bɛɛbã Armagedõ, a na n puka a pãngã b sẽn pa tõe n yalsã woto.

6. Sẽn paas Wẽnnaam ziirã, bõe la kiris-neb nins sẽn tar yam-welgrã ne-yã?

⁶ A Habakuk yetame me: “[A Zeova] ziir luda saase, la dũniyã pida ne bãmb pẽgre. Bãmb vẽenema yãgda wa wĩntoogo.” Ad sɩd yaa gesr sẽn be rasãnde! Yaa sɩd tɩ ninsaalb pa tõe n yã a Zeova Wẽnnaam n vɩɩmd ye. (Yikri 33:20) Baasg zãnga, sã n yaa ne Wẽnnaam sõgen dãmbã sẽn tar kɩs-sɩdã, b sũyã nin ligdame, b sã n get a ziirã neerem. (Efɛɛz rãmba 1:18, NW) La kiris-neb nins sẽn tar yam-welgrã nee bũmb a to sẽn paas a Zeova ziirã. Habakuk 3:4 baasda woto: “Vẽenem yãgdame n yit bãmb nusẽ; tɩ bõe, b pãnga solga be.” N-yẽe, d neeme t’a Zeova seglame n sa n na n tʋme, n tũnugd ne a nug-rɩtgã pãng la a keelem.

7. Wẽnnaam sẽn na n yik n kẽn ne tõogrã na n waa ne bõe neb nins sẽn kɩɩsd-a wã zutu?

⁷ Wẽnnaam tõogr kẽndã na n yɩɩ yel-beed  n kõ neb nins sẽn kɩɩsd-a wã. Habakuk 3:5 yetame: “Bã-longds lʋɩta bãmb taoor tɩ kẽer pʋgd b poore.” Yʋʋmd 1473 S.D.T.W., Israɛll nebã sẽn da wa n pẽ Kãabg Tẽngã toadgẽ wã, wʋsg tõdgame, n maan yoob la b pʋʋs bõn-naandse. Rẽ kɩtame tɩ bã-longdem Wẽnnaam sẽn wa ne kʋ sẽn yɩɩd neb 20 000. (Sõdbo 25:1-9) Ka la bilfu, a Zeova sã n wa yik n na n kẽn ‘Wẽnnaam Sẽn-tõe-fãa daar kãsenga zabrẽ,’ neb nins sẽn kɩɩsd-a wã me na n namsa b yel-wẽnã yĩnga. Tõe meng tɩ bã-longdem sɩd-sɩd kʋ kẽere.—Wilgri 16:14, 16.

8. Sã n yaa ne Habakuk 3:6, bõe n gũud Wẽnnaam bɛɛbã?

⁸ Masã bɩ y kelg no-rɛɛsã sẽn bilgd tãb-biis soab a Zeova sẽn tʋmd ne manesem sẽn yaa kãsenga. Habakuk 3:6 (NW) pʋgẽ, d karemda woto: “A [Zeova Wẽnnaam] yalsame, sẽn na yɩl n dĩms tẽngã. A yãame, la rẽ poore a kɩtame tɩ tẽn-tẽnsã tʋrse. La tãens sẽn be wakat fãa wã wãame; kunkub nins sẽn kaoosd wakat sẽn-kõn-sa wã wõgemdame. Pĩnd soayã yaa yẽ n so.” A Zeova reng n “yalsame” wa zenerall sẽn get zabrã zĩigẽ. T’a bɛɛbã rigd ne rabeem. B geta b bɛ wã sẽn ya a soaba, tɩ rabeem kẽ-b tɩ b yas n digda. A Zezi yeelame tɩ wakat n na n wa tɩ ‘dũniyã buud fãa na n wiisi.’ (Matɩe 24:30) B na n wa bãngame tɩ ned ba a yembr pa tõe n kɩɩs a Zeova raabã ye, la rẽ tɩ kẽ n bõogame. Ninsaalbã siglsi, baa b rãmb nins sẽn wõnd b vigla kãn-kãe wala “tãens sẽn be wakat fãa wã,” la “kunkub nins sẽn kaoosd wakat sẽn-kõn-sa” na n siigame. Na n yɩɩ wa Wẽnnaam “pĩnd soayã,” wa a sẽn da tʋm to-to pĩnd wẽndẽ wã.

