A Zeova sẽn wilgd tõnd sor to-to
A Zeova sẽn wilgd tõnd sor to-to
“Tɛ-y maam so-buk sẽn yaa tɩrg pʋgẽ.”—YƖƖL SÕAMYÃ 27:11.
1, 2. a) Wãn-wãn la a Zeova wilgd a nin-buiidã sor rũndã-rũndã? b) Bõe ne bõe la d segd n maan n dɩ tigissã yõod tɩ pidi?
A ZEOVA la vẽenemã la sɩdã Yẽgre, wa d sẽn yã sõsg ning sẽn loogã pʋgẽ wã. A Gomdã vẽnegda tõnd sorã, d sẽn kẽnd tɩrlmã so-buk zugã sasa. A Zeova wilgda tõnd sor n zãmsd tõnd a soyã. (Yɩɩl Sõamyã 119:105) Wala yɩɩl-gʋlsdã pĩnd wẽndẽ wã, ne mi-beoogo, d sakda Wẽnnaam sor-wilgrã la d pʋʋsd woto: “Zusoaba, [Zeova, NW ] bɩ y zãms maam yãmb sorã. Tɛ-y maam so-buk sẽn yaa tɩrg pʋgẽ.”—Yɩɩl Sõamyã 27:11.
2 Manesem a yembr a Zeova sẽn tũnugd ne n kõt zãmsg rũndã-rũndã yaa ne kiris-neb tigissã maasem. Tõnd rɩta segl-kãngã nafa tɩ pitẽ, 1) n kẽngd tigissẽ wã n pa vaandẽ, 2) n kelgd sõssã sõma, la 3) d kõt leoor sõma, kɛlgdbã sã n wa paam sor n kẽesd b toog bɩ? Sẽn paase, tõnd sakda ne mi-beoogo, d sã n paamd sagls sẽn na n sõng-d tɩ d pa “so-buk sẽn yaa tɩrg pʋgẽ” bɩ?
Yãmb tigissã kẽnd yaa wãn to?
3. Wãn-wãn la wakat fãa so-pakd minim n debd tigissẽ wã n pa vaandẽ?
3 Rĩungã koe-moondb kẽer sɩng n debda tigissã hal b yãadem wakat n pa vaandẽ ye. A Zeova Kaset soab sẽn yaa wakat fãa so-pakd tẽra woto: “Maam ne m ma-bi-pogsã sẽn wa n bɩt yʋʋmd 1930 pi-gĩndã tɛka, tõnd ra pa baood n na n sʋk d roagdbã n gese d sã n na n kẽnga tigisgã ye. D ra miime tɩ d ra segd n kẽngame, sã n pa mikame tɩ d ra pa keemame. Sẽn dat n yeel tɩ tõnd zakã ra pa vaand tigissã ye.” Wala no-rɛɛs poak a Ann, saam-bi-poak kãng “ka bas” a Zeova balengã zĩigẽ kẽnd ye.—Luk 2:36, 37.
4-6. a) Bõe yĩng tɩ Rĩungã koe-moondb kẽer vaand tigissã? b) Bõe yĩng tɩ tigissẽ wã kẽngr tar yõod wʋsgo?
4 Yãmb bee neb nins sẽn kẽnd kiris-neb tigissẽ wã n pa vaandẽ wã sʋk bɩ, bɩ yãmb lebga ned sẽn kẽngd tigissã loant-loanta? Kiris-neb kẽer sẽn da tagsd tɩ b maanda sõma zĩ-kãng wɛɛngẽ wã rɩka sard n na n vaees n ges sã n sɩd yaa woto. Semen a wãn pʋgẽ, b gʋlsa tigiss nins b sẽn kẽngã. Sasa kãng pʋgẽ wã baasgẽ, b sẽn lebg n gesã, ling-b lame, b sẽn yã tigiss sõor ning b sẽn da vaalã.
