D bao n bãng “Kirist tagsgo”

“ ‘Ãnda n bãng Zusoaba [a Zeova, NW ] tagsgo n na n zãms bãmba?’ La tõnd tara Kirist tagsgo.”—1 KORẼNT DÃMBA 2:16.

1, 2. A Gomdã pʋgẽ, a Zeova yãame tɩ zemsame t’a puk bõe a Zezi wɛɛngẽ?

A ZEZI ra yaa wãn-wãna? A zoobdã, a yĩn-gãongã la a ninã kõbg ra yaa wãn-wãna? A ra yaa wok bɩ koɛɛga? A ra peesda kɩlo a wãna? Yʋʋm kob-gĩnã pʋsẽ, gʋndb sãnda bilga a Zezi ne manesem sẽn sakde, t’a taab bilg-a ne manesem sẽn loog noore. Kẽer bilg-a-la wa rao tɛkẽ la ned sẽn tar pãnga, tɩ neb a taab bilg-a wa ned sẽn ka pãng la sẽn ka yẽesem.

² La Biiblã pa gomd n tadgd a Zezi yĩngã yalẽ zug ye. Sẽn yaa lebende, a Zeova yãame tɩ zemsame t’a puk bũmb sẽn tar yõod n yɩɩd zĩig sẽn zãre: yaa a Zezi sẽn da yaa ned ning buudã. Evãnzill dãmbã pa wilgd a Zezi sẽn yeel la a maan bũmb ningã bal ye, la a leb n wilgda yĩn-sidg sẽn tar pãnga, la tagsg manesem ning sẽn da pukd a goamã la a tʋʋmã pʋsẽ wã. Evãnzill dãmb a naas kãensã sõngda tõnd tɩ d bao n bãng bũmb ning tʋm-tʋmd a Poll sẽn wilg tɩ yaa ‘Kirist tagsgã.’ (1 Korẽnt dãmba 2:16) Tara yõod tɩ d bãng a Zezi tagsgã, a yĩn-sidsã la a nedemdã. Bõe yĩnga? Yaa sẽn na ta bʋʋm a yiib yĩnga.

3. D sã n bãng Kirista tagsgo, bõe yam la d tõe n paam?

 ³ Pipi, Kirista tagsg kɩtdame tɩ d bãng a Zeova Wẽnnaam tagsgã bilfu. A Zezi ra mii a Ba wã sõma wʋsg hali n da tõe n yeel woto: “Ned ba a yembr ka mi Biiga sẽn ya a soab ye, sã n ka Ba bala. La ned ba a yembr ka mi Ba sẽn ya a soab ye, sã n ka Biiga bala, la Biiga sẽn dat n vẽneg ned ninga ne bãmba.” (Luk 10:22) Yaa wala a Zezi ra yetame: ‘Yãmb sã n dat n bãng a Zeova sẽn ya a soab bɩ y ges maam.’ (Zã 14:9) Woto, d sã n zãmsd bũmb ning Evãnzill dãmbã sẽn yet a Zezi tagsg la a yĩn-sidg sẽn da yaa to-to wã zugu, sɩda, yaa a Zeova tagsg la a yĩn-sidg sẽn yaa to-to wã la d bãngda. Bãngr a woto kɩtdame tɩ d pẽneg d Wẽnnaamã n paase.—Zak 4:8.

4. Tõnd sã n sɩd rat n tʋm wala Kirista, bõe la d segd n deng n bao n bãnge, la bõe yĩnga?

⁴ Yiib-n-soaba, tõnd sẽn mi Kirist tagsgã sõngda tõnd tɩ d “tũ bãmb nao wã [neere, NW ].” (1 Pɩɛɛr 2:21) Tũ a Zezi pa a goamã togs n yɩlem la togs-n-taar dɩkr ne a tʋʋmã bal ye. Sẽn mik tɩ tagsa wã la yĩn-sidsã tara pãng tʋʋmã zutã yĩnga, Kirist tũub baoodame tɩ d bɩɩs “yam” ning Kirist sẽn da tallã. (Filip rãmba 2:5) Woto rat n yeelame tɩ d sã n sɩd rat n maan wa Kirista, d segd n deng n tagsame la d tall yĩn-sidg wa yẽ wala d sẽn tõe tɛka, d sẽn pa-zems-zãngã pʋgẽ. Bɩ d vaees Kirista tagsg ne Evãnzill gʋlsdbã sõngre. Pipi, d na n sõsa yɛl sẽn tall pãn-tusdg a Zezi sẽn da tagsd la a ra tar yĩn-sidg to-to wã zugu.

