Bũmb ning y sẽn segd n bãng sõodã wɛɛngẽ

RŨNDÃ-RŨNDÃ sõodã võor wilgr yaa toogo. Sẽn yaa woto wã yaa tɩ neb nins sẽn maand sõodã pa maand-a tɩ wõnd taab ye. B pa tar zu-sobend b fãa sẽn sak n deege, bɩ tẽeb bɩ seb-sõng b sẽn tik sẽn na n lagem b tẽeba zĩ-yend ye. B minungã, b siglgã, b yel-maandɩ wã, la wẽnd ning b sẽn tagsd tɩ b waoogdame wã yaa toɛ-toɛ me. Ad gʋlsd a yembr sẽn yete: “Tɩɩm-sãoogã dũni lebgda wa ‘raag’ sẽn kõt ned sor t’a yãk tagsg sẽn zems ne a ratem.” Tɩ gʋlsd a to yeele: “Rũndã-rũndã payẽ rãmbã tagsa yõsa taab bũmb fãa wɛɛngẽ la bala.”

Ne neb wʋsgo, kɩɩs taabã pa yell ye. Sebr a yembr sẽn kõt sẽn dat-b n yɩ sõobã sagls yetame: “Yãmb sã n yã kɩbay sẽn wõnd b kɩɩsda taab tɩ pa nana ne-yã, bɩ y vaees kɩba-kãens n dɩk sard n bãng y sẽn dat n tũ a soaba. Kelg-y y sũurã. Rat n yeelame tɩ y ges yel-maandɩ wã b sẽn yiis sɛba pʋsẽ wã n dɩk sard n yãk yãmb sẽn tagsd t’a soab ning yaa tɩrga.”

Sã n yaa ne neb nins sẽn mi sɩdã halhaalã, kɩba-kãens sẽn kɩɩsd taabã yaa yelle. Sɩdã yaa yel-sɩd sẽn be. Pa ned sẽn tagsd bɩ a sẽn saagd n na n paam bɩ a sẽn tẽedã bal n kɩtd tɩ yɛlã yaa sɩd ye. Wala makre, wakat n zĩnd tɩ logtoɛɛmbã tagsdẽ tɩ b ra tõe n sãooga fõosre, b sã n pasg no-vɩɩg zĩis a yiib n dɩk n dogl bãadã yãoog zugu. Sãmbg sẽn ka be, bãad dãmb wʋsg sɩd tẽeme tɩ tɩbs-kãngã ra tõe n sãoog-b lame. La bãmb tẽebã ne b saagrã ra pa zems ne yel-sɩdã ye: manesem a woto pa sãoogd fõosr ye. Pa nebã n naand sɩdã ye, b maoodame n wʋm sɩdã võore.

Biiblã yetame t’a tara sɩdã tẽebã yɛl wɛɛngẽ. A Zezi Kirist sẽn da wa n be tẽng zugã a yeela a Ba wã woto pʋʋsg pʋgẽ: “Yãmb goama yaa sɩda.” (Zã 17:17) Tʋm-tʋmd a Poll gʋlsame: “Gʋlsg Sõamyã zãnga yaa Wẽnnaam n kõ tõndo.” (2 Tɩmote 3:16) Neb wʋsg sẽn maand sõod pa sak woto ye. Sẽn yaa lebende, b baooda vẽnegr la sor-wilgr tẽ-faad pʋsẽ, tẽn-kʋdem wẽndẽ tũudum dãmbẽ wã, la baa siãns fiksiõ wã pʋgẽ. La rẽ yĩnga, pa yam tʋʋmd tɩ d yaa n ges Biiblã sẽn yet bũmb ningã sɩda? Bala, b sak n deega zĩig fãa la bal t’a yaa sebr sõngo. A leb n yaa tũudum sɛb nins sẽn yaa kʋd n yɩɩdã sẽn ket n be a yembre. B gʋlsa Biiblã yʋʋm 1 600 pʋgẽ, la a fãa wã pʋgẽ a pa tar zãmsg sẽn kɩɩsd taab ye. Bɩ d mak Biiblã zãmsg ne tẽeb sẽn wɛ neb nins sẽn nong sõodã sẽn nong n wilgdẽ.

 Ãnd dãmb n be bõn-vɩɩs nif sẽn pa ne wã dũni pʋgẽ?