5 Tõeeme tɩ nina yeel tɩ: ‘Rẽ pa lingr ye, weoogrã yaa wʋsg nebã zut n kɩt tɩ pa nana ne-b tɩ b kẽnd tigissã n pa vaandẽ ye.’ Yaa sɩd yẽ tɩ d vɩɩ gĩnd-gĩnd vɩɩm. Bũmb sẽn be me yaa tɩ weoogrã na n paasame tɩ sãmbg ka be ye. (2 Tɩmote 3:13) La rẽ pa segd n kɩt tɩ d modg n kẽng tigissã n pa vaal sɩda? D sã n pa rɩlgd d mens sõma ne tẽeb rɩɩb sẽn yaa sõma sẽn na yɩl n teel-do, d pa tõe n tẽ tɩ d na n yalsa kãn-kãe dũni kãngã weoogr taoor ye. Bãng-y tɩ d sã n pa tigimd taab n pa vaandẽ, d tõe n wa ratame n bas “so-buk sẽn yaa tɩrga” zãnga! (Yelbũna 4:18) Yaa sɩda, d sã n wa sõs n tʋm n ya n ta yiri, tõeeme tɩ d pa na n dat wakat fãa n kẽng tigisgẽ ye. La d sã n yaool n sɩd kẽng baa ne d yaamsã, nafd-d lame, la d raoonda d kiris-nin-taasã Rĩungã Roogẽ.
6 Hebre dãmba 10:25 wilgda bʋʋm kãseng a to sẽn kɩt tɩ d segd n kẽng tigissẽ wã n pa vaal ye. Beenẽ tʋm-tʋmd a Poll sagenda a kiris-nin-taasã tɩ b tigim taaba, ‘sẽn yɩɩd fãa bãmb sẽn ne tɩ daarã kolgdame wã yĩnga.’ N-yẽe, d pa segd n yĩm t’ “a Zeova daarã” kolgdame ye. (2 Pɩɛɛr 3:12, NW ) D sã n baas n yeel tɩ dũni kãngã saab ket n zãrame, d tõe n sɩngame n basd d mensã tʋʋm tɩ reegd tẽebã tʋʋm wala tigissã kẽngr zĩiga. Rẽ, wa a Zezi sẽn keoogã, ‘ra-kãng tõe n wa linga tõndo.’—Luk 21:34.
Yɩ-y ned sẽn kelgd sõma
7. Bõe yĩng tɩ tar yõod tɩ kambã kelg sõma tigissẽ wã?
7 Pa sek bal tɩ d kẽng tigissã ye. D segd n kelga neere, n kelg b sẽn yet bũmb ning be wã. (Yelbũna 7:24) Tõnd kambã me segd n maana woto. Biig sã n kẽng lekolle, b gũudame t’a kelg karen-saamba, baa gom-zug takɩ sã n pa noom-a, bɩ sã n wõnd yɩɩda a wʋmbo. Karen-saambã miime tɩ biigã sã n modg n kelge, a na n dɩɩ zãmsgã nafre, baa yaa bilfu. Wall tɩ b sɩng gõeem tigingã sã n sɩng balã, rẽ yĩnga pa bũmb sẽn zems ne kambã tɩ b kelg zãmsg ning b sẽn kõt tigingã tigissẽ wã sɩda? Yaa sɩd tɩ sɩd nins sẽn tar yõod sẽn be Gʋlsg Sõamyã pʋgẽ wã, “kẽer bee bãmb sʋk n yaa toog tɩ bãng b võyã.” (2 Pɩɛɛr 3:16) La d pa segd n paoog biig sẽn tar tõog ning n na n zãmsã ye. Wẽnnaam pa paoogd tõog kãng ye. Biiblã gʋlsg wakate, a kõo a sõgen dãmb nins sẽn yaa kambã noor tɩ “b wʋm la b zãms Zusoab a Wẽnnaam zoeese n gũus b mense n sak tõoda goama fãa,” tɩ gom-kãens kẽer võor-wʋmb ra yaa toog ne kambã tɩ sãmbg ka be ye. (Tõodo 31:12; mak-y ne Maankʋʋre 18:1-30.) A Zeova baoodame tɩ kambã maan sẽn pa ta woto rũndã-rũndã bɩ?