A belem sẽn deng t’a yɩ ninsaalã

5, 6. a) Tõnd tũud-n-taasã tõe n talla pãn-tusd-bʋg tõnd zutu? b) Tũud-n-taar bʋg la Wẽnnaam pipi Biriblã tall saasẽ t’a nan pa wa tẽng zugu, la bõe pãn-tusdg la rẽ tall a zugu?

⁵ Tõnd sẽn tũud b rãmb sõma-sõma wã tõe n talla pãn-tusdg tõnd zutu, n toeem tõnd tagsa wã, d yĩn-sidsã la d tʋʋmã, tɩ yɩ sõma bɩ wẽnga. * (Yelbũna 13:20) Ges-y tũud-n-taar ning a Zezi sẽn da tar saasẽ t’a nan pa wa tẽng zugã. A Zã Evãnzillã takda tõnd yamã n sikd a Zezi belem sẽn deng t’a yɩ ninsaalã zugu, n yetẽ t’a yaa Wẽnnaam “Gomda” bɩ a Gom-dɛɛsa. A Zã yeelame: “Hal sɩngre Gomda ra beeme, la Gomda ra bee ne Wẽnnaam, la Gomda yaa Wẽnnaam. Bãmb bee ne Wẽnnaam hal sɩngre.” (Zã 1:1, 2) A Zeova sẽn pa tall sɩngrã yĩnga, a sẽn yet tɩ Gomdã bee ne Wẽnnaam hal ‘sɩngrã’ segd n tɩ loee ne Wẽnnaam naanegã tʋʋm sɩngre. (Yɩɩl Sõamyã 90:2) A Zezi yaa “Bi-kãseng sẽn yɩɩd bõn-naandsa fãa.” Woto yĩnga, a ra beeme tɩ b nan pa naan bõn-naands nins sẽn yaa malɛk rãmbã la ãndũniyã ninsaalba nif sẽn ne wã ye.—Kolos rãmba 1:15; Wilgri 3:14.

⁶ Sã n yaa ne nasaar bãngrã magbo, ãndũniyã ninsaalba nif sẽn ne wã bee sẽn na ta yʋʋm milyaar 12. Mag-kãensã sã n zemsa bilfu, Wẽnnaam pipi Biriblã paama tũud-n-taar sõma ne a Ba wã yʋʋm milyõ ka tɛk tɩ b nan pa naan a Ãdem ye. (Mak-y ne Miise 5:1.) Woto, nonglem kãseng n loe b yiibã ne taaba. Wala yam sẽn gomd wa nedã, b bilga pipi Biribl kãngã belem sẽn deng t’a yɩ ninsaalã t’a yetẽ: “Mam wa n lebga wa tʋʋm-mit yẽ sɛɛgẽ, la m wa n lebga ned ning a [Zeova] sẽn da nong zall daar ne a to fãa, tɩ m sũur noom a taoor wakat fãa.” (Yelbũna 8:30, NW ) A sẽn tall zood sõma ne nonglmã Yẽgrã yʋʋm ka tɛkã, yɩɩ bũmb sẽn tall pãng wʋsg Wẽnnaam Biriblã zugu! (1 Zã 4:8) Biribl kãng wa n bãnga a Ba wã tagsa, a yĩn-sids la soaya, la a puk zʋgd kãense, n yɩɩd ned a to buud fãa.—Matɩe 11:27.