Sʋk-kãseng sẽn tɩ loe ne tẽebã võor-wʋmb la woto: Ãnd n be bõn-vɩɩs nins nif sẽn pa ne wã dũni pʋgẽ? Baa rũndã-rũndã sõobã sã n nong n balemd bõn-naandsã, wẽnnaam dãmb wʋsgã, kẽer balemda wẽn-poak sẽn yaa kãseng la sẽn yaa ma, tɩ b get-a t’a tʋmd tʋʋm nens a tãab pʋgẽ wala pʋg-polle, ma la pʋg-yãan-koɛɛnga, sẽn makd vɩɩmã zĩ-kãsems a tãabã. Pʋg-kãng tara rolle, sẽn yaa wẽnd sẽn tar yɩɩla. Sõob a taab balemda wẽnd la wẽn-poak me. Gʋlsd a yembr yetame: “Wẽn-poakã la wẽndã b get-b-la wala pag la rao pãensã sẽn be dũniyã zugã pukri. A yembr fãa [tara] yɛl sẽn pa wõnd a taabã, tɩ b sã n fãoog taab bɩ a wat ne vɩɩmã naaneg sẽn zemse.” Sõodã mit a to gʋlsame: “Yãkr nins sẽn yaa kãsems n yɩɩdã a yembr sõodã wɛɛngẽ yaa yãmb sẽn na n yãk wẽnnaam dãmb ninsã (wẽnnaam daado/wẽn-pogse) y sẽn na n tʋm ne wã. . . . Sõodã kõt-y-la sor tɩ y yãke, la y waoog wẽnd buud nins y sẽn yãkã.”

Biiblã pa sak ne tagsa kãensã ba a yembr ye. A Zezi Kirist rɩka a ministɛɛrã fãa n zãms neb a taabã a Zeova “sẽn yaa sɩd Wẽnnaam a ye balã” wɛɛngẽ. (Zã 17:3, NW ) Biiblã yetame: “A Zeova yaa kãseng la a zemsa ne pẽgr wʋsgo, la a zemsa ne zoees n yɩɩd wẽnnaam dãmba a taaba fãa. Bala nin-buiid dãmbã wẽnnaam dãmb yaa wẽnnaam dãmb sẽn ka yõodo.”—1 Kɩbaya 16:25, 26, NW.

Yaa wãn to ne Munaafɩɩkã? Gom-biis võor sebr a yembr (Webster’s Ninth New Collegiate Dictionary) wilgdame tɩ sõodã “yaa yẽsg ne munaafɩɩkã.” Rũndã-rũndã, na n yɩɩ toog tɩ d yã sõe sẽn na n sak n deeg võor-wilgr kãngã, bala bãmb wʋsg pa sakd n deeg t’a Sʋɩtãan Munaafɩɩk beeme ye. Pʋg-bɩɩg a yembre, b sẽn bilg zʋrnall a yembrẽ (The Irish Times) wala “sõ-naab la Irlãnd sõob sul-kãsems sẽn yɩɩdã a yembr taoor soaba,” tagsda woto: “Tẽ Munaafɩɩkã rat n yeelame tɩ f sak n deega kiris-nedemdã . . . [Munaafɩɩkã] pa tõe n be ãndũni sẽn pa tar Wẽnnaam pʋgẽ ye.”

Biiblã sɩd wilgdame tɩ Munaafɩɩkã beeme, la a yetẽ tɩ namsgã la gudgrã wʋsg sẽn be tẽng zugã yaa yẽ n wa ne. (Wilgri 12:12) A Zezi pa zãms nebã tɩ Munaafɩɩkã beeme bal ye, la a le wilgame tɩ d tõe n maana Munaafɩɩkã raab n pa bãng ye. Wala makre, tũudmã nanambs sẽn yaa tɩrs tɩ loog b mens nifẽ wã, sẽn zĩnd yʋʋm kob-yendẽ wã ra yetame tɩ ne manesem buudu, b ra yaa Wẽnnaam komdibli la b ra tẽed tɩ b ra maanda Wẽnnaam daabo. A Zezi sẽn da tõe n bãng sẽn da be b sũyã pʋsẽ wã ra miime tɩ pa woto ye. A yeel-b-la vẽenega: “Sʋɩtãana la yãmb ba, la yãmb dat n maana yãmb ba ratem.” (Zã 8:44) Sẽn paase, Biiblã sebr ning sẽn yaa Wilgrã yetame tɩ Munaafɩɩkã “belgd[a] dũniyã fãa.”—Wilgri 12:9.

Tɩt maaneg n be n yaa sõma bɩ?

Yaa sɩd tɩ tɩt maanegã tɩ loee wakat fãa ne tɩɩm-saoogã. * Tẽn-kʋdem wẽndẽ la rũndã-rũndã neb wʋsg tẽedame tɩ sõobã sẽn maand tɩɩm yaa sẽn na yɩl n maan neb a taabã wẽnga. B yetame tɩ sõobã tara tõog n na n  tũnug ne tɩɩm maaneg n kẽes ned toog wʋsg pʋgẽ bɩ a kʋ-a menga. B nong n ningda sõobã taale, yel-beed sẽn wa fãa la bala, tɩ bãase, kũum la kood sẽn pa yɩ sõma wã be sʋka.

Rũndã-rũndã, sõobã kɩɩsda taal ningr kãngã ne pãnga. B sẽn sak n deeg tɩ wakat-wakate sõe ning beeme n maand wẽngã, wʋsg sẽn yɩɩd yetame bal tɩ b tũnugda ne b tɩɩmã tɩ nafdẽ, la pa sẽn na yɩl n maan wẽng ye. B sẽn boond-b rãmb tɩ Wiccans rãmbã wilgdame tɩ gĩnamoeemdã zũnuuf na n lebg n waa ned ning sẽn maand-a wã zug naoor a tãabo, la b yetẽ tɩ rẽ yaa bõn-kãseng sẽn gɩdg-b tɩ b pa maand kãab wẽns ye. Ad makr ne gĩnamoeemd b sẽn yet tɩ bee nafrã: Kãab-nood sẽn na yɩl n kogl f menga, n yɩlg zak neb sẽn da be a pʋgẽ n bas tɩ f kẽ ne pãn-wẽnsã, sẽn na yɩl tɩ ned nong-fo, sẽn na yɩl n maag bãas la a paas laafɩ, sẽn na yɩl tɩ f tʋʋm da sãame, la sẽn na yɩl n paam ligdi. Ne pãn-kãensã wʋsg b sẽn dɩk n dogl sõodã, pa lingr tɩ sõodã kɩbar piuug wʋsg woto ye.

La Biiblã pa maand welgr gĩnamoeemd sẽn yaa sõma ne gĩnamoeemd sẽn yaa wẽng ye. Tõog ning a sẽn kõ a Moiizã pʋgẽ, Wẽnnaam wilga a tagsgã vẽenega. A yeelame: “Y pa segd n maan gĩnamoeemd ye.” (Maankʋʋre 19:26, NW ) D karemda woto me: “B pa segd n yã ned yãmb sʋkã . . . sẽn maand gĩnamoeemdo, bɩ ned sẽn baood bãna bɩ sõeyã, bɩ ned sẽn loet neb a taab ne tɩɩm bɩ ned sẽn bʋgd bagr ye.”—Tõodo 18:10, 11, NW.

Bõe yĩng tɩ Wẽnnaam yeel woto? Pa t’a rat n gɩdga tõnd tɩ d ra maan bũmb sẽn nafd tõnd ye. A Zeova kõo tõod kãensã a nin-buiidã, a sẽn da nong-ba, la a ra pa rat tɩ rabeem la zɩɩlem tẽebã kẽes-b yembd pʋgẽ wã yĩnga. Sẽn yaa lebende, a sagenda a sõgen dãmbã tɩ b pẽneg-a n kos bũmb nins b sẽn datã. A yaa “bark sõama la kũun sõama fãa” Kõta. (Zak 1:17) Tʋm-tʋmd a Zã kõo a tẽed-n-taasã bas-m-yam woto: “Tõnd sẽn kot bãmb bũmb ninga fãa tõnd deegda [Wẽnnaam] nengẽ, tõnd sẽn sakd bãmb tõog la d maand sẽn noom bãmba yĩnga.”—1 Zã 3:22.

Yaa wãn to ne malɛg-wẽnsã?

Sõob wʋsg sak n deega ne Biiblã yel-kãngã zugu: Malɛg-wẽnsã sɩd beeme. Sebr a yembrẽ, sõod tɛɛnd keoogda woto: “Kɩɩm dãmbã bee be: Bãmb me bee dũni pʋgẽ, ninsaal nif sẽn pa tõe n yã, sẽn tar bõn-naands vɩɩsã. . . . Goam nins sẽn yaa ‘zĩn-kɩdga,’ ‘malɛk wẽnga’ la ‘zĩna’ zemsame bal kɛpɩ. B tara pãng wʋsgo. . . . B buud nins sẽn tar yam n yɩɩdã . . . tõeeme, (tɩ ned sã n kõ-b sore,) n kẽ tõnd dũniyã pʋgẽ. . . . B tõe n kẽe yãmb yĩngã . . . , hali n  soog yãmb ne manesem buudu. N-yẽe, yaa woto kɛpɩ wala pĩnd kɩbay sẽn gomd zĩn dãmb sẽn soogd nebã yellã.”

Biiblã gʋlsg wakate, zĩn dãmb sẽn soog nebã namsa nebã ne manesem buud toor-toore. Neb kẽer yel-kãngã buud sẽn paama ra pa tõe n gom ye, kẽer da lebga zoense, t’a taab ra gãeeme, tɩ neb a taab ra tar pãng sẽn yɩɩd ninsaal dẽnda. (Matɩe 9:32; 12:22; 17:15, 18; Mark 5:2-5; Luk 8:29; 9:42; 11:14; Tʋʋma 19:16) Wakat ninga tooga yaa wʋsgo, zĩn-dãmb wʋsg sã n da naag taab n kẽ ned a yembre. (Luk 8:2, 30) Rẽ, sɩd-sɩda, bʋʋm sẽn tar pãng n be n kɩt t’a Zeova keoogd a nin-buiidã tɩ b lak b mens ne sõodã la tɩɩm-saoogã nens a taabã.

Tũudum sẽn yẽbg sɩd zugu

Wʋsg maanda sõod rũndã-rũndã, bala a wõnda bũmb sẽn ka yell wʋsgo, bɩ a yaa tũudum buudu. B sak-a-la buud kẽer pʋsẽ masã. B pa yɛɛsd-a ye. Sẽn yaa lebende, a lebga wa bõn-zaalga. Vɩɩmã sẽn yaa to-to tɩ b basd ned fãa t’a yãk a tũudmã, tɩ kɩt tɩ neb wʋsg sak yɛl sẽn pa lebd be wã, sõodã paamda waoogr wʋsgo.

Sɩda, tũudmã lebga wa raag ned fãa sẽn tõe n kẽngẽ n tɩ yãk bũmb ning sẽn zems ne a ratem, wala ned sẽn na n tɩ ra naooda. Sẽn yaa lebend ne rẽ, a Zezi goma yãkr a yiib bal sẽn be yelle. A yeelame: “Bɩ y kẽ zak noor sẽn yaa sẽka. Tɩ bõe, zak noor sẽn yaa yalenga la sor sẽn yaa yalenga rabda sãoong zĩiga, la neb wʋsg kẽeda beenẽ. La zak noor sẽn yaa sẽka la sor sẽn yaa bãanega rabda vɩɩm zĩigẽ, la a yãtb yaa bilfu.” (Matɩe 7:13, 14) Wa sẽn zemse, bee ne tõnd tɩ d yãk sor ning d sẽn na n tũ wã. La sẽn mik tɩ tõnd wakat sẽn-kõn-sa yɩ-neerã bee yell pʋgẽ wã yĩnga, yãk-kãngã tara yõod wʋsgo. Sẽn na yɩl n paam tẽebã vẽnegre, d segd n ket n baooda sɩdã sore: yaa sor ning sẽn be Wẽnnaam Gomdã sẽn yaa Biiblã bal pʋgẽ wã.

[Tẽngr note]

[Foto, seb-neng a 5]

Rũndã-rũndã, neb wʋsg geta sõodã wa tũudum buud sẽn pa tar yelle

[Foto, seb-neng a 6]

Wakat fãa b rɩka gĩnamoeemdã n tɩ lagem ne tɩɩm saooga

[Foto, seb-neng a 6]

Sẽn maand-b sõodã maanda Munaafɩɩkã raab n pa miẽ bɩ?

[Foto, seb-neng a 7]

Biiblã wilgda sɩdã sore