8. Bõe ne bõe la roagdb kẽer maand sẽn na yɩl n sõng b kambã tɩ b kelg tigissẽ wã?
8 Roagdb nins sẽn yaa kiris-nebã mikdame tɩ b kambã tẽeb ratem paamda pidsg me ne b sẽn zãmsd bũmb ning tigissẽ wã. Woto yĩnga, roagdb kẽer kɩtdame tɩ b kambã gũs tɩ tigissã nan pa ta, sẽn na yɩl tɩ b sã n wa Rĩungã Roogẽ bɩ mik tɩ b vʋʋsame n tɩge, n tõe n deeg zãmsgo. Roagdb kẽer tõee ne pa-vigsd n yãk koak televiziõ wã gesg wɛɛngẽ, bɩ b gesame tɩ yaa yam bũmb tɩ b kiis-a b kambã yĩnga, zaaba nins tigiss sẽn be wã. (Efɛɛz rãmba 5:15, 16, NW ) La roagdb a woto pa basd kambã tɩ b reem wʋsg ye, la b tusd b kambã tɩ b kelg la b zãms wa sẽn zems ne b yʋʋmã la b pãn-tõogã.—Yelbũna 8:32.
9. Bõe n tõe n sõng tõnd tɩ d yɩ neb sẽn nong n kelgdẽ n paase?
9 A Zezi ra gomda ne kãsemb a sẽn yeel woto wã: “Bɩ y gũus neer ne yãmb sẽn kelgdã.” (Luk 8:18) Rũndã-rũndã, rẽ yeelg yaa nana n yɩɩd a maanego. D sak tɩ kelgr yaa toogo, la d tõe n zãmsa kelgre. Y sã n kelgd diskuur sẽn tik Biiblã zug bɩ tigisg sõsga, bɩ y modg n bak tags-kãsemsã. Mams-y n deng n bãng sõsdã sẽn na n togs tagsg ning sẽn pʋgdã. Bao-y tagsga y sẽn tõe n dɩk n tʋm y ministɛɛrã pʋgẽ bɩ y sẽn tõe n tũ y vɩɩmã pʋgẽ. Y yamẽ wã bɩ y lebg n ges tagsa wã, b sã n wɛgsd-ba. Rɩk-y not koeese.
10, 11. Wãn-wãn la roagdb kẽer sõng b kambã tɩ b yɩ neb sẽn kelgd sõma n yɩɩda, la manesem bʋs la yãmb yã tɩ yaa sõma?
10 Yaa b sẽn na n sɩng tɩ b paoodẽ la kambã tõe n paam kelgr minung sẽn yaa sõma n yɩɩdã. Hal sẽn deng meng tɩ b zãms kareng la gʋlsgo, kamb kẽer sẽn nan pa kẽ lekoll roagdb sagl-b lame tɩ b rɩk “not rãmb” tigissã wakate. B gʋlsda bãnd seb-pɛdg zugu, b sã n wa togs gom-biis b sẽn mi sõma wa “a Zeova,” “a Zezi,” bɩ “Rĩungã.” Yaa woto la kambã tõe n zãms b sẽn yet bũmb ning Rĩungã Roogẽ wã kelgr sõma.
11 Wakat ninga, baa kamb nins sẽn fɩsg n yɩɩdã ratame tɩ b sagl-b tɩ b kelge. Zak soab a yembr mikame t’a yʋʋm 11 biriblã yam da gõoda kiris-neb tigis-kãsengẽ, t’a rɩk Biibl n kõ-a n yeel-a tɩ sõsdbã sã n sõdg verse bɩ a lak Biiblã n bao verse rãmbã. Ba wã ra rɩkda not rãmbã la a ra get a biriblã sẽn da zãad Biiblã. Rẽ poore, biriblã kelga tigis-kãsengã geelg-n-tʋm ne yamleoog n yɩɩda.
Goam-y-yã
12, 13. Bõe yĩng tɩ tar yõod tɩ d naag tigingã n yɩɩle?
12 Rĩm a Davɩɩd yɩɩla woto: “Zusoaba [Zeova, NW ], mam . . . gilgd[a] yãmb maoongã zĩiga. La mam pãrgda m koɛɛg ne bark pʋʋsgo.” (Yɩɩl Sõamyã 26:6, 7) A Zeova Kaset rãmbã tigiss kõta tõnd soy sõma wʋsg tɩ d zẽk d koees n wilg d tẽebã. Manesem a yembr tõnd sẽn tũnugd ne n maand woto yaa d sẽn na n lagem ne tigingã neb n yɩɩle. Woto yaa tõnd balengã neng a yembr sẽn tar yõod wʋsgo, d sẽn yaool n tõe n yĩm nana-nana.