A tẽng zug vɩɩmã la pãn-tusdɩ nins a sẽn segã

7. Bʋʋm nins sẽn kɩt tɩ ra yaa tɩlae ne Wẽnnaam pipi Biriblã t’a wa tẽng zugã a yembr yaa bʋgo?

⁷ Yɛl wʋsg la Wẽnnaam Biriblã ra segd n bãnge, bala a Zeova sẽn da ratã ya a segl a Biriblã t’a yɩ Maankʋʋd Kãsem sẽn tar ninbãan-zoeere, sẽn tõe n “zoet tõnd ninbãanega.” (Hebre dãmba 4:15) Bũmb a ye sẽn kɩt tɩ Biriblã wa tẽng zug n yaa ninsaalã, yaa sẽn na yɩl n pids yɛl nins b sẽn baood tʋʋm-kãngã yĩnga. A sẽn wa tẽng zug ka n yaa ninsaal ne nems la zɩɩmã, a Zezi ra  bee yɛl la pãn-tusdɩ pʋsẽ a sẽn da be saasẽ n getẽ bala. Masã wã a ra tõe n bãnga ninsaal tagsg la a yĩn-sidg sẽn ya a soab a toore. Wakat ninga, yaamse, ko-yũud la kom yõk-a lame. (Matɩe 4:2; Zã 4:6, 7) Sẽn yɩɩd fãa, a tõoga toog ne manesem buud toor-toore, zu-loees la namsg pʋsẽ. Woto, a “zãmsa sakre” n paam zʋgd nins b sẽn baoodã zãng sẽn na yɩl n yɩ Maankʋʋd Kãsmã.—Hebre dãmba 5:8-10.

8. Bõe la d mi a Zezi tẽng zug vɩɩmã sɩngr wɛɛngẽ?

⁸ Yaa wãn to ne yɛl nins a Zezi sẽn vɩɩmd a vɩɩmã tẽng zugã? Biiblã pa gom a bi-bɩɩlmã wakat n kaoos ye. Sɩda, yaa a Matɩe la a Luk bal n gom a rogmã yelle. Evãnzillã gʋlsdbã ra miimi t’a Zezi ra vɩɩmda saasẽ t’a nan pa wa tẽng zug ye. Belem kãng sẽn deng t’a yɩ ninsaalã wilga ned ning buud a sẽn yɩ wã n yɩɩd bũmb a to fãa. Baasg zãnga, a Zezi ra yaa ninsaal zãng-zãnga. Baa ne a sẽn da zems zãngã, a ra ket n segd n bɩɩme n lebg bi-bɩɩga, n wa ta kãsem zĩigẽ, la wakat kãng fãa pʋgẽ a reega zãmsgo. (Luk 2:51, 52) Biiblã pukda yɛl kẽer a Zezi tẽng zug vɩɩmã wɛɛngẽ, tɩ yel-kãens tuk-a tɩ sãmbg ka be ye.

9. a) Bõe n wilgd t’a Zezi roga zak pʋgẽ sẽn be talemd pʋgẽ? b) Wõnda a Zezi bɩɩ yɛl sẽn yaa wãn to pʋsẽ?

⁹ Vẽenega, a Zezi sẽn dog zak ning pʋgẽ wã ra bee talemd pʋgẽ. Bũmb sẽn wilgd rẽ yaa kũun ning a Zozɛf ne a Maari sẽn tall n kẽng wẽn-doogẽ wã sẽn zems rasem 40 a Zezi rogmã poorã. Wall tɩ b wa ne pe-ra-poll n maan maoong sẽn yõogd bugum ne wal-bɩɩg maa marwall n maan maoong yel-wẽnã yĩnga, b waa ne “wal a yiibu walla manewal a yiibu.” (Luk 2:24) Sã n yaa ne a Moiiz Tõogã, maoong kãng ra yaa naong rãmbã kũun la woto. (Maankʋʋre 12:6-8) Tar-n-tarẽ, zag-kãngã tarem sẽn pa wʋsgã wa n fɩɩgame. A Zozɛf ne a Maari ra tara sẽn na ta kamb a yoob a taab bãmb b yiibã sẽn paame, a Zezi rogmã sẽn tũ ne yel-solemdã poore. (Matɩe 13:55, 56) Woto, a Zezi roga zak sẽn tar neb wʋsg t’a tarmã pa wʋsg pʋgẽ.