9, 10. Bõe la Habakuk 3:7-11 tẽegd tõndo?

⁹ A Zeova ‘sũ-yikrã wɩnga’ ne a bɛɛbã. La yaa zab-te-bʋs la a na n tũnug ne a zab-kãsengẽ wã? Kelg-y no-rɛɛsã sẽn bilgd-b to-to n yetẽ: “Yãmb yaasa tãpo. Y loka pida ne pɛɛma. [Bu-rãmbã sẽn wẽen n pidsã yaa bũmb nins b sẽn yeelã, (NW )] Yãmb pãrga dũniyã tɩ ko-soɛy zĩndi. Tãensa yãa yãmb n digda la sa-kẽenga waame. Ko-zulums zẽka b koeese tɩ b ko-wiisa yik wʋsgo. Y pɛɛma kẽnda wʋsgo; y kãna pɩndame tɩ wĩndga ne kiuuga yas b zĩisẽ.”—Habakuk 3:7-11.

¹⁰ A Zozue wakatã, a Zeova kɩtame tɩ wĩntoogã ne kiuugã yaase. Rẽ yɩɩ a Zeova pãn-kãsengã wilgri. (Zozue 10:12-14) A Habakuk goamã tẽegda tõnd t’a Zeova na n tũnuga ne pãn-kãng Armagedõ.  Yʋʋmd 1513 S.D.T.W., a Zeova wilgame t’a ra tara tõog tẽngã ko-zulums zutu, a sẽn wa n tũnug ne Mog-Miuugã n sãam a Faraõ tãb-biisã. Yʋʋm pis-naas poore, Zʋrdẽ kʋlgã sẽn pid n puugã ra pa gɩdg Israɛll tɩ b pa kẽn ne tõogr n kẽ Kãabg Tẽngẽ wã ye. (Zozue 3:15-17) No-rɛɛs poak a Debora wakatã, sa-kẽeng n ni tɩ kooma loog ne Israɛll bɛ a Sizera saar dãmbã. (Bʋkaoodba 5:21) Pãn-kãensã sẽn yaa sa-kãsengã la ko-zulumsã na n zĩnda ne a Zeova Harmagedõ. Sa-tãsã la sa-yãgb me be a nugẽ, wala kãnde, bɩ lok sẽn pid ne pɛɛma.

11. Bõe n na n maane, a Zeova sã n wa wilg a pãn-kãsengã?

¹¹ Sɩd-sɩda, yaa bũmb sẽn na n kẽes rabeem wʋsgo, a Zeova sã n tʋm ne a pãn-kãsengã fãa. A Habakuk goamã wilgdame tɩ yʋng na n lebga wa wĩntoogo, tɩ wĩndg sasa vẽenemã yɩɩg wĩntoogã vẽenem. Bilgr kãngã sẽn yaa bãngr-gomdã sẽn tɩ loe ne Harmagedõ wã sã n yaa sɩd-sɩd bɩ makr me, bũmb a yembr n yaa vẽenega: A Zeova na n tõogame, n pa bas bɛ ba a yembr t’a põs ye.

Fãagrã yaa waazib ne Wẽnnaam nin-buiidã!