13 Kamb kẽer sẽn nan pa tõe n karma zãmsda Rĩungã yɩɩl nins b sẽn na n yɩɩl tigissẽ wã semen fãa wã ne zugu. B sũy yaa noog wʋsgo, b sẽn tõe n yɩɩl ne kãsembã. La kambã sã n wa fɩsg bilfu, b tõeeme n pa rat n yɩɩl Rĩungã yɩɩl wa pĩndã ye. Kãsemb kẽer me yam yooda ne tigissẽ wã yɩɩlgo. La yɩɩlgã bee tõnd balengã pʋgẽ, wala tẽeb pʋʋgã tʋʋmd sẽn be tõnd balengã pʋgẽ wã. (Efɛɛz rãmba 5:19) D maanda d sẽn tõe fãa n na n pẽg a Zeova tẽeb pʋʋgã tʋʋmdẽ. Tõnd me pa tõe n ning-a ziir n zẽk d koeesã, n yɩɩl ne d sũy fãa, d koɛɛgã noom t’a pa noom sɩda?—Hebre dãmba 13:15.
14. Bõe yĩng tɩ zems tɩ d reng n segl bũmb nins d sẽn zãmsd tigingẽ wã neere?
14 D leb n pẽgda Wẽnnaam, d sã n kõt leoor sẽn kengd tẽebo, d tigissã nens nins sẽn baood tɩ kɛlgdbã kẽes b toogã pʋgẽ. Rẽ baooda seglgo. Tags Wẽnnaam Gomdã zĩis nins võor sẽn tagem n yɩɩdã zut rɩkda sẽka. Tʋm-tʋmd a Poll sẽn da nong Gʋlsg Sõamyã kareng wa yellã bãngame tɩ yaa woto. A gʋlsame: “Ges Wẽnnaam yam la b bãngr sẽn ka tɛka.” (Rom dãmba 11:33) Zak soben dãmba, tara yõod wʋsg tɩ y sõng y zakã ned fãa t’a bao n vaees Wẽnnaam yamã, wa b sẽn puk-a Gʋlsg Sõamyã pʋgẽ wã. Yãk-y sẽk zak pʋgẽ Biibl zãmsgã wakat n wilg tagsa nins võe sẽn yaa toogã, la y sõng y zakã neb tɩ b segl tigissã yĩnga.
15. Sagl-bʋs n tõe n sõng ned t’a kõ leoor tigissẽ wã?
15 Y sã n dat n kõt leoor naoor wʋsg n paasd tigissẽ wã, bõe yĩng tɩ y pa na n deng n segl y sẽn dat n yeelã? Pa tɩlae tɩ y kõ leoor sẽn yaa kãseng ye. Biiblã verse sẽn zems y sẽn karem ne y sũur fãa bɩ goam a wãn sẽn yit y sũurẽ yaa bũmb b sẽn na n tall naneb ne. Koe-moondb kẽer kota sebr zãmsg taoor lʋɩtã t’a sʋk-b sull b sẽn yãk takɩ pipi sʋkrã, sẽn na yɩl tɩ bãmb me tõog n paam sor n wilg b tẽebã.
Sẽn pa tar-b minima lebgda yam dãmba
16, 17. Sagl-bʋg la kẽem soab a yembr kõ ministɛɛrã sõgna, la bõe yĩng tɩ saglgã wom biisi?
16 A Zeova Kaset rãmbã tigissẽ, b nong n tẽegda tõnd tɩ d karem Wẽnnaam Gomdã daar fãa. Woto maaneg kengda tẽebo. A leb n sõngda tõnd tɩ d rɩk sard sẽn yaa sõma, tɩ d rems d nedemdã zamse, tɩ d yals kãn-kãe makrã taoore, la d lebs n paam d tẽebã kɩls tɩ zemse, d sã n bʋdg bilf n bas sorã.—Yɩɩl Sõamyã 19:8.