10. Bõe n wilgd t’a Maari ne a Zozɛf ra yaa wẽn-zoɛtba?

¹⁰ Ra yaa roagdb sẽn yaa wẽn-zoɛtb n wub a Zezi la b ges a yelle. A ma a Maari ra yaa pʋg-sõng tɛkẽ. Tẽeg-y tɩ malɛk a Gabriɛll sẽn da pʋʋsd-a wã yeel-a-la woto: “Mam pʋʋsda foom, fo sẽn yaa ned Wẽnnaam sẽn barkã. Zusoaba [a Zeova, NW ] bee ne foom.” (Luk 1:28) A Zozɛf me ra yaa wẽn-zoɛta. Yʋʋmd fãa, a ra togda sor n maan kɩlometr 150 n kẽng Zerizalɛm Pakã yĩnga n pa vaandẽ ye. A Maari me ra kẽngdame, baa ne sẽn da yaa ne roapã bal la yaa modgr tɩ b kẽngã. (Yikri 23:17; Luk 2:41) Kibs kãngã a yembr sasa, b sẽn bao a Zezi sõma-sõma poore, a Zozɛf ne a Maari yãa a Zezi sẽn da tar yʋʋm 12 wẽn-doogẽ wã t’a be karen-saam dãmbã sʋka. A Zezi yeela a roagdbã sẽn da maand yɩɩrã woto: “Yãmb ka mi tɩ yaa tɩlae tɩ m ges m Ba tʋʋmd yell la?” (Luk 2:49) Gom-biig ning sẽn yaa “Ba” wã ra segd n yaa nonglem gom-biig sẽn yaa sõma ne bi-bɩɩg a Zezi. Bũmb a yembr sẽn be, b togs-a lame tɩ ra yaa a Zeova la a Ba roakã. Sẽn paase, a Zozɛf ra segd n yaa ba-wubdg sẽn yaa sõma ne a Zezi. Sɩd-sɩda, a Zeova ra pa na n yãk nin-toaag t’a wub A Biribl nongrã ye!

11. Tʋʋm-bʋg la a Zezi zãms-yã, la Biiblã gʋlsg wẽndẽ, tʋʋm-kãngã buud tʋmb ra baooda bõe maanego?

 ¹¹ Yʋʋm nins a sẽn zĩnd Nazarɛtã sasa, a Zezi zãmsa raad wãabo. Wõnda ya a ba-wubdg a Zozɛf sɛɛgẽ la a zãms tʋʋm-kãngã. A Zezi bãnga tʋʋmdã sõma hal tɩ b wa boond yẽ mengã tɩ “ra-wãada.” (Mark 6:30) Biiblã gʋlsg wakate, ra-wãadba ra meta roto, n da kaad bõn-yoodo (tɩ taabl dãmba, kʋgs la goeels be sʋka), n paas koobã tʋʋm teedo. A sebrã (Dialogue avec Tryphon) pʋgẽ, a Justin Martyr sẽn vɩɩmd yʋʋm kob-gĩnd a yiib soab T.W. gʋlsa woto a Zezi wɛɛngẽ: “A ra minim n tʋmda raad-wãab tʋʋma tẽng zug ka, n da maand nag-kũy la gol dãmba.” Tʋʋm-kãngã ra pa nana ye, bala pĩnd wẽndẽ wã, ra-wãad ra pa tõe n da a raadã ye. Wõnda a ra kẽngda weoogẽ n tɩ bao tɩɩg n kɛ-a n lubi, n tall raadã n wa yiri. Woto, tõe t’a Zezi yãa toog wala bao n kõ noorã, tʋm ne raadensã, la zakã ligd zãab wɛɛngẽ.