12. Bõe la Wẽnnaam na n maan a bɛɛbã, la ãnd n na n paam fãagre?

¹² No-rɛɛsã kẽngda taoor n bilgd a Zeova sẽn sãamd A bɛɛbã. Habakuk 3:12 pʋgẽ d karemdame: “Yãmb pɩʋʋga dũniyã n tab buud wʋsgo [”ne sũ-puugri,” NW ].” La a Zeova pa na n sãam nebã yaar ye. Ninsaalb kẽer n na n paam fãagre. Habakuk 3:13 yetame: “Yãmb yiimi n na n fãag y nebã, la y fãag y nin-tũusdgã.” N-yẽe, a Zeova na n fãaga a sõgen dãmb nins sẽn yaa kɩs-sɩd dãmbã. Rẽ tɩ Babilon Kãsengã sẽn yaa dũni gill ziri tũudum soolmã sãama zãnga. La rũndã-rũndã, tẽn-tẽnsã maoodame n dat n menes baleng yɩlemdã. Ka la bilfu, a Goog sẽn yit Magoogã na n wa zaba ne Wẽnnaam sõgen dãmbã. (Ezekɩɛll 38:1-39:13; Wilgri 17:1-5, 16-18) A Sʋɩtãan zab-kãngã na n tõogame bɩ? Ayo! Wakat kãnga, ne sũ-yikri, a Zeova na n tõoga a bɛɛbã, n tab-b wa ka-bɛɛl b sẽn tabd zaeegẽ. La a na n fãaga neb nins sẽn sõgend-a ne vʋʋsem la ne sɩdã.—Zã 4:24, NW.

13. Wãn-wãn la Habakuk 3:13 na n paam pidsgu?

¹³ B reng n togsa nin-wẽnsã sãoong zãng-zãngã woto: “Yãmb [a Zeova] luba nin-wẽns rooga soaba n kɩt tɩ rooga yɩ zaal yĩngri tɩ ta tẽnga.” (Habakuk 3:13) ‘Ro-kãng’ yaa dũni wẽngã sẽn paam pãng a Sʋɩtãan Munaafɩɩk pãn-tusdg pʋgẽ wã. B na n sãam-a lame. B na n sãama “rooga soaba” bɩ taoor dãmbã sẽn yaa Wẽnd bɛɛbã. B na n sãama roogã zãnga, hal n ta a yẽbgrẽ wã menga. A pa na n ye zĩnd ye. Ad sɩd na n yɩɩ yolsg tɛkẽ!

14-16. Sã n yaa ne Habakuk 3:14, 15, bõe n na n paam a Zeova nin-buiidã la b bɛɛbã?

¹⁴ Armagedõ, neb nins sẽn na n mak n sãam a Zeova “nin-tũusdgã,” b na n ning-b-la zũnd-zãnd pʋgẽ. Sã n yaa ne Habakuk 3:14, 15, no-rɛɛsã gomda ne Wẽnnaam n yetẽ: “Yãmb kɩtame t’a meng pɛɛm kõs a tãb-biisa naab wakat ninga bãmb sẽn wa wa sɩlmand n kaasd ne sũ-noog n na n sãeeg tõnd la b soos n dɩ ninbãan dãmbã. Yãmb kẽnda ne y wiid ko-kãsenga zugu, la kooma puuga wʋsgo.”

¹⁵ A Habakuk sẽn yet tɩ “tãb-biisa . . . waa wa sɩlmand . . . n na n sãeeg tõnd[ã],” no-rɛɛsã gomda a Zeova sõgen dãmb sẽn zaeyã zĩigẽ. Wala so-gɩtb sẽn solg n dat n ling neba, tẽn-tẽnsã na n yikame n pig Wẽnnaam balemdbã sẽn na yɩl n sãam-ba. Wẽnnaam la  a nin-buiidã bɛɛb kãensã na n maana “sũ-noog[o],” n tar bas-m-yam tɩ b na n tõogame. Na n wõnega wa kiris-neb sẽn yaa kɩs-sɩd dãmbã ka pãng ye. B na n wõnega “ninbãan dãmbã.” La pãn-kãens sẽn yaa Wẽnd bɛɛbã sã n sɩng b zabrã, a Zeova na n kɩtame tɩ b rɩk b zab-teedã n wẽneg n zab taaba. B na n dɩka b zab-teedã bɩ b ‘rasabã’ n wẽneg n zab taaba.