17 Tigingã kẽem dãmb nins sẽn tar minimã segl n saame, n na n kõ sagls sẽn yit Gʋlsg Sõamyã pʋgẽ sẽn zems ne tõnd ratmã. D sẽn segd n maan bal yaa d “teoog” b saglsã sẽn tik Biiblã zugã. (Yelbũna 20:5, NW ) Daar a yembre, ministɛɛrã sõgen sẽn tar yẽesem kosa kẽem soab sagls n dat n bãng a sẽn na n maan to-to n tall yõod n paas tigingã pʋgẽ. Kẽem soabã sẽn da mi bi-bɩɩgã sõma wã laka a Biiblã 1 Tɩmote 3:3, (NW ) zĩigẽ wã sẽn yet tɩ roap nins b sẽn yãkã segd n yɩɩ ‘maan tɩ zems rãmbã.’ Ne sõmblem, a wilga bi-bɩɩgã sẽn na n maan to-to n tõog n yɩ maan tɩ zems soaba, a manesmã ne neb a taabã pʋgẽ. Saam-biigã sẽn yaa bi-bɩɩgã sũur sãama ne sagl-vẽeneg ning b sẽn kõ-a wã bɩ? Abada! A yeelame: “Kẽem soabã tũnuga ne Biiblã, rẽnd mam yãame tɩ saglgã ra yita a Zeova nengẽ.” Ne mi-beoogo, ministɛɛrã sõgen tũu saglgã, la a kẽngda taoor sõma-sõma.
18. a) Bõe n sõng kiris-ned sẽn yaa bi-bɩɩg t’a yals kãn-kãe makr taoor lekollẽ wã? b) Biiblã verse bʋs la yãmb ningd y yamẽ, y sã n wa be makr taoore?
18 Wẽnnaam Gomdã tõeeme me n sõng kom-bɩɩsã tɩ b “lak ne yãadem datem wẽnga.” (2 Tɩmote 2:22) A Zeova Kaset soab sẽn yaa bi-bɩɩg sẽn paam a kolɛɛzã baasg dipolom sẽn pa kaoos pʋgẽ ra tõog n yalsa kãn-kãe makrã taoore, yʋʋm nins fãa a sẽn karma pʋgẽ, a sẽn bʋgs la a tũ Biiblã verse kẽerã yĩnga. A ra nong n tagsda sagls nins sẽn be Yelbũna 13:20 pʋgẽ wã zutu: “Ned sã n tũud yam dãmba, a na n lebga yam soaba.” Woto, a ra gũusdame n baood zood ne neb nins bal sẽn da tar waoogr wʋsg ne Gʋlsg Sõamyã noyã. A tagsa woto: “Mam pa são ned a to ba a yembr ye. Mam sã n lagem ne neb nins sẽn tudgã, m na n dat n taa m zo-rãmbã yam, la rẽ ra tõe n waa ne zu-loeese.” A Poll saglg ning sẽn be 2 Tɩmote 1:8 pʋgẽ wã me sõng-a lame. A gʋlsame: “Ra zoe yãnd tõnd Zusoaba kaset yĩnga, . . . [La] bɩ f lagem maam n nams Koe-nooga yĩnga.” Wa sẽn zems ne sagl-kãngã, saam-bi-poak kãngã moona a tẽebã sẽn tik Biiblã zugã ne raood a karen-bi-taasã segb sẽn zems fãa sasa. B sã n wa yeel-a t’a gom a karen-bi-taasã sẽn be karen-doogẽ wã fãa taoore, a ra yãkda gom-zug sẽn kõt-a sor t’a kõ kasetã Wẽnnaam Rĩungã wɛɛngẽ ne yam.
19. Bõe yĩng tɩ bi-bɩɩg a yembr da pa tõe n yals kãn-kãe dũni kãngã weoogr taoore, la yaa bõe n kõ-a tẽebã pãnga?
19 Tõnd sã n bʋdg n basa “nin-sõng sor[e],” Wẽnnaam Gomdã tõe n sõnga tõnd tɩ d rems d na-kẽndrã. (Yelbũna 4:18) Bi-bɩɩg sẽn be Afirik bãnga woto a toore. A Zeova Kaset soab a yembr sẽn wa n ges-a, a saka Biibl zãmsgo. A ra nonga a sẽn da zãmsd bũmb ningã, la ra pa kaoos la a tall tũud-n-ta-wẽns lekollẽ wã ye. Wakat n zĩnd t’a ra vɩ yoob pʋgẽ. “Mam sũur-kasetã ra ket n namsd-m lame, tɩ m yals tigissã kẽnde,” woto la a sak n deege. Kaoosg poore, a sɩnga tigissã waoong yɛsa. Bi-bɩɩgã togsa woto vẽenega: “Mam yãame tɩ sẽn yɩɩd fãa, bũmb ning sẽn wa ne yel-kãngã wã yaa tɩ kom n da tar maam tẽebã wɛɛngẽ wã. M da pa maand m meng zãmsg ye. Yaa rẽ yĩng la m sẽn da pa tõe n yals kãn-kãe makrã taoorã. Rẽ, m sɩngame n karemd Gũusg Gasgã la Révéillez-vous! wã. Bilf-bilfu, mam tẽebã pãng waame, la m yɩlga m vɩɩmã. Rẽ yɩɩ kaset sẽn yaa sõma ne neb nins sẽn yã toeeng nins m sẽn maana. M deega lisgu, la masã m tara sũ-noogo.” Yaa bõe n kõ bi-bɩ-kãngã pãng t’a tõog a nemsã pãn-komslem? A lebs n paama a tẽebã pãng a sẽn maan a meng Biibl zãmsgã n pa vaalã yĩnga ye.