12. Bõe n wilgd vẽeneg t’a Zozɛf renga a Zezi n ki, la rẽ waa ne bõe a Zezi zugu?

¹² A sẽn da yaa bi-kãsengã, tõeeme t’a Zezi sõngame n ges zakã yelle, sẽn yɩɩd fãa, sẽn wõnd a Zozɛf renga a Zezi n ki wã. * Zion’s Watch Tower ning sẽn puk yʋʋmd 1900 yʋʋm-vẽkr kiuug pipi daar yeelame: “Rog-n-mikã togsdame t’a Zozɛf kiime t’a Zezi ra ket n yaa bi-bɩɩga, tɩ yẽ reeg raadã wãab tʋʋmd n lebg zakã zãada. Goam n be Gʋlsg Sõamyã pʋgẽ n kõt kaset buud tɩ yɩɩ woto. B wilga be tɩ b boonda a Zezi mengã tɩ ra-wãada, tɩ b gomd a ma wã la a ma-biisã yelle, n yaool n pa gom a Zozɛf yell ye. (Mark 6:3) . . . Rẽnd sɩd tõeeme tɩ tõnd Soaalã vɩɩm pʋgẽ yʋʋm piig la a nii sasa, sẽn sɩng yell ning yell b sẽn goma wakat [tɩ be Luk 2:41-49 pʋgẽ wã] n tɩ ta a lisgã wakate, a rɩka sẽk kãng n tʋm vɩɩmã daar fãa tʋʋmã.” Wõnda a Maari ne a kambã, n paas a Zezi, bãnga sɩd la ba-nongr kũum toogo.

13. A Zezi sẽn wa n sɩng a ministɛɛrã, bõe yĩng tɩ ra yaa ne bãngre, yam la yĩn-sidg sẽn tar pãng sẽn yɩɩd ninsaal a to fãa rẽnda?

¹³ Vẽenega, a Zezi pa rog naar pʋgẽ ye. Sẽn yaa lebende, yẽ mengã vɩɩmda wa nin-talsã. Rẽ poore, yʋʋmd 29 T.W., wakat ra taame t’a Zezi ra na n tʋm tʋʋmd ning Wẽnnaam sẽn yãk tɩ gũud-a wã. Yʋʋm-kãng saabẽ wã, a reega lisg koom pʋgẽ n dog n lebg Wẽnnaam Biribl tẽebã wɛɛngẽ. ‘Yĩngr pakame n kõ-a,’ tɩ rẽ wilgd vẽeneg t’a ra tõe n tẽega a vɩɩmã sẽn da yaa to-to saasẽ, sẽn deng t’a yɩ ninsaalã, n paas tagsa la yĩn-sids nins a sẽn da tar pĩndã. (Luk 3:21, 22) Woto, a Zezi sẽn wa n sɩng a ministɛɛrã, ra yaa ne bãngre, yam la yĩn-sidg sẽn tar pãng n yɩɩd ninsaal a to fãa sẽn da tõe n tallã. Evãnzillã gʋlsdb bee bʋʋm sõma la b sẽn modg b mens n gʋls a Zezi ministɛɛrã zug yɛlã n yɩɩd sẽn keta fãa wã. Baa ne woto, b pʋd n da pa tõe n gʋls bũmb nins fãa a sẽn yeel la a maana ye. (Zã 21:25) La b sẽn vẽneg-b tɩ b gʋls bũmb ninsã sõngda tõnd tɩ d bãng ninsaan-kãseng ning to sẽn zɩ n zĩndã tagsgo.

