Ma sagls sẽn yaa sõma

“M biiga, reeg f ba zãmsgo, la ra bas bũmb nins f ma sẽn wilg fooma ye.”—Yelbũna 1:8.

TÕND roagdbã, d ba wã la d ma wã tõe n yɩɩ raood kengre, teelg la sagls yẽgr n kõ-do. Yelbũnã sebr sẽn be Biiblẽ wã gomda rĩm sẽn yaa bi-bɩɩg a Lemuɛll yelle. A paama “remsg” “koe-zɩsg” sẽn yit a ma wã nengẽ. B gʋlsa gom-kãens Yelbũna sak 31 pʋgẽ, la tõnd me tõe n dɩɩ ma kãng saglsã sẽn yaa sõma wã nafa.—Yelbũna 31:1, NW.

Sagls sẽn zems ne rĩma

A Lemuɛll ma wã sɩngda ne sʋgsg sẽn nekd tõnd ratem: “M biiga, m bi-nongre, m pʋleng biiga, mam na n yeela foom tɩ bõe?” A ma wã sẽn kos naoor a tãabã wilgdame t’a maanda yɩɩr n dat t’a biigã kelg a goamã. (Yelbũna 31:2) A sẽn maand yɩɩr ne a biigã tẽeb wɛɛngẽ wã yaa mak-sõng n kõ roagdb nins sẽn yaa kiris-nebã rũndã-rũndã.

Sã n yaa ne a biig yɩ-neerã wɛɛngẽ, bõe yɩɩr la ma tõe n tall a biig yĩng n yɩɩd yão-beedã la vɩ-yookã sẽn lagem ne rãam, pagb la yɩɩlã wɛɛngẽ? A Lemuɛll ma wã tikda yellã nifu: “Ra kõ pagb f pãng ne f paoong fãa ye.” A yeelame tɩ yoobã “sãama rĩm dãmba.”—Yelbũna 31:3.

D pa segd n deem ne yũ rãam tɩ loogã ye. “Lemuɛll, ka tog tɩ rĩm yũ rãam ye,” woto la a keoogda. Rĩm na n yɩɩ wãn n kao bʋʋd tɩ zems n pa ‘yĩm tõogã n ka le bãng ninbãan dãmb sẽn tog n paam bũmb ninga,’ a yamã sã n pa vẽen wakat fãa?—Yelbũna 31:4-7.

Sẽn yaa lebende, rĩmã sã n lak a meng ne minim-wẽns kãensã, a na n tõogame n “kao bʋʋd tɩrg n sõng naong rãmb ne nimbãan dãmba.”—Yelbũna 31:8, 9.

Baa ne kom-bɩɩs nins sẽn yaa kiris-nebã sẽn pa “rĩm dãmb” rũndã-rũndã wã, a Lemuɛll ma wã sagls sẽn yaa sõma wã zemsa ne-ba, bɩ pʋd n zemsa ne bãmb n yɩɩda. Dorgã rɩkre, sɩgaarã yũub la yoobã yaa wʋsg kom-bɩɩsã nengẽ rũndã-rũndã, la tara yõod wʋsg tɩ kom-bɩɩs nins sẽn yaa kiris-nebã kelge, b roagdbã sã n dat n taas-b ‘koe-zɩsdo.’

Pʋg-sõngo

Ma rãmbã bee bʋʋm n maand yɩɩr ne b komdibli nins sẽn bɩt n debd roap zĩigẽ wã kãadem kõom sẽn na n yɩ to-to. Rẽ poore, sẽn pak a Lemuɛll ma wã yaa pʋg-sõng zʋgdã. Sãmbg sẽn ka be, na n yɩɩ bũmb sẽn na n naf biribl wʋsgo, a sã n kelg pag tagsg ne yel-kãngã sẽn tar yõod wʋsgã.

Verse 10 pʋgẽ, b rɩka ‘pʋg-sõng’ n mak ne sãnem, Biiblã sẽn yet tɩ f pa paamd-a tɩ f pa modg wʋsgã. Woto me, pʋg-sõng paoong baooda modgre. Wall t’a yɩ yãg-yãg n kẽ kãadem, yaa neer tɩ bi-bɩɩg rɩk sẽk n tũusi. Rẽ poore, a na n tõog n talla naneb wʋsg ne pag ning a sẽn yãkã.

B yeela a Lemuɛll woto pʋg-sõng wɛɛngẽ: “A sɩd teegd-a lame.” (Verse 11) Woto rat n yeelame t’a pa segd n pẽdg t’a pagã kot a sor bũmb fãa pʋgẽ ye. Yaa sɩda, kẽed-n-taasã segd n yẽsa ne taab n yaool n dɩk sard kãsems wala sard nins sẽn tɩ loe ne teed ligd sẽn yaa toog raabo, bɩ b kambã wubri. Yẽsg yel-kãensã wɛɛngẽ na n sõng n paasa bãmb ne taab zoodã.