¹⁶ La sẽn yɩɩd woto n wate. Rẽ, a Zeova na n tũnuga ne malɛk rãmbã pãens sẽn yɩɩd ninsaal dẽndã n sãam a bɛɛbã n baase. Ne a yĩngr tãb-biisã ‘wiid’ sẽn be a Zezi Kirist sor-wilgr pʋgẽ, a na n paama tõogr “ko-kãsengã” la “kooma” zugu, sẽn yaa ãdem-biisã kʋʋnd sẽn yaa bɛɛbã sẽn be rãmbg pʋgẽ wã. (Wilgri 19:11-21) Rẽ poore, b na n yiisa nin-wẽnsã tẽngã zugu. Ad yaa Wẽnnaam pãngã la a tɩrlmã wilgr sẽn yaa kãseng wʋsg menga!

A Zeova daarã sɩd watame!

17. a) Bõe yĩng tɩ d tõe n tall bas-m-yam t’a Habakuk goamã na n pidsame? b) Wãn-wãn la d tõe n yɩ wa a Habakuk d sẽn gũud a Zeova ra-kãsengã sasa?

¹⁷ D tõe n kɩsa sɩd t’a Habakuk goamã na n pidsa ka la bilfu. B pa na n kaoos tɩ loog b pidsgã wakat ye. Yãmb manesem yaa wãn-wãn ne y sẽn deng n bãng woto wã? Tẽeg-y t’a Habakuk ra gʋlsda vʋʋsem sõngã  vẽnegr pʋgẽ. A Zeova na n tʋmame, la a sã n wa maan woto, na n waa ne tẽn-kũum tẽng zugu. Rẽnd pa lingr la no-rɛɛsã sẽn gʋls woto wã ye: “Mam wʋma yõ wã fãa, la m digdame. A koɛɛga kɩtame tɩ m no-bɩmsa pãbd taaba. M kõaba pãng sɛɛme tɩ m dũma rigda. Mam na n sĩndame n gũ daar ninga toog sẽn na n paam neb nins sẽn zabd ne tõndã.” (Habakuk 3:16) A Habakuk ra rigda hal sõma la a bee bʋʋm. La a tẽebã rĩmsame bɩ? Ayo! A ra sakame n na n maag a yĩng n gũ a Zeova ra-kãsengã. (2 Pɩɛɛr 3:11, 12) Tõnd me manesem pa woto sɩda? Sɩd-sɩda n-yẽe! D tara tẽeb sẽn pid zãng t’a Habakuk bãngr-gomdã na n pidsame. La nand tɩ yɩ woto, d gũuda ne maag-m-menga.

18. Baa ne a Habakuk sẽn da mi tɩ far n watã, a manesem da yaa wãn-wãna?

¹⁸ Wakat fãa, zabr wata ne toodo, baa ne sẽn baasd-b n tõogã. Rɩɩbã tõeeme n ye kaẽ ye. Tõe tɩ arzɛgsã sãame. Vɩɩmã naar tõe n boogame. Rẽ sã n paam tõndo, d na n maana wãn-wãna? A Habakuk ra tara manesem sẽn zems ne pẽgre, bala a yeelame: “Tɩ bõe, baa kankams sã n ka le ning puudu, tɩ sĩb me ka wom, tɩ oliiv tɩɩs me ka wom, tɩ pʋta me ka wom koodo, tɩ piis ne niig me ka le be bãgr pʋgẽ, mam na n kell n maana sũ-noog Zusoab a Wẽnnaam sẽn yaa mam fãagda yĩnga.” (Habakuk 3:17, 18) Wa sẽn sɩd zemse, a Habakuk ra gẽegda fare, tõe tɩ yɩ kom menga. Baasgo, a zɩ n menes a sũ-noogã ne a Zeova ye, a soab ning nugẽ a fãagrã sẽn yiẽ n wã.