A Zezi sẽn da yaa ned ninga

14. Wãn-wãn la Evãnzill dãmbã bilgd a Zezi wa rao sẽn tar nonglem la yĩn-sids sẽn tar pãngã?

¹⁴ Sã n yaa ne Evãnzill dãmbã, nedemd ning a Zezi sẽn tallã yɩɩ rao sẽn tar nonglem la yĩn-sids sẽn tar pãnga. A talla yĩn-sidg buud toor-toor wʋsgo: a zoee wãoor ninbãanega  (Mark 1:40, 41); a sũur sãam neb sẽn tall yam-kaalg taoore (Luk 19:41, 42); a talla bʋʋm n sãam a sũur ne ligd tekdb sẽn yaa rat-tɩ-loog rãmba (Zã 2:13-17). A Zezi sẽn da wʋmd a to yĩn-sidg võorã yĩng ra tõe n sidgame hal t’a raag nintãm, la a pa solgd a yĩn-sidgã ye. A zo-nongr a Lazaar sẽn da wa n ki wã, a sẽn yãa a Lazaar tão a Maari sẽn yãbdã, tuka a Zezi wʋsg hali n kɩt tɩ yẽ mengã raag nintãm, n yãbd neb a taaba fãa nifẽ.—Zã 11:32-36.

15. Wãn-wãn la a Zezi nonglem yĩn-sidsã ra yaa vẽenes manesem nins pʋsẽ a sẽn da get la a maand ne neb a taabã?

¹⁵ Sẽn yɩɩd fãa, a Zezi nonglem yĩn-sidsã ra yaa vẽenes ne a sẽn da tagsd to-to ne neb a taabã, la a sẽn da maand to-to ne-bã. A ra baooda naong rãmbã la b sẽn wẽgd b rãmbã zĩiga, n sõngd-b tɩ b paam ‘yolsg b sɩɩsã yĩnga.’ (Matɩe 11:4, 5, 28-30, NW ) Sẽk ra pa paoog-a hali t’a pa tõe n ges sẽn namsd-bã yell ye. Wala makre, pag zɩɩm sẽn da yit wʋsg sẽn soos n sɩɩs a fuugã la bõos sẽn yaa zoang b sẽn da pa tõe t’a sĩndã. (Matɩe 9:20-22; Mark 10:46-52) A Zezi ra baooda zʋg-sõma nins sẽn be neb a taabã nengẽ wã, la a ra pẽgd-ba. La sã n da yaa tɩlae me a ra lengdame. (Matɩe 16:23; Zã 1:47; 8:44) Wakat ning pagbã sẽn da pa tar sor ne yɛl wʋsgã, a Zezi talla naneb la waoogr manesem sẽn kɩls tɩ zems ne-ba. (Zã 4:9, 27) Pagb sull ra bee bʋʋm b sẽn da rat n dɩk b paoong n sõgen-a wã.—Luk 8:3.

16. Yel-bʋs n wilgd t’a Zezi ra tara tagsg sẽn kɩls tɩ zems ne vɩɩmã la dũni zug laogã?

¹⁶ A Zezi ra tara tagsg sẽn kɩls tɩ zems ne vɩɩmã. Tẽng zug laogã yõod ra pa be pipi zĩigẽ ne-a ye. Wõnda laogã wɛɛngẽ a ra pa tar bũmb wʋsg ye. A yeelame t’a ra pa tar ‘zĩig n na n gãneg a zug ye.’ (Matɩe 8:20) La a Zezi paasa neb a taabã sũ-noogo. A sẽn da wa n kẽng kãadem kibsẽ wã, sẽn mi n tall miziki, yɩɩl la kɩdengã, yaa vẽeneg t’a pa kẽng be n na n sãam kibsã sũ-noog ye. Sɩda, a Zezi maana a pipi yel-solemdã be. Divẽ wã sẽn wa n sa wã, a kɩtame tɩ koomã lebg divẽ noogo, sẽn “kõt neba sũ-noogo.” (Yɩɩl Sõamyã 104:15; Zã 2:1-11) Woto, kibsã ra tõe n kẽnga taoore, tɩ pʋg-paalã ne a sɩdã põs yãnde. A kɩls tɩ zemsã leb n puka sasa a taab yell b sẽn gom n wilg a Zezi sẽn wa n tʋm n kaoos wʋsg a ministɛɛrã pʋgẽ wã.—Zã 4:34.