20. Wãn-wãn la bi-bɩɩg tõe n yals kãn-kãe a Sʋɩtãan makrã taoore?
20 Kom-bɩɩs sẽn yaa kiris-neba, y segda makr rũndã-rũndã! Y sã n dat n tõog a Sʋɩtãan makrã, y segd n dɩɩ tẽebã rɩɩb n pa vaal ye. Yɩɩl-gʋlsdã sẽn da yaa bi-bɩɩgã meng bãnga rẽ. A pʋʋsa a Zeova bark a sẽn kõ a Gomdã, ‘tɩ bi-bɩɩg maan t’a sor zemsã.’—Yɩɩl Sõamyã 119:9.
Wẽnnaam sẽn teesẽ tõnd fãa, d na n kẽngame
21, 22. Bõe yĩng tɩ d pa segd n kʋmb n yeel tɩ sɩdã sor yaa toog tɩ loog noore?
21 A Zeova yiisa Israɛll buudã Ezipt n tɩ kẽes Kãabg Tẽngẽ wã. Sã n yaa ne ninsaal nif gesgo, tõe tɩ sor ning a sẽn yãkã wõnega toom zaalem. A Zeova basa sor ning sẽn wõnd nana n yɩɩdã, sor ning sẽn wõnd tɩrg n yɩɩd sẽn yɛgd Mediterane Mogrã, n tall a nin-buiidã n dɩk rasempʋɩɩgã sorã tũub sẽn da yaa toogã. Woto wã Wẽnnaam sɩd da talla sõmblem. Bala baa ne mogrã sor sẽn da yaa koɛɛg n yɩɩdã, a ra na n talla Israɛll nebã n tɩ pasg Filisti nebã sẽn da yaa bɛɛbã tẽnga. A Zeova sẽn yãk so-zẽngã, a kɩtame t’a nin-buiidã põs zabr ne Filisti nebã.
22 Woto me, sor ning zug a Zeova sẽn tar tõnd n kẽndẽ rũndã-rũndã wã tõe n wõnda toog wakat-wakate. Semen fãa, d sẽn yaa kiris-nebã d tara tʋʋm wʋsgo, tɩ tigingã tigissi, meng zãmsgã la tẽeb pʋʋgã tʋʋmd be sʋka. Soay a taab tõe n wõnda nana n yɩɩda. La yaa tõnd sẽn na n tũ Wẽnnaam sor-wilgrã bal la d na n ta zĩig ning d sẽn tʋmd wʋsg n dat n ta wã. Woto yĩnga, bɩ d ket n deegd zãmsg sẽn tar yõod wʋsgã sẽn yit a Zeova nengẽ wã la d pa “so-buk sẽn yaa tɩrg pʋgẽ” wã wakat sẽn-kõn-sa!—Yɩɩl Sõamyã 27:11.
Y tõe n wilga a võor bɩ?
• Sẽn yɩɩd fãa, bõe yĩng tɩ d segd n bãng tɩ tara yõod tɩ d kẽng kiris-neb tigissã?
• Bõe la roagdbã tõe n maan n sõng b kambã tɩ b kelg tigissẽ wã?
• D sã n dat n kelg sõma bõe la d segd n maane?
• Bõe n tõe n sõng tõnd tɩ d kõ leoor tigissẽ wã?
[Zãmsgã sogsgã]
[Foto, seb-neng 14, 15]
Kiris-neb tigissẽ wã kẽngr sõngda tõnd tɩ d ning a Zeova daarã d yamẽ
[Foto rãmba, seb-neng 16]
Manesem toɛ-toɛ n be d sẽn na n tũnug ne n pẽg a Zeova kiris-neb tigissẽ wã