19. Tood bʋs la kiris-neb wʋsg segda, la ne bõe la d tõe n kɩs sɩda, d sã n ning a Zeova pipi zĩigẽ d vɩɩmã pʋgẽ?

¹⁹ Rũndã-rũndã, baa sẽn deng a Zeova zabrã ne nin-wẽnsã menga, neb wʋsg n namsd yel-be-kãsems yĩnga. A Zezi reng n togsame tɩ zaba, kom, tẽn-digimdgu, la bã-longds n da na n zĩnd a ‘belmã [a Rĩungã naamẽ] bãnd’ pʋgẽ. (Matɩe 24:3-14, NW; Luk 21:10, 11) Tõnd saam-biis wʋsg vɩɩ tẽnsẽ a Zezi gom-kãensã pidsgã sẽn wat ne toog sẽn pa nana, la rẽ kɩtame tɩ b namsd wʋsgo. Tõe tɩ kiris-neb a taab me na n namsa woto beoog-daare. Sã n yaa ne tõnd wʋsg sẽn yɩɩda, tõeeme tɩ ‘kankams ka le ning puud’ hal tɩ saabã wa ye. Baasg zãnga, d mii bõn-kãensã sẽn watã võore, la rẽ kõta tõnd pãnga. Sẽn paase, d tara teelgo. A Zezi kãaba woto: “Bɩ y reng n bao Wẽnnaam soolem ne bãmb tɩrlem, la bõn-kãens fãa na paas yãmba.” (Matɩe 6:33) Rẽ pa wilgd tɩ d na n sɩd paama naar vɩɩm ye. La a kõta tõnd bas-m-yam tɩ d sã n lʋɩɩs a Zeova taoore, a na n gesa d yelle.—Yɩɩl Sõamyã 37:25.

20. Baa ne toodã sẽn yaa wakat bilf bũmbã, bõe la d segd n dɩk sard kãn-kãe n maane?

²⁰ Baa wakat bilf toog ning fãa tõnd sẽn segd n segã sẽn ya a soaba, d pa segd n tẽ masã t’a Zeova pa tõe n fãag-d ye. Tõnd saam-biis la d saam-bi-pogs wʋsg sẽn be Afiriki, Erop Yaang la zĩis a taab segda tood sẽn loog nugu, la b ket n ‘maanda sũ-noog a Zeova yĩnga.’ Wala bãmba, bɩ d ra tol n bas woto maaneg ye. Tẽeg-y t’a Zeova sẽn yaa Naab-sẽn-ka-to wã yaa tõnd “pãnga” Yẽgre. (Habakuk 3:19) A ka na n tol n sãam d sũur ye. Armagedõ waoongã pa be sãmbg ye, la dũni paalg ning Wẽnnaam sẽn kãabã pʋglg me na n yɩɩ waaziba. (2 Pɩɛɛr 3:13) Rẽ, “dũniyã na n pida ne Zusoaba ziir bãngr wa ko-kãsemsa sẽn lud tẽngã.” (Habakuk 2:14) Nand tɩ wakat kãng ta, bɩ d tũ a Habakuk mak-sõngã. Wakat fãa bɩ d ‘maan sũ-noog Zusoab a Wẽnnaam sẽn yaa tõnd fãagda yĩnga.’

Y tẽrame bɩ?

• Wãn-wãn la a Habakuk pʋʋsgã tõe n mad tõndo?

• Bõe yĩng t’a Zeova tik n yiki?

• Bõe la a Habakuk bãngr-gomdã yet fãagrã wɛɛngẽ?

• Ne manesem bʋg la d segd n gũ a Zeova ra-kãsengã?

[Zãmsgã sogsgã]

[Foto, seb-neng 29]

Yãmb mii pãens nins Wẽnnaam sẽn na n tũnug ne n zab ne nin-wẽnsã Armagedõ bɩ?