17. Bõe yĩng tɩ pa lingr t’a Zezi yaa Karensaam Kãsenga, la yaa bõe la a zãmsgã pukda?

¹⁷ A Zezi ra yaa Karensaam Kãsengã. A zãmsgã wʋsg ra pukda daar fãa vɩɩmã yɛl a sẽn da mi sõma wã. (Matɩe 13:33; Luk 15:8) A zãmsgã buud da ka to ye. Ra yaa zãmsg sẽn sɩd yaa vẽenega, nana la zems wakat fãa. A zãmsgã võor da tagmame n yɩɩda. A zãmsgã ra wilgdame t’a tʋlla ne a sũur fãa t’a kɛlgdbã bãng a Zeova tagsgã, a sẽn get yɛlã to-to la a soayã.—Zã 17:6-8.

18, 19. a) Ne gom-makdem bʋs sẽn tar pãng la a Zezi bilg a Ba wã? b) Bõe yell la d na n gom sõsg ning sẽn pʋgdã pʋgẽ?

¹⁸ A sẽn da nong n tũnugd ne bilsgu, a Zezi wilga a Ba wã sẽn ya a soab ne gom-makdem sẽn tar pãng b sẽn da pa tõe n yĩm nana-nana ye. Gom Wẽnnaam ninbãan-zoeerã yell n pa togs n welg yaa bũmb a yembre. Yaa toor masã, b sã n dɩk a Zeova n mak ne ba sẽn kõt sugr sẽn tar yĩn-sidg wʋsgo, a sẽn yã a biriblã sẽn lebg n watẽ wã, hali n “wudg n mobg-a n mok-a.” (Luk 15:11-24) A sẽn zãgs rogem-mig-toos nins pʋsẽ tũudmã nanambs sẽn da paoogd nin-buiidã, a Zezi wilgame t’a Ba wã ra yaa Wẽnnaam b sẽn da tõe n gom ne nana-nana, sẽn da sak yõor yaood dɛɛgd kosg n yɩɩd Fariziẽ sẽn da wilgd a meng ne  a wuk-m-meng pʋʋsgo. (Luk 18:9-14) A Zezi bilga a Zeova wa maan-neer Wẽnnaam sẽn mi yir-kɩdg sẽn na n lʋɩ tẽnga. “Dẽ yĩnga, bɩ y da zoe rabeem ye. Yãmb bee yõod n yɩɩd yirs wʋsgo,” a Zezi kõ a karen-biisã bas-m-yam woto. (Matɩe 10:29, 31) Nebã bee bʋʋm la b sẽn da yɛɛs wʋsg ne a Zezi “zãmsgã sẽn yaa to-to wã” la b ra nong a zĩigã. (Matɩe 7:28, 29) Bãng-y tɩ vugri, “neb kʋʋng” paa ne-a n maan dasem a tãabo, hali n pa tar dɩɩb ye!—Mark 8:1, 2.

¹⁹ D tõe n talla mi-beoog ne a Zeova, a sẽn puk Kirist tagsgã a Gomdã pʋgẽ wã! La yaa wãn-wãn la d tõe n tall la d puk Kirist tagsgã d manesmã ne d taabã pʋgẽ? D na n sõsa rẽ zug sõsg ning sẽn pʋgdã pʋgẽ.

[Tẽngr not rãmbã]

Y tẽrame bɩ?

• Bõe yĩng tɩ tar yõod tɩ d bãng “Kirista tagsgo”?

• Tũud-n-taar bʋg la a Zezi tall t’a nan pa yɩ ninsaala?

• A tẽng zug vɩɩmã sasa, yel-bʋs la pãn-tusdɩ bʋs la a Zezi mengã vɩɩmd-yã?

• Bõe la Evãnzill dãmbã pukd a Zezi nedemdã wɛɛngẽ?

[Zãmsgã sogsgã]

[Foto, seb-neng a 3]

A Zezi bɩɩ zak sẽn tar neb wʋsg pʋgẽ, tɩ zakã tarem pa wʋsg ye

[Foto rãmba, seb-neng a 5]

A Zezi sẽn da tar yʋʋm 12, a bãngrã la a leoorã yɛɛsa karen-saamb dãmbã