Yaa sɩd tɩ pʋg-sõng tara yɛl wʋsg n na n maane. Verse 13 n tɩ ta 27 pʋgẽ, b sõdga sagls la noy zãmaan fãa pagbã yĩnga, b sẽn  tõe n tũ tɩ naf b zagsã. Wala makre, ne futã la teedã ligd sẽn paasdã, pʋg-sõng zãmsdame n na n tall yam la a yɩ baood sẽn na yɩl t’a zakã neb paam fut sõma n ning tɩ sakd gesgo. (Verse 13, 19, 21, 22) Sẽn na yɩl n boog zakã rɩɩb ligdi, a senda bõn-bɩts wa a sẽn tõe tɛka, la a raad rɩɩbã ne yam.—Verse 14, 16.

Vẽenega, pʋg-kãngã pa rɩt ‘kʋɩɩng rɩɩb ye.’ A tʋmda wʋsg la a get a zakã tʋʋm yell neere. (Verse 27, NW ) Yẽ sẽbgda “a fuugu n yõkd tʋʋmde,” sẽn dat n yeel t’a segenda a meng n tʋm tʋʋm-toogo. (Verse 17) A yikdame n sɩng a tʋʋmdã tɩ wĩndg nan pa puk ye, la a tʋmda wʋsg hal tɩ yʋng kẽ sõma. Yaa wala a fɩtlã bugum sẽn vẽnegd-a t’a tʋmdẽ wã wita wakat fãa.—Verse 15, 18.

Sẽn yɩɩd fãa, pʋg-sõng yaa tẽeb neda. A zoeta Wẽnnaam la a balemd-a ne waoogr la zoees wʋsgo. (Verse 30) Sẽn paase, a sõngda a sɩdã n wubd b kambã tɩ b maan woto. Verse 26 yetame: Ne “yam,” a zãmsda a kambã, la “a sagenda neb ne nonglem.”

Sɩd-sõngo

Sẽn na yɩl tɩ pʋg-sõng sak-a, a Lemuɛll ra segd n tʋka sɩd-sõng zɩɩbã. A Lemuɛll ma wã tẽeg-a-la zɩɩb kãens kẽere.

Sɩd-sõng ra paamda “tẽnga kãsem dãmba” pẽgre. (Yelbũna 31:23) Woto rat n yeelame t’a yaa ned sẽn tar tõogo, pʋ-peelem, la b sẽn tõe n tall bas-yard ne, la Wẽn-zoɛta. (Yikri 18:21; Tõodo 16:18-20) A sã n yaa woto b ra ‘mi-a-la tẽngã noyẽ,’ (NW ), zĩig ning taoor dãmbã sẽn da tigimd n get galʋ-tẽngã yɛl yellã. Sẽn na yɩl tɩ b ‘bãng-a’ wa Wẽn-zoɛta, a ra segd n yɩɩ maan-tɩ-zems soaba la a tall manesem sẽn zems ne “tẽnga” kãsem dãmba, tõe tɩ rat n yeelame tɩ bab-sak bɩ babg kãsem dãmbã.

Sãmbg sẽn ka be, a sẽn tik yẽ meng sẽn yã zug n gomda, a Lemuɛll ma wã tẽegda a biriblã tɩ tara yõod t’a wilg naneb ne pag ning a sẽn na n wa paama. Tẽngã zugu, nin-zẽng ye ka be a sẽn segd n nong n yɩɩd-a ye. Woto, bɩ y mams yĩn-sidg ning sẽn da pukd biribl kãngã koɛɛgẽ wã a sẽn sak n togs nebã fãa taoor tɩ: “Pagb wʋsg tõogdame n maand neere, la foom n yɩɩd bãmb fãa.”—Yelbũna 31:29.

Yaa vẽeneg t’a Lemuɛll talla naneb ne a ma wã sagls sẽn yaa sõma wã. Wala makre, d neeme tɩ verse a 1 wã pʋgẽ, a gomda a ma wã goam yell n wilgdẽ tɩ yaa yẽ meng goama. Woto yĩnga, a pa reem ne ‘remsgã’ ye, la a rɩɩ a ma wã sagls nafre. Bɩ tõnd me rɩ “koe-zɩsg” kãngã nafr n tũ a noyã d vɩɩmã pʋgẽ.

[Foto rãmba, seb-neng 31]

Pʋg-sõng pa rɩt ‘kʋɩɩng rɩɩb